Apocalipsis 7:1-17
7 Rü yemawena rü nüxü̃ chadau ga ãgümücü ga Tupanaarü orearü ngeruü̃gü ga daxũcüã̱x ga ñoma ga naanearü ãgümücüpe̱xegu chigüxü̃. Rü ínanapoxü̃gü ga gumá ãgümücü ga buanecügü nax tama waixü̃müétügu, rü tama márétügu, rü bai i wüxi i naiétügu naxüxü̃ca̱x.
2 Rü yexgumarüxü̃ ta nüxü̃ chadau ga wüxi ga Tupanaarü orearü ngeruxü̃ ga daxũcüã̱x ga éstewa ne ũxü̃. Rü nüxü̃́ nayexma ga Tupana ya Maxü̃cüarü cáxnaruxü̃. Rü nüma rü tagaãcü nüxna nacagü ga yema togü ga ãgümücü ga Tupanaarü orearü ngeruü̃gü ga nayauxgüxü̃ ga pora nax nachixexẽẽgüãxü̃ca̱x ga yema waixü̃mü rü yema már.
3 Rü ñanagürü nüxü̃: “¡Taxṹ i yatacüma penachixexẽẽxü̃ i waixü̃mü rü ngẽma már rü naigü, ñu̱xmatáta yacanacatügü i ngẽma Tupanaarü duü̃xü̃gü ixĩgüxü̃!” ñanagürü.
4 Rü nüxü̃ chaxĩnü ga ñuxre nax yixĩxü̃ ga yema icáxnacatügüxü̃. Rü yema Iraétanüxü̃tanüwa rü guxü̃wama 144,000 nixĩ.
5 7:5-8 Rü yema icáxnacatügüxü̃ ga Iraétanüxü̃, rü ñaa nixĩ:Yudátaagü - 12,000Rubéü̃taagü - 12,000Gáxtaagü - 12,000Achétaagü - 12,000Netarítaagü - 12,000Manachétaagü - 12,000Chimeóü̃taagü - 12,000Lebítaagü - 12,000Ichacátaagü - 12,000Chaburóü̃taagü - 12,000Yúchetaagü - 12,000Bẽyamíü̃taagü - 12,000
6 Nüü̃ nadau 7:5
7 Nüü̃ nadau 7:5
8 Nüü̃ nadau 7:5
9 Rü yemawena ichadawenü, rü nüxü̃ chadau ga muxũchixü̃ma ga naguxü̃raü̃xü̃ ga nachixü̃anecüã̱x, rü naguxü̃raü̃xü̃ ga duü̃xü̃gütücumü, rü naguxü̃raü̃xü̃ ga ĩanegücüã̱x, rü naguxü̃raü̃xü̃ ga duü̃xü̃gü ga to ga nagawa idexagüxü̃. Rü yema tochicaxü̃pe̱xegu rü gumá Carneruxacüpe̱xegu nachigü. Rü yema nax namuxũchixü̃ rü taxucürüwa texé tayaxugü nax ñuxre yixĩxü̃. Rü naxchiru ga icómüxü̃ rü imáxü̃maxã nixãxchiru. Rü naxme̱xwa nanangegü ga wairaatügü.
10 Rü guxü̃ma ga nümagü rü tagaãcü ñanagürügü: “Yimá tórü Tupana ya tochicaxü̃wa rütocü rü yimá Carnéruxacü rü yimágü nixĩ ya tüxü̃ maxẽxẽẽcü”, ñanagürügü.
11 Rü guxü̃ma ga Tupanaarü orearü ngeruü̃gü ga daxũcüã̱x rü nüxü̃ ínachimaeguãchi ga yema tochicaxü̃ rü yema 24 ga ãẽ̱xgacügü rü yema ãgümücü ga daxũcüã̱x ga maxẽxü̃. Rü nüma ga yema Tupanaarü orearü ngeruü̃gü ga daxũcüã̱x rü yema tochicaxü̃pe̱xegu nanangücuchitanü, rü Tupanaxü̃ nicua̱xüü̃gü.
12 Rü ñanagürügü: “Rü ngẽmaãcü yixĩ. Rü nüma ya Tupana nixĩ i namexü̃ nax guxü̃guma guxãma nüxü̃ icua̱xüü̃güxü̃, rü nataxẽẽgüxü̃, rü moxẽ nüxna ixãgüxü̃, rü nüxü̃ ingechaü̃güxü̃, erü guxü̃ i cua̱x nüxü̃́ nangẽxma, rü guxü̃étüwa nangẽxma, rü guxü̃arü yexera napora. Rü ngẽmaãcü yixĩ”, ñanagürügü.
13 Rü ñu̱xũchi wüxi ga yema 24 ga ãẽ̱xgacügü rü choxna naca, rü ñanagürü: “¿Texégü tixĩgü ya yíxema cómüchirugüxe, rü ngextá ne taxĩ?” ñanagürü.
14 Rü choma chanangãxü̃, rü ñacharügü: “Pa Corix, cuma nixĩ i nüxü̃ cucuáxü̃ nax texégü tixĩgüxü̃”, ñacharügü. Rü yexguma ga nüma rü ñanagürü: “Yíxemagü tixĩgü ga nawa ngupetütanüxe ga yema ngúxü̃ ga taxü̃ rü marü tügü iyauxgüchiruxe nawa ga nagü ya yimá Carnéruxacü. Rü ngẽmaca̱x nixĩ i ticómüchiruxü̃.
15 Rü ngẽmaca̱x nixĩ i Tupanaarü tochicaxü̃pe̱xewa tangexmagüxü̃ rü ngunecü rü chütacü rü nüxü̃́ tapuracüexü̃ i napatawa. Rü nümatama ya Tupana ya tochicaxü̃wa rütocü rü napatawa tá tüxna nadau.
16 Rü marü tagutáma tataiyae, rü tagutáma tita̱xawae. Rü marü tagutáma üa̱xcü tüxü̃ nigu, rü tagutáma üa̱xcüarü naianexü̃ tüxü̃́ nangu̱x.
17 Erü yimá Carnéruxacü i ngẽma tochicaxü̃wa ngẽxmacü, rü tá mea tüxna nadau ñoma carnérugüna idauxü̃rüxü̃. Rü nawa tá tüxü̃ nagagü i ngẽma dexáarü chuxchuxü̃gü i maxẽẽruxü̃. Rü Tupana tá tüxü̃́ ínanapi i guxü̃ma i tümagüxü̃etü”, ñanagürü.
