Apocalipsis 8:1-13
8 Rü yexguma gumá Carnéruxacü yagáuyegu ga yema norü 7 ga yema poperaarü ñaxtachipe̱xexü̃, rü ngãxü̃ ga ora rü nachianemare ga daxũxü̃wa.
2 Rü ñu̱xũchi nüxü̃ chadau ga yema 7 ga Tupanaarü orearü ngeruü̃gü ga daxũcüã̱x ga yexma Tupanape̱xegu chigüxü̃. Rü wüxichigüna nanaxã ga norü cornéta.
3 Rü yemawena ínangu ga wüxi ga to ga Tupanaarü orearü ngeruxü̃ ga daxũcüã̱x. Rü nüma rü yema pumarate̱xearü guruü̃pe̱xegu nachi. Rü yéma nanange ga wüxi ga buetarexacü ga pumarate̱xearü guruxü̃ ga úirunaxca̱x. Rü nüxna nanaxã ga taxü̃ ga pumarate̱xe nax yema tochicaxü̃pe̱xewa yexmaxü̃ ga pumaraarü gute̱xeruü̃wa yaguãxü̃ca̱x, nax yema pumaraema rü wüxigu Tupanaarü duü̃xü̃güarü yumüxẽmaxã Tupanaxü̃tawa nanguxü̃ca̱x.
4 Rü yema pumaraarü caxixü̃ ga yema orearü ngeruxü̃ ga daxũcüã̱xme̱xẽwa ixũxũxü̃ rü wüxigu Tupanaarü duü̃xü̃güarü yumüxẽgümaxã daxũ naxĩema ñu̱xmata Tupanaxü̃tawa nangu.
5 Rü ñu̱xũchi ga yema orearü ngeruxü̃ rü nanayaxu ga yema buetarexacü ga pumaraarü gute̱xeruxü̃. Rü yema pumaraarü gute̱xechicawa nanayaxu ga ã́xwe ga naicü, rü gumámaxã nanaxüãcu ga gumá buetarexacü. Rü ñu̱xũchi ñoma ga naaneétügu nanaña. Rü yexgumatama poraãcü nidu̱xruane, rü nayexma ga nagagü, rü naxãẽmacüane rü naxĩã̱xãchiane.
Tupanaarü orearü ngeruü̃gü ga daxũcüã̱xarü cornétachiga
6 Rü yexguma ga yema 7 ga Tupanaarü orearü ngeruü̃gü ga daxũcüã̱x ga icornétaã́xü̃, rü nügü ínamexẽẽgü nax nagu yacuegüxü̃ca̱x.
7 Rü yema nape̱xewa yexmaxü̃ ga Tupanaarü orearü ngeruxü̃ rü nüxíra nayacue ga norü cornéta. Rü yexgumatama ñoma ga naaneétügu narüyi ga gáuxü̃pütagü rü üxüẽma ga nagümaxã ãéü̃xü̃. Rü wüxi ga yema norü tomaepü̱xarü üye ga naane rü nixa. Rü yexgumarüxü̃ ta wüxi ga yema norü tomaepü̱xarü üye ga naixnecü rü nixa. Rü guxü̃ma ga natüane rü nixae.
8 Rü yema norü taxre ga Tupanaarü orearü ngeruxü̃ rü nayacue ga norü cornéta. Rü ñu̱xũchi wüxi ga taxü̃ ga nama̱xpǘneraü̃xü̃ ga iya̱u̱xraxü̃ rü yexma márgu nanaña. Rü wüxi ga yema norü tomaepü̱xarü üye ga már rü nagüxü̃ nananguxuchi.
9 Rü wüxi ga yema norü tomaepü̱xarü üyetücumü ga yema márwa maxẽxü̃, rü nayue. Rü yexgumarüxü̃ ta wüxi ga yema norü tomaepü̱xarü üyetücumü ga wapurugü rü inayi.
10 Rü yema norü tomaepü̱x ga Tupanaarü orearü ngeruxü̃, rü nayacue ga norü cornéta. Rü ñu̱xũchi wüxi ga taxüchicü ga woramacuri ga taemaxü̃chicü rü daxũwa narüngu. Rü wüxi ga omü ga ixaxü̃rüxü̃ nixĩ. Rü nagu nangu ga wüxi ga yema norü tomaepü̱xarü üye ga natügü rü natüxacügü.
11 Rü gumá woramacuri rü Üxüxü̃ nixĩ ga naéga. Rü wüxi ga yema norü tomaepü̱xarü üye ga guxü̃ma ga dexá rü naxüxchíü. Rü muxü̃ma ga duü̃xü̃gü rü yema dexáwa nayue yerü naxüxchíü.
12 Rü yema norü ãgümücü ga Tupanaarü orearü ngeruxü̃ rü nayacue ga norü cornéta. Rü wüxi ga yema norü tomaepü̱xarü üye ga üa̱xcü rü nixo. Rü yexgumarüxü̃ ta wüxi ga yema norü tomaepü̱xarü üye ga tauemacü rü woramacurigü rü ẽxtagü rü nixo. Rü yemaacü wüxi ga yema norü tomaepü̱xarü üye ga guxü̃ma ga yema rü naxẽane. Rü ga ngunecü rü ãgümücü ga ora naxẽane. Rü ga chütacü rü ãgümücü ga ora nixo ga tauemacü rü woramacurigü rü ẽxtagü.
13 Rü yemawena ichadawenü rü nüxü̃ chaxĩnü ga wüxi ga ĩyü ga daxũgu íxexeü̃xü̃ ga tagaãcü ñaxü̃: “Nangechaü̃tümüü̃gü i ngẽma duü̃xü̃gü i naanewa maxẽxü̃ i ngẽxguma yacuegüãgu tá ya norü cornétagü i ngẽma togü i tomaepü̱x i Tupanaarü orearü ngeruü̃gü”, ñaxü̃.
