Apocalipsis 9:1-21
9 Rü yema norü wüxime̱e̱xpü̱x ga Tupanaarü orearü ngeruxü̃, rü nayacue ga norü cornéta. Rü nüxü̃ chadau ga wüxi ga woramacuri ga daxũwa rüngucü ga ñoma ga naanegu ngucü. Rü gumá woramacurina nanaxã ga norü chawi ga yema ãxmaxü̃ ga taguma iyacuáxü̃.
2 Rü nayawãxna ga yema ãxmaxü̃ ga taguma iyacuáxü̃. Rü yéma inayagoema ga caxixü̃ ñoma wüxi i taxü̃ i u̱xearü caxixü̃rüxü̃. Rü yema caxixü̃ rü nanaxẽẽmaxẽxẽ ga gumá üa̱xcü rü buanecü.
3 Rü yema caxixü̃wa ínachoxü̃ ga munügü ga naaneétügu yixü̃. Rü yema munügüna nanaxã ga pora nax ñoma tuxchinawerüxü̃ duü̃xü̃güxü̃ nachixü̃ca̱x.
4 Rü yema munümaxã nüxü̃ nixu nax tama natüanexü̃ nachixexẽẽxü̃ca̱x rü bai i ta̱xacürü nanetügü rü bai i ta̱xacürü naigü. Natürü nanamu nax nachixexẽẽgüãxü̃ca̱x ga yema duü̃xü̃gü ga tama Tupanaarü cáxnacatü nüxü̃́ yexmaxü̃.
5 Natürü tama nanamu nax yema duü̃xü̃güxü̃ nada̱i̱xü̃ca̱x. Natürü nanamu nax ngúxü̃ nüxü̃ yangexẽẽmaregüxü̃ca̱x ga wüxime̱e̱xpü̱x ga tauemacü. Rü yema ngúxü̃ ga nüxü̃ yangexẽẽgüxü̃, rü ñoma tuxchinawe duü̃xü̃güxü̃ chixü̃rüxü̃ nixĩ.
6 Rü ngẽma ngunexü̃gügu rü duü̃xü̃gü tá naxca̱x nadaugü nax nayuexü̃, natürü taxũtáma nayue. Rü woo nanaxwa̱xegüxüchi nax nayuexü̃, natürü taxucürüwatama nayue.
7 Rü yema munügü rü ñoma cowarugü i daiwa ĩxü̃rüxü̃ nixĩgü. Rü naeruwa nüxü̃́ nayexma ga ta̱xacü ga ñoma nga̱xcueruxü̃ ga úirunaxca̱xrüxü̃ ixĩgüxü̃. Rü nachiwe rü nanaduü̃xü̃chiwegüraxü̃.
8 Rü nayáegü rü ñoma ngeã̱xyaerüxü̃ nixĩgü. Rü napütagü rü ñoma leóü̃pütagürüxü̃ nixĩgü.
9 Rü naxü̃newa nayexma ga norü poxü̃ruxü̃ ga fierunaxca̱x. Rü naga ga gumá naxpe̱xatügü rü ñoma muxũchine ya caru ya daiwa cowaru tugünegarüxü̃ nixĩgü.
10 Rü nareexü̃gü rü ñoma tuxchinawerüxü̃ naxãnegu. Rü yema naneguwa rü naxãguchata nax wüxime̱e̱xpü̱x ya tauemacü duü̃xü̃güxü̃ ngúxü̃ yangexẽẽgüxü̃ca̱x.
11 Rü yema munügüarü ãẽ̱xgacü, rü yema ãxmaxü̃ ga taguma iyacuáxü̃arü dauruxü̃ nixĩ. Rü Yudíugügawa rü yema munügüarü ãẽ̱xgacü, rü Abadóü̃ nixĩ. Rü Griégugügawa rü Apirióü̃ nixĩ.*
12 Rü yexma nayacua̱x ga yema nüxíraxü̃xü̃ ga chixexü̃ ga taxü̃, natürü ínayaxüama ga to ga taxre.
13 Rü yema norü 6 ga Tupanaarü orearü ngeruxü̃ rü nayacue ga norü cornéta. Rü nüxü̃ chaxĩnü ga wüxi ga naga ga nawa inaxũxü̃ ga natanüwa ga yema norü ãgümücüpe̱xe ga yema pumaraarü gute̱xechicaxü̃ ga úirunaxca̱x ga Tupanape̱xewa yexmaxü̃.
14 Rü yema naga rü nanamu ga yema orearü ngeruxü̃ ga cornétaã́xü̃, rü ñanagürü nüxü̃: “¡Yawẽgüxü̃ i ngẽma ãgümücü i orearü ngeruü̃gü i daxũcüã̱x i taxtü i Eufrátegu ngãxü̃güxü̃!” ñanagürü.
15 Rü yemaacü niwẽgüxü̃ ga yema ãgümücü ga orearü ngeruü̃gü nax nadaiaxü̃ca̱x ga wüxi ga yema norü tomaepü̱xarü üyetücumü ga duü̃xü̃gü. Yerü ga yema orearü ngeruü̃gü rü woetama yemaca̱x ínamemaregü nax yema ora rü yema ngunexü̃ rü gumá tauemacü rü gumá taunecü nadaiaxü̃ca̱x ga yema duü̃xü̃gü.
16 Rü nüxü̃ chaxĩnü nax ñuxre nax yixĩxü̃ ga yema orearü ngeruü̃güarü churaragü ga cowaruétügu ĩxü̃. Rü 200’000,000 nixĩgü.
17 Rü yemaacü nixĩ ga nüxü̃ chadauxü̃ ga yema cowarugü ga yexguma chango̱xetügu. Rü yema churaragü ga yema cowaruétügu ĩxü̃ rü nüxü̃́ nayexma ga norü nga̱xcuxü̃nexü̃ ga poxü̃ruxü̃ ixĩxü̃ ga ñoma üxüxetürüxü̃ iyauraxü̃. Rü yema poxü̃ruxü̃ rü nixãmatü rü nidaumatü rü niya̱u̱xmatü rü nidexmatü. Rü yema cowaruerugü rü ñoma leóü̃erurüxü̃ nixĩgü. Rü naã̱xgüwa ínaxũxũ ga üxüema rü caxixü̃ rü achúfre.
18 Rü wüxi ga norü tomaepü̱xarü üyetücumü ga duü̃xü̃gü rü nayue namaxã ga yema üxüema rü caxixü̃ rü achúfre ga yema cowarugüa̱xwa íchoxü̃xü̃.
19 Yerü ga yema cowarugü rü naã̱xwa rü nareexü̃wa nixĩ ga nüxü̃́ nayexmaxü̃ ga norü pora. Rü gumá nareexü̃gü rü ñoma ãxtaperüxü̃ nixĩgü rü nixãeru. Rü yemamaxã duü̃xü̃güxü̃ nangõ̱x rü ngúxü̃ nüxü̃ ningexẽxẽ.
20 Natürü ga yema togü ga duü̃xü̃gü ga tama yema poxcuruü̃gümaxã yuexü̃, rü tama nüxü̃ narüxoe ga yema chixexü̃gü ga naxügüxü̃. Rü tama nüxü̃ narüxoe nax nüxü̃ yacua̱xüü̃güxü̃ ga ngo̱xogü rü yema tupananetachicüna̱xãgü ga úirunaxca̱x rü diẽrumünaxca̱x rü cobrenaxca̱x rü nutagünaxca̱x rü nainaxca̱x. Rü yemaacü nüxü̃ nicua̱xüü̃güama ga yema norü tupananetachicüna̱xãgü ga ngearü maxü̃ã́xü̃ rü tama nüxü̃ daugüxü̃ rü tama nüxü̃ ĩnüexü̃ rü tama ixĩxü̃.
21 Rü tama nüxü̃ narüxoe nax namáetagüxü̃, rü yayuüexü̃, rü naxü̃nearü ngúchaü̃ naxügüxü̃ rü nangĩ́ta̱a̱xgüxü̃.
Notas
^ 9:11 Ngẽma naéga rü: “Chixexẽẽruxü̃”, ñaxü̃chiga nixĩ.
