Cantares 3:1-11
3 Rü chütacü yexguma chorü pechicawa chapexgu, rü chaxãnegü.
Rü chaunegüwa naxca̱x chadau ga gumá ngextü̱xücü i choxü̃́ ngúchaü̃xüchicü.Natürü tama nüxü̃ ichayangau.
2 Rü yexguma ícharüdaxgu, rü ĩanearü namagügu rü plázagügu chixũgü nax naxca̱x chadauxü̃ca̱x ya yimá choxü̃́ ngúchaü̃xü̃chicü.Rü naxca̱x chadau, natürü tama nüxü̃ ichayangau.
3 Rü purichíagü ga ĩanearü dauruü̃güna chaca rü ñacharügü:—¿Tama nüxü̃ pedauxü̃ ya yimá ngextü̱xücü ya choxü̃́ ngúchaü̃xü̃chicüx? —ñachagürü.
4 Rü yexgumatama purichíagüna chixũgachiguwena nüxü̃ ichayangau ya yimá ngextü̱xücü ya choxü̃́ ngúchaü̃xü̃chicüx.Rü naxme̱xgu chiyauxãchi, rü tama nüxü̃ chingeãcü chauépatawa chanaga.
Nümax
5 Pa Ngexü̃gü i Yerucharéü̃cüã̱xgüx, rü chanaxwa̱xe i ngẽma cowügü rü cowüacügü i naixnecüwa ngẽxmagüxü̃égagu chomaxã ipexüga nax taxũtáma ngĩxü̃ ípeba̱i̱xgüxü̃ i ngẽma choxü̃́ ngúchaü̃cü i pacü rü ñu̱xmatáta ngĩechama naba̱i̱xãchi.
Norü tomaepü̱x i wiyae
Coru
6 ¿Rü texé tixĩ ya yíxema ngéma ínachianexü̃wa duü̃xü̃gü tüxü̃ ne ngetaxü̃güxe naemagu i naguxü̃raü̃xü̃ i pumaragü?
7 Rü dücax, rü yimá rü Charomóü̃ nixĩ ya duü̃xü̃gü yangetaü̃gücü.Rü ínayaxümücügü i 60 i churaragü i rüporamaegüxü̃ i Iraéanewa.
8 Rü guxü̃ma i ngẽma churaragü rü tarawa meama daixü̃ icuáxü̃ nixĩ.Rü nümagü rü nüxü̃ nicua̱xüchi nax norü ãẽ̱xgacüna nadaugüxü̃.Rü wüxichigü i nüma rü nügücüwawa nanatuxẽxẽ i norü tara nax ngẽmamaxã norü ãẽ̱xgacüxü̃ ínapoxü̃güxü̃ca̱x ega ãũcümaxü̃wa nangẽxmagügu i chütacü.
9 Rü nüma ga ãẽ̱xgacü ga Charomóü̃ rü Líbanucüã̱x i mürapewa i mexü̃wa nanaxüxẽxẽ ga wüxi ga naweü̃ nax namaxã yangetaü̃güãxü̃ca̱x.
10 Rü guma naxpawerugü ga gumá naweü̃ rü diẽrumünaxca̱x nixĩgü.Rü yema norü ngũxca̱xwexü̃ruxü̃ rü úirunaxca̱x nixĩ.Rü yema norü tochicaxü̃ rü naxchiru i dauxracharaxü̃maxã natüétü.Rü naxü̃mawa rü Yerucharéü̃cüã̱x ga pacügü rü meama inanga̱xãẽgü yerü nüxü̃ ingechaü̃gü.
11 Pa Pacügü i Chióü̃cüã̱x ¡rü ípechoxü̃ nax ípeyadaugüxü̃ca̱x ya ãẽ̱xgacü ya Charomóü̃ rü nüxü̃ pedau i ngẽma nga̱xcueruxü̃ ga naé nüxü̃́ üxü̃ naxca̱x ga yema ngunexü̃ ga nagu yangĩxü̃ rü poraãcü nagu nataãẽxü̃.
