Cantares 4:1-16
4 Cuma rü cumexẽchi, Pa Choxü̃́ Ngúchaxü̃cüx.
Rü aixcüma cumexẽchi.Rü ñoma taxre i muxtucurüxü̃ nixĩ i cuxetügü i curü tüchametüxü̃arü aixepegu yacu̱xgüxü̃.Rü ngẽma cuyae i cha̱xixü̃ rü wẽxẽchixü̃ rü ñoma chíbuxacütücumü i Garaáxanearü ma̱xpǘnegüarü tuãchixü̃wa írüxĩgüxü̃rüxü̃ nixĩ.
2 Rü guxü̃nema ya cupüta rü nacho̱xtanü rü nimexẽchi ñoma carnérutücumü i ngexwaca ixaiyagüxü̃ nax yayoxta̱xagüchaü̃xü̃rüxü̃ nixĩgü.Rü wüxichigü ya yima cupütagü rü nixãmücü rü taxúnema nüxicatama nangẽxma.
3 Rü cubera rü nadauxuchi ñoma wüxi ya tü ya daunütaxüchinerüxü̃.Rü ngẽxguma quidexagu rü ngẽma curü dexa rü namexẽchi.Rü cumatügü rü ñoma taxre i boxra i curü tüchametüxü̃arü aixepegu icúxü̃rüxü̃ nixĩ.
4 Rü cunaxã rü namexẽchi naxrüxü̃ ya yima torre ya nutanaxca̱x ga Dabíaxü̃́ naxügüãcü naxnearü chogüruxü̃.Rü yima torrewa narütugü i 1,000 i poxü̃ruü̃gü i ãtachinüxü̃ i yatügü i poraxü̃ namaxã nügü ípoxü̃güxü̃.
5 Rü cuníü̃gü rü namexẽchi ñoma taxre i cowüxacügü i nügümaxã wüxigu buexü̃ i putüra i líriunecüwa chibüerüxü̃
6 Rü naxü̃pa nax yangóonexü̃, rü yaxũgachixü̃ i ngẽma ẽanexü̃, rü choma rü tá chaxĩnagü nagu ya yima ma̱xpǘne i pumara nawa ngẽxmane.
7 Rü cuma rü cumexẽchi, Pa Choxü̃́ Ngúchaxü̃cüx.Rü cucutüwa inaxügü rü ñu̱xmata cueruwa nangu nax cumexẽchixü̃.Rü cuma rü taxuwama cuchixe.
8 Chomaxã Líbanuwa rüxüe rü chowe rüxũ, Pa Cho̱xma̱x!¡Rü chomaxã Líbanuarü ma̱xpǘnegüwa rüxüe!¡Rü yima ma̱xpǘnechitaerugü ya Amaná rü Chení rü Ermóü̃ i nagu naxãxmaü̃güxü̃ i leóü̃gü rü aigü, rü nawa rüxüe nax nagu rüdaunüxü̃ca̱x i ngẽma doxonexü̃!
9 Pa Mexẽchicü Pa Pacü Pa Cho̱xma̱x, rü wüxitama ga curü dawenümaxã choxü̃́ cugü cungúchaü̃xẽxẽ.Rü yema wüxichimüü̃ ga cuchagümaxã choxü̃ quiyauxãxẽ, rü marü tama yáxna chaxĩnü nax choxü̃́ cungúchaü̃xü̃chixü̃.
10 Rü ngẽma curü meãẽgü rü choxü̃ nataãẽxẽxẽ, Pa Pacü Pa Cho̱xma̱x.Rü ngẽma curü meãẽgü rü bínuxü̃ narümaixcuramaexüchi.Rü curü pumara rü guxü̃ma i togü i pumaragüxü̃ narüchiacamaexüchi.
11 Pa Cho̱xma̱x, cubera rü ñoma berurerüxü̃ namaixcuraxüchi.Rü curü conütüü̃wa rü berure rü lechi nangẽxma.Rü cuxchiru rü nachixemaxü̃chi ñoma Líbanuarü naixnecüemarüxü̃.
12 Rü cumax, Pa Pacü Pa Cho̱xma̱x, rü mea cugüna cudau.Rü ñoma wüxi i putüranecü i meama ípoxeguxü̃rüxü̃ quixĩ.Rü ñoma puchu i meama rüwãxtaxü̃rüxü̃ quixĩ.
13 Rü yima cuxune rü ñoma wüxi i boxranecü i chiarü oṍxü̃rüxü̃ nixĩ.Rü ñoma maxẽgü i yichacuxü̃rüxü̃ nixĩ.
14 Rü ngẽma ngéma ngẽxmagüxü̃ rü ñoma pumaragü i nárdugü, rü achafráü̃gü, rü dexne ya yixicü, rü canela, rü naguxü̃raü̃xü̃ i naigü i paacaanexü̃rüxü̃ nixĩgü.Rü ñoma pumaragü i míra, rü álo, rü guxü̃ma i ngẽma togü i pumaragü i mexẽchixü̃rüxü̃ nixĩ.
15 Rü cuma rü ñoma puchu i putüranecüwa ngẽxmaxü̃rüxü̃ quixĩ.Rü ñoma dexá i Líbanuarü ma̱xpǘnegüwa ne yáxü̃rüxü̃ quixĩ.
Ngĩmax
16 Pa Buanecü i Nórtewa Ne Ũcüx, ¡nua naxũ!Pa Buanecü i Súrwaama Ne Ũcüx, ¡nua naxũ!¡Rü chorü putüranecü ibuaxẽxẽ nax ngẽmaãcü nachacuarü chi̱xemaxü̃ guxü̃wama nanguxü̃ca̱x!¡Rü nua curü putüranecüwa naxũ, Pa Choxü̃́ Ngúchaxü̃cüx, nax cunangṍxü̃ca̱x i ngẽma norü o i cuxü̃́ chi̱xichixü̃!
