Cantares 5:1-16
5 Rü marü nagu chaxücu i chorü putüranecü, Pa Pacü Pa Cho̱xma̱x,
rü ngéma nüxü̃ chayangau i naguxü̃raü̃xü̃ i pumaragü i chi̱xemaxü̃chixü̃.Rü marü nüxü̃ chaweneta ya chorü berure ya naxchiãü̃wa ngẽxmane, rü marü chayaxaxü i chorü bínu rü lechi.
Coru
Pa Tomücügü ya Pexü̃ Tangechaü̃güxex,¡Rü pechibüe rü pexaxegü!¡Rü mea pegüxü̃́ peyanguxẽxẽ i ngẽma penaxwa̱xexü̃!
Norü ãgümücü i wiyae
Ngĩmax
2 Choma rü ngẽxguma chapexgu rü chaxãnegü. Rü chaunegüwa nüxü̃ chaxĩnü nax chaute choxna ca̱xaxü̃ rü ñaxü̃:—¡Cha̱u̱xca̱x yawãxna i ĩã̱x, Pa Cho̱xma̱x, Pa Choxü̃́ Ngúchaü̃xü̃chixcüx, Pa Chorü Muxtucuxacüx, nax chixücuxü̃ca̱x!Rü choma rü chiwaieru cherenamaxã.Rü yimá cherena ya chütacü rüngucü rü poraãcü choxü̃ niwaiyaexẽxẽ —ñanagürü choxü̃ ga chaunegüwa.
3 Natürü ga choma rü chanangãxü̃ rü ñachagürü nüxü̃:—Choma rü marü íchacuxuchi.¿Rü ta̱xacüca̱x tá wena chicu̱xcuchixü̃?Rü marü chaugü chayauxcutü. ¿Rü ta̱xacüca̱x tá wena chaugü chaxüxacutüxü̃? —ñachagürü ga chaunegüwa.
4 Rü chaute ya choxü̃́ ngúchaü̃cü rü ĩã̱xmachate̱xewa nixüpetü ĩã̱xarü taixẽẽruxü̃ca̱x nax yawãxnaãxü̃ca̱x taa̱x ga ĩã̱x.Rü yexguma nüxü̃ chada̱u̱xgu nax tama yawãxnaãxü̃ ga ĩã̱x rü choxü̃́ nangechaü̃tümüxü̃.
5 Rü yexguma ga choma rü ícharüda nax chayawãxnaxü̃ca̱x ga ĩã̱x naxca̱x ga chaute ya choxü̃́ ngúchaü̃cü.Rü cho̱xme̱xwa rü chautanüme̱xẽwa pumara ga míramaxã nichurutanü, rü ĩã̱xarü chotaruxü̃wa nayi.
6 Natürü yexguma ĩã̱x chiwãxnagu, rü chaute ya choxü̃́ ngúchaü̃cü rü marü nataxuma i ĩã̱xwa.Rü yexguma ga choma rü poraãcü naxca̱x changechaü̃.Rü naxca̱x chadau, natürü tama nüxü̃ ichayangau.Rü naxca̱x chaca, natürü nüma rü tama choxü̃ nangãxü̃.
7 Rü namagu choxü̃ nangaugü ga purichíagü ga chütacü ĩanena daugüxü̃, rü choxü̃ nacua̱i̱xgü rü choxü̃ nanapi̱xẽẽgü.Rü yema purichíagü ga nüxna daugüxü̃ ga ĩanearü ĩã̱x i taxü̃ i nawa ixücuxü̃, rü choxü̃́ ínanacawegü ga yema chorü tüeruruxü̃.
8 Pa Ngecügü i Yerucharéü̃cüã̱xgü, ega nüxü̃ ipeyangauxgu ya chaute ya choxü̃́ ngúchaü̃cü, rü namaxã nüxü̃ pixu nax tama marü yáxna chaxĩnüxü̃ nax naxca̱x changechaü̃xü̃.
Coru
9 Pa Ngecü i Guxü̃ma i Ngexü̃güxü̃ Rümemaecüx,¿ta̱xacüarü mexü̃ ẽ̱xna nüxü̃́ nangẽxma ya cute, rü ta̱xacüwa nixĩ i togü i yatügüarü yexera yixĩxü̃ ya cute rü ngẽmaãcü namaxã nüxü̃ tixuxü̃ca̱x nax cuxca̱x nataeguxü̃?
Ngĩmax
10 Rü chaute rü nadexracha̱xmüü̃ rü woo 1,000 i yatügütanüwa rü tá nüxü̃ pecua̱xama.
11 Rü naeru rü namexẽchi ñoma úiruxüchirüxü̃. Rü nayae rü nacha̱xaxi rü nawẽ̱xẽchi ñoma caruparüxü̃.
12 Rü naxetügü rü nimexẽchi ñoma taxre i muxtucu i lechiwa aiyagüxü̃ rü puchuxãnacügu chogüxü̃rüxü̃.
13 Rü namatügü rü nimexẽchi ñoma putüraanecügü i chiacaemaxü̃rüxü̃.Rü naberagü rü namexẽchi ñoma putüragü i líriugü i míra nawa ichuruxü̃rüxü̃.
14 Rü nachacüügü rü nimexẽchi ñoma úirumena̱xãgü i topáchiumaxã inga̱xãẽmena̱xãgüxü̃rüxü̃.Rü naxü̃ne rü namexẽchi ñoma marfí i meama ibaixẽẽxü̃ i chafírugümaxã nga̱xãẽxü̃rüxü̃.
15 Rü naparagü rü nimexẽchi ñoma caxtagü ya nuta ya mármonaxca̱x ya úiruxüchiétügu caxgünerüxü̃.Rü nüma rü namexẽchi ñoma ocayiwagü ya Líbanuanecüã̱xrüxü̃.
16 Rü nabera rü namaixcuraxüchi.Rü nüma rü guxü̃wama namexẽchi,Rü ngẽmaãcü nixĩ ya chaute ya choxü̃́ ngúchaü̃cü, Pa Ngexü̃gü i Yerucharéü̃cüã̱xgüx.
