Cantares 6:1-13
6 Rü ngẽma Ngexü̃gü rü ngĩgürügügü:
—¿Ngextá naxũ ya cute, Pa Guxü̃ i Ngexü̃güxü̃ Rümemaecüx?¿Rü ngextáama nixĩ i naxũxü̃? Rü tá cuwe tarüxĩ nax naxca̱x idaugüxü̃ca̱x —ngĩgürügügü.
Ngĩmax
2 Rü ngĩma rü ngĩgürügü: —Nüma ya chaute ya choxü̃́ ngúchaü̃cü rü norü putüra i líriunecü i yixnecüxü̃wa naxũ nax ngéma nachibüexẽẽxü̃ca̱x i norü carnérugü.Rü ñu̱xũchi ngéma putüragü i líriu tá nayarücawechacu.
3 Rü choma rü chaute ya choxü̃́ ngúchaü̃cüarü chixĩ, rü nüma ya chaute rü choxrü nixĩ.Rü nüma rü putüra i líriunecüwa naxũ nax ngéma maxẽwa nachibüexẽẽxü̃ca̱x i norü carnérugü —ngĩgürügü.
Norü wüxime̱e̱xpü̱x ga wiyae
Nümax
4 Rü cumax, Pa Choxü̃́ Ngúchaxü̃cüx, rü cumexẽchi rü choxü̃ cutaãẽxẽxẽ yima ĩanegü ya Tirchárüxü̃ rü Yerucharéü̃rüxü̃.Rü cuma rü ñoma wüxi i churaratücumürüxü̃ quixĩ nax taxucürüwa cuxcha̱xwa chiñaxü̃.
5 ¡Rü marütama nax choxü̃ cudawenüxü̃ erü yima cuxetügü rü choxü̃ narüporamaegü!Rü ngẽma cuyae i cha̱xixü̃ rü ñoma chíbuxacütücumü i Garaáxanearü ma̱xpǘnegüarü tuãchixü̃wa írüxĩgüxü̃rüxü̃ nixĩ.
6 Rü yima cupütagü rü nacho̱xtanüxüchi ñoma carnérügü i ngexwaca ixaiyagüxü̃rüxü̃ nax yayoxta̱xagüxü̃rüxü̃ nixĩgü.
7 Rü cumatügü rü ñoma taxre i boxra i curü tüchametüxü̃arü aixepegu icúxü̃rüxü̃ nixĩ.
8 6:8-9 Rü 60 tixĩ ya cho̱xma̱xgü rü 80 tixĩ ya cho̱xma̱xabagü, rü muxẽma tixĩ ya chorü paxegü ya imexẽchixe, natürü i cumax, Pa Chorü Muxtucuxacüx, rü cuxicatama nixĩ i guxü̃ i ngexü̃gütanüwa curümemaexü̃.Rü cuma nixĩ i cuéxacü irümemaexü̃ quixĩxü̃.Rü ngẽxguma ngĩxü̃ nadaugügu ga yema paxü̃gü rü mexü̃ ngĩmaxã naxuegugü.Rü ngẽma cho̱xma̱xgü rü cho̱xma̱xabagü rü ngĩxü̃ nicua̱xüü̃gü.
9 Nüü̃ nadau 6:8
Coru
10 ¿Rü texé tixĩ ya daxe nua ngóxe ñoma ẽxü̃wa üa̱xcü yarügoxü̃rüxü̃?Rü ngĩma rü ñoma tauemacürüxü̃ imexẽchi. Rü ñoma üa̱xcürüxü̃ nangóonexẽxẽ.Rü ngĩma rü ñoma wüxi i churaratücumürüxü̃ iyixĩ nax taxucürüwa texé ngĩcha̱xwa iñaxü̃.
Ngĩmax
11 Choma rü castañanecüwa chaxũ nax íchayadauxü̃ nax yayauxátüxü̃ ga yema naigü ga doxonexü̃wa yexmagüxü̃.Rü ngéma chaxũ nax nüxü̃ chadauxchaxü̃ca̱x nax naxügüxü̃ ga úbagü rü nax yaxãchacuxü̃ i boxragü.
12 Rü yemawena rü tama nüxü̃ chacua̱x nax ta̱xacü ngupetüxü̃.Rü ngürüãchi chorü coricüwawa chaugü chadau ga wüxi ga caruwa.
Coru
13 Rü ngẽma ngexü̃gü ga Yerucharéü̃cüã̱x rü ngĩgürügügü:—¡Nataegu, Pa Chuláü̃cüã̱x, rü nataegu!¡Rü nataegu erü cuxü̃ tadaugüchaü̃! —ngĩgürügügü.Rü ngĩma rü ngĩgürügü: —¿Ta̱xacü nixĩ i chowa nüxü̃ pedauxchaxü̃xü̃ i choma nax Chuláü̃cüã̱x chixĩxü̃? —ngĩgürügü.
Coru
Rü ngẽma ngexü̃gü rü ngĩgürügügü: —Nüxü̃ tadaugüchaü̃ nax íquiñaãchiü̃xü̃ ñoma petawarüxü̃ —ngĩgürügügü.
