Cantares 7:1-13
7 Pa Ãẽ̱xgacüxacüx, yima cucutügü ya chaü̃dáriagu icuaixgǘne rü nimexẽchi.
Rü ngẽma cutachinügü rü nimexẽchi.Rü ñoma ngã̱xãẽruü̃gü i úirunaxca̱x i wüxi i nüxü̃ cua̱xüchixü̃ üxü̃rüxü̃ nixĩgü.
2 Rü ngẽma cuã́xpetüna̱xã rü namexẽchi.Rü ñoma wüxi i copu i boxü̃ i taguma bínu ya mecü nawa taxuxü̃rüxü̃ nixĩ.Rü ngẽma cupütüwe rü namexẽchi. Rü ñoma trigutücumü i putüra i líriugümaxã íxüeguxü̃rüxü̃ nixĩ.
3 Rü yima cuníü̃gü rü nimexẽchi.Rü ñoma taxre i cowüxacügü i nügümaxã ibuexü̃rüxü̃ nixĩgü.
4 Rü cunaxã rü namexẽchi naxrüxü̃ ya wüxi ya torre i marfínaxca̱x.Rü yima cuxetügü rü nimexẽchi naxrüxü̃ ya yimá puchugü ya yima ĩane ya Ebóü̃arü ĩã̱x i Báx-rabíü̃wa ngẽxmagücürüxü̃.Rü ngẽma curaxü̃ rü namexẽchi ñoma Líbanuarü torre ya ĩane ya Damácuguama dawenüxü̃rüxü̃.
5 Rü ngẽma cuxuneétüwa ngẽxmaxü̃ i cueru rü namexẽchi ñoma ma̱xpǘne ya Carmérurüxü̃.Rü ngẽma cuyae rü namexẽchi ñoma tü ya idauxranütanerüxü̃.Rü cuyae i cha̱xixü̃gu ícunanu̱xẽxẽ ya yimá ãẽ̱xgacü.
6 Pa Ngecü i Choxü̃́ Ngúchaxü̃cüx, cuma rü chorü taãẽxẽẽruxü̃ quixĩ.Rü cuma rü cumechametü. Rü guxü̃wama cumexẽchi.
7 Rü cuma rü cumáchane ñoma wüxi i palmerarüxü̃.Rü yima cuníü̃gü rü ñoma norü ogürüxü̃ nixĩgü.
8 Choma rü nagu charüxĩnü nax nagu chaxĩnagüxü̃ i ngẽma palmera nax choxrü yixĩxü̃ca̱x i ngẽma norü o.Rü yima cuníü̃gü rü ñoma úbaya̱xagürüxü̃ nixĩgü.Rü ngẽma cuema rü namanzanaaca.
9 Rü ngẽma cua̱x rü ñoma mecü ya bínurüxü̃ nixĩ.Rü ngẽma curü chúxu rü ñoma bínu ya mexẽchicürüxü̃ nixĩ.Rü yimá bínu rü name i cuberawa rü cupütatanüwa ne naya̱x.
Ngĩmax
10 Choma rü chaute ya choxü̃́ ngúchaü̃cüarü chixĩ.Rü nüma rü poraãcü nüxü̃́ changúchaü̃.
11 ¡Pa Chautex ya Choxü̃́ Ngúchaxü̃cüx, rü ngĩxã naanewa taxĩ! Rü ngẽma naixchacügütanügu tá tanangupetüxẽxẽ i tórü chütaxü̃.
12 Rü ngẽxguma yangunegu, rü úbanecüwa tá taxĩ nax íyadaugüxü̃ca̱x rü aixcüma marü naxügü i ngẽma úbagü, rü marü yaboxgüchacugü, rü marü yaxãchacu i boxragü.Rü ngéma tá nixĩ i cuxna chanaxãxü̃ i chorü ngechaü̃.
13 Rü ngẽma maü̃dráguragü rü yáxü̃guma napaanetanü.Rü tapatawa rü nangẽxma i naguxü̃raü̃xü̃ i ori̱xgü.Rü nangẽxma i ori̱xgü i marü ipagüxü̃, rü ñu̱xũchi ori̱xgü i ngexwaca buxuxü̃ i cuxca̱x namaxã changuxü̃xü̃, Pa Choxü̃́ Ngúchaxü̃cüx.
