Colosenses 1:1-29
1 1:1-2 Pa Chauenexẽgü ya Coróchaarü Ĩanewa Ngẽxmagüxex, choma i Pauru rü wüxigu namaxã i taenexẽ i Timutéu nixĩ i pexca̱x tanaxümatüxü̃ i ñaa popera. Rü choxü̃ nixĩ ga Tupana ga inamuãchixü̃ nax nüxü̃ chixuchigüxü̃ca̱x ya Ngechuchu ya Cristuarü ore. Rü pexca̱x chanaxümatü i pema ya chauenexẽgü ya Tupanaarü duü̃xü̃gü ixĩgüxe ya Cristuaxü̃́ yaxõgüxe. Rü chanaxwa̱xe i Tanatü ya Tupana pexü̃ rüngü̃xẽẽxü̃ nax aixcüma pegü pengechaü̃güxü̃ca̱x rü petaãẽgüxü̃ca̱x.
2 Nüü̃ nadau 1:1
Pauru rü yema yaxõgüxü̃ca̱x nayumüxẽ
3 Rü guxü̃guma i ngẽxguma pexca̱x tayumüxẽgügu, rü moxẽ nüxna taxã ya Tupana ya Nanatü ya tórü Cori ya Ngechuchu ya Cristu.
4 Rü marü nüxü̃ tacuáchiga nax aixcüma Ngechuchu ya Cristuaxü̃́ peyaxõgüxü̃, rü aixcüma nüxü̃ pengechaü̃güxü̃ i guxü̃ma i ngẽma duü̃xü̃gü i Tupanaarü ixĩgüxü̃.
5 Rü tataãẽgü erü pema rü ípenangu̱xẽxẽ i ngẽma Tupana pexca̱x ímexẽẽxü̃ i daxũguxü̃ i naanewa. Rü yemachiga nixĩ ga marü nüxü̃ pexĩnüexü̃ ga yexguma pemaxã nüxü̃ tixuxgu i Tupanaarü ore i aixcüma ixĩxü̃.
6 Rü ngẽmatama ore i mexü̃ ga pexü̃tawa nguxü̃, rü guxü̃wama nangu i ñu̱xmax. Rü ngẽma ore rü guxü̃wama duü̃xü̃güarü maxü̃xü̃ naxüchicüü, yema perü maxü̃xü̃ nax naxüchicüüxü̃rüxü̃ ga yexguma nüxü̃ pexĩnüegu nax Tupana pexü̃ ngechaü̃güxü̃ rü nüxü̃ pecua̱xgügu nax aixcüma yixĩxü̃ ga yema norü ore.
7 Rü yema ore nixĩ ga pexü̃ nangúexẽẽxü̃ ga Epáparu ya tomücü ya nüxü̃ tangechaü̃gücü ya wüxigu tomaxã Tupanaarü orewa puracücü. Nüma nixĩ i Cristuarü puracütanüxü̃ ya mecü ya ñu̱xma tochicüxü petanüwa ngẽxmacü.
8 Rü nüma ya Epáparu nixĩ i tomaxã nüxü̃ yaxuxü̃ i pechiga nax ñuxãcü Tupanaãxẽ i Üünexü̃arü ngü̃xẽẽmaxã pegü pengechaü̃güxü̃.
9 Rü ngẽmaca̱x i toma ga noxritama pexü̃ tacuáchigagu, rü taguma nüxü̃ tarüchau nax pexca̱x tayumüxẽgüxü̃. Rü guxü̃guma Tupanana naxca̱x tacagü nax mea pexü̃ nüxü̃ nacua̱xẽẽxü̃ca̱x i ngẽma norü ngúchaü̃ nax penaxüxü̃. Rü ngẽxgumarüxü̃ ta nüxna naxca̱x taca nax pexna naxããxü̃ca̱x i naguxü̃raü̃xü̃ i cua̱x i Naãxẽ ya Üünexü̃wa ne ũxü̃.
10 Rü nüxna naxca̱x tacagü nax tórü Cori naxwa̱xexü̃ãcüma pemaxẽxü̃ca̱x rü guxü̃guma penaxüxü̃ca̱x i ngẽma nüma namaxã nataãẽxü̃. Rü nüxna naxca̱x tacagü nax pexü̃́ natauxchaxẽẽãxü̃ca̱x nax naguxü̃raü̃xü̃ i mexü̃ pexügüxü̃ca̱x, rü guxü̃ i ngunexü̃gu yexeraãcü Tupanaxü̃ pecuáxü̃ca̱x.
11 Rü nüxna naxca̱x tacagü nax norü pora i mexẽchixü̃maxã pexü̃ naporaexẽẽxü̃ca̱x nax ngẽmaãcü guxü̃ma i guxchaxü̃gümaxã peporaexü̃ca̱x rü yáxna namaxã pexĩnüexü̃ca̱x rü petaãẽgüxü̃ca̱x.
12 Rü ngẽmaãcü penaxwa̱xe nax taãẽãcüma Tanatü ya Tupanana moxẽ pexãgüxü̃, erü nüma pexü̃ nimexẽẽgü nax pema rü ta penayauxgüxü̃ca̱x i ngẽma mexü̃gü i nüma tá nüxna naxãxü̃ i ngẽma norü duü̃xü̃gü ixĩgüxü̃.
13 Yerü nüma ga Tupana rü marü Chatanáme̱xẽwa tüxü̃ ínanguxü̃xẽxẽ rü Nane ya nüxü̃ nangechaü̃cüme̱xẽwa tüxü̃ nangẽxmagüxẽxẽ.
14 Rü gumá Nanegagu nixĩ ga tüxü̃ namaxẽxẽẽxü̃ rü tüxü̃́ nüxü̃ iyanangümaxü̃ ga tórü pecadugü.
Yexguma pecaduca̱x nayu̱xgu ga Cristu rü Tupana nügümaxã nanangüxmüexẽxẽ ga duü̃xü̃gü
15 Taguma texé Tupanaxü̃ tadau, natürü nüma rü núma nanamu ga Nane nax duü̃xü̃gü nüxü̃ daugüxü̃ca̱x rü nüxü̃ nacua̱xgüxü̃ca̱x nax ñuxãcü yixĩxü̃ i nüma ya Tupana. Rü naxü̃pa ga guxü̃ma ga yema nango̱xẽẽxü̃, rü nüxíra marü nayexma ga Tupana Nane.
16 Rü nüma ga Tupana rü wüxigu Nanemaxã nanango̱xẽxẽ ga guxü̃ma i daxũguxü̃ i naanewa rü ñoma i naanewa ngẽxmagüxü̃, rü guxü̃ma i ngẽma nüxü̃ idauxü̃ rü ngẽma tama nüxü̃ idauxü̃. Rü yemaacü nanaxü ga guxü̃ma ga naãẽgü rü norü ãẽ̱xgacügü i poraexü̃ i tama nüxü̃ idauxü̃. Rü yemaacü Nanemaxã rü Naneca̱x nanaxü ga guxü̃ma.
17 Rü naxü̃pa ga guxü̃ma, rü nüma ga Cristu rü marü nüxíra nayexma. Rü nüma nixĩ i mea inanuãxü̃ i guxü̃ma rü namaxã inacuáxü̃.
18 Rü nüma ya Cristu rü naeru nixĩ i guxü̃ma i ngẽma yaxõgüxü̃, rü nümagü rü Cristuxü̃ne nixĩgü. Rü naxü̃pa ga guxü̃ma rü Cristu rü woetama marü nayexma. Rü nüma nixĩ ga nüxíra yuwa ínadaxü̃ nax guxü̃arü ãẽ̱xgacü yixĩxü̃ca̱x.
19 Rü nüma ga Tupana rü nanaxwa̱xe nax guxü̃ma i norü pora rü Cristuwa nayexmaxü̃.
20 Rü Tupana rü ñoma ga naanewa nanamu ga Cristu nax curuchagu nayuxü̃ca̱x rü nagü inabaxẽãxü̃ca̱x. Rü gumá nagümaxã nixĩ ga Tupana ga nügümaxã inangüxmüexẽẽãxü̃ ga guxü̃ma i ñoma i naanewa ngẽxmaxü̃ rü guxü̃ma i daxũguxü̃ i naanewa ngẽxmaxü̃.
21 Rü pema ga ü̃pa rü Tupanana peyaxü̃gugü rü norü uanügü pixĩgü, yerü naxchi pexaie nagagu ga perü chixexü̃gü ga nagu perüxĩnüexü̃ rü nagu pemaxẽxü̃.
22 Natürü nüma ya Cristu rü yexguma curuchagu nayu̱xgu rü Tupanamaxã pexü̃ inarüngü̃xmüexẽxẽ. Rü yemaacü nanaxü ga Cristu nax nügüxü̃tawa pexü̃ nagagüxü̃ca̱x rü nape̱xewa pimexü̃ca̱x rü nataxuxü̃ca̱x i perü chixexü̃.
23 Natürü ngéma nax pengugüxü̃ca̱x, rü penaxwa̱xe nax guxü̃guma aixcüma peyaxõgüxü̃ rü taguma nüxü̃ perüxoexü̃ i ngẽma ore i mexü̃ ga marü nüxü̃ pexĩnüexü̃ nachiga i ngẽma maxü̃ i ípenangu̱xẽẽxü̃. Rü ngẽmatama ore nixĩ i ñu̱xma gúxü̃ i naanewa nüxü̃ yaxugüexü̃, rü choma i Pauru nixĩ i nawa chapuracüxü̃ nax nüxü̃ chixuxü̃ca̱x i ngẽma ore.
Tupana rü Pauruxü̃ namu nax guxü̃ma ga yaxõgüxü̃xü̃ nangúexẽẽxü̃ca̱x
24 Rü ñu̱xma nax pexca̱x ngúxü̃ chingexü̃ rü chataãxẽ erü nüxü̃ chacua̱x rü ñaa chaxunemaxã choma rü ta chayanguxẽxẽ ga yema ngúxü̃ ga Cristu ingexü̃ naxca̱x i norü duü̃xü̃gü i yaxõgüxü̃.
25 Rü nüma ya Tupana rü choxü̃ namu nax naxca̱x chapuracüxü̃ca̱x i guxü̃ma i ngẽma yaxõgüxü̃. Rü perü mexü̃ca̱x nixĩ i choxü̃ namuxü̃ nax guxü̃wama nüxü̃ chixuxü̃ca̱x i norü ore.
26 1:26-27 Rü ngẽmaca̱x nüxü̃ chixu i ngẽma ore ga noxri ẽxü̃guxü̃ ga nũxcümaü̃güxü̃ ga duü̃xü̃gü tama nüxü̃ cua̱xgüxü̃. Natürü i ñu̱xma ya Tupana rü norü duü̃xü̃gü i yaxõgüxü̃xü̃ nüxü̃ nacua̱xẽxẽ i ngẽma ore i guxü̃ i duü̃xü̃güca̱x ixĩxü̃. Rü ngẽma ore ga noxri ẽxü̃guxü̃ rü nüxü̃ nixu nax Cristu i petanüwa ngẽxmaxü̃gagu tá pexü̃́ nangẽxmaxü̃ i pechica i daxũguxü̃ i naanewa.
27 Nüü̃ nadau 1:26
28 Rü ñu̱xma i toma rü Cristuchiga nixĩ i duü̃xü̃gümaxã nüxü̃ tixuxü̃. Rü toma rü nüxü̃ tacuáãcüma tayaxucu̱xẽgü rü tanangúexẽxẽ i guxü̃ma i duü̃xü̃gü nax Cristugagu yangearü chixexü̃ã́xü̃ca̱x, rü ngẽmaãcü Tupanape̱xewa tanagagüxü̃ca̱x.
29 Rü ngẽmaca̱x woo guxchaxü̃gü cha̱u̱xca̱x ínguxgu rü poraãcü chapuracüama namaxã i ngẽma pora i chowa ngẽxmaxü̃ i Cristu choxna ãxü̃.
