Deuteronómio 10:1-22
10 Rü nüma ga Moiché rü ñanagürü: —Rü yixcama nüma ga Cori ya Tupana rü ñanagürü choxü̃: “¡Ẽcü, cumatama naxü i taxre i nutatachinü ga yema noxri cuxna chaxãxü̃raxü̃xü̃güxü̃! ¡Rü ngẽxgumarüxü̃ ta naxü i wüxi i baú i mürapewanaxca̱x, rü ñu̱xũchi daa ma̱xpǘne ya Chinaígu naxĩnagü nax ngéma chomaxã quidexaxü̃ca̱x!
2 Rü ngẽxguma i choma rü ngẽma nutatachinügügu tá chanaxümatü ga yematama ore ga noxri nagu chaxümatüxü̃ ga yema nüxíraxü̃xü̃ ga nutatachinü ga quipuxẽẽxü̃. Rü ñu̱xũchi ngẽma baúgu tá namaxã cunguxü̃!” ñanagürü choxü̃ ga Tupana.
3 Rü yexguma ga choma rü nai ga acáchianaxca̱xwa chanaxü ga wüxi ga baú. Rü chanaxü ta ga taxre ga nutatachinügü rü ñu̱xũchi guma ma̱xpǘnegu namaxã chaxĩnagü.
4 Rü nüma ga Cori ya Tupana rü yema taxre ga nutatachinügu nanaxümatü ga yema 10 ga norü mugü, yema noxritama naxüxü̃rüxü̃ ga yexguma guma ma̱xpǘnewa üxüemaarü ngãxü̃wa pemaxã yadexaxgu ga yexguma guxãma ga yixema wüxigu yexma ngutaque̱xegügu. Rü ñu̱xũchi choxna nanana ga yema taxre ga nutatachinügü.
5 Rü yexguma ga choma rü ícharüxĩ nawa ga guma ma̱xpǘne. Rü ñu̱xũchi yema baúgu chananucu ya yema taxre ga nutatachinügü, yema Cori ya Tupana chomaxã nüxü̃ ixuxü̃rüxü̃. Rü ñu̱xma rü ta rü ngématama nangẽxmagü —ñanagürü ga Moiché.
6 Rü nüma ga yema Iraétanüxü̃ rü Beerúx-bené-yaacáü̃wa inaxĩãchi nax Mochérawa naxĩxü̃ca̱x. Rü yexma nixĩ ga nayuxü̃ ga Aróü̃, rü yexma nixĩ ga nata̱xgüãxü̃. Rü nane ga Ereachá nachicüxü chacherdótexü̃ ningucuchi.
7 Rü yéma inaxĩãchi rü Guxgódawa naxĩ. Rü yéma Guxgódawa inaxĩãchi nax Yobátawa naxĩxü̃. Rü yema naanewa rü taxü̃ ga dexá nayexma.
8 Rü yéma nixĩ ga Cori ya Tupana ga Lebítanüxü̃xü̃ naxunetaxü̃ nax yangegüãxü̃ca̱x ga yema baú ga Cori ya Tupanaarü mugüchixü̃, rü ñu̱xũchi namaxã inacua̱xgüxü̃ca̱x. Rü yexgumarüxü̃ ta nüxü̃ naxuneta nax nape̱xewa nayexmagüxü̃ca̱x rü nüxü̃́ napuracüexü̃ca̱x rü naégagu duü̃xü̃gümaxã mexü̃ naxuegugüxü̃ca̱x. Rü ñu̱xma rü ta rü ngẽmaãcü nanaxügü.
9 Rü yema Lebítanüxü̃ rü taxuxü̃ma ga naane nüxna naxǘ natanüwa ga yema togü ga Iraétanüxü̃. Yerü nümatama ga Cori ya Tupana nixĩ ga nüxna ücü norü ãmareruxü̃.
10 Rü Moiché rü ñanagürü: —Choma rü 40 ga ngunexü̃ rü 40 ga chütaxü̃ guma ma̱xpǘne ga Chinaíwa chayexma, noxrirüü̃tama. Rü Cori ya Tupanana chaca nax tama pexü̃ nada̱i̱xü̃ca̱x, rü nüma rü choxü̃ naxĩnü rü yemaca̱x tama pexü̃ nadai.
11 Rü nüma ga Cori ya Tupana rü ñanagürü choxü̃: “¡Ngéma naxũ, rü cugü namexẽxẽ nax namaxã icuxũãchixü̃ca̱x i ngẽma duü̃xü̃gü nax nagu pechocuxü̃ca̱x rü peyapuxü̃ca̱x i ngẽma naane ga nũxcümaü̃güxü̃ ga perü o̱xigümaxã nüxü̃ chixuxü̃ nax nüxna tá chanaxãxü̃!” ñanagürü.
Yema Cori ya Tupana Iraétanüxü̃axü̃́ naxwa̱xexü̃
12 Rü ñu̱xma Pa Iraétanüxü̃x ¿ta̱xacü nixĩ i perü Cori ya Tupana pexü̃́ naxwa̱xexü̃? Rü ngẽma pexü̃́ nanaxwa̱xexü̃ nixĩ nax nüxü̃ picua̱xüü̃güxü̃ rü aixcüma naga pexĩnüexü̃ rü nacümagu pexĩxü̃, rü nüxü̃ pengechaü̃güxü̃ rü ñu̱xũchi nüxü̃́ pepuracüexü̃ guxü̃ma i perü maxü̃maxã rü guxü̃ i peãẽmaxã.
13 Rü ngẽma Tupana pexü̃́ naxwa̱xexü̃ nixĩ nax aixcüma peyanguxẽẽxü̃ i norü mugü rü ucu̱xẽgü i ñu̱xma pemaxã nüxü̃ chixuxü̃ nax mea pexü̃ nangupetüxü̃ca̱x.
14 ¡Rü dücax, nagu perüxĩnüe nax Cori ya perü Tupana yixĩxü̃ i norü yora i ngẽma dauxü̃wa nüxü̃ idauxü̃ rü ngẽma yexerawa ngẽxmagüxü̃, rü ñu̱xũchi ñoma i naane rü guxü̃ma i nawa ngẽxmagüxü̃!
15 Natürü natanüwa ga guxü̃ma ga yema togü ga duü̃xü̃gü rü nüma ga Cori ya Tupana rü yexera namaxã nataãxẽ ga yema nũxcümaü̃güxü̃ ga perü o̱xigü rü nüxü̃ nangechaxü̃. Rü yemaca̱x pema nax nataagü pixĩgüxü̃, rü pexü̃ naxuneta. Rü ñu̱xma rü ta rü meama nango̱x nax pexü̃ naxunetaxü̃ nax norü duü̃xü̃gü pixĩgüxü̃.
16 ¡Rü ngẽmaca̱x nüxü̃ perüoe i ngẽma pecüma i chixexü̃ i perü maxü̃wa ngẽxmaxü̃! Rü tama name i duü̃xü̃gü i tama ixĩnüechaü̃xü̃ pixĩgü.
17 Erü yimá perü Cori ya Tupana rü ngẽma duü̃xü̃gü namaxã tupanaã̱xgüxü̃étüwa nangẽxma, rü guxü̃ma i ãẽ̱xgacügüétüwa nangẽxma. Rü nüma nixĩ i poraxüchicü rü ãũcümacü rü guxü̃maxã icuácü. Rü naxca̱x rü guxãma i yixema rü tawüxigu, rü tama diẽru nayaxu ega texé tügü ütanüchaü̃gu.
18 Rü nüma rü tüxna nadau ya yíxema ta̱xcuxe rü yutexe. Rü tüxü̃ nangechaxü̃ ya yíxema to i nachixü̃anecüã̱x ya petanüwa ngẽxmaxe, rü tüxü̃ naxüwemü rü tüxü̃ naxüxchiru.
19 Rü ngẽmaca̱x i pema rü ta penaxwa̱xe nax tüxü̃ pengechaxü̃xü̃ ya yíxema to i nachixü̃anecüã̱x, yerü ga pemax rü ta to ga nachixü̃anecüã̱xgü pixĩgü ga Equítuanewa.
20 ¡Rü nüxü̃ pengechaxü̃ ya yima perü Cori ya Tupana! ¡Rü nüxü̃xicatama picua̱xüü̃gü rü naga pexĩnüe! ¡Rü ngẽxguma wüxi i uneta pexü̱xgu rü penaxwa̱xe i naégagu penaxü̱x!
21 Erü nüxü̃ nixĩ i namexü̃ nax nüxü̃ picua̱xüü̃güxü̃. Rü nüma nixĩ ya perü Tupana ga pexca̱x naxücü ga yema taxü̃gü ga mexü̃gü ga pexetümaxã nüxü̃ pedaugüxü̃.
22 Rü yexguma Equítuanewa nangugügu ga yema nũxcümaü̃güxü̃ ga perü o̱xigü, rü 70 icatama yema nangugü. Natürü i ñu̱xma i pemax rü perü Cori ya Tupana pexü̃ nimuxẽxẽ, rü ngẽmaca̱x ñoma ẽxtagü i daxũxü̃wa nüxü̃ idauxü̃rüxü̃ pemuxũchi.
