Deuteronómio 12:1-32
12 Rü ngẽxguma nawa pemaxẽgu i ngẽma naane i Cori ya perü Tupana perü o̱xigümaxã unetaxü̃ rü penaxwa̱xe nax guxü̃guma naga pexĩnüexü̃ rü nagu pexĩxü̃ i ngẽma mugü rü ucu̱xẽgü i pemaxã nüxü̃ chixuxü̃.
2 ¡Rü wüxicana penaxoxẽxẽ i guxü̃ma i ngẽma nachicagü i ma̱xpǘnegüwa ngẽxmagüxü̃ rü guxü̃ma i naigü i taxü̃tüxü̃wa ngẽxmagüxü̃ i ngextá ngẽma duü̃xü̃gü i tá ípewoxü̃xü̃ norü tupananetagüxü̃ nawa yacua̱xüü̃güxü̃!
3 ¡Rü nagu pepogüe i norü ãmarearü guruü̃gü, rü íxraxü̃gu penapo ya yima nutagü ya namaxã natupanaã̱xgücü. Rü ípenagu i ngẽma Acheráchicüna̱xã i nainaxca̱x i nüxü̃ yacua̱xüü̃güxü̃. Rü nagu pepogüe i norü tupanachicüna̱xãgü! ¡Rü ípenapigü i naégagü i ngẽma norü tupanagü nax taxuwama nüxna nacua̱xãchiegüxü̃ca̱x!
4 Rü pema rü ngẽxguma perü Cori ya Tupanaxü̃ picua̱xüü̃gügu ¡rü taxũtáma ngẽma duü̃xü̃gücümagu pexĩ!
5 Rü Tupana rü petanüwa tá nüxü̃ naxuneta i wüxi i nachica nax nawa namaxü̃xü̃ca̱x. Rü pema rü tá ngẽma nachicawa pexĩ nax ngéma nüxü̃ picua̱xüü̃güxü̃ca̱x.
6 Rü ngẽxma tá Tupanaca̱x peyadai rü ípenagu i perü ãmaregü i naxü̃nagü, rü ngéma tá penange i perü diẽru i diésmugü, rü ngẽma diẽru i Tupanaarü puracüca̱x ipexãxü̃, rü ngẽma diẽru i Tupanamaxã pexueguxü̃, rü ngẽma diẽru i perü ngúchaü̃maxã ipexãxü̃, rü ngẽma nüxíraxü̃güxü̃ i perü wocaxacügü rü perü carnéruxacügü i Tupanana pexãgüxü̃.
7 Rü ngẽma nachicawa rü Cori ya Tupanape̱xewa pexacügümaxã tá pechibüe rü tá petaãxẽ naxca̱x i ngẽma mexü̃gü i Cori ya perü Tupanaarü ngü̃xẽẽgagu perü puracüwa peyaxuxü̃.
8 Rü ngẽxguma ngẽma nachicawa Tupanaxü̃ picua̱xüü̃gügu rü taxũtáma ñu̱xma ixügüxü̃rüxü̃ penaxü nax wüxichigü tanaxüxü̃ i ngẽma tümaca̱x mexü̃.
9 Rü ñu̱xma rü ta taxũta nawa pengugü i ngẽma naane i Cori ya perü Tupana tá pexna ãxü̃ i nawa tá aixcüma petaãẽgüxü̃.
10 Natürü ngẽxguma marü pichoü̃gu i ngẽma natü i Yudáü̃ rü nawa pemaxẽgu i ngẽma naane i Cori ya Tupana tá pexna ãxü̃, rü nüma rü tá pexna nadau rü tá pexü̃ ínapoxü̃ naxme̱xwa i ngẽma perü uanügü i pexü̃ íchomaeguãchixü̃ rü taxuca̱xtama pemuü̃e rü pexoegaãẽgü.
11 Rü ngẽxguma ngẽma naanewa pengẽxmagügu rü nüma ya Cori ya Tupana rü tá nüxü̃ naxuneta i wüxi i nachica i nüma tá nawa nangẽxmaxü̃. Rü ngéma tá naxca̱x peyadai rü ípenagu i perü ãmaregü i naxü̃nagü. Rü ngéma tá penange i perü diẽru i diésmugü, rü ngẽma diẽru i Tupanaarü puracüca̱x ipexãxü̃, rü ngẽma perü nanetüarü o i rümemaegüxü̃ i pexueguxü̃ nax Tupanana penaxãxü̃.
12 Rü ngẽma nachicawa i Cori ya Tupanape̱xewa rü tá penaxüchiga wüxigu namaxã i penegü rü pexacügü rü perü puracütanüxü̃ rü ngẽma Lebítanüxü̃ i petanüwa maxẽxü̃. Erü nümagü i Lebítanüxü̃ rü taxuxü̃ma i naanegü nayauxgü i perü naanewa.
13 ¡Rü pegüna peda̱u̱x nax tama ngexü̃rüüxü̃mare i nachicawa ípenaguxü̃ i perü ãmaregü!
14 Rü wüxitücumüarü naanewa rü Tupana tá nüxü̃ naxuneta i wüxi i nachica nax ngéma naxca̱x ãmaregü piguxü̃ca̱x. Rü ngéma tá nixĩ i penaxüxü̃ i guxü̃ma i ngẽma pexü̃ chamuxü̃.
15 Natürü guxü̃guma ega penaxwa̱xegu rü tama nachu̱xu nax peyamáxü̃ i wüxi i pexü̃na rü penangṍxü̃ i namachi. Rü ngẽma rü wüxi i ngü̃xẽxẽ nixĩ i Tupana pexna ãxü̃. Rü yíxema Tupanape̱xewa tügü mexẽẽ́xe rü woo yíxema tama Tupanape̱xewa tügü mexẽẽ́xe, rü marü name nax tanangṍxü̃ i ngẽma namachi ñoma cowümachi rüe̱xna yawemachi tangṍxü̃rüxü̃.
16 Natürü yimá nagü rü ¡taxũtáma penangõ̱x! Rü waixü̃müanegu tá penaba ñoma dexá ibaxü̃rüxü̃.
17 Rü ngẽxguma perü ĩanegüwatama pengẽxmagügu rü taxũtáma penangõ̱x i ngẽma perü ãmaregü i diésmu i marü Tupanaca̱x ípexüxüchixü̃ i perü triguwa rü perü bínuwa rü perü chíxü̃wa rü nüxíraxü̃xü̃ i perü wocaxacügüwa rü carnéruxacügüwa, rü bai i ta̱xacü i Cori ya Tupanamaxã pexueguxü̃wa rü woo i ngẽma ãmare i perü ngúchaü̃maxã Tupanana pexãxü̃wa.
18 Rü guxü̃ma i ngẽma Tupanaarü ãmaregü rü penaxwa̱xe i nape̱xewa penangõ̱x nawa i ngẽma nachica i nüma nüxü̃ naxunetaxü̃. Rü ngéma perü Cori ya Tupanape̱xewa rü tá penangõ̱x wüxigu namaxã i pexacügü rü perü puracütanüxü̃ rü ngẽma Lebítanüxü̃ i petanüwa ngẽxmagüxü̃. Rü ngéma chope̱xewa tá petaãẽgü namaxã i ngẽma õna i perü puracüwa peyaxuxü̃.
19 Rü ngẽxguma ngẽma naanewa pemaxẽyane ¡rü taxṹ i nüxü̃ perüngümaexü̃ i ngẽma Lebítanüxü̃!
20 Natürü ngẽxguma Tupana yanguxẽẽgu nax nüxü̃ natanetaxü̃ i ngẽma perü naane, yema pemaxã nüxü̃ yaxuxü̃rüxü̃, rü ngẽxguma pexü̃́ nachi̱xégagu nax namachi pengṍxü̃ rü tá penangõ̱x i guxü̃ma i namachi i penaxwa̱xexü̃.
21 Natürü ngẽxguma ngẽma ípemaxẽxü̃arü yáxü̃wama nangẽxmagu i ngẽma nachica ya Tupana nüxü̃ unetaxü̃ naxca̱x ya napata rü ngẽxguma taxuacüma ngéma pixĩgu, rü name nax ngẽma ípemaxẽxü̃gutama penadaixü̃ i ngẽma wocaxacügü rüe̱xna carnéruxacügü i Tupanana pexãxü̃ rü name nax penangṍxü̃ i guxü̃ma i ngẽma namachi i pexü̃́ chi̱xégaxü̃, ngẽma pemaxã nüxü̃ chixuxü̃rüxü̃.
22 Rü ngẽma cowümachi rü yawemachi nax pengṍxü̃rüxü̃ rü marü name nax penangṍxü̃ i ngẽma wocaxacümachi rü ngẽma carnéruxacümachi. Rü yíxema Tupanape̱xewa tügü mexẽẽ́xe rü woo yíxema tama Tupanape̱xewa tügü mexẽẽ́xe rü tama nachu̱xu nax tanangṍxü̃ i ngẽma namachi
23 Natürü yimá nagü rü ¡taxũtáma penangõ̱x! Erü yimá nagüwa nangẽxma i norü maxü̃. Rü ngẽmaca̱x ¡taxũtáma ngẽma namachimaxã penangõ̱x ya yimá nagü ya maxü̃ nawa ngẽxmacü!
24 12:24-25 Rü yimá nagü rü penaxwa̱xe nax waixü̃müanegu penabaxü̃ ñoma dexá ibaxü̃rüxü̃. ¡Rü taxũtáma penangõ̱x! Rü ngẽmaãcü tá pexü̃ rü pexacügüxü̃ mea nangupetü, erü penaxü i ngẽma Tupanape̱xewa mexü̃.
25 Nüü̃ nadau 12:24
26 Natürü ngẽma perü ãmaregü i Tupanaca̱x ípexüxüchixü̃ rü ngẽma ãmaregü i Tupanaca̱x pexueguxü̃ rü tá ngẽma nachica ya Tupana nüxü̃ unetaxü̃wa penana.
27 Rü ngẽma Tupanaarü ãmarearü guruü̃wa tá naxca̱x ípenagu i perü naxü̃nagü. Rü yimá nagü i ngẽma naxü̃nagü i Tupanana pexãxü̃ rü tá ngẽma ãmarearü guruü̃étügu penaba. Natürü i ngẽma namachi rü name nax penangṍxü̃.
28 ¡Rü naga pexĩnüe rü peyangu̱xẽxẽ i guxü̃ma i ngẽma pemaxã nüxü̃ chixuxü̃ nax ngẽmaãcü i pemax rü pexacügü rü mea pexü̃ nangupetüxü̃ca̱x i guxü̃guma! Erü penaxü i ngẽma Tupanape̱xewa mexü̃ i nüma ya Cori ya Tupana namaxã taãẽxü̃.
Ucu̱xẽgü naxca̱x i ngẽma naxchicüna̱xãgüxü̃mare icua̱xüü̃güxü̃
29 12:29-30 Rü ngẽxguma Cori ya Tupana nadaiãgu i ngẽma duü̃xü̃gütücumügü nawa i ngẽma naane i tá penapuxü̃, rü ngẽxguma nawa pemaxẽgu i pema, rü tá penaxwa̱xe nax pexuãẽgüxü̃ nax tama nagu pexĩxü̃ i ngẽma nacümagü i ngẽma duü̃xü̃gü i ñu̱xma ngẽma naanewa maxẽxü̃, rü bai i nüxü̃ picua̱xüü̃güxü̃ i norü tupananetagü.
30 Nüü̃ nadau 12:29
31 Rü tama name nax ngẽma duü̃xü̃gü naxüxü̃rüxü̃ penaxü i ngẽxguma Cori ya Tupanaxü̃ picua̱xüü̃gügu. Erü nüma ya Cori ya Tupana rü nüxü̃́ nawa̱xtümüxü̃ i ngẽma chixexü̃ i naxügüxü̃ i ngẽma duü̃xü̃gü i ngẽxguma norü tupananetaxü̃gü yacua̱xüü̃gügu. Rü nümagü rü norü tupananetagüca̱x tüxü̃ nigu ga naxacügü.
32 Natürü i pema rü penaxwa̱xe nax guxü̃guma nagu pexĩxü̃ i guxü̃ma i ngẽma mugü i pemaxã nüxü̃ chixuxü̃. Rü taxũtáma ta̱xacürü to i mugü pixücuchi rüe̱xna ípenaxüxüchi nawa i ngẽma pemaxã nüxü̃ chixuxü̃.
