Deuteronómio 13:1-18
13 13:1-3 Rü ngẽxguma petanüwa nango̱xgu i wüxi i ngo̱xetüwa̱xexü̃ rüe̱xna wüxi i orearü uruxü̃ i pemaxã naxunagüxü̃ i wüxi i cua̱xruxü̃, rüe̱xna ta̱xacü i yixcüra tá ngupetüxü̃, rü woo yanguxgu i ngẽma pemaxã nüxü̃ yaxuxü̃ rü ngẽmawena rü pexü̃ ñaxgu: “¡Ngĩxã nawe tarüxĩ i to i tupanagü i pema tama nüxü̃ pecuáxü̃, rü ngĩxã rü nüxü̃ ticua̱xüü̃gü!” ñaxgu pexü̃, rü tama name i naga pexĩnüe. Erü nüma ya Cori ya perü Tupana rü pexü̃ naxǘ rü aixcüma perü maxü̃nemaxã rü guxü̃ i peãẽmaxã nüxü̃ pengechaü̃.
2 Nüü̃ nadau 13:1
3 Nüü̃ nadau 13:1
4 ¡Rü perü Cori ya Tupanawexica tátama nixĩ i perüxĩxü̃, rü yima perü Tupanaxü̃xicatata nixĩ i picua̱xüü̃güxü̃! ¡Rü nagu pemaxẽ i norü mugü rü naga pexĩnüe! ¡Rü nüxü̃́ pepuracüe rü guxü̃guma naxca̱xicatama pemaxẽ!
5 Rü ngẽma orearü uruxü̃ rüe̱xna ngẽma ngo̱xetünetaxü̃ rü noxtacüma peyama̱x, erü pexü̃ naxuxcu̱xẽ nax namaxã penuexü̃ca̱x ya perü Cori ya Tupana ga Equítuanewa pexü̃ ínguxü̃xẽẽcü ga ngextá pexü̃ ínamugügümarexü̃wa. Rü tá nayu i ngẽma orearü uruxü̃ rüe̱xna ngẽma ngo̱xetünetaxü̃ nagagu nax pexü̃ yaxĩgachixẽẽchaü̃xü̃ nüxna i ngẽma mugü ga Tupana pemaxã nüxü̃ yaxuxü̃ nax nagu pexĩxü̃ca̱x. Rü ngẽmaãcü tá ipeyanaxoxẽxẽ i ngẽma chixexü̃ i petanüwa ngẽxmaxü̃.
6 Rü ngẽxguma cuenexẽxü̃chi rüe̱xna cune rüe̱xna cuxacü rüe̱xna cuxma̱x i ngĩxü̃ cungechaxü̃cü rüe̱xna wüxi i cumücüxüchi cúãcü cuxü̃ naxucu̱xẽgu nax nüxü̃ quicua̱xüü̃xü̃ca̱x i togü i tupanagü i cuma tama nüxü̃ cucuáxü̃ rü cunatü tama nüxü̃ cuáxü̃ rü taxũtáma naga cuxĩnü.
7 Rü woo ega ngẽma duü̃xü̃gü i pexna ngaicamagüxü̃arü tupana yixĩxgu, rü woo duü̃xü̃gü i pexna yáxü̃gugüxü̃arü tupana yixĩxgu, rü woo i ñaa naanearü tawa maxẽxü̃ i duü̃xü̃güarü tupana yixĩxgu, rü taxũtáma cugü icuxã nax cunaxüxü̃ca̱x i ngẽma duü̃xü̃ i cuxü̃ ucu̱xẽxü̃arü ngúchaü̃ rü taxũtáma naga cuxĩnü.
8 13:8-9 Rü taxũtáma namaxã quixãũxãchi rü taxũtáma icuyacu̱x i ngẽma chixexü̃ üxü̃ ¡rü noxtacüma yama̱x! Rü cuma tá nixĩ i cuxíra icunaxügüxü̃ nax cuyamáxü̃. Rü cuwena rü guxü̃ma i duü̃xü̃gü tá nixĩ i yama̱xgüxü̃.
9 Nüü̃ nadau 13:8
10 ¡Rü nutamaxã ínamuxũchi rü ñu̱xmata nayu̱x i ngẽma duü̃xü̃! Rü ngẽma nixĩ i norü natanü i ngẽma duü̃xü̃ i cuxü̃ ixũgachixẽẽchaü̃xü̃ nüxna ya Cori ya curü Tupana ya Equítuanewa cuxü̃ ínguxuchixẽẽcü ga ngextá mugüruü̃gü íquixĩxü̃wa.
11 Rü ngẽmaãcü guxü̃ma i Iraétanüxü̃ rü tá nüxü̃ naxĩnüe i ngẽma ngupetüxü̃chiga, rü tá poraãcü namuü̃e. Rü tagutáma wena texé tanaxüchaü̃ i nangexgumaraxü̃xü̃ i chixexü̃.
12 13:12-15 Rü ngẽxguma nüxü̃ pecuáchigagu nax ngexnerüxüne ya yima ĩanegü ya Cori ya perü Tupana pexna ãxü̃newa nangóegu i duü̃xü̃gü i chixexü̃arü üruü̃gü i tama Tupanaga ĩnüexü̃ rü naxucu̱xẽgüxü̃ i duü̃xü̃gü nax ta̱xacürü tupananetaxü̃ yacua̱xüü̃güxü̃, rü pema rü name nax ípeyadaugüxü̃ rü aixcüma yixĩ rüe̱xna tama. Rü ngẽxguma aixcüma yixĩxgu nax duü̃xü̃gü naxucu̱xẽgüxü̃ nax ta̱xacürü tupananetaxü̃ yacua̱xüü̃güxü̃ca̱x, rü penaxwa̱xe nax noxtacüma taramaxã penadaixü̃ i guxü̃ma i ngẽma duü̃xü̃gü ya yima ĩanewa maxẽxü̃. Rü guxü̃táma pedai rü taxuxü̃táma pemaxẽxẽ rü woo ngẽma naxü̃nagü rü tá penadai.
13 Nüü̃ nadau 13:12
14 Nüü̃ nadau 13:12
15 Nüü̃ nadau 13:12
16 Rü guxü̃ma i norü ngẽmaxü̃gü i ngẽma duü̃xü̃gü, rü yima ĩanearü ngãxü̃gu tá penanutaque̱xe rü ngéma tá peyagu wüxigu namaxã ya yima ĩane. Rü ngẽma rü wüxi i ãmare i Cori ya perü Tupanana pexãxü̃ tá nixĩ. Rü yima ĩane rü tá inayarüxo rü tagutáma wena nanaxügü.
17 ¡Rü taxũtáma ta̱xacü pegüxü̃́ peyaxu i ngẽma Cori ya Tupana ueguxü̃ nax peyaguxü̃! Rü ngẽxguma aixcüma peyanguxẽẽgu i guxü̃ma i ngẽma rü nüma ya Cori rü tagutáma pemaxã nanu. Rü tá nüxü̃́ pengechaxü̃tümüxü̃gü rü tá pexü̃ nimuxẽxẽ yema perü o̱xigümaxã naxueguxü̃rüxü̃.
18 Rü ngẽxguma nagu pexĩxgu i guxü̃ma i norü mugü i ñu̱xma pexna chaxãxü̃ rü penaxü̱xgu i ngẽma nape̱xewa aixcüma mexü̃, rü nüma ya Cori ya Tupana rü guxü̃gutáma pexü̃ narüngü̃xẽxẽ.
