Deuteronómio 15:1-23
15 Rü ngẽxguma 7 ya taunecüarü gu̱xguwa nanguxgu rü pema rü tá tüxü̃́ nüxü̃ iperüngümae ya yíxema pexü̃́ nangetanügüxe.
2 Rü ñaãcü tá penaxü: Rü ngẽxguma texé tümamücüna paxaãchi tanaxãxgu i wüxi i diẽru nax tanatáeguxẽẽxü̃ca̱x, natürü tama paxa tanatáeguxẽẽgu ya yíxema tümamücüaxü̃́ nangetanüxẽ, rü ngẽxguma nawa nanguxgu ya yimá 7 ya taunecü rü tá tüxü̃́ nüxü̃ tarüngüma i ngẽma tümaarü ngetanü. Rü marü taxũtáma tümamücüxü̃ tachixewe nax tanatáeguxẽẽxü̃ca̱x i ngẽma diẽru erü yimá taunecügu rü guxü̃ma i ngetanügü rü tá nüxü̃ itarüngümae naégagu ya Cori ya Tupana.
3 Rü ngẽxguma wüxi i duü̃xü̃ i to i nachixü̃anecüã̱x yixĩxgu i pexü̃́ nangetanüxü̃ rü marü name i penachixewe nax pexü̃́ naxütanüãxü̃ca̱x i ngẽma pexü̃́ nangetanüxü̃. Natürü ngẽxguma wüxi i petanüxü̃ i Iraétanüxü̃ yixĩxgu i pexü̃́ nangetanüxü̃, rü yimá taunecüarü gu̱xgu rü tá nüxü̃́ nüxü̃ iperüngümae i guxü̃ma i norü ngetanügü.
4 15:4-5 Rü ngẽxguma guxü̃gutáma naga pexĩnüegu rü nagu pemaxẽgu i guxü̃ma i ngẽma Tupanaarü mugü i ñu̱xma pexna chaxãxü̃, rü nüma ya perü Cori ya Tupana rü tá pexü̃ narüngü̃xẽxẽ nawa i ngẽma naane i tá pexna naxãxü̃, rü nataxutama i duü̃xü̃ i ngearü diẽruã́xü̃ i Iraéarü naanewa.
5 Nüü̃ nadau 15:4
6 Rü ngẽmaãcü nüma ya Cori ya perü Tupana tá pexü̃ narüngü̃xẽxẽ, yema pemaxã inaxunetaxü̃rüxü̃. Rü tá pexü̃́ nangẽxma i diẽru nax muxü̃ma i to i nachixü̃anegüna penaxãxü̃ca̱x rü yixcüma pexü̃́ natáeguxẽẽxü̃ca̱x. Natürü i pema rü tagutáma togüxü̃tawa naxca̱x ípeca i diẽru nax yixcama nüxü̃́ penatáeguxẽẽxü̃ca̱x. Rü muxü̃ma i to i nachixü̃anegü rü pexme̱xwa tá nangẽxmagü, natürü i pema rü tagutáma naxme̱xwa pengẽxmagü.
7 Rü ngẽxguma ngẽma naane i Cori ya perü Tupana pexna ãxü̃arü ĩanegüwa tangexmagu i wüxi i Iraétanüxü̃ i ngearü diẽruã́xẽ, rü tama name i tümamaxã pechixecüma rü tüxna pexaü ega diẽruca̱x pexna tacaxgu nax yixcama pexü̃́ tanatáeguxẽẽxü̃ca̱x.
8 Natürü name nixĩ nax namaxã pemecümaxü̃ rü nüxü̃ perüngü̃xẽẽxü̃ namaxã i ngẽma diẽru i nüxü̃́ taxuxü̃ i pexna naxca̱x naca̱xaxü̃ nax yixcama pexü̃́ natáeguxẽẽxü̃ca̱x.
9 Rü tama name nax cugüãẽwa cunguxẽẽxü̃ i ñaa ĩnü i chixexü̃ i ñaxü̃: “Marü ningaica ya yimá taunecü ya ngetanü nagu nüxü̃ irüngümaecü, rü ngẽmaca̱x naguxcha nax diẽru nüxna chaxãxü̃”, ñacuxü̃. Rü ngẽxguma namaxã cuxaügu rü tama nüxna cunaxãxgu, rü nüma rü tá Tupanamaxã cuxü̃ nixu, rü ngẽma cuxüxü̃ rü pecadu tá nixĩ.
10 Rü narümemae nax taãẽãcüma tüxü̃ curüngüxẽẽxü̃ ya yíxema ngearü diẽruã́xẽ. Rü ngẽxguma ngẽmaãcü cunaxü̱xgu rü Tupana rü tá cuxü̃ narüngü̃xẽxẽ i guxü̃ma i ta̱xacü icuxüxü̃wa.
11 Rü ñoma i naanewa rü tagutáma nataxu i duü̃xü̃gü i ngearü diẽruã́xü̃. Rü ngẽmaca̱x pexü̃ chamu nax namaxã pemecümaxü̃ rü nüxü̃ perüngü̃xẽẽxü̃ i ngẽma petanüxü̃ i ngearü diẽruã́xü̃ rü nüxü̃́ taxuxü̃ i ñoma i naanewa.
Mugüruü̃güchiga
12 Rü ngẽxguma wüxi i Iraétanüxü̃ i yatüxü̃ rüe̱xna ngexü̃ cuxü̃ nügümaxã taxegu nax curü mugüruxü̃ yixĩxü̃ca̱x, rü 6 ya taunecü tá nixĩ i curü mugüruxü̃ yixĩxü̃. Rü ngẽxguma norü 7 ya taunecüwa nanguxgu rü tá cunaxwa̱xe nax cuyangéxü̃.
13 15:13-14 Rü ngẽxguma ícunamuxũchigu, rü tama name nax ngẽãcume̱xẽxü̃ cuyangéxü̃. Rü name nax curü naxü̃natanüwa nüxna cunamu i ñuxre i ngẽma naxü̃nagü. Rü ngẽxgumarüxü̃ tá ta nüxna cunaxã i ñuxre i curü trigu rü ñuxre ya curü bínu. Rü ngẽmaãcü tá namaxã cungau i ngẽma ngẽmaxü̃gü i Cori ya curü Tupana cuxna ãxü̃.
14 Nüü̃ nadau 15:13
15 ¡Rü tagutáma nüxü̃ perüngümae nax pema rü mugüruü̃gü pixĩgüxü̃ ga Equítuanewa rü nüma ga Cori ya perü Tupana nixĩ ga pexü̃ ínguxü̃xẽẽcü! Rü ngẽmaca̱x nixĩ i ñu̱xma i pexna chanaxãxü̃ i ñaa mu.
16 15:16-17 Natürü ngẽxguma ngẽma curü mugüruxü̃ i yatüxü̃ rüe̱xna ngexü̃ tama cuxna ínaxũxü̃chaü̃gu erü cüxü̃ nangechaü̃ rü nüxü̃ nangechaxü̃ i cuxacügü rü cuma rü namaxã cumecüma, rü ngẽxguma i cuma rü tá cunayaxu i wüxi i ponamachinüruxü̃ rü cupataarü ĩã̱xwa tá cuyaponamachinü. Rü ngẽmaãcü i nüma rü guxü̃gutáma curü mugüruxü̃ nixĩ.
17 Nüü̃ nadau 15:16
18 Rü tama name nax cunachu̱xuxü̃ nax cuyangéxü̃ i curü mugüruxü̃ i 6 ya taunecü meama cuxü̃́ puracüxü̃. Erü wüxi i duü̃xü̃ i meama norü puracü ãtanüxü̃arü ngãxü̃gumare nüxü̃́ cunaxütanü. Rü ngẽxguma cuma meamare cuyange̱xgu, rü nüma ya Cori ya curü Tupana rü tá cuxü̃ narüngü̃xẽxẽ nawa i guxü̃ma i ngẽma cuxüxü̃.
Guxü̃ma i naxü̃nagü iyatüxü̃ i nüxíra buexü̃ rü Tupanaarü nixĩgü
19 Rü ngẽxguma yaxãxacügu i ngẽma perü wocagü rü perü carnérugü rü penaxwa̱xe nax Tupanaca̱x nüxü̃ pexunetaxü̃ i ngẽma naxacügü i yatüxü̃ i nüxíra buexü̃. Rü tama name i penapuracüxẽxẽ i ngẽma nüxíraxü̃xü̃ i perü wocaxacü iyatüxü̃, rü tama name i ípenayoü̃ta̱xa i ngẽma nüxíra buxü̃ i perü carnéruxacü iyatüxü̃.
20 Rü wüxichigü ya taunecügu rü ngẽma nachica ya Tupana nüxü̃ unetaxü̃wa rü wüxigu cutanüxü̃maxã tá Tupanape̱xewa cunangõ̱x i ngẽma nüxíraxü̃xü̃ i perü naxü̃nagü.
21 Natürü ngẽxguma nachixegu i ngẽma naxü̃na, rüe̱xna yangãnechigügu rüe̱xna nangexetügu, rü tama name nax Tupanana penaxãxü̃ rü peyaguxü̃.
22 Rü yima perü ĩane ya nawa pemaxẽnewa tátama penangõ̱x i ngẽma naxü̃na. Rü yíxema Tupanape̱xewa tügü mexẽẽ́xe rü woo tama Tupanape̱xewa tügü mexẽẽ́xe rü tama nachu̱xu nax penangṍxü̃ i ngẽma namachi, ngẽma yawemachi rüe̱xna cowümachi tangṍxü̃rüxü̃.
23 Natürü tama name nax penangṍxü̃ i nagü i ngẽma naxü̃nagü. Rü yimá nagü rü waixü̃mügu tá penaba.
