Deuteronómio 16:1-22
16 ¡Rü ngẽxguma Abíarü tauemacüwa nanguxgu rü penaxüchiga i Üpetüchiga naxca̱x ya tórü Cori ya Tupana! Yerü wüxi ga chütaxü̃ ga guma tauemacügu nixĩ ga Equítuarü naanewa tüxü̃ ínagaxü̃xü̃ ga Cori ya perü Tupana.
2 Rü Üpetüchigagu rü tá Tupanaca̱x peyama̱x rü peyagu i wocagü rü carnérugü nagu i ngẽma nachica i nüma nüxü̃ naxunetaxü̃ nax nagu naxãpataxü̃.
3 Rü ngẽxguma penangõ̱xgu i ngẽma õna i Üpetüchigaarü ngunexü̃gu pengṍxü̃ rü paũ i ngearü pu̱xẽẽruü̃ã́xü̃maxã tá penangõ̱x. Rü wüxi i yüxü tá nixĩ i penangṍxü̃ i ngẽma paũ i ngearü pu̱xẽẽruü̃ã́xü̃. Erü ngẽma paũwa tá nüxna pecua̱xãchie nax ñuxãcü ngúxü̃ pingegüxü̃ ga Equítuanewa, rü yemaca̱x ñu̱xãẽãcüma nawa ípechoxü̃. Rü ngẽmaãcü i pema rü ñu̱xma nax pemaxẽxü̃gu rü tá nüxna pecua̱xãchie ga yema ngunexü̃ ga nagu Equítuanewa ípechoxü̃xü̃.
4 Rü ngẽma 7 i ngunexü̃gu rü guxü̃ma i perü naanewa rü nataxutama i paũarü pu̱xẽẽruxü̃. Rü ngẽma peta nagu ixügüxü̃ i ngunexü̃arü yáuanecü i cha̱u̱xca̱x pedaixü̃ i naxü̃nagü, rü taxuxü̃táma perü moxü̃ruxü̃ ípeyaxüxẽxẽ i namachi.
5 Rü natanüwa ya yima ĩanegü ya Tupana pexna ãxü̃newa, rü tama name ya ngexnerüxünemare ya ĩanegu penadai i ngẽma naxü̃nagü i Üpetüchigaca̱x ixĩxü̃.
6 Rü ngẽma nachica ya Tupana nüxü̃ unetaxü̃ nax nawa nangẽxmaxü̃, rü ngẽmawaxicatátama nixĩ i naxca̱x ípenaguxü̃ i ngẽma naxü̃nagü i Üpetüchigaca̱x ixĩxü̃. Rü ngẽxguma marü nayáuanegu rü yaxücuchaü̃gu ya üa̱xcü rü name nax ípenaguxü̃. Yerü yexguma marü nayáuanegu nixĩ ga Equítuanewa ípechoxü̃xü̃.
7 Rü ngẽma nachica ya Tupana nüxü̃ unetaxü̃wa tá peyagu i namachi i ngẽma naxü̃nagü i Tupanana pexãxü̃, rü tá penangõ̱x. Rü moxü̃ãcü pa̱xmama rü pepataca̱x tá pewoegu.
8 Rü 6 i ngunexü̃gu tá nixĩ i penangṍxü̃ i ngẽma paũ i ngearü pu̱xẽẽruü̃ã́xü̃. Rü norü 7 i ngunexü̃gu rü Cori ya perü Tupanaca̱x tá penaxü i wüxi i ngutaque̱xe i mexẽchixü̃. Rü ngẽma ngunexü̃ rü taxúetama tapuracü.
Nanetüarü Buxgüchigaarü peta
9 16:9-10 Rü ngẽma ngunexü̃ nax nagu naxügüxü̃ i nanetüarü buxu, rü ngẽmawena rü 7 i yüxü tá ingupetü nax Cori ya perü Tupanaca̱x penaxüchigaxü̃ca̱x i Nanetüarü Buxchiga. Rü ngẽma petawa rü tá perü ngúchaü̃maxã Cori ya perü Tupanana penaxã i perü ãmaregü ngẽma nüma ya Tupana pexna naxãxü̃rüxü̃. Rü ngẽxguma Tupana pexna naxãxgu i muxü̃ma i nanetügü rü name i pema rü ta muxü̃ma i ãmaregü nüxna pexã.
10 Nüü̃ nadau 16:9
11 Rü Tupanape̱xewa tá penaxü i ngẽma peta nawa i ngẽma nachica ya Tupana nüxü̃ unetaxü̃ nax nawa nangẽxmaxü̃. Rü ngẽma petawa rü name nax ngéma penagagüxü̃ i guxü̃ma i pexacügü rü perü mugüruü̃gü. Rü ngẽxgumarüxü̃ ta name nax nüxna pexuxü̃ i ngẽma Lebítanüxü̃ rü ngẽma to i nachixü̃anecüã̱x i petanüwa ngẽxmagüxü̃. Rü ñu̱xũchi name nax tüxna pexuxü̃ ya yíxema taxcutagü rü yutegüxe i perü ĩanewa ngẽxmagüxe.
12 ¡Rü nüxna pecua̱xãchie nax pema rü ta mugüruü̃gü pixĩgüxü̃ ga Equítuarü naanewa! Rü ngẽmaca̱x name nax nagu pexĩxü̃ i guxü̃ma i ñaa mugü.
Naixatünaxca̱x ya Düxenügüarü petachiga
13 Rü ngẽxguma marü nagu̱xgu nax peyabuxgüxü̃ i perü trigu, rü marü penayauxtüü̃gu ya perü úbagü, rü 7 i ngunexü̃gu tá penaxüchiga i ngẽma Düxenügüarü Petachiga.
14 Rü ngẽma petagu rü tá petaãẽgü namaxã i pexacügü, rü perü mugüruü̃gü, rü Lebítanüxü̃, rü ngẽma duü̃xü̃gü i to i nachixü̃anecüã̱xgü, rü taxcutagü rü yutegüxe i perü ĩanegüwa ngẽxmagüxe.
15 Rü ngẽma peta i Tupanaca̱x tá pexüxü̃ rü 7 i ngunexü̃ tá penaxüchiga nawa i ngẽma nachica i nüma nüxü̃ naxunetaxü̃. Rü ngẽmaãcü ya perü Cori ya Tupana rü tá pexü̃ narüngü̃xẽxẽ nax muxü̃ pexü̃́ ínguxuchixü̃ i guxü̃ma i penetügüarü o. Rü guxü̃ma i perü puracüwa rü tá pexü̃ narüngü̃xẽxẽ, rü aixcüma tá petaãẽgü.
16 Rü guxü̃ma i yatüxü̃gü rü wüxichigü ya taunecügu rü name nax tomaepü̱xcüna Cori ya perü Tupanape̱xewa naxĩxü̃ nawa i ngẽma nachica i nüma nüxü̃ naxunetaxü̃. Rü ñaagü nixĩ i ngẽma petagü i nagu Tupanape̱xewa naxĩxü̃: Paũ i Ngearü Pu̱xẽẽruü̃ã́xü̃, rü Nanetüarü Buxgüchiga, rü Düxenügüchiga. Rü ngẽma petachigagügu rü tama name nax texé ngẽãcume̱xẽãcüma Cori ya Tupanape̱xewa taxuxü̃.
17 Rü wüxichigü rü name nax ngéma tanangexü̃ i tümaarü ãmare. Rü ngẽma nax Tupana tüxü̃ rüngü̃xẽẽxü̃ãcü rü name nax wüxichigü nüxna tanaxãxü̃ i ngẽma tümaarü nanetügüarü o.
Ãẽ̱xgacügü i guxchaxü̃arü mexẽxẽruü̃güchiga
18 Rü guxü̃nema ya perü ĩanegü ya perü Cori ya Tupana tá wüxichigü i natücumüna ãxü̃newa nüxü̃ pexuneta i ãẽ̱xgacügü i guxchaxü̃güarü mexẽẽruü̃gü rü norü ngü̃xẽẽruü̃gü nax nümagü aixcüma meama namexẽẽgüãxü̃ca̱x i ngẽma duü̃xü̃güarü guxchaxü̃gü.
19 Rü pemax, Pa Ãẽ̱xgacügü i Guxchaxü̃güarü Mexẽẽruü̃güx, ¡rü taxṹ i peyatoxẽxẽxü̃ i ngẽma guxchaxü̃arü mexẽxẽ! Rü ngẽxguma penamexẽẽgu i ngẽma duü̃xü̃güarü guxchaxü̃gü rü name nax guxãxü̃ma mea penamexẽẽxü̃ i tümarü guxchaxü̃gü. ¡Rü taxũtáma penayaxu ega texé pexü̃́ naxütanüchaü̃gu nax nawaama pexüxü̃ca̱x! Erü ngẽma diẽru rü ñoma yangexetüxü̃rüxü̃ nayaxĩgüxẽxẽ i ngẽma nüxü̃ cua̱xüchixü̃ rü ínayatoxẽxẽ i ngẽma aixcümaxü̃ ixugüxü̃arü dexa.
20 Rü name nax guxü̃guma ngẽma aixcüma ixĩxü̃guxicatama nax pexĩxü̃ nax ngẽmaãcü nawa pemaxẽxü̃ca̱x, rü pexrü yixĩxü̃ca̱x i ngẽma naane i Cori ya perü Tupana tá pexna ãxü̃.
21 16:21-22 Rü ngẽxguma Tupanaarü ãmarearü guruxü̃ pexü̱xgu nax tórü Cori ya Tupanaxü̃ picua̱xüü̃güxü̃ca̱x, ¡rü taxũtáma naxü̃tagu penaxü i tupananeta i Acheráchicüna̱xã! ¡Rü taxũtáma nügüétü penanugü ya nutagü nax namaxã petupanaã́xü̃ca̱x! Erü nüma ya Cori ya perü Tupana rü poraãcü ngĩmachi naxai.
22 Nüü̃ nadau 16:21
