Deuteronómio 18:1-22
18 18:1-2 Rü ngẽma chacherdótegü i Lebítanüxü̃ rü guxü̃ma i ngẽma Lebítanüxü̃tücumü rü taxũtáma ngẽma togü i Iraétanüxü̃rüxü̃ nanayauxgü i norü naane. Rü nümagü i Lebítanüxü̃, rü ngẽma ãmaregü i Tupanaca̱x ínaguxü̃wa tá nixĩ i nayauxgüãxü̃ i nawemügü. Rü ngẽma diẽru i duü̃xü̃gü Tupanana ãxü̃wa tá nixĩ i nayauxgüãxü̃ i ngẽma diẽru i nüxna üxü̃ i ngẽma Lebítanüxü̃. Rü ngẽma Lebítanüxü̃ rü taxũtáma ngẽma togü i Iraétanüxü̃rüxü̃ nanayauxgü i norü naane. Rü nüma ya Cori ya Tupana tá nixĩ i nüxna nadauxü̃ rü namaxã inacuáxü̃.
2 Nüü̃ nadau 18:1
3 Rü ngẽxguma wüxi i Iraétanüxü̃ Tupanaca̱x yama̱xgu i wüxi i woca i yatüxü̃ rüe̱xna carnéru rü ngẽma chacherdótegüna üxü̃ nixĩ i ngẽma namachica̱xwe rü nachicüra rü guxü̃ma i naü̃nütagü.
4 Rü ngẽxgumarüxü̃ ta ngẽma chacherdótegüna tá naxǘ i ngẽma nüxíraxü̃güxü̃ i norü o i duü̃xü̃güarü trigu, rü nüxíraxü̃xü̃ i bínugü rü chíxü̃gü. Rü ngẽxgumarüxü̃ ta nüxna naxǘ i ngẽma nüxíra iyoxü̃ i carnéruta̱xa.
5 Rü tórü Cori ya Tupana rü guxü̃ma i Iraétanüxü̃tücumüwa nüxü̃ naxuneta i ngẽma Lebítücumü nax nümagü rü nanegü rü nataagü guxü̃guma namaxã inacua̱xgüxü̃ca̱x i Tupanaarü puracü.
6 Rü ngẽxguma ngexnerüxünemare i perü ĩanegü i Iraéanewa ngẽxmagünewa wüxi i Lebítanüxü̃ nüxü̃́ ngúchaü̃gu nax Tupanapatawa naxũxü̃ nax ngéma napuracüxü̃ca̱x, rü tama name i nüxna penachu̱xu.
7 Rü narümemae nax nüxü̃ perüngü̃xẽẽxü̃ nax ngẽmaãcü ngéma nanguxü̃ca̱x rü yanguxẽẽãxü̃ca̱x i Tupanapataarü puracü naxrüxü̃ i ngẽma togü i namücügü i ngéma Tupanaaxü̃́ puracüexü̃.
8 Rü nüma rü ngẽma togü i namücügü yaxuxü̃e̱xpü̱x i õna tá nanayaxu. Rü naétü tá nanayaxu i ngẽma nanatü nüxna ãxü̃.
Ucu̱xẽgü nax tama nagu naxĩxü̃ca̱x i nacümagü i chixexü̃
9 Rü ngẽxguma marü nagu pechocugu i ngẽma nachixü̃ane i perü Cori ya Tupana tá pexna ãxü̃, rü tama name i naxca̱x pedauxü̃tae i ngẽma nacümagü i chixexü̃ i ngẽma duü̃xü̃gü.
10 Rü tama name i texé i petanüwa rü tümaxacüxü̃ itamu nax ngẽma duü̃xü̃güarü tupanaca̱x tayaguxü̃, rü bai i nagu tixũxü̃ i ngẽma nawa nüxü̃ icuáxü̃ i ngẽma ẽxü̃guxü̃, rü bai i nagu tixũxü̃ nax tayuüxü̃, rü bai i nagu tixũxü̃ nax toguxexü̃ tachixexẽẽxü̃.
11 Rü tama name i naxca̱x tixũ nax duẽxẽgüxü̃ tatoṍẽxü̃, rü bai i naxü̃tawa taxũ nax nüxna tayacaxü̃ca̱x i ngẽma ẽxü̃guxü̃xü̃ cuáxü̃, rü bai i nüxna tayaca i ngẽma naãxẽgüca̱x ngẽmagüxü̃, rü bai i nüxna tayaca i ngẽma yuetaãẽca̱x ngẽmagüxü̃.
12 Erü ya Tupana rü naxchi naxai i ngẽma duü̃xü̃gü i ngẽma nacümagügu maxẽxü̃. Rü ngẽmaca̱x nixĩ ya Cori ya perü Tupana i pepe̱xewa tá ínawoxü̃ãxü̃ i ngẽma nachixü̃anecüã̱xgü, erü nümagü rü ngẽma nacüma i chixexü̃gu nixĩ i namaxẽxü̃.
13 Rü ngẽmaca̱x i pema, rü penaxwa̱xe nax nagu pexĩxü̃ i ngẽma Cori ya perü Tupana naxwa̱xexü̃.
14 Erü ngẽma duü̃xü̃gü i tá ípewoxü̃xü̃ nawa i ngẽma naane rü naga naxĩnüe i ngẽma nüxü̃ icuáxü̃ nax ta̱xacü tá yixcüra ngupetüxü̃ rü naga naxĩnüe i ngẽma ẽxü̃guxü̃xü̃ cuáxü̃. Natürü nüma ya Cori ya perü Tupana rü tama nanaxwa̱xe nax nagu pexĩxü̃ i ngẽma nacümagü i chixexü̃.
Orearü uruxü̃ i Moichéwena tá ínguxü̃
15 Rü nüma ya Cori ya perü Tupana rü tá petanüwa nanango̱xẽxẽ ya wüxi ya chauxrüxü̃ orearü uruxü̃. Rü pema rü name nixĩ i naga pexĩnüe.
16 Rü yema nixĩ ga Cori ya Tupanana naxca̱x pecaxü̃ ga ma̱xpǘne ga Oréxwa ga yema ngunexü̃ ga guxãma ga pemax nagu yéma pengutaque̱xegüxü̃ rü ñapegügüxü̃: “Tama tanaxwa̱xe i wena nüxü̃ taxĩnüe i naga ya Cori ya tórü Tupana, rü bai i nüxü̃ tadauxchaü̃xü̃ ya daa üxü ya taxü̃ne nax tama tayuexü̃ca̱x”, ñaperügügü.
17 Rü yexguma ga Cori ya Tupana rü ñanagürü choxü̃: “Marü name i ngẽma nüxü̃ yaxugüxü̃.
18 Rü choma rü tá ngẽma Iraétanüxü̃tanüwa chanango̱xẽxẽ ya wüxi ya curüxü̃ orearü uruxü̃. Rü nüma rü wüxi ya natanüxü̃ ixĩxcü tá nixĩ. Rü nüma rü tá mea duü̃xü̃gümaxã nüxü̃ nixu i ngẽma choma namaxã nüxü̃ chixuxü̃, rü tá namaxã nüxü̃ nixu i ngẽma choma chanamuxü̃.
19 Rü guxãma ya yíxema tama nüxü̃́ irüxĩnüexe ya yimá orearü uruxü̃ chauégagu nüxü̃ ixuxü̃, rü choma rü tá tüxna chaca rü ta̱xacüca̱x tama itaxĩnüxü̃”, ñanagürü choxü̃ ga Cori ya Tupana.
20 Natürü ngẽma orearü uruxü̃ i nüxü̃ ixuxü̃ i ngẽma tama choma chanamuxü̃ nax nüxü̃ yaxuxü̃ca̱x, rüe̱xna ta̱xacürü tupananetaégagu idexaxü̃, rü yu tá namaxã pexuegu.
21 18:21-22 Rü ngẽxguma chi pema rü nagu perüxĩnüegu: “¿Rü ñuxãcü tá nüxü̃ icuáxü̃ nax tama Tupanaarü ore yixĩxü̃ i ngẽma nüxü̃ yaxuxü̃ i ngẽma orearü uruxü̃?” rü name nax nüxü̃ pecuáxü̃ rü ngẽxguma ngẽma ore i Tupanaégagu nüxü̃ yaxuxü̃ rü tama yanguxgu, rü ngẽmawa tá nüxü̃ pecua̱x nax tama Cori ya Tupanaarü ore yixĩxü̃, rü ngẽma orearü uruxü̃ rü norü ngúchaü̃mare nixu. Rü ngẽmaca̱x i pema rü tama name nax nüxü̃ pemuü̃exü̃.
22 Nüü̃ nadau 18:21
