Deuteronómio 19:1-21
19 Rü ngẽxguma marü Tupana nadaixgu i ngẽma duü̃xü̃gü i ñu̱xma ngẽma naane ya Tupana pexna ãxchaü̃xü̃wa maxẽxü̃, rü pema tá nixĩ i nawa pemaxẽxü̃ ya yima ĩanegü rü napatagü i ngẽma duü̃xü̃gü.
2 19:2-3 Rü ngẽxguma yanguxgu i ngẽma rü pema rü tá ípenaxüxüchi ya tomaepü̱x ya ĩanegü nax cu̱xchicaruü̃gü yaxĩgüxü̃ca̱x nawa i ngẽma naane ya Tupana tá pexna ãxü̃. Rü ñu̱xũchi tá peyamexẽẽgü i ngẽma nama ya yima ĩanegüwa nadagüxü̃. Rü ñu̱xũchi ngẽma naane i Cori ya perü Tupana pexna ãxü̃ rü tomaepü̱xgu tá peyayauxye nax ngẽmaãcü ngẽma máetacüraxü̃xü̃ ngexnerüxüne ya yima tomaepü̱x ya ĩanegu yanacúxü̃ca̱x nax ngẽmaãcü tama yama̱xgüãxü̃ca̱x i ngẽma natanüxü̃ i ngẽma duü̃xü̃ i yuxü̃.
3 Nüü̃ nadau 19:2
4 Rü ngẽma máetaxü̃ rü ngẽxguma aixcüma yixĩxgu nax tama nagu naxĩnüãcüma rü tama tümachi naxaiãcüma tüxü̃ yama̱xcüraxü̃xü̃, rü marü name i ngexnerüne ya yima ĩanegu yanacúxü̃ca̱x nax ngẽmaãcü tama yama̱xgüãxü̃ca̱x i ngẽma natanüxü̃ i ngẽma duü̃xü̃ i yuxü̃.
5 Rü ngẽxgumarüxü̃ chi wüxi i duü̃xü̃ namücümaxã naixnecüwa üxüwa naxĩxgu, rü ngürüãchi íyachexnecüüyane ítangoxochigu ya norü yuema rü ngẽma namücüeruwa taña rü nayu, rü marü name nax wüxi ya yima ĩanegüwa nañaxü̃ nax ngẽxma yanacúxü̃ca̱x rü ngẽmaãcü tama yama̱xgüãxü̃ca̱x i ngẽma natanüxü̃ i ngẽma duü̃xü̃ i yuxü̃.
6 Rü tama name nax nügüna nayaxü̃xü̃ ya yima ĩanegü ya cu̱xchicaxü̃gü, erü ngẽxguma chi nayáxü̃gu, rü ngürüãchi wüxi i natanüxü̃ i ngẽma yuxü̃ rü norü numaxã tá nawe nangẽ nax yamáãxü̃ca̱x, rü ngürüãchi namagu tá nüxü̃ nayangau rü tá nayama̱x woo i ngẽma yama̱xcüraxü̃xü̃maxã rü taguma nügü chi naxaiegu.
7 Rü ngẽmaca̱x nixĩ i pexü̃ chamuxü̃ nax nüxü̃ pexunetaxü̃ ya tomaepü̱x ya ĩanegü nax cu̱xchicaruü̃gü yaxĩgüxü̃ca̱x.
8 19:8-9 Rü ngẽxguma aixcüma naga pexĩnüegu i ngẽma mugü i ñu̱xma pexna chaxãxü̃ rü aixcüma perü Cori ya Tupanaxü̃ pengechaü̃gu, rü aixcüma nagu pemaxẽgu i norü mugü, rü nüma ya perü Cori ya Tupana rü tá pexna nanaxã i guxü̃ma i ngẽma naane ga perü o̱xigümaxã nüxü̃ yaxuxü̃. Rü ñu̱xũchi Yudáü̃arü oéstewa tá nüxü̃ pexuneta ya nai ya tomaepü̱x ya ĩanegü ya cu̱xchicaxü̃gü naétü ya yima tomaepü̱x ya ĩanegü ya cu̱xchicaxü̃gü i nua Yudáü̃arü éstewa ngẽxmagüne.
9 Nüü̃ nadau 19:8
10 Rü ngẽmaãcü i perü naane i Cori ya Tupana pexna ãxü̃wa rü taxũtáma nayama̱xgü i ngẽma máetacüraxü̃xü̃. Rü ñu̱xũchi i pema rü taxuca̱xma nipeguãchi.
11 19:11-12 Natürü ngẽxguma wüxi i duü̃xü̃ rü to i duü̃xü̃chi naxaixgu rü tüxü̃ íyacu̱xéxü̃gu nax tüxü̃ yamáxü̃ca̱x rü ñu̱xũchi yañaxgu nax wüxi ya ĩane ya cu̱xchicaruü̃gu yanacúxü̃ca̱x, rü ngẽxguma yima ĩane ya nawa ne naxũxü̃nearü ãẽ̱xgacü rü tá norü churaragüxü̃ namu nax yayauxgüãxü̃ca̱x. Rü ñu̱xũchi yíxema tüxü̃ yamáxetanüxü̃na tá nanamu nax ngẽma yamáxü̃ca̱x.
12 Nüü̃ nadau 19:11
13 Rü taxũtáma pexü̃́ nangechaü̃tümüxü̃ i ngẽma máetaxü̃ nax ngẽmaãcü Iraéanewa nataxuxü̃ca̱xma i duü̃xü̃ i taxuxü̃ma chixexü̃ naxüãcüma yuxü̃. Rü ngẽxguma ngẽmaãcü penaxü̱xgu, rü mea tá pexü̃́ ínanguxuchi i guxü̃ma i ngẽma pexüxü̃.
14 Rü ngẽma naane i Cori ya perü Tupana tá pexna ãxü̃wa rü taxũtáma peyaxügachi i pemücüanearü üyeanearü cua̱xruxü̃, erü ngẽma üyeanearü cua̱xruxü̃gü rü woetama nũxcümacürüwa nayexmagü.
Mugü naxca̱x i ngẽma ãẽ̱xgacüpe̱xewa doraxü̃ ixuxü̃
15 Rü ngẽxguma wüxitama i duü̃xü̃ nüxü̃ ixuxgu nax nüxü̃ nadauxü̃ i wüxi i máeta rüe̱xna ta̱xacürü to i guxchaxü̃ rü tama ningu nax aixcüma yixĩxü̃. Natürü ngẽxguma taxre rüe̱xna tomaepü̱x i duü̃xü̃gü nüxü̃ ixuxgu rü ngẽmawa nüxü̃ pecua̱x nax aixcüma yixĩxü̃
16 19:16-17 Rü ngẽxguma wüxi i duü̃xü̃ toguechiga doraxü̃ ixuxgu nax chixexü̃ taxüxü̃, rü ngẽma taxre i guxchaxü̃ nügümaxã ügüxü̃ rü name nax Tupanape̱xewa rü chacherdótegüpe̱xewa rü ngẽma ngunexü̃gügu puracüexü̃ i guxchaarü mexẽẽruü̃güpe̱xewa naxĩxü̃.
17 Nüü̃ nadau 19:16
18 19:18-19 Rü nümagü i ãẽ̱xgacügü rü tá mea nanangugü i ngẽma guxchaxü̃. Rü ngẽxguma dora yixĩxgu i ngẽma duü̃xü̃ nüxü̃ ixuxü̃, rü tá nüechama nanayaxu i ngẽmatama poxcu i ngẽma to i duü̃xü̃ca̱x nagu naxĩnüxü̃. Rü ngẽmaãcü tá ipeyanaxoxẽxẽ i ngẽma chixexü̃ i petanüwa ngẽxmaxü̃.
19 Nüü̃ nadau 19:18
20 Rü ngẽxguma ngẽmaxü̃ nacua̱xgügu i ngẽma togü i duü̃xü̃gü rü tá namuü̃e rü taxũtáma ngẽma chixexü̃ naxügü.
21 Rü taxũtáma pexü̃́ nangechaü̃tümüxü̃ i ngẽma duü̃xü̃ i chixexü̃ üxü̃. Rü ngẽma máetaxü̃ rü tá peyama̱x. Rü ngẽma texéxü̃ ichaíxetüxẽẽxü̃ rü tá peyacháixetüxẽxẽ. Rü ngẽma texéxü̃ ibüepütaxü̃ rü tá peyabüepüta. Rü ngẽma texéxü̃ ibüyechacüüxü̃ rü tá peyabüyechacüxü. Rü ngẽma texéxü̃ ibüyeparaxü̃ rü tá peyabüyepara.
