Deuteronómio 2:1-37
2 Rü nüma ga Moiché rü ñanagürü: —Yemawena rü chianexü̃wa taxĩ, rü nagu taxĩ ga yema nama ga Már i Dauchíüxü̃wa nadaxü̃, yema Cori ya Tupana choxü̃ muxü̃ãcüma. Rü muxü̃ma ga ngunexü̃ tingegü nax Cheíarü ma̱xpǘnecüwagu írüchoeguxü̃.
2 2:2-3 Rü yemaca̱x ga Cori ya Tupana rü choxü̃ ñanagürü: “Marü muxü̃ma i ngunexü̃ nagu pingegü nax nagu pixĩxü̃ i ñaa ma̱xpǘxanexü̃gü. ¡Ẽcü i ñu̱xma rü nórtewaama pexĩ!
3 Nüü̃ nadau 2:2
4 2:4-5 ¡Rü duü̃xü̃gümaxã nüxü̃ ixu i ñaa ore! Pemax rü nawa ta pechopetü i ngẽma Cheíane i nawa namaxẽxü̃ i Echaútanüxü̃ i petanüxü̃ ixĩgüxü̃. Nümagü rü pexü̃ namuü̃e, ¡natürü pexuãẽgü, rü taxṹ i penadaixü̃! Erü choma rü bai i íxraxü̃ i ngẽma nachixü̃anearü naane pexna chaxã. Erü ngẽma Cheíarü máxpü̱xanexü̃gü rü Echaútanüxü̃arü nixĩ. Rü choma nixĩ ga nüxna chanaxãxü̃.
5 Nüü̃ nadau 2:4
6 Pemax rü nüxna tá naxca̱x pecagü nax pexü̃ namaxã nataxegüxü̃ca̱x i õnagü i penaxwa̱xexü̃. Rü nüxü̃́ tá penaxütanügü. Rü woo ngẽma dexá i perü axeruü̃gü rü nüxü̃́ tá penaxütanü”, ñanagürü.
7 Rü yimá Cori ya perü Tupana rü pexü̃ narüngü̃xẽxẽ nawa ga guxü̃ma ga yema pexüxü̃. Rü gumá 40 ga taunecü rü pemaxã nayexma rü pexna nadau ga yexguma yema taxüchixü̃ ga chianexü̃gu pexĩxgu. Rü taxuxü̃ma pexü̃́ nataxu ga yexguma.
8 Rü nüxü̃ ítachoeguãchi ga Cheíane ga nawa namaxẽxü̃ ga tatanüxü̃ ga Echaútanüxü̃. Rü nagu taxĩ ga yema nama ga Arabáwa, rü Eráxwa, rü Echióü̃-guébewa daxü̃. Rü ñu̱xũchi nagu taxĩ ga yema nama ga Moáarü chianexü̃wa nadaxü̃.
9 Rü yexguma ga Cori ya Tupana rü choxü̃ ñanagürü: “¡Taxṹ i penachixewexü̃ rü penadaixü̃ i ngẽma Moátanüxü̃, erü Loxtanüxü̃ nixĩgü! Rü choma rü bai i íxraxü̃ i norü naanegü tá pexna chaxã. Rü choma nixĩ ga Loxtanüxü̃na chanaxãxü̃ ga yema naane ga Ár”, ñanagürü.
10 (Rü nũxcüma ga yema naane rü Éntanüxü̃ nawa namaxẽxü̃. Rü yema duü̃xü̃gü rü nitaxü̃ne rü namuxũchi. Rü nimáchane yema Anáxtanüxü̃rüxü̃.
11 Rü duü̃xü̃gü nagu rüxĩnüegu nax Refátanüxü̃ yaxĩgüxü̃, natürü ga Moátanüxü̃ rü Éntanüxü̃maxã nanaxugü.
12 Rü nũxcüma ga yema Cheíane rü Oréutanüxü̃ nixĩ ga nawa maxẽxü̃. Natürü ga yema Echaútanüxü̃ rü nanadai ga yema duü̃xü̃gü, rü ñu̱xũchi nüma nagu naxãchiü̃gü ga yema naane, yexgumarüxü̃ ga Iraétanüxü̃ rü nanapugü ga yema naane ga Cori ya Tupana nüxna ãxü̃ nax nagu naxãchiü̃güxü̃ca̱x.)
13 Rü yexguma ga Cori ya Tupana rü ñanagürü: “¡Ñu̱xma rü ipexĩãchi rü pichoü̃ i ngẽma natüxacü i Chérex!” ñanagürü. Rü yexguma ga yixema rü tichoü̃ ga yema natüxacü.
14 Rü yema ngunexü̃ ga Cadé-banéawa nagu ixĩãchixü̃gu rü ñu̱xmata yema ngunexü̃ ga natüacü ga Chérexwa nagu ichoü̃xü̃gu rü 38 ga taunecü marü ningu. Rü gumá 38 ga taunecügügu nixĩ ga yoxni nayuexü̃ ga guxü̃ma ga yema yatügü ga daiwa imexü̃, yema Cori ya Tupana namaxã naxueguxü̃rüxü̃.
15 Yerü natanügu nangu ga yema Cori ya Tupanaarü nu, ñu̱xmata guxü̃ma yue.
16 2:16-17 Rü yexguma marü taxuxü̃ma maxü̃gu ga yema yatügü ga daiwa mexü̃ ga Equítuanewa íchoxü̃xü̃, rü chomaxã nidexa ga Cori ya Tupana rü choxü̃ ñanagürü:
17 Nüü̃ nadau 2:16
18 2:18-19 “Ñu̱xmatatama nixĩ i nawa pechopetüxü̃ i ngẽma Moáarü üyeane, rü ñu̱xũchi Árwaama tá pexĩ. Natürü ngẽxguma tá namaxã ipeyarüxĩxgu i ngẽma Amóü̃tanüxü̃ i Loxtaagü ixĩgüxü̃, ¡rü taũtáma penachixewegü rü taũtáma penadai! Erü choma rü taxuxü̃táma bai i íxraxü̃ i norü naane tá pexna chaxã, erü choma nixĩ i Loxtaagüna chanaxãxü̃ i ngẽma naane nax noxrügüxü̃ yaxĩxü̃ca̱x”, ñanagürü ga Tupana.
19 Nüü̃ nadau 2:18
20 Rü yema naane rü yexgumarüxü̃ ta Refátanüxü̃arü naane nixĩ, yerü ga nũxcüma rü Refátanüxü̃ nawa namaxẽ. Rü nüma ga Amóü̃tanüxü̃ rü Chamchúü̃tanüxü̃maxã nanaxugü ga yema Refátanüxü̃.
21 Rü yema duü̃xü̃gü ga Refátanüxü̃ rü naporaxüchi rü namuxũchi. Rü yema duü̃xü̃gü rü ñoma Anáxtanüxü̃rüxü̃ nimáchanexü̃chi. Natürü ga Cori ya Tupana rü Amóü̃tanüxü̃xü̃ namu nax nadaiaxü̃ca̱x. Rü yemaacü ga yema Amóü̃tanüxü̃ rü yexma naxãchiü̃gü.
22 Rü yema Cori ya Tupana Echaútanüxü̃ca̱x naxüxü̃rüxü̃ rü yema Amóü̃tanüxü̃ca̱x nanaxü. Yerü nüma ga Cori ya Tupana rü Echaútanüxü̃axü̃́ nanatauxchaxẽxẽ nax nadaiaxü̃ca̱x ga yema Oréutanüxü̃ ga Cheíanewa maxẽxü̃, nax nayauxgüãxü̃ca̱x ga yema naane i ñu̱xma rü ta nagu naxãchiü̃güxü̃.
23 Rü yematama nüxü̃ nangupetü ga yema Ebéutanüxü̃ ga Gáchaarü ngaicamana yexmagüne ga ĩanexacügüwa maxẽxü̃. Rü yema Firitéugü ga capaxũ ga Crétawa ne ĩxü̃ nixĩ ga yema Ebéutanüxü̃xü̃ daixü̃. Rü yexma norü naanegu naxãchiü̃gü.
24 Rü yemawena rü nüma ga Cori ya Tupana rü ñanagürü: “¡Ipexĩãchi, rü natüacü i Arnóü̃ pichoü̃! Choma rü wüxigu norü naanemaxã tá pexme̱xgu chananguxẽxẽ i ngẽma Amoréu i Chióü̃ i ĩane ya Ebóü̃arü ãẽ̱xgacü. ¡Rü norü naanegu pechocu rü Chióü̃maxã pegü peda̱i̱x!
25 Rü ñu̱xmawena rü tá muü̃ naxca̱x íchanguxẽxẽ i guxü̃ i nachixü̃anecüã̱x i ñoma i naanewa ngẽxmagüxü̃ nax pexü̃ namuü̃exü̃ca̱x. Rü ngẽxguma pechigaxü̃ naxĩnüegu rü muü̃maxã tá nidu̱xruxe rü tá poraãcü nanaxĩ̱xãchiãẽgü”, ñanagürü.
Iraétanüxü̃ rü ãẽ̱xgacü ga Chióü̃xü̃ narüpomaegü
26 2:26-27 Rü yexguma chianexü̃ ga Caremóxwa íyexmaxü̃wa, rü choma ga Moiché rü chanamuãchitanü ga ñuxre ga orearü ngeruü̃gü nax mea Ebóü̃arü ãẽ̱xgacü ga Chióü̃maxã yanadexagüxü̃ca̱x rü namaxã nüxü̃ yanaxugüexü̃ca̱x ga chorü ore ga ñaxü̃: “Nagu charüxĩnü nax curü naanewa tachopetüxü̃. Rü nagu tá taxĩ i ngẽma taxü̃ i nama i curü naanewa dapetüxü̃ rü taxũtáma nüxna ítachocu i ngẽma namaarü tügünecüwawa rü bai i norü to̱xwecüwawa.
27 Nüü̃ nadau 2:26
28 2:28-29 Rü diẽrumaxã tá cuxü̃́ tanaxütanü i ngẽma õna i tanaxwa̱xegüxü̃ rü ñu̱xũchi ngẽma dexá i torü axeruxü̃ ixĩxü̃. Rü ngẽma cuxna naxca̱x chacaxü̃xicatama nixĩ nax ngéma toxü̃ cuchopetüxẽẽxü̃, yexgumarüxü̃ ga toxü̃́ natauxchaxẽẽãxü̃ nax norü naanewa tachopetüxü̃ ga yema Echaútanüxü̃ ga Cheíwa maxẽxü̃ rü ñu̱xũchi yema Moátanüxü̃ ga Árwa maxẽxü̃. Erü tanaxwa̱xe nax tichoü̃xü̃ i ngẽma natü i Yudáü̃ nax nawa tangugüxü̃ca̱x i ngẽma naane i Cori ya torü Tupana tá toxna ãxü̃”, ñaxü̃ ga chorü ore.
29 Nüü̃ nadau 2:28
30 Natürü gumá ãẽ̱xgacü ga Chióü̃ rü tama norü naanewa tüxü̃ nachopetüxẽẽchaü̃, yerü nüma ga Cori ya tórü Tupana rü naãxẽwa nananguxẽxẽ nax tüxna nachúxãxü̃ca̱x nax norü naanewa ichopetüxü̃. Rü yemaacü nanaxü ga tórü Cori ya Tupana yerü nanaxwa̱xe nax yemaacü pexme̱xgu nanguxü̃ca̱x ga yema Amoréutanüxü̃arü ãẽ̱xgacü. Rü ngẽmaãcü pexme̱xwa nangẽxma i ñu̱xmax.
31 Rü yexguma ga Cori ya Tupana rü choxü̃ ñanagürü: “Ñaa ngunexü̃gu rü cuxme̱xwa chanangexmaxẽxẽ i Chióü̃ rü ñu̱xũchi guxü̃ma i nachixü̃ane. ¡Rü nagu naxücu i ngẽma norü naane rü ñu̱xũchi namaxã inacua̱x!” ñanagürü.
32 2:32-33 Rü yexguma ga Chióü̃ rü guxü̃ma ga norü churaragümaxã toxca̱x naxĩ nax yemaacü Yaáchagu tamaxã nügü nada̱i̱xü̃ca̱x. Natürü nüma ga Cori ya tórü Tupana rü taxme̱xgu nanayixẽxẽ. Rü yemaacü tayama̱x ga Chióü̃, rü tanadai ga yema nanegü rü ñu̱xũchi guxü̃ma ga yema norü churaragü.
33 Nüü̃ nadau 2:32
34 Rü guxü̃nema ga guma norü ĩanegü rü taxme̱xwa nayexmagü rü yemaacü tanadai ga guxü̃ma ga yatüxü̃gü rü ngexü̃gü rü buxü̃gü. Rü taxuxü̃ma ga maxü̃xü̃ ítayaxüxẽxẽ.
35 Rü yema yigüxü̃́ idexü̃ nixĩ ga wocagü rü ñu̱xũchi yema yemaxü̃gü ga itatanüxü̃ ga guma ĩanegü ga ipuxü̃newa nüxü̃ irüngaugüxü̃. Rü yemaxicatama nixĩ ga yigüxü̃́ idexü̃.
36 Rü guma ĩane ga Aroé ga natü ga Arnóü̃cutüwa yexmanewa rü ñu̱xũchi guma ĩane ga doxonexü̃wa yexmanewa itanaxügü nax napuxü̃xü̃ ñu̱xmata Garaáxgu yacuá. Rü nataxuma ga ĩane ga tüxü̃ rüporamaene. Yerü nüma ga Cori ya tórü Tupana rü taxme̱xgu nanayixẽxẽ ga guxü̃nema ga guma ĩanegü.
37 Rü yema naanegü ga tama tapuxü̃xü̃ nixĩ ga Amóü̃tanüxü̃arü naanegü, rü guxü̃ma ga yema naane ga natü ga Yabóxwa yexmaxü̃, rü guma ĩanegü ga máxpü̱xanexü̃wa yexmagüne, rü ñu̱xũchi guxü̃ma ga yema togü ga naanegü ga Cori ya tórü Tupana tama naxwa̱xexü̃ nax tanapuxü̃.
