Deuteronómio 20:1-20
20 Rü ngẽxguma tá ipexĩãchigu nax perü uanügümaxã pegü pedaixü̃ca̱x, rü woo ngẽma perü uanügü rü pexü̃ namumaegu rü namuxgu i norü cowarugü rü norü carugü ya daiweü̃gü, rü taxũtáma nüxü̃ pemuü̃e, erü petanüwa tá nangẽxma ya perü Cori ya Tupana ga Equítuanewa pexü̃ ígaxü̃cü.
2 Rü ngẽxguma nawa nanguxgu i ora nax perü uanügümaxã pegü pedaixü̃ rü nüma ya chacherdóte rü tá perü churaragütanüwa naxũ rü tá nayaxucu̱xẽ rü ñanarügü tá nüxü̃:
3 “Pa Iraétanüxü̃, ¡Choxü̃́ iperüxĩnüe! Ñu̱xma rü tá perü uanügümaxã pegü pedai, natürü tama name i peyarümaãchitanü, rü pemuü̃e, rü naxcha̱xwa pidu̱xrue rü peba̱i̱xãchie.
4 Erü nüma ya perü Cori ya Tupana rü pexü̃tawa nangẽxma, rü nüma tá nixĩ i nadaiaxü̃ i ngẽma perü uanügü, rü tá nüxü̃ pexü̃ narüporamaegüxẽxẽ”, ñanagürü tá.
5 Rü ngẽmawena rü ngẽma churaragüarü ãẽ̱xgacügü rü tá norü churaragüxü̃ ñanagürügü: “Rü ngẽxguma texé petanüwa naxü̱xgu ya wüxi ya tümapata ya ngexwacaxü̃ne ya taxũtáma nagu tapexü̃ne, rü name nax tümatapataca̱x tataeguxü̃, erü ngürüãchi nuxã daixgu tayu rü tá tomare i duü̃xü̃ nagu nape.
6 Rü ngẽxguma texé tüxü̃́ nangẽxmagu i tümaarü úbanecü i taguma tabuxarü oóxü̃, rü name nax tümatapataca̱x tataeguxü̃, erü ngürüãchi nuxã daixgu tayu rü tá tomare i duü̃xü̃ nanabuxu i tümaarü úbagü.
7 Rü ngẽxguma texé ingĩxchaü̃gu, natürü taxũta itingĩxgu, rü name nax tümatapataca̱x tataeguxü̃, erü ngürüãchi nuxã daixgu tayu rü tá tomare i yatü ngĩmaxã ningĩ i ngẽma nge i ngĩmaxã taxãma̱xchaü̃cü”, ñanagürügü tá.
8 Rü ngẽmawena rü ngẽma churaragüerugü rü wena tá norü churaragüxü̃ ñanagürügü: “Rü ngẽxguma texé muü̃gu, rü name nax tümapataca̱x tataeguxü̃ nax ngẽmaãcü tama tanamuü̃xẽẽxü̃ca̱x i ngẽma togü i tümamücügü”, ñanagürügü tá.
9 Rü ngẽxguma marü yagúegagügu i ngẽma churaragüerugü rü ñu̱xũchi ngẽma capitáü̃gü tá norü churaragüpe̱xegu nachigü rü ngẽmaãcü tá inaxĩãchi.
10 Rü ngẽxguma marü nüxü̃ pingaicagu ya wüxi ya ĩane ya naxca̱x ípeyachoãchine, rü penaxwa̱xe nax mea namaxã pidexagüxíraxü̃ i ngẽma norü duü̃xü̃gü rü nüxna pecaxü̃ nax tama pegü namaxã pedaixü̃ca̱x.
11 Rü ngẽxguma ngẽma duü̃xü̃gü ya yima ĩanewa maxẽxü̃ rü nayauxgüã̱xgu i ngẽma namaxã nüxü̃ pixuxü̃, rü pexü̃ nachocuxẽẽgu, rü nümagü rü tá pexme̱xwa nangẽxmagü rü tá perü mugüruü̃gü nixĩgü.
12 Natürü ngẽxguma tama nayauxgüã̱xgu i ngẽma namaxã nüxü̃ pixuxü̃, rü tá nüxü̃ ípechomaeguãchi ya yima ĩane rü tá pegü namaxã pedai.
13 Rü nüma ya Cori ya Tupana rü tá pexme̱xgu nanayixẽxẽ i ngẽma duü̃xü̃gü. Rü pema rü taramaxã tá penadai i guxü̃ma i yatüxü̃gü i nawa ngẽxmagüxü̃.
14 Natürü i ngẽma ngexü̃gü rü buxü̃gü rü naxü̃nagü rü guxü̃ma ya yima ĩanewa ngẽxmagüxü̃ rü pexrü tá nixĩ. Rü pema rü tá penayaxu i guxü̃ma i ngẽma perü uanügüarü ngẽmaxü̃gü i perü Cori ya Tupana pexna ãxü̃.
15 Rü ngẽmatátama namaxã pexü ya guxü̃nema ya ĩanegü ya yáxü̃wa ngẽxmagüne rü tama ngẽma naane ya Tupana tá pexna ãxü̃wa ngẽxmagüne.
16 Natürü ngẽma naane ya Tupana tá pexna naxãxü̃ nax perü yixĩxü̃ca̱x rü taxuxü̃táma penamaxẽxẽ i ngẽma duü̃xü̃gü i ngéma ngẽxmagüxü̃.
17 20:17-18 Rü ngẽmaãcü taxuxü̃táma penamaxẽxẽxẽ i ngẽma Itítanüxü̃ rü Amoréutanüxü̃ rü Canaáü̃tanüxü̃ rü Ferechéutanüxü̃ rü Ebéutanüxü̃ rü Yebuchéutanüxü̃. Rü perü Cori ya Tupana pexü̃ muxü̃ãcü tá penadai i guxü̃ma i ngẽma duü̃xü̃gü nax tama pexü̃ nangúexẽẽxü̃ca̱x i ngẽma nacüma i chixexü̃chixü̃ i norü tupananetaxü̃ namaxã yacua̱xüü̃güxü̃, rü tama ngẽmamaxã perü Cori ya Tupanape̱xegu chixexü̃gu pexü̃ nayixẽẽxü̃ca̱x.
18 Nüü̃ nadau 20:17
19 Rü ngẽxguma wüxi ya ĩane penapuchaü̃gu rü muxü̃ma i ngunexü̃gü nüxü̃ ípechomaeguãchigu, rü tama name nax peyayexü̃ i ngẽma nanetügü i oṍxü̃. Erü tá pexü̃́ name nax penangṍxü̃ i norü o, rü ñu̱xũchi nanetügümare nixĩgü rü tama duü̃xü̃gürüxü̃ nügü ínapoxü̃.
20 Natürü ngẽma naigümare i tama ingṍxü̃arü oṍxü̃ rü marü name nax peyayexü̃ nax ngẽmawa penaxüxü̃ca̱x i perü toxṍõnegü nax nagu pechocuxü̃ca̱x ya yima ĩane rü penapu̱xuxü̃ca̱x.
