Deuteronómio 21:1-23
21 21:1-2 Rü ngẽxguma marü nawa pengẽxmagügu i ngẽma naane i perü Cori ya Tupana tá pexna ãxü̃ rü texé wüxi i naanegu nüxü̃ yangauxgu i wüxi i duü̃xü̃ i yuxü̃, natürü tama nüxü̃ pecuáxü̃ nax texé yamáxü̃, rü ngẽxguma i perü ãẽ̱xgacügü rü guxchaarü mexẽẽruü̃gü rü tá nanangugügü nax ngexnerüüne ya ĩanegü nüxna ngaicamagüxü̃ i ngẽma nachica i ngẽma duü̃xü̃ nagu yuxü̃.
2 Nüü̃ nadau 21:1
3 Rü ngẽxguma i nüma ya yima ĩane ya nüxna ngaicamanearü ãẽ̱xgacügü rü tá nayayauxgü i wüxi i wocaxacü i ngexü̃ i taguma toxcunaxãruxü̃ nax napuracüxü̃ca̱x.
4 Rü nawa tá nanagagü i wüxi i doxonexü̃ i taguma nagu naxüanegüxü̃ rü taguma nagu natoegüxü̃ i nüxü̃́ ngẽxmaxü̃ i wüxi i natü i taguma yachexü̃. Rü nüma i ngẽma ãẽ̱xgacügü rü ngẽxma tá nayapoyenaxãgü i ngẽma wocaxacü.
5 Rü ngẽmawena i ngẽma chacherdótegü i Lebítanüxü̃ rü tá ngéma naxĩ. Rü nümagü nixĩ i Cori ya Tupana nüxü̃ unetaxü̃ nax norü puracümaxã inacua̱xgüxü̃ca̱x rü naégagu mexü̃ duü̃xü̃gümaxã naxueguxü̃ca̱x. Rü nümagü nixĩ i namexẽẽgüaxü̃́ i guxü̃ma i duü̃xü̃güarü guxchaxü̃gü i ngẽxguma nügümaxã nanuegu rüe̱xna nügü nangaegu.
6 Rü ñu̱xũchi guxü̃ma i norü ãẽ̱xgacügü ya yima ĩane rü tá ngẽma wocaxacü i marü ipoyenaãxü̃xétüwa nügü naya̱u̱xme̱xgü.
7 Rü tá ñanagürügü: “Pa torü Tupanax, toma rü tama tayama̱x i ngẽma yatü rü tama nüxü̃ tadaugü nax texé yamáxü̃.
8 ¡Toxü̃ nangechaü̃, Pa Corix, i toma i curü duü̃xü̃gü i Iraétanüxü̃ ga Equítuanewa toxü̃ ícunguxü̃xẽẽxü̃. Rü ngẽma nax nayuxü̃ i wüxi i tama chixexü̃ üxü̃! Rü taxṹ i cuyatoguãchixẽxẽxü̃!” ñanagürügü tá.
9 Rü ngẽmaãcü tá petanüwa inarüxo nax yapeguãchixü̃ i ngẽma nax nayuxü̃ i ngẽma tama chixexü̃ üxü̃. Rü ngẽmaãcü Tupanape̱xewa tá mexü̃ pexü.
Ucu̱xẽgü naxca̱x i ngexü̃gü i daigu íyauxü̃xü̃
10 Rü ngẽxguma perü uanügümaxã pegü peda̱i̱xgu, rü perü Cori ya Tupana pexme̱xẽgu nayixẽẽgu nax ípenayauxü̃xü̃ca̱x i perü uanügü,
11 rü ngẽxguma natanüwa wüxíe i petanüwa ngĩxü̃ tada̱u̱xgu rü tüxü̃́ nangúchaü̃gu i wüxi i nge i mechametücü rü ngĩmaxã taxãma̱xgu,
12 rü name nax tümapatawa ngĩxü̃ tagaxü̃, rü tá ngĩxü̃ tamu nax ngĩgü yayoeruxü̃ rü ngĩgü ínayoü̃patüxü̃.
13 Rü ngẽmawena tá ícu̱xuchi ga yema ngĩxchiru ga nagu yacúxü̃ ga yexguma daigu ngĩxü̃ yayauxgügu. Rü to i mexü̃gu tá iyacu̱x. Rü tümapatawa tá ingẽxma. Rü wüxi ya tauemacü tá ngĩnatüca̱x rü ngĩéca̱x ixaure. Rü ngẽmawena rü marü name nax ngĩmaxã namaxü̃xü̃ i ngẽma Iraétanüxü̃. Rü ngĩma rü tá naxma̱x iyixĩ rü nüma rü tá ngĩte nixĩ.
14 Natürü ngẽmawena yixcüra ega nüma i ngẽma Iraétanüxü̃ rü ngĩxü̃ naxoxgu, rü name nax ngĩxü̃ yangẽ́xü̃ rü ngĩxü̃ yamuxü̃ nax ngĩchixü̃aneca̱x nataeguxü̃ca̱x. Natürü tama name nax ngĩmaxã nataxexü̃ rüe̱xna norü mugüruxü̃ ngĩxü̃ yaxĩxẽẽxü̃, erü ngĩma rü naxma̱xchire̱x iyixĩ.
Tauxcha naxca̱x i ngẽma nane i irüyamaexü̃
15 Rü ngẽxguma wüxi ya yatü rü nataxrema̱xgu, natürü wüxíexü̃tama nangechaü̃ rü yíxema togue rü tama tüxü̃ nangechaü̃. Natürü ngẽxguma yíxema taxre ya naxma̱xwa rü naxãnegu, rü yíxema naxma̱x ya tama tüxü̃ nangechaü̃xewa nabuxgu ya yimá nane ya nüxíraü̃cü,
16 rü ngẽxguma nawa nanguxgu i ngunexü̃ nax nanegüxü̃ yanuaxü̃ i norü ngẽmaxü̃gü i ngẽma yatü, rü taxuacütáma ngẽma ngĩxü̃ nangechaxü̃cü ngĩnena nanaxã i ngẽma rümumaexü̃ i norü ngẽmaxü̃gü, erü yíxema tama tüxü̃ nangechaxü̃xẽ ngĩne nixĩ ya nüxíraü̃cü, rü yimana nixĩ i naxüxü̃ i ngẽma rümumaexü̃ i ngẽmaxü̃gü.
17 Rü ngẽmaca̱x nanaxwa̱xe nax nüxü̃ nacuáxü̃ nax yima yixĩxü̃ ya nane ya yacü. Rü tá nüxna nanaxã i ngẽma rümumaexü̃ i norü ngẽmaxü̃gü, erü yima nixĩ ya nüxíraü̃cü ya nane. Rü ngẽmaca̱x nixĩ i nüxna naxüxü̃ i ngẽma rümumaexü̃ i ngẽmaxü̃gü.
Poxcu naxca̱x i ngẽma nanegü i tama nanatü rü naéga ĩnüexü̃
18 21:18-19 Rü ngẽxguma texé tüxü̃́ nangẽxmagu i tümane i tama nanatüga rü naéga ĩnüxü̃, rü woo ngẽxguma tanapoxcugügu rü tama ĩnüchaü̃xü̃, rü yíxema nanatü rü naé rü yima ĩanearü ãẽ̱xgacügüpe̱xewa tá tanagagü.
19 Nüü̃ nadau 21:18
20 Rü ñatagürügü tá: “Ñaa tone rü tama toga naxĩnüchaü̃ rü nanuama rü taxuwama toga naxĩnüchaü̃, rü nüma rü chixexü̃arü üruxü̃ nixĩ rü nangãxwa̱xe”, ñatagürügü.
21 Rü ngẽxguma guxü̃ma i ngẽma duü̃xü̃gü ya yima ĩanewa maxẽxü̃ rü tá nutamaxã ínanamuxũchigü rü ngẽmaãcü tá nayama̱xgü. Rü ngẽmaãcü tá peyanaxoxẽxẽ i ngẽma chixexü̃ i perü ĩanewa ngẽxmaxü̃. Rü ngẽxguma i ngẽma togü i Iraétanüxü̃ nüxü̃ nacua̱xgügu rü tá namuü̃e nax naxügüãxü̃ i chixexü̃.
Mugü naxca̱x i ngẽma duü̃xü̃gü i taxü̃ i chixexü̃ ügüxü̃
22 21:22-23 Rü ngẽxguma wüxi i duü̃xü̃ rü taxü̃ i guxchaxü̃ üxgu rü ngẽmaca̱x naigu nügü nawẽxnaxãgu, rü tama name nax chütacü ngéma natuxü̃ i naxü̃ne. Rü nanaxwa̱xe nax ngẽmatama i ngunexü̃ i nagu nügü nawẽxnaxãxü̃gu inatáxü̃ i ngẽma naxü̃ne. Erü Tupana rü chixexü̃ namaxã naxuegu i ngẽma wẽxnaxãcü yuxü̃. Rü tama name nax ngẽmamaxã penachixexẽẽxü̃ i ngẽma naane ya Tupana tá pexna ãxü̃.
23 Nüü̃ nadau 21:22
