Deuteronómio 22:1-30
22 Rü ngẽxguma narütau̱xgu i tümamücüarü woca rüe̱xna carnéru rü ngẽxguma texé nüxü̃ da̱u̱xgu rü tama name nax tanangexrümarexü̃. Rü nanaxwa̱xe nax tümamücüxü̃tawa tanagaxü̃.
2 Natürü ngẽxguma norü yora i ngẽma naxü̃na tama tümaarü ngaicamagu napexgu rüe̱xna tama nüxü̃ tacua̱xgu nax texéarü yixĩxü̃ i ngẽma naxü̃na, rü name nax tümapatawa tanagaxü̃ ñu̱xmatáta tümaxü̃tawa naxca̱x íyaca i ngẽma norü yora. Rü ngẽxguma i tüma rü name nax norü yoraáxü̃ tanatáeguxẽẽxü̃.
3 Rü ngẽxgumarüxü̃ ta ega texéaxü̃́ narütau̱xgu i wüxi i búru rüe̱xna wüxi i naxchiru, rüe̱xna toamachigü i ngẽmaxü̃, rü ngẽxguma texe nüxü̃ da̱u̱xgu rü tama name nax tanangexrümarexü̃. Rü nanaxwa̱xe nax norü yoraáxü̃ tanatáeguxẽẽxü̃.
4 Rü ngẽxguma texé nüxü̃ da̱u̱xgu i tümamücüarü woca rüe̱xna búru i naxwetamaxã namagu nguxü̃, rü tama name nax tanangexrümarexü̃. Rü name i norü yoraxü̃ tarüngü̃xẽxẽ nax inachixü̃ca̱x i norü búru.
5 Rü ngẽma ngexü̃gü rü tama name nax yayatüchiruxü̃. Rü ngẽma iyatüxü̃ rü tama name nax yangexchiruxü̃. Rü Tupana rü tama namaxã nataãxẽ i ngẽma nacüma.
6 Rü ngẽxguma texé wüxi i naixtanüwa rüe̱xna waixü̃müanewa nüxü̃ da̱u̱xgu i wüxi i werichiaxü̃, rü ngẽma weri rü naxchiãü̃wa nangẽxmagu naxacügüxü̃ ínanaitanügu rüe̱xna nacharaü̃tanügu íyañuxgu rü tama name nax guxü̃ma i tümaémaxã tüxü̃ nadexü̃ i naxacügü.
7 Rü ngẽxguma tanadexgu i ngẽma naxacügü rü name nax tayañaxẽẽxü̃ i ngẽma naé. Rü ngẽxguma ngẽmaãcü penaxü̱xgu rü tá mucü ya taunecütama taãxẽwa pemaxẽ.
8 Rü ngẽxguma texé ngexwacaxü̃ne ya tümapata taxü̱xgu rü name nax ítanapoxeguxü̃ i naétüwa ya tümapata nax ngẽmaãcü taxúema ngéma rünguxü̃ca̱x rü ngẽmaãcü tama yatümaguãchixü̃ca̱x ega ngürüãchi texé ngéma rünguxgu rü tayu̱xgu.
9 Rü ngẽxguma texé úbanecü tüxü̃́ ngẽxmagu rü tama name nax nanecügutama tanatoxü̃ i natoraü̃xü̃ i nanetü. Rü ngẽxguma ngẽmaãcü tanaxü̱xgu rü Tupanana tá tanaxuaxü̃ i guxü̃ma i ngẽma nanetügüarü o.
10 Rü ngẽxguma peane pexaimüanegu rü tama name i wüxi i woca rü búrumaxã ãmücüxü̃maxã penaxaimüane i perü naane.
11 Rü ngẽma naxchiru i nagu picu̱xgüxü̃ rü tama name nax ngẽma carnéruta̱xamaxã rü línuchimaxã penaxücuxẽẽxü̃.
12 Rü ngẽma cuxchiru i düxruxü̃ i mámüxü̃ rü name i norü ãgümücüpe̱xewa cunapaicu i norü ngã̱xãẽruü̃gü i bopü̱xüxü̃.
Mugü naxca̱x i ãma̱xchiga rü ãtechiga
13 Rü ngẽxguma wüxi i yatü rü ngĩmaxã yangĩxgu i wüxi i nge rü ngĩmaxã namaxü̱̃xgu, natürü ngẽmawena rü marü tama nangĩxwa̱xegu,
14 rü ngẽma nax ngĩxü̃ ínatáxchaü̃xü̃ca̱x, rü nüxü̃ yaxugu nax naxma̱x rü marü to i yatümaxã namaxü̃xü̃ naxü̃pa ga nax yangĩxü̃,
15 rü ngẽxguma i ngĩnatü rü ngĩé i ngẽma nge rü tá ĩanearü ãẽ̱xgacügüpe̱xewa taxĩ. Rü ngéma tá tanangegü i ngẽma naxchápenüxü̃ i cua̱xruxü̃ ixĩxü̃ nax ngĩma rü taguma yatü ngĩxü̃ nacuáxü̃.
16 Rü nüma i ngĩnatü rü tá ãẽ̱xgacügüxü̃ ñanagürü: “Choma rü daa yatüna ngĩxü̃ chamu i chauxacü nax naxma̱x yaxĩxü̃ca̱x, natürü i ñu̱xma i nüma rü ngĩxü̃ naxo.
17 Rü nüxü̃ nixu nax ngĩma ya chauxacü rü marü to i yatü ngĩxĩne cuáxü̃ naxü̃pa ga nax ngĩmaxã naxãmaxü̃. Natürü ñaa nixĩ i cua̱xruxü̃ nax ngĩma rü taguma yatü ngĩmaxã ipexü̃”, ñanagürü. Rü ngẽxguma ya ngĩnatü rü tá ngẽma ãẽ̱xgacügüpe̱xegu nayangexechi i ngẽma naxchápenüxü̃ i cua̱xruxü̃ ixĩxü̃.
18 Rü ngẽxguma i nümagü i ãẽ̱xgacügü rü tá nayayauxgü i ngẽma yatü. Rü tá nanapoxcue.
19 Rü ñu̱xũchi ngẽma ãẽ̱xgacügü rü tá ngẽma yatümaxã nanaxuegugü nax ngĩnatüaxü̃́ naxütanüãxü̃ca̱x i 100 tachinü i diẽru, nagagu nax ngĩxü̃ nachixechigaxẽẽxü̃ i ngẽma pacü ya Iraétanüxü̃ ixĩcü ya tagumachire̱x yatü ngĩxĩne cua̱xcü. Rü ngẽmaãcü i ngẽma yatü rü taxuacütáma ngĩxü̃ ínata̱x, rü ngĩma rü guxü̃gutáma naxma̱x iyaxĩ.
20 Natürü ngẽxguma aixcüma yixĩxgu nax ngĩma i pacü rü marü yatüxü̃ ngĩxĩne cuáxü̃ naxü̃pa nax naxãtexü̃,
21 rü ngẽxguma i ngẽma ĩanearü ãẽ̱xgacügü rü ngĩnatüpataarü ĩã̱xgu tá ngĩxü̃ nayamugü. Rü yima ĩanearü yatügü rü ngẽxma tátama nutagümaxã ngĩxü̃ nima̱xgü nagagu i ngẽma chixexü̃chixü̃ i naxüxü̃ i Iraétanüxü̃tanüwa i ngĩnatüpatawa. Rü ngẽmaãcü tá peyanaxoxẽxẽ i ngẽma chixexü̃ i petanüwa ngẽxmaxü̃.
22 Rü ngẽxguma texé íyanguéxü̃gu i wüxi i yatü i wüxi i nge i ãtecümaxã maxü̃xü̃, rü ngẽma taxre rü tá yu namaxã naxuegugü. Rü ngẽmaãcü tá peyanaxoxẽxẽ i ngẽma chixexü̃ i Iraétanüxü̃tanüwa ngẽxmaxü̃.
23 Rü wüxi i pacü i taguma yatüxü̃ cua̱xcü i wüxi ya yatümaxã ãtechaü̃cü, rü ngẽxguma ĩanegu to i yatü ngĩxü̃ nga̱u̱xgu rü ngĩmaxã namaxü̃gu
24 rü ngẽma yatü rü ngẽma pacü rü tá ĩanearü ãẽ̱xgacügüpe̱xewa nanagagü nax namaxã naxuegugüãxü̃ca̱x nax nutamaxã ínamuxũchigüãxü̃ca̱x nax ngẽmaãcü nayuexü̃ca̱x. Rü ngĩma i ngẽma pacü rü tá ngĩxü̃ nima̱xgü erü ĩanewatama nangẽxmaãcü tama ngü̃xẽẽca̱x íica nax duü̃xü̃gü ngĩétüwa chogügüxü̃ca̱x. Rü nüma i ngẽma yatü rü tá nayu nagagu nax wüxi i pacü i to i yatümaxã ãtechaü̃cümaxã nax namaxü̃xü̃. Rü ngẽmaãcü tá peyanaxoxẽxẽ i ngẽma chixexü̃ i petanüwa ngẽxmaxü̃.
25 Natürü ngẽxguma wüxi i yatü rü ngĩxica naanegu ngĩxü̃ nga̱u̱xgu i wüxi pacü i to i yatümaxã ãtechaü̃cü, rü ngẽxma ngĩxü̃ yayauxmaregu i ngẽma yatü, rü ngẽma pacü rü taxũtáma iyu, natürü nüma i ngẽma yatü i ngĩxü̃ iyaxuxü̃ rü tá nayama̱xgü.
26 Rü ngĩma i ngẽma pacü rü taxuca̱xma ngĩxü̃ nima̱xgü erü taxuxü̃ma i chixexü̃ ixü. Natürü nüma i ngẽma yatü i ngĩxü̃ iyaxuxü̃ rü nanaxwa̱xe nax nayuxü̃, erü ngẽma chixexü̃ i naxüxü̃ rü ñoma wüxi ya namücüxü̃ yamáxü̃rüxü̃ nixĩ.
27 Erü nüma i ngẽma yatü rü ngĩxicatama naanegu ngĩxü̃ nangau i ngẽma pacü, rü ngĩma rü chi woo wáita naxü̱xgu rü ngü̃xẽẽca̱x ínaca̱xgu rü taxúema ngĩxü̃ ítapoxü̃.
28 Rü ngẽxguma wüxi i yatü rü ngĩxü̃ yangauxgu i wüxi i nge i taguma yatüxü̃ cua̱xcü, rü taxuxü̃ma i yatümaxã ãtechaü̃cü, rü ngẽxguma ngẽma yatü ngĩxü̃ yayaxu̱xgu rü ngĩmaxã namaxü̱̃xgu, rü duü̃xü̃gü nüxü̃ daugügu,
29 rü nüma i ngẽma yatü rü nanaxwa̱xe nax ngĩnatüaxü̃́ naxütanüãxü̃ i 50 tachinü i diẽru. Rü ngẽma nax ngĩxü̃ yayauxãcümare ngĩmaxã namaxü̃xü̃gagu, rü nanaxwa̱xe nax ngĩmaxã naxãxma̱xü̃chixü̃. Rü tagutáma ngĩxü̃ ínata̱x rü ngĩma rü guxü̃gutáma naxma̱x iyixĩ.
30 Rü tama name nax texé tümanatüma̱xmaxã maxü̃xü̃, erü ngẽma rü wüxi i taxü̃ i chixexü̃ nixĩ tümanatüca̱x.
