Deuteronómio 23:1-25
23 Rü yíxema iduxuchipü̱xücharexe rüe̱xna wíechiraxü̃xẽ rü taxucürüwama Tupanaarü duü̃xü̃güarü ngutaque̱xegu taxücu.
2 Rü yíxema ngürüwaxü̃marexe rü taxucürüwama Tupanaarü duü̃xü̃güarü ngutaque̱xegu taxücu, rü woo nataagü i tá ingóetanüxü̃ rü taxucürüwama ngẽxma nachocu woo norü 10 i natücumüwa nangu i ngẽma ngexwaca ingóetanüxü̃.
3 Rü ngẽma Amóü̃tanüxü̃ rü ngẽma Moátanüxü̃ rü tagutáma Tupanaarü duü̃xü̃güarü ngutaque̱xegu nachocu rü woo norü 10 i natücumüwa nangu i ngẽma ngexwaca ingóetanüxü̃ rü tagutáma ngẽxma nachocu.
4 Yerü nümagü ga Amóü̃tanüxü̃ rü Moátanüxü̃ rü tama pexü̃ nayauxgü õnamaxã rü axexü̃maxã ga yexguma Equítuanewa ípechoxü̃gu. Rü nümagü rü naétü nüxü̃́ nanaxütanügü ga Balaáü̃ ga Beúx nane ga Mechopotámiaarü ĩane ga Petúxwa ne ũcü nax chixexü̃ pemaxã naxueguxü̃ca̱x. Natürü ga Tupana rü Balaáü̃ãẽwa nananguxẽxẽ nax mexü̃ama pemaxã naxueguxü̃ca̱x rü tama i chixexü̃.
5 Rü yemaacü ga nüma ga Cori ya perü Tupana rü tama Balaáü̃ga naxĩnü, rü Balaáü̃ãẽwa nananguxẽxẽ nax mexü̃ama pemaxã naxueguxü̃ca̱x rü tama i chixexü̃, yerü pexü̃ nangechaü̃.
6 Rü ngẽma Amóü̃tanüxü̃ rü Moátanüxü̃ ¡rü pema rü guxü̃ i ngunexü̃gü i nagu pemaxẽxü̃gu rü tagutáma namaxã perüngüxmüe rü tagutáma nüxü̃ perüngü̃xẽẽgü!
7 Natürü ngẽma Edóü̃tanüxü̃ rü tama name nax naxchi pexaiexü̃ erü nümagü rü petanüxü̃ nixĩgü. Rü ngẽxgumarüxü̃ ta i ngẽma Equítuanecüã̱xgü rü tama name nax naxchi pexaiexü̃, yerü pemax rü mucü ya taunecü nachixü̃anewa pemaxẽ.
8 Rü ngẽma Edóü̃tanüxü̃ rü Equítuanecüã̱xgü rü marü name nax nataagüxacügü rü Tupanaarü duü̃xü̃güarü ngutaque̱xegu nachocu.
Mugü i ãũãchigüxü̃chiga
9 Rü ngẽxguma daiwa pexĩxgu rü wüxi i nachicagu peyapegügu, rü name i pegüna pedaugü nax tama penaxüxü̃ca̱x i ta̱xacürü chixexü̃ i Tupanape̱xewa tama mexü̃.
10 Rü ngẽxguma wüxíe chütacü tümaanegüwa ngúchaü̃ taxü̃netagu rü itabamügu rü taxãũãchi. Rü name nax ítaxũxũxü̃ i ngẽma ípepegüxü̃wa, rü ngẽma ngunexü̃ rü taxuacütáma tixücu.
11 Natürü ngẽxguma marü nachütachaü̃gu rü tá naxaiya nax ngẽmaãcü chütacü wena yaxücuxü̃ca̱x i ngẽma ípepegüxü̃wa.
12 Rü ngẽxguma pewo̱xegüchaü̃gu, rü penaxwa̱xe nax pexü̃́ nangẽxmaxü̃ i wüxi i nachica i woetama ngẽmaruxü̃ ixĩxü̃ i ípepegüxü̃arü yáxü̃waxü̃ra ngẽxmaxü̃.
13 Rü perü ngẽmaxü̃ nagu nuxü̃tanüwa rü penaxwa̱xe nax pexü̃́ nangẽxmaxü̃ i wüxi ya nai ya ãmagune nax yimamaxã peyaxaixmaxü̃xü̃ca̱x ya peü̃ ega ngẽxguma wo̱xewa pexĩgu rü yixcama ngẽmamaxã waixü̃mümaxã penagüétüxü̃ca̱x ya peü̃.
14 Erü nüma ya Cori ya Tupana rü petanüwa naxũũxü̃ nax pexna nadauxü̃ca̱x rü perü uanügüxü̃ pexü̃ naporamaegüxẽẽxü̃ca̱x. Rü ngẽmaca̱x penaxwa̱xe nax ngẽma ípepegüxü̃wa rü wüxi i nachica i üünexü̃ nax yixĩxü̃. Rü ngẽmaca̱x penaxwa̱xe nax nangemataxü̃ rü nataxuxü̃ma i ta̱xacürü ãũãchixü̃ ya Tupana tama namaxã taãẽxü̃. Erü ngẽxguma taxũtáma ngẽmaãcü penaxü̱xgu rü nüma ya Tupana rü tá pexna nixũgachi.
Mugüruxü̃chiga
15 Rü ngẽxguma wüxi i mugüruxü̃ norü corina yaxũxgu rü ngü̃xẽẽca̱x pexna nacaxgu nax pexü̃tagu yanacúxü̃ca̱x, rü tama name nax norü corica̱x penamueguxü̃.
16 Narümemae nax mea penayaxuxü̃ rü nüxü̃́ penatauxchaxẽẽxü̃ nax nüma nanaxwa̱xene ya ĩanewa namaxü̃xü̃ca̱x i Iraéanewa. ¡Rü taxúetama tanachixewe!
Iraétanüxü̃ rü tama name i naxca̱x nadauxü̃taegü i nacüma i chixexü̃ i togü ügüxü̃
17 ¡Rü taxũtáma naxca̱x pedauxü̃tae i ngẽma nacüma i chixexü̃ i ngẽma togü i duü̃xü̃gü i tama yaxõgüxü̃ nagu ĩxü̃ i ngẽxguma diẽruca̱x naxü̃nemaxã nataxeãcüma norü tupananetagüxü̃ yacua̱xüü̃gügu! ¡Rü bai i wüxi i ngexü̃ rüe̱xna wüxi i yatüxü̃ naxca̱x nadauxü̃tae i ngẽma nacüma!
18 Rü taxũtáma Tupanapatawa penange i diẽru i ngẽma nacüma i chixexü̃wa ne ũxü̃ nax ngẽmaãcü penaxütanüxü̃ca̱x i wüxi i uneta i Tupanamaxã pexüxü̃. Erü ngẽma nacüma rü Tupanape̱xewa rü poraãcü nachixe.
Diẽru i togüna pexãxü̃ rü tá nangearü üétüã̱x
19 Rü ngẽxguma pemücüna diẽru pexãxgu nax yixcüamaxü̃ra pexü̃́ tá natáeguxẽẽxü̃ca̱x, ¡rü taxṹ i penaxwa̱xexü̃ nax norü üétümaxã pexü̃́ tá nataeguxü̃! Rü nüetama nixĩ ega woo diẽru yixĩxgu, rüe̱xna õna yixĩxgu, rüe̱xna ngexü̃rüüxü̃mare i ngẽmaxü̃gü i üétüãcü itaxeguxẽẽxü̃ yixĩxgu.
20 Rü ngẽma duü̃xü̃ i to i nachixü̃anecüã̱x rü marü name nax guxü̃ i norü üétümaxã pexü̃́ natáeguxẽẽxü̃ i ngẽma pexü̃́ nangetanüxü̃. Natürü tama name nax ngẽma pemücümaxã pexüxü̃. Rü ngẽxguma tá nixĩ ya Cori ya Tupana i pexü̃ nangü̃xẽẽxü̃ nawa i guxü̃ma i perü puracü i pexüxü̃ nawa i ngẽma naane i tá peyaxuxü̃wa.
21 Ngẽxguma wüxi i uneta Cori ya perü Tupanaca̱x pexü̱xgu, rü penaxwa̱xe nax paxãma peyanguxẽẽxü̃. Erü ngẽxguma tama paxa peyanguxẽẽgu, rü nüma ya Cori ya perü Tupana rü tá pexna naca naxca̱x i ngẽma perü uneta. Rü Tupanape̱xewa rü pecadu tá nixĩ ega tama peyanguxẽẽgu i ngẽma perü uneta.
22 Rü ngẽxguma taxuxü̃ma i uneta pexü̱xgu, rü taxuxü̃ma i chixexü̃ pexü.
23 Natürü ngẽxguma pema rü perü ngúchaü̃maxã Cori ya perü Tupanaaxü̃́ uneta pexü̱xgu, rü name nixĩ nax aixcümama peyanguxẽẽxü̃.
24 Ngẽxguma cumücüarü úbanecüwa cuxũxgu, rü name nax cunangṍxü̃ i ngẽma cuma cunaxwa̱xexü̃ i úbaarü o. Natürü tama name nax curü pexchigu ícuyangexü̃ i úba.
25 Rü ngẽxguma cumücüarü trigunecüwa cuxũxgu rü name nixĩ i cuxme̱xmaxã cuyacawe i ñuxre i ngẽma tríguarü o. Natürü tama name nax cüxchimaxã cuyawíxü̃ i ngẽma trigu.
