Deuteronómio 26:1-19
26 26:1-2 Rü pema rü ngẽxguma nagu pechocugu rü nawa pengẽxmagügu i ngẽma naane i Cori ya Tupana tá pexna ãxü̃, rü ngẽma nüxíraxü̃xü̃ i penetü i peanegu petogüxü̃arü o rü tá wüxi i pechigu penanucu. Rü nawa tá cunana i ngẽma nachica i Cori ya Tupana nüxü̃ unetaxü̃ nax nawa nangẽxmaxü̃.
2 Nüü̃ nadau 26:1
3 Rü naxü̃tawa tá cuxũ ya yima chacherdóte i ngẽma ngunexü̃gu puracücü, rü ñacurügü tá nüxü̃: “Ñu̱xma i choma rü Cori ya Tupanape̱xewa nüxü̃ chixu nax marü nawa changexmaxü̃ i ngẽma naane ga Cori ya Tupana tórü o̱xigümaxã nüxü̃ ixuxü̃ nax tüxna tá naxããxü̃”, ñacurügü.
4 Rü nüma i chacherdóte rü tá cuxna nanayaxu ya yimá pexchi, rü Cori ya curü Tupanaarü ãmarearü guruü̃pe̱xegu tá nayaxǘ.
5 Rü ngẽxguma i cuma rü Cori ya Tupanape̱xewa tá ñacurügü: “Chorü o̱xigü rü wüxitücumü ga duü̃xü̃gü ga Araméutanüxü̃ ga noxri noxretama ixĩgüxe. Rü tümagü rü nu ne tanaxĩmare rü Equítuanewa taxĩ rü yexma tayaxãpatagü. Rü yemawena rü timu, rü muxü̃ma ga duü̃xü̃gü ga poraexü̃ tixĩgü.
6 Natürü ga Equítuanecüã̱x rü chixri tomaxã nachopetü. Rü poraãcü ngúxü̃ toxü̃ ningegü. Rü chixri tomaxã inacua̱x rü puracü i yaxü̃ toxü̃ naxüxẽxẽ.
7 Rü yexguma ga toma rü poraãcü Cori ya torü o̱xigüarü Tupanana taca nax toxü̃ nangüxẽẽxü̃ca̱x. Rü nüma rü toxü̃ naxĩnü ga yema nüxna naxca̱x tacaxü̃. Rü nüxü̃ nadau ga yema taxü̃ ga guxchaxü̃ ga nawa tayexmagüxü̃ rü yema taxü̃ ga puracü ga toétüwa yexmaxü̃. Rü toxü̃ nadau nax taxü̃ ga guxchaxü̃ toxü̃ yangegüxẽẽxü̃.
8 Rü yemaca̱x ga nüma ga Cori ya Tupana rü inanawe̱x ga norü pora. Rü yema Equítuanearü duü̃xü̃güca̱x ínanangu̱xẽxẽ ga taxü̃ ga guxchaxü̃gü rü ãũcümaxü̃gü. Rü yemaacü nixĩ ga Equítuanewa toxü̃ ínanguxü̃xẽẽxü̃.
9 Rü ñaa nachicawa toxü̃ nagagü, rü toxna nanaxã ga ñaa naane i ngextá yima lechi rü berure rü ñoma dexárüxü̃ taguma ínataxuxü̃wa.
10 Rü ngẽmaca̱x ngẽma naane i Cori ya Tupana choxna ãxü̃wa nua chanana i ngẽma chaunetüarü o i nüxíraxü̃güxü̃”, ñacurügü tá. Rü ngẽmawena rü Cori ya Tupanaarü ãmarechicape̱xegu tá cunaxǘ ya yima pexchi. Rü ñu̱xũchi Cori ya Tupanape̱xegu tá cucaxã́pü̱xü.
11 Rü ngẽmawena rü tá cunaxüchiga i guxü̃ma i ngẽma mexü̃gü i Cori ya curü Tupana cuxna ãxü̃ rü cupatacüã̱xna ãxü̃. ¡Rü nüxna naxu i ngẽma Lebítanüxü̃ rü ñu̱xũchi ngẽma duü̃xü̃gü i to i nachixü̃anecüã̱x i petanüwa ngẽxmagüxü̃ nax cumaxã wüxigu nataãẽgüxü̃ca̱x!
Ngẽma curü nanetügüarü owa cuyaxuxü̃arü diésmuchiga
12 Rü ngẽxguma norü tomaepü̱x ya taunecüwa nanguxgu, rü tá ípenaxüxüchi i perü diésmu nawa i guxü̃ma i perü nanetügüarü o. Rü nüxna tá penaxã i ngẽma Lebítanüxü̃, rü ngẽma to i nachixü̃anecüã̱x i petanüwa ngẽxmagüxü̃, rü ngẽma taxcutagü rü yutegüxü̃ i perü ĩanegüwa ngẽxmagüxü̃ nax ngẽmaãcü nümagü rü ta meama nachibüexü̃ca̱x.
13 Rü ñu̱xũchi curü Cori ya Tupanamaxã tá nüxü̃ quixũ rü ñacurügü tá: “Marü chopatawa chanaxǘxüchi i ngẽma chaunetüarü o i cuxna üxü̃. Rü ñu̱xũchi marü nüxna chanaxã i ngẽma Lebítanüxü̃, rü ngẽma to i nachixü̃anecüã̱x i nua totanüwa ngẽxmagüxü̃, rü ngẽma taxcutagü rü yutegüxü̃. Rü ngẽmaãcü meama chayanguxẽxẽ i guxü̃ma i ngẽma choxü̃ cumuxü̃ rü taxuxü̃ma i curü mugüxü̃ icharüngüma.
14 Rü ngẽma cuxna chaxãxü̃wa rü taxuxü̃ma changõ̱x i choma ga yexguma chayutanügu rü ngechaü̃wa chayexmagu. Rü bai nax yuexü̃na chanaxuaxü̃xü̃. Pa Cori Pa Chorü Tupanax, choma rü meama cuga chaxĩnü rü ñu̱xũchi meama chayanguxẽxẽ i guxü̃ma i ngẽma choxü̃ cumuxü̃.
15 Rü cuma nax dauxü̃wa cungexmaxü̃ ya cupata ya üünenewa ¡rü toxü̃ nadawenü rü mexü̃ tomaxã naxuegu i toma i curü duü̃xü̃gü i Iraétanüxü̃! ¡Rü mexü̃ namaxã naxuegu i ñaa naane i toxna cuxãxü̃ i ngexta yima lechi rü berure rü ñoma dexárüxü̃ taguma ínataxuxü̃wa, yema tórü o̱xigümaxã nüxü̃ quixuxü̃rüxü̃!”
Iraétanüxü̃xü̃ namu nax naga naxĩnüexü̃ca̱x i Cori ya Tupanaarü mugü
16 Rü Cori ya perü Tupana rü pexü̃ namu i ñu̱xma nax nagu pexĩxü̃ca̱x i ngẽma norü mugü rü ucu̱xẽgü i pemaxã nüxü̃ chixuxü̃. ¡Rü mea peyanguxẽxẽ i perü maxü̃nemaxã rü peãẽmaxã!
17 Rü pema rü marü nüxü̃ pixu nax nüma ya Cori rü perü Tupana nax yixĩxü̃. Rü marü namaxã ipexuneta nax nagu tá pexĩxü̃ i ngẽma nüma nanaxwa̱xexü̃. Rü marü namaxã nüxü̃ pixu rü tá peyangu̱xẽxẽ i norü mugü rü ucu̱xẽgü rü guxü̃gutáma naga pexĩnüe.
18 Rü nüma ya Cori ya Tupana rü ñu̱xma pemaxã nüxü̃ nixu, Pa Iraétanüxü̃x, nax pema rü norü duü̃xü̃gü pixĩgüxü̃, yema marü pemaxã nüxü̃ yaxuxü̃rüxü̃. Rü ngẽmaca̱x i ñu̱xma rü penaxwa̱xe nax naga pexĩnüexü̃ i guxü̃ma i norü mugü.
19 Rü nüma ya Cori ya Tupana rü tá pexü̃ narüngü̃xẽxẽ nax wüxi i nachixü̃ane i guxü̃ i togü i nachixü̃anegüarü yexera peporaexü̃ca̱x. Rü tá pexü̃ natachigaxẽxẽ rü tá pexü̃ nanamuü̃exẽxẽ i ngẽma togü i nachixü̃anegü. Rü pema tá nixĩ i duü̃xü̃gü i perü Cori ya Tupana pexü̃ unetaxü̃ nax norü duü̃xü̃gü pixĩgüxü̃, yema pemaxã nüxü̃ yaxuxü̃rüxü̃ —ñanagürü ga Moiché.
