Deuteronómio 28:1-68
28 Rü ngẽxguma chi aixcüma naga pexĩnüegu ya Cori ya perü Tupana rü ñu̱xũchi nagu pemaxẽgu i ngẽma norü mugü i ñu̱xma pemaxã nüxü̃ chixuxü̃, rü ngẽxguma i nüma ya Cori ya Tupana rü tá guxü̃ma i togü i duü̃xü̃gü i ñoma i naanewa ngẽxmagüxü̃étüwa pexü̃ naxǘgüxẽxẽ.
2 Rü ngẽxguma naga pexĩnüegu ya Cori ya perü Tupana rü guxü̃gutáma pexca̱x ínanangu̱xẽxẽ i ñaa ngü̃xẽẽxü̃.
3 Rü ngẽxguma ĩanewa pengẽxmagügu rüe̱xna peanewa pengẽxmagügu rü nüma ya Cori ya perü Tupana rü tá pexü̃ narüngü̃xẽxẽ.
4 Rü nüma ya Cori ya Tupana rü tá pexacügüxü̃ narüngü̃xẽxẽ. Rü penetügü rü tá namu i norü o. Rü perü wocagü rü perü carnérugü rü guxü̃ma i pexü̃nagü rü tá pexü̃́ nimu.
5 Rü yimá perü pexchi rü guxü̃gutáma naxããcu namaxã i penetüarü o. Rü ngẽma perü mecha i nawa trigute̱xe piñumüxü̃ rü tagutáma nawa nataxu i trigute̱xe naxca̱x i perü paũ.
6 Rü guxü̃ma i ta̱xacü i pexüxü̃wa rü meatáma pexü̃́ ínanguxuchi.
7 Rü nüma ya Cori ya Tupana rü tá pexme̱xgu nanayixẽxẽ i perü uanügü ega ngẽxguma pexca̱x íyaxüãchigu. Rü mea yachimachimüü̃ãcü tá pexca̱x ínayaxüãchi, natürü ngẽxguma pemaxã nügü nadaixgu rü tá nügü nawoone nax pexcha̱xwa yabuxmüxü̃ca̱x.
8 Rü nüma ya Cori ya Tupana rü tá pexü̃ narüngü̃xẽxẽ rü ngẽma perü trigupatagü rü guxü̃gutáma nixããcu. Rü guxü̃ma i perü puracü i pexüxü̃ rü tá mea pexü̃́ ínanguxuchi. Rü tá pexü̃ narüngü̃xẽxẽ nax taãẽxãcü nawa pemaxẽxü̃ca̱x i ngẽma naane i tá pexna naxãxü̃.
9 Rü ngẽxguma peyanguxẽẽgu i norü mugü rü ñu̱xũchi nagu pexĩxgu i ngẽma norü ucu̱xẽgü, rü nüma ya Cori ya perü Tupana rü tagutáma pexna nixũgachi rü guxü̃gutáma petanüwa nangẽxma rü noxrüxicatama i duü̃xü̃gü tá pixĩgü, yema pemaxã nüxü̃ yaxuxü̃rüxü̃.
10 Rü ngẽxguma i guxü̃ma i togü i nachixü̃anecüã̱xgü i ñoma i naanewa ngẽxmagüxü̃ rü tá nüxü̃ nadaugü nax pemax rü aixcüma Cori ya Tupanaarü duü̃xü̃gü pixĩgüxü̃, rü ngẽmaca̱x tá pexü̃ namuü̃e.
11 Rü ngẽxguma marü nawa pengẽxmagügu i ngẽma naane i Cori ya Tupana perü o̱xigümaxã nüxü̃ ixuxü̃ nax pexna naxããxü̃, rü ngẽxguma ya nüma ya Cori ya Tupana rü tá pexü̃ nanawe̱x i norü ngechaü̃, rü tá nimu i penegü, rü pexacügü, rü pexü̃nagü rü penetügüarü o.
12 Rü tá pexca̱x nayawãxnaxü̃ i norü ngẽmaxü̃gü i dauxü̃wa ngẽxmagüxü̃, rü perü naanegu tá nanapuxẽxẽ nax mea nayaexü̃ca̱x i penetügü. Rü tá pexü̃ narüngü̃xẽxẽ nax mea ínanguxuchixü̃ca̱x i guxü̃ma i perü puracü i pexü̃xü̃. Rü tá pexü̃́ nangẽxma i diẽru nax muxü̃ma i to i nachixü̃anegüna penaxãxü̃ca̱x rü ñu̱xũchi pexü̃́ natáeguxẽẽxü̃ca̱x. Natürü i pema rü tagutáma togüxü̃tawa naxca̱x ípeca i diẽru nax ñu̱xũchi nüxü̃́ penatáeguxẽẽxü̃ca̱x.
13 Rü ngẽxguma peyanguxẽẽgu rü nagu pemaxẽgu i Cori ya perü Tupanaarü mugü i ñu̱xma pemaxã nüxü̃ chixuxü̃, rü nüma ya Cori ya Tupana rü tá nape̱xewa pexü̃ naxǘgüxẽxẽ, rü tagutáma wixweama pexü̃ nawogü. Rü guxü̃gutáma naétüwa pengẽxmagü i ngẽma togü i nachixü̃anecüã̱xgü i duü̃xü̃gü, rü tagutáma natüxü̃waama pengẽxmagü.
14 Rü ngẽmaãcü tá pexü̃ narüngü̃xẽxẽ ega tama nüxna pixĩgachigu i norü mugü nax ngẽma tupananetagüxü̃ picua̱xüü̃güxü̃ca̱x.
Poxcu i tá naxca̱x ínguxü̃ i Iraétanüxü̃ ega tama yanguxẽxẽgüãgu i Tupanaarü mugü
15 Natürü ngẽxguma taxũtáma naga pexĩnüegu, rü taxũtáma nagu pemaxẽgu i ngẽma Cori ya perü Tupanaarü mugü i ñu̱xma pemaxã nüxü̃ chixuxü̃, rü tá pexca̱x ínangu i guxü̃ma i ñaa guxchaxü̃gü:
16 Rü guxchaxü̃ tá pexü̃́ nangẽxma i perü ĩanewa rü peanewa.
17 Rü perü pexchi rü tá nangeãcu, rü ngẽma curü mecha i trigu nawa cuñucharaxü̃wa rü tá nataxuma i trigute̱xe naxca̱x i perü paũ.
18 Rü pexacügü rü tá guxchaxü̃ naxca̱x ínangugü, rü penetügü rü tá ngéma nichixemare, rü perü wocaxacügü, rü perü carnéruxacügü rü guxü̃ma i pexü̃nagü rü tá chixexü̃ natanüwa nangu.
19 Rü guxü̃ma i perü puracü i pexüxü̃wa rü tá chixri pexü̃́ ínanguxuchi.
20 Rü nüma ya Cori ya Tupana rü tá guxchaxü̃ pexca̱x ínangu̱xẽxẽ, rü naguxü̃raü̃xü̃ i ĩnü i nagu ípetüexü̃ tá pexca̱x ínangu, rü ngúxü̃ tá pexca̱x ínangu i guxü̃ma i perü puracü i pexüxü̃wa. Rü paxatáma peyue erü pema rü perü chixexü̃gagu nüxna pixĩgachi ya Cori ya Tupana.
21 Rü Cori ya Tupana rü da̱xaweane tá pexca̱x ínangu̱xẽxẽ rü ngẽma da̱xaweane rü tá ngẽxma pexü̃ nadai, rü tá pexü̃ inayarüxoxẽxẽ nawa i ngẽma nachixü̃ane i nawa tá pengẽxmagüxü̃.
22 Rü pexca̱x tá ngéma nanamu i da̱xaweanegü i pexü̃ daixü̃, rü axü̃negü i poraxü̃ i tama paxa pexü̃ ngupetüxü̃, rü perü chaxünegü, rü naiane i tama namaxã peporaexü̃. Rü perü trigu i peanewa ngẽxmaxü̃ rü tá nipagü erü dexá rü tá nichegü rü ñu̱xũchi naweane rü norü da̱xaweane tá naxca̱x ínangugü. Rü ngẽma da̱xaweanegü rü tagutáma pexna nangupetü ñu̱xmatáta pexü̃ nadai.
23 Rü yea daxũguxü̃ i naane rü taxũtáma pexca̱x nanapuxẽxẽ i norü pucü. Rü ñoma i naanewa rü taxũtáma nixo i penetügü, erü tá nataianexüchi.
24 Rü Cori ya Tupana rü nachicüü ya pucü rü tá pexca̱x ínananguxẽxẽ i waixü̃müte̱xearü caixnagüxü̃ rü naxnücüarü caixnagücü ñu̱xmatáta ngẽmagu peyue.
25 Rü nüma ya Cori ya Tupana rü tá perü uanügüme̱xẽgu pexü̃ nayixẽxẽ. Rü pema rü tá meama naxca̱x pichiyechimüü̃ãcü perü uanügüca̱x ípeyaxüãchi nax namaxã pegü pedaixü̃ca̱x. Natürü i pema rü tá naxcha̱xwa pibuxmü rü pegü pewoonemare. Rü guxü̃ma i togü i nachixü̃anegü i ñoma i naanewa ngẽxmagüxü̃ rü tá pemaxã naba̱i̱xãchie.
26 Rü ngurucugü, rü aigü rü tá pexü̃ nangõ̱xgü rü taxúetama tayaxãchigütanü.
27 Rü Cori ya Tupana rü tá pexca̱x ínanangu̱xẽxẽ i taixnagü rü o̱xrigü i taguma ixẽxü̃ yema Equítuanecüã̱xgüca̱x ínanguxẽẽxü̃rüxü̃. Rü tá pexca̱x ínananguxẽxẽ i churí rü chaxüne i ngearü üxü̃ã́xü̃
28 Rü naétü tá pexãũãẽgü, rü pengexetügü rü naguxü̃raü̃xü̃ i ĩnü i nagu ípetüexü̃ tá pexca̱x ínangu
29 Rü ñoma duü̃xü̃ i ngexetüxü̃ i nuxica rü puxü̃rüxü̃ tá pixĩgü. Rü guxü̃ma i perü puracü i pexüxü̃wa rü taxũtáma mea pexü̃́ ínanguxuchi. Rü guxü̃gutáma togü pemaxã inacua̱x rü tá pexü̃́ nangĩ̱x rü taxúetama pexü̃ tarüngü̃xẽxẽ.
30 Rü wüxi i ngecümaxã tá nüxü̃ quixu nax ngĩmaxã cuxãma̱xchaü̃xü̃, natürü to i yatü tá ngĩmaxã ínape. Rü cuma rü cupata tá cuxü, natürü tagutáma cuma nagu cupe. Rü wüxi i naane tá úbamaxã cuto, natürü tagutáma norü oxü̃ cungõ̱xneta.
31 Rü cupe̱xegu tátama nayama̱xgü i curü woca i yatüxü̃, natürü ngẽma namachi rü taxũtáma cunangõ̱x. Rü cupe̱xewa tátama cuxna nanapugü i curü búru, rü tagutáma cuxü̃́ nanatáeguxẽẽgü. Rü curü uanügü rü tá cuxü̃́ naxca̱x nangĩ̱xgü i curü carnérugü, rü taxúetama cuxü̃ tarüngü̃xẽxẽ nax cunapuxü̃xü̃ca̱x i ngẽma curü carnérugü.
32 Rü penegü rü pexacügü rü pexü̃ta tátama duü̃xü̃gü i to i nachixü̃anewa ne ĩxü̃na nanamugü nax norü puracütanüxü̃xü̃ yagagüãxü̃ca̱x. Rü pema rü guxü̃gutáma nagu perüxĩnüe nax wena nüxü̃ pedauxü̃ca̱x, natürü marü taxucürüwama wena nüxü̃ pedau.
33 Rü ngẽma curü naanegu cutoxü̃ i cunetüarü o i curü puracüwa ne ũxü̃, rü duü̃xü̃gü i ü̃paacü taguma nüxü̃ cucuáxü̃ tá nüxchiama nanangõ̱xgü. Rü ngẽmaãcü guxü̃gutáma chixri cumaxã inacua̱xgü rü chixri cumaxã nachopetü.
34 Rü ngẽxguma nüxü̃ cuda̱u̱xgu i guxü̃ma i ngẽma, rü tá cuxãũãẽ.
35 Rü Cori ya Tupana rü o̱xri i taguma ixẽgüxü̃ tá cuã́pü̱xüwa, rü cuperemawa rü ñu̱xũchi guxü̃ma i cuxunewa narüyixẽxẽ. Rü ngẽma rü woo cuxüxü̃gu, rü tagutáma nixegü.
36 Rü nüma ya Cori ya Tupana rü tá perü uanügüaxü̃́ nanatauxchaxẽxẽ nax pexü̃ rü perü ãẽ̱xgacüxü̃ nagagüxü̃ nawa i wüxi i nachixü̃ane i pema rü penatügü taguma nüxü̃ cuáxü̃. Rü ngẽma nachixü̃anewa rü tá nüxü̃ picua̱xüü̃gü i tupananetagü i nainaxca̱x rü nutanaxca̱x.
37 Rü guxü̃nema ya yima ĩanegü ya Cori ya Tupana pexü̃ mugünewa, rü pema rü wüxi i baixãchixẽẽruxü̃ rü cugüruxü̃ tá pixĩgü.
38 Rü muxü̃ne ya nanetüchire tá ipetogü, natürü ngẽxguma naxügügu rü munü tá pexü̃́ nayawa. Rü ngẽmaca̱x noxretama i norü o tá peyaxu.
39 Rü úba tá pexünecü rü tá nüxna pedau, natürü bai i norü oxü̃ tá pengõ̱xnetaxü̃ rü norü bínune peyaxaxüxü̃, erü ngẽma perü úba rü õxmigü tá pexü̃́ nayawa.
40 Rü peanewa rü tá oribu ipeto, natürü bai i ñuxgu tá norü chíxü̃maxã pegü pepumaraxü̃ erü ngẽma perü oribugü rü tá doxüxü̃ma inagü i ngẽma norü o.
41 Rü tá pexü̃́ nangẽxma i penegü rü pexacügü, natürü taxũtáma pexü̃tawa nangẽxmagü erü perü uanügü rü to i nachixü̃anewa tá nanagagü.
42 Rü guxü̃ma i ngẽma perü naanewa ngẽxmagüxü̃ i naigü rü ñu̱xũchi penetüarü ogü rü munügü tá nayawa.
43 Rü ngẽma duü̃xü̃gü i to i nachixü̃anecüã̱x i pechixü̃anegu ãpatagüxü̃ rü tá yexera pexü̃ narüporamaegüchigü, rü yoxni i pema rü yexera tá perüturamaetanüchigü.
44 Rü nüma i ngẽma duü̃xü̃gü rü tá nimuarü diẽruã̱x rü ngẽmaca̱x tá pexna ngĩxü̃ naxãgü nax yixcama norü üétümaxã ngĩxü̃ nüxü̃ petáeguxẽẽxü̃ca̱x, natürü i pema rü tá pexü̃́ nataxutama nax diẽru ngĩxü̃ pexãxü̃. Rü nümagü rü guxü̃gutáma peétüwa naxügü rü pema rü guxü̃gutáma natüxü̃waama pexügü.
45 Rü guxü̃ma i ngẽma guxchaxü̃gü rü cuxca̱x tá ínangugü rü ngextá ícuxũxü̃wa rü tá cuwe ningechigü ñu̱xmatáta cuxü̃ nayuxẽxẽ. Erü cuma rü tama naga cuxĩnü ya Cori ya curü Tupana, rü tama cuyanguxẽxẽ i norü mugü rü ucu̱xẽgü i cumaxã nüxü̃ yaxuxü̃.
46 Rü ngẽma guxchaxü̃gü i tá cuxca̱x íngugüxü̃ rü guxü̃gutáma cuxca̱x rü cutaagüca̱x rü taxü̃ i cua̱xruxü̃ tá nixĩ.
47 Erü tama taãẽãcüma rü quixaixcümaãcüma nüxü̃ quicua̱xüxü̃ ya Cori ya curü Tupana ga yexguma cuxü̃ nangü̃xẽẽgu rü muxü̃ma ga ngẽmaxü̃gü cuxna naxãxgu.
48 Rü nüxü̃́ tá cupuracü i ngẽma curü uanügü i Cori ya Tupana tá cutanüwa mugüxü̃. Rü taiya tá cuxü̃́ nangu̱x, rü ta̱xawa tá quinge, rü tá cungexchiru, rü taxuxü̃táma cuxü̃́ nangẽxma. Rü nüma ya Cori ya Tupana rü ngúxü̃ tá cuxü̃ ningexẽxẽ, rü curü uanügüarü mugüruxü̃ tá cuxü̃ nixĩxẽxẽ ñu̱xmatáta ngẽmagu cuyu.
49 Rü Cori ya Tupana rü wüxi i nachixü̃ane i yáxü̃wama ngẽxmaxü̃ i tama nagaxü̃ cucuáxü̃ tá cuxca̱x ínayachoõchixẽxẽ, ñoma wüxi i ĩyü i goexü̃ i poraxüchixü̃rüxü̃.
50 Rü ngẽma nachixü̃anecüã̱x i duü̃xü̃gü rü ninuchiwe, rü taxũtáma tüxü̃ nangechaü̃gü i yaxguã̱xgü rü woo buxegü rü taxũtáma nüxü̃́ tangechaü̃tümüü̃gü.
51 Rü ngẽma duü̃xü̃gü rü tá curü wocaxacügümaxã naxãwemü. Rü cuanegu cutoxü̃ i cunetügüarü o rü tá nayabuxgü ñu̱xmatáta taxuxü̃táma i norü o ngéma yaxǘgüxẽxẽ. Rü ngẽma curü tríguarü o, rü taxuxü̃táma ngéma nayaxügüxẽxẽ. Rü ngẽxgumarüxü̃ ta i curü bínu, rü chíxü̃, rü curü wocaxacügü rü curü carnéruxacügü rü taxuxü̃táma ngéma nayaxügüxẽxẽ. Rü ngẽmagagu tá taiyamaxã cuyu.
52 Rü ngẽma curü uanügü rü tá naxca̱x ínayaxüãchi ya curü ĩanegü rü tá nüxü̃ ínachomaeguãchi rü ñu̱xmatáta yawa̱xẽẽgüã i ngẽma naxtapü̱xgü i máchanexü̃ i cuma nüxü̃́ cuyaxõxü̃. Rü ngẽmaãcü tá nüxü̃ ínachomaeguãchi ya guxü̃nema ya curü ĩanegü ya ngẽma naane i Cori ya curü Tupana cuxna ãxü̃wa ngẽxmagüne.
53 Rü ngẽxguma curü uanügü curü ĩanegüca̱x íyaxüãchiyane rü cuma nax ĩanearü aixepewa cungexmaxü̃ rü poraãcü tá taiya cuxü̃́ nangu̱x rü ngẽmagagu tá düxwa cunegü rü cuxacügü i Cori ya Tupana cuxna tüxü̃ mugüemaxã tá cuxãwemü.
54 Rü ngẽmaca̱x woo ngẽma yatü i mecümaxüchixü̃ rü taxúetama nüxü̃́ tangechaü̃tümüxü̃ ya naenexẽ rü woo naxma̱x i ngĩxü̃ nangechaü̃xü̃chicü, rü woo naxacügü ya nüxü̃́ íyaxügüe.
55 Rü taxũtáma nanaxwa̱xe nax texémaxã nangauxü̃ i ngẽma naxacümachi i namaxã naxãwemüxü̃. Rü ngẽmaãcü tá nixĩ i ngẽxguma curü uanügü curü ĩanegüca̱x íyaxüãchigu, rü nataxutama i ta̱xacü nax cungṍxü̃. Rü ngẽma tá nixĩ i ngẽma guxchaxü̃ i taxüchixü̃ i curü uanügü tá cuxü̃ ingexẽẽxü̃ i guxü̃nema ya curü ĩanegüwa.
56 Rü ngẽma ngecü i petanüwa mecümaxüchicü i tama ngearü chapatuã̱xcü waixü̃müanewa ngaxchaü̃cü rü tá ngĩte ya nüxü̃ nangechaxü̃xü̃chicü ixai rü ngĩnegüchi ixai rü ngĩxacügüchi ixai.
57 Erü taxũtáma ngĩtemaxã rü ngĩxacügümaxã ingauxchaxü̃ ya yíxema ngĩxacü ya ngexwaca buxe rü ñu̱xũchi ngẽma tümaã̱x i namaxã taxíxraxü̃. Rü guxü̃ma i ngẽma rü cúãcü tá inangõ̱x. Erü ngẽxguma curü uanügü curü ĩanegüca̱x íyaxüãchigu, rü nataxutama i ta̱xacü i ngṍxü̃.
58 Rü ngẽma tá cuxü̃ nangupetü ega ngẽxguma taxũtáma nagu cumaxü̃gu i guxü̃ma i ngẽma mugü rü ucu̱xẽgü i ñaa poperagu ümatüxü̃ rü tama naga cuxĩnügu rü nüxü̃ cungechaxü̃gu i curü Cori ya Tupana ya poraxüchicü rü ãũcümacü.
59 Rü nüma ya Cori ya Tupana rü tá cuxca̱x rü cutaagüca̱x ínanangu i poraxü̃ rü ãũcümaxü̃ i da̱xaweanegü i nawa iyuxü̃ i ngearü üxü̃ã́xü̃.
60 Rü Cori ya Tupana rü cuxca̱x tá ínanangu̱xẽxẽ ga yematama poxcugü ga Equítuanecüã̱xgüca̱x ínanguxẽẽxü̃ ga cuma namaxã cubaixãchixü̃. Rü ngẽma poxcugü tá nixĩ i guxü̃gutáma ngúxü̃ cuxü̃ ningexẽẽxü̃.
61 Rü ngẽxgumarüxü̃ tá ta cuxca̱x ínananguxẽxẽ i to i da̱xaweane rü ngúxü̃gü i tama ñaa popera i ngu̱xẽẽtaeruü̃gu ümatüxü̃ ñu̱xmatáta cuyu i cumax.
62 Rü cumax, Pa Iraéx, ga cutanüxü̃ ga noxri ñoma ẽxtagü i daxũwa ngẽxmagüxü̃rüxü̃ muxũchixü̃, rü wüxi i natücumü i íxraxü̃xü̃ tá nixĩ. Rü ngẽma tá nangupetü namaxã i cutanüxü̃ erü tama Cori ya curü Tupanaga cuxĩnü.
63 Rü yexgumarüxü̃ nax Cori ya Tupana cutanüxü̃maxã taãẽxü̃ ga noxri rü mexü̃ naxca̱x naxüxü̃ rü yamuxẽẽãxü̃, rü ngẽxgumarüxü̃ ta norü taãxẽ tá nixĩ nax iyanaxoxẽẽãxü̃. Rü tá nawa ínanawoxü̃ i ngẽma naane i nawa tá nangẽxmagüxü̃.
64 Rü nüma ya Cori ya Tupana rü togü i nachixü̃anegü i yáxü̃wa ngẽxmagüxü̃gu tá nanawoone. Rü ngẽma nachixü̃anegüwa rü tá nüxü̃ nicua̱xü̃gü i tupananetagü i nainaxca̱x rü nutanaxca̱x ga woo cuma rü woo curü o̱xigü taguma nüxü̃ cua̱xgüxü̃.
65 Rü ngẽxguma ngẽma nachixü̃anegüwa nangẽxmagügu i cutanüxü̃ rü tagutáma nataãẽgü rü tagutáma inarüngü̃gü, erü Cori ya Tupana rü guxü̃gutáma muü̃wa nanangexmagüxẽxẽ. Rü ngẽmaca̱x tá nangechaxü̃xetügü rü tá naxoegaãẽgü.
66 Rü ngẽxguma i norü maxü̃ rü guxü̃gutáma ãũcümaxü̃wa nangẽxma. Rü ngunecü rü chütacü rü tá namuü̃e. Rü ngẽmaãcü tagutáma nataãẽgü, erü guxü̃gutáma ãũcümaxü̃wa tá nangẽxmagü.
67 Rü poraãcütama namuü̃e. Rü ngẽma ãũcümaxü̃gü i naxetümaxã nüxü̃ nadaugüxü̃gagu, rü pa̱xmama i ẽxü̃wa rü tá ñanagürügü: “¡Chierüx paxa nachütagu!” Rü ngẽxguma nachütagu rü ñanagürügü tá: “¡Chierüx paxa yangunegu!” ñanagürügü.
68 Rü woo nax Cori ya Tupana cumaxã nüxü̃ ixuxü̃ nax tagutáma wenaxarü ngẽma nama i Equítuanewa daxü̃gu tá naxca̱x cutaeguxü̃, natürü nüma ya Cori ya Tupana rü wapurugu tá nayamugü i cutanüxü̃ nax Equítuaneca̱x nawoeguxü̃ca̱x. Rü ngéma Equítuanewa rü tá curü uanügüna nanaxuaxü̃ nax mugüruxü̃ namaxã nataxegüxü̃ca̱x, natürü nataxutama i naxca̱x taxexü̃ —ñanagürü ga Moiché.
