Deuteronómio 29:1-29
29 Rü noxri ga nüma ga Cori ya Tupana rü marü Iraétanüxü̃maxã nüxü̃ nixu ga norü uneta ga ma̱xpǘne ga Oréxwa. Rü yemaétü nixĩ ga ñaa yexwaca̱xü̃ ga norü uneta ga Cori ya Tupana Moichéxü̃ muxü̃ nax Iraétanüxü̃maxã nüxü̃ yaxuxü̃ca̱x ga Moátanüxü̃güchixü̃anewa.
2 Rü nüma ga Moiché rü nanangutaque̱xexẽxẽ ga guxü̃ma ga Iraétanüxü̃ rü ñanagürü nüxü̃: —Pema rü marü nüxü̃ pedau ga guxü̃ma ga yema Cori ya Tupana Equítuanewa Faraóü̃maxã rü norü ngü̃xẽẽruü̃gümaxã rü ñu̱xũchi guxü̃ma i norü duü̃xü̃gümaxã naxüxü̃.
3 Rü pema rü marü nüxü̃ pedau ga yema taxü̃ ga guxchaxü̃gü, rü cua̱xruü̃gü rü taxü̃ ga mexü̃gü ga Cori ya Tupana norü poramaxã üxü̃.
4 Natürü woo i ñu̱xma ya Cori ya Tupana rü tama pexü̃ nüxü̃ nacua̱xẽxẽ rü tama pexca̱x nanango̱xẽxẽ nax ta̱xacüca̱x yixĩxü̃ nax naxüaxü̃ ga guxü̃ma ga yema.
5 Rü 40 ga taunecü yema chianexü̃gu pemaxã chixũ. Rü guxcüma ga gumá taunecügu rü taxuxü̃ma ga pexchiru rü perü chapatu pexü̃́ nangau.
6 Rü yexguma rü taguma paũ ta pengõ̱x, rü taguma bínune pixaxü rü bai i ta̱xacürü to ga axexü̃ ga ngúchia̱xü̃ pixaxgü. Rü yemaacü pemaxã nanaxü nax nüxü̃ pecuáxü̃ca̱x nax nüma ya Cori rü perü Tupana nax yixĩxü̃.
7 Rü yexguma ñaa naanewa ingugügu rü nüma ga Chióü̃ ga ĩane ga Ebóü̃arü ãẽ̱xgacü rü Óx ga Bacháü̃anearü ãẽ̱xgacü taxca̱x nayayi nax tüxü̃ nada̱i̱xü̃ca̱x, natürü ga yixema rü tanadaiama.
8 Rü yema norü naanegü rü tanapu rü nüxna tanaxã ga Rubéü̃tanü̃xü̃, rü Gáxtanüxü̃ rü ngãxü̃tücumü ga Manachétanüxü̃.
9 Rü ngẽmaca̱x penaxwa̱xe nax peyanguxẽẽxü̃ rü naga pexĩnüexü̃ i guxü̃ma i ngẽma unetaarü dexagü nax ngẽmaãcü mea pexü̃́ yaxũxü̃ca̱x i guxü̃ma i ta̱xacü i pexüxü̃wa.
10 29:10-11 Rü ñu̱xma i guxãma i pema, rü nua Cori ya perü Tupanape̱xegu pengutaque̱xegü namaxã i wüxichigü i natücumüarü ãẽ̱xgacügü, rü perü ãẽ̱xgacügü i yaxguã̱xgü, rü togü i yatügü i pemaxã icua̱xgüxü̃, rü guxü̃ma i yatügü i Iraétanüxü̃, wüxigu namaxã i buxü̃gü, rü ngexü̃gü, rü duü̃xü̃gü i to i nachixü̃anecüã̱xgü i petanüwa ngẽxmagüxü̃, rü woo duü̃xü̃ i perü üxüarü yauxruü̃gü rü duü̃xü̃ i perü dexáarü yauxruü̃gü.
11 Nüü̃ nadau 29:10
12 Rü nua pengutaque̱xegü nax Cori ya Tupanape̱xewa nüxü̃ pixuxü̃ca̱x nax aixcüma tá peyanguxẽẽxü̃ i ngẽma uneta i Cori ya perü Tupana pemaxã üxü̃.
13 Rü ñu̱xma i nüma ya Cori ya Tupana rü pemaxã nüxü̃ nixu nax pema rü norü duü̃xü̃gü pixĩgüxü̃ rü nüma rü perü Tupana nax yixĩxü̃ yema nũxcüma ga perü o̱xigü ga Abraáü̃ rü Ichaá rü Acóbumaxã nüxü̃ yaxuxü̃rüxü̃.
14 29:14-15 Natürü ngẽma Cori ya Tupanaarü uneta i tamaxã nüxü̃ yaxuxü̃ rü tama taxca̱xica nixĩ i yixema i ñu̱xma nape̱xewa nax ingẽxmagüxü̃, natürü guxü̃ma i ngẽma yixcüra tá ingóetanüxü̃ca̱x rü ta nixĩ.
15 Nüü̃ nadau 29:14
16 Rü pemax rü meama nüxü̃ pecua̱x nax chixri tamaxã nachopetüxü̃ ga yema Equítuanecüã̱xgü ga yexguma norü naanewa iyexmagügu. Rü nüxü̃ pecua̱x nax ñuxãcü guxchaxü̃ tüxna naxãgüxü̃ ga yema nachixü̃anegü ga nawa ichopetüetanüxü̃ nax ñu̱xma nua ingugüxü̃ca̱x.
17 Rü pema rü marü nüxü̃ pedaugü ga yema norü tupananetachicüna̱xãgü ga taxuwama mexü̃ ga naiwa rü nutawa, rü diẽrumüwa rü úirumüwa naxügüxü̃ ga yema duü̃xü̃gü nüxü̃ icua̱xüü̃güxü̃.
18 Rü tama penaxwa̱xe nax petanüwa nangemaxü̃ i wüxi i yatü, rüe̱xna wüxi i ngexü̃, rüe̱xna wüxi ya ĩpatacüã̱xgü, rüe̱xna wüxitücumü i duü̃xü̃gü i Cori ya Tupanana ixĩgachixü̃ naxca̱x nax ngẽma nachixü̃anegüarü tupananetagüxü̃ yacua̱xüü̃güxü̃ca̱x. Rü petanüwa rü tama name nax wüxíe ñoma wüxi i nai i üxchuma̱xãxü̃ i nawa iyuxü̃rüxü̃ ixĩxẽ.
19 Rü nawena nax marü nüxü̃ pexĩnüexü̃ i ñaa unetaarü dexa, rü ngẽxguma chi ngexerüxe i petanüwa rü nüxü̃ ixuxgu nax taxuxü̃ma i chixexü̃ naxüxü̃ rü ñaxü̃gu naxĩnügu: “Rü guxü̃ma i ta̱xacü i chaxüxü̃wa rü mea tá choxü̃́ ínanguxuchi woo ngẽma choma chanaxwa̱xexü̃ chaxümaregu”, ñaxü̃gu naxĩnügu, rü nagagu tá nixĩ i Cori ya Tupana poxcu naxca̱x ínguxẽẽxü̃ i guxü̃ma i Iraétanüxü̃.
20 Rü nüma ya Cori ya Tupana rü taxũtáma nüxü̃́ nüxü̃ narüngüma i ngẽma norü chixexü̃, rü naétügu tá nananguxẽxẽ i norü nu. Rü naxca̱x tá ínangugü i guxü̃ma i ngẽma guxchaxü̃gü i ñaa poperagu ümatüxü̃. Rü ñu̱xũchi nataagü i ngẽma yatü rü Tupana rü ñoma i naanewa tá inayanaxoxẽxẽ.
21 Rü nüma ya Cori ya Tupana rü ngẽma yatüxü̃ tá ínamuxũchi natanüwa i guxü̃ma i ngẽma Iraétanüxü̃tücumügü. Rü naxca̱x tá ínanangu̱xẽxẽ i guxü̃ma i ngẽma guxchaxü̃gü i ñaa unetapanegu ümatüxü̃.
22 Rü ngẽma penegü rü petaagü i yixcüra tá ngóexü̃, rü ñu̱xũchi ngẽma duü̃xü̃gü i yáxü̃guxü̃ i nachixü̃anewa ne ĩxü̃ rü tá nüxü̃ nadaugü i ngẽma guxchaxü̃gü rü da̱xaweanegü i Cori ya Tupana ñoma i naanewa tá ngu̱xẽẽxü̃.
23 Rü tá nüxü̃ pedau i ngẽma naane i nawa pengẽxmagüxü̃ rü achúfremaxã, rü yucüramaxã napaxü̃, rü ñu̱xũchi waixü̃müane ixaxü̃xicatama nax yixĩxü̃. Rü ngẽma naanegu rü taxucürüwama nagu tatoe, rü ngẽma nanetü i nagu petoxü̃ rü taxũtáma narüxügü, rü bai wüxi i maxẽ nawa rüxüxü̃. Rü guma ĩanegü ga Cori ya Tupana norü numaxã iguxü̃ne ga Chodóma, rü Gomóra, rü Axmá rü Cheboíü̃maxã üpetüxü̃rüxü̃ tá perü naanemaxã naxüpetü.
24 Rü ngẽxguma i guxü̃ma i ñoma i naanecüã̱xgü i duü̃xü̃gü rü tá ínacagü rü ñanagürügü: “¿Ta̱xacüca̱x nixĩ ga Cori ya Tupana ga yemaacü napoxcuãxü̃ ga yema nachixü̃ane? ¿Ta̱xacüca̱x poraãcü namaxã nanuxũchi?” ñanagürügü tá.
25 Rü duü̃xü̃gü rü ñanagürügü tá: “Yema namaxã nangupetü ga yema Iraétanüxü̃ yerü nüxna nixĩgachi ga yema uneta ga Cori ya Tupana norü o̱xigümaxã üxü̃ ga yexguma Equítuanewa ínagaxü̃ãgu.
26 Rü yema Iraétanüxü̃ rü togü ga duü̃xü̃güarü tupananetagüxü̃ nicua̱xüü̃gü rü nape̱xegu nacaxã́pü̱xügü. Rü yemaacü nanaxügü woo tama yema tupananetagüxü̃ nacua̱xgügu rü taguma ta̱xacüwa nüxü̃ nangü̃xẽẽgügu.
27 Rü yemaca̱x nixĩ ga Cori ya Tupana ga yema duü̃xü̃gümaxã nanuxũchixü̃, rü nachixü̃anegu nangu̱xẽẽãxü̃ ga guxü̃ma ga yema guxchaxü̃gü ga ñaa poperagu ümatüxü̃.
28 Rü yemaca̱x nixĩ ga Cori ya Tupana rü namaxã nanuxũchixü̃ rü nachixü̃anewa ínawoxü̃ãxü̃ rü to ga nachixü̃anegüwa namugüãxü̃. Rü yema nixĩ ga namaxã ngupetüxü̃ ga yema duü̃xü̃gü. Rü ñu̱xma rü ta rü ngẽmaãcü nixĩ”, ñanagürügü tá.
29 Rü nangẽxma i ta̱xacü i tama nüxü̃ icuáxü̃ i yixema, rü Cori ya Tupanaxicatama nixĩ ya nüxü̃ cuácü. Natürü nangẽxma i ta̱xacü marü tüxü̃ rü taxacügüxü̃ nüxü̃ nacua̱xẽẽxü̃ nax guxü̃gutáma nagu imaxẽxü̃ca̱x i guxü̃ma i ngẽma ucu̱xẽgü i ñaa mugüwa ngẽxmagüxü̃ —ñanagürü ga Moiché.
