Deuteronómio 3:1-29
3 Rü yemawena rü to ga namagu taxĩ, rü Bacháü̃anewaama taxĩ. Natürü ga Óx ga yema nachixü̃anearü ãẽ̱xgacü ixĩxü̃ rü guxü̃ma ga norü churaragümaxã taxca̱x naxĩ rü Edréigu tamaxã nügü nadai.
2 Rü yemaca̱x ga Cori ya Tupana rü choxü̃ ñanagürü: “¡Taxṹ i nüxü̃ cumuü̃xü̃! Erü nüma ya Óx rü norü churaragümaxã rü ñu̱xũchi guxü̃ma i norü nachixü̃anegümaxã rü tá cuxme̱xgu chananguxẽxẽ. Rü namaxã tá cunaxü ga yema Chióü̃ ga Amoréugüarü ãẽ̱xgacü ga Ebóü̃wa maxü̃xü̃maxã cuxüxü̃rüxü̃”, ñanagürü.
3 Rü yemaacü nixĩ ga Cori ya Tupana rü toxme̱xgu nangu̱xẽẽãxü̃ ga Bacháü̃anearü ãẽ̱xgacü ga Óx rü ñu̱xũchi guxü̃ma ga norü churaragü. Rü guxü̃xü̃ma tadai rü taxuxü̃ma ga maxü̃xü̃ ítayaxüxẽxẽ.
4 Rü tanapuxü̃ ta ga guxü̃nema ga norü ĩanegü, rü bai ga wüxi ga íyaxüxü̃ne ga tama tapuxü̃ne. Rü guxü̃wama rü 60 ga ĩanegü nixĩ ga guma tapuxü̃ne. Rü yemaacü tanapuxü̃ ga guxü̃nema ga ĩanegü ga Argóxanewa yexmagüne ga Óxme̱xẽwa yexmagüne ga Bacháü̃anewa.
5 Rü guxü̃nema ga guma ĩanegü ga tapuxü̃ne rü meama ínipoxegugü, rü nima̱xtapü̱x ga norü poxeguxü̃, rü naxĩ̱ã̱xgüã̱x, rü ñu̱xũchi natotaruü̃ã̱xgü. Rü naétü nayexma ga muxü̃ma ga naigü ga ĩanexacügü ga tama ípoxegugüne.
6 3:6-7 Rü guxü̃nema ga gumagü rü nagu tapogüe, rü yema Ebóü̃arü ãẽ̱xgacü ga Chióü̃maxã taxüxü̃rüxü̃ namaxã tanaxügü. Rü tanadai ga guxü̃ma ga yatüxü̃gü rü ngexü̃gü rü buxü̃gü. Natürü yigüxü̃́ tanade ga guxü̃ma ga wocagü rü ñu̱xũchi yema tórü uanügüarü yemaxü̃gü ga itatanüxü̃.
7 Nüü̃ nadau 3:6
8 Rü yemaacü ga yema ngunexü̃gügu rü taxme̱xgu nayi ga norü naanegü ga yema taxre ga ãẽ̱xgacügü ga Amoréutanüxü̃ ga natü ga Yudáü̃arü éstewa maxẽxü̃. Rü yema naane ga ipuxü̃xü̃ rü natü ga Arnóü̃wa inaxügü rü ñu̱xmata ma̱xpǘne ga Ermóü̃wa nangu.
9 (Rü guma ma̱xpǘne ga Ermóü̃ rü Chidóü̃cüã̱xgü rü Chirióü̃maxã nanaxugü, rü yema Amoréutanüxü̃ rü Chenímaxã nanaxugü.)
10 Rü yemaacü taxme̱xgu nayi ga guxü̃nema ga guma ĩanegü ga ãẽ̱xgacü ga Óx namaxã icuáxü̃ne ga ma̱xpǘnearü doxonexü̃chitaeruwa yexmagüne rü Garaáxanewa yexmagüne rü Bacháü̃anewa yexmagüne rü ñu̱xmata Chacáwa rü Edréiwa nangu.
11 (Rü gumá ãẽ̱xgacü ga Óxicatama nixĩ ga íyaxücü ga Refátanüxü̃tanüwa. Rü yema norü pechicaxü̃ rü fierumünaxca̱x nixĩ, rü 4 metruarü ngãxü̃ nixĩ ga norü ma̱x rü wixgutaa̱x taxre ga metru nixĩ ga norü tatachinü. Rü ñu̱xma rü ta rü Amóü̃tanüxü̃arü ĩane ya Rabáwa nangẽxma.)
Rubéü̃tanüxü̃, rü Gáxtanüxü̃, rü ngãxü̃tücumü ga Manachétanüxü̃ ga Yudáü̃arü éstewaama nayexmagü
12 Rü yema naane ga Amoréugüna ipuxü̃xü̃wa, rü ĩane ga Aroé ga natü ga Arnóü̃pechinüwa yexmanewa inaxügü rü ñu̱xmata Garaáxarü ma̱xpǘanexü̃arü ngãxü̃gu yacuáx, rü Rubéü̃tanüxü̃na, rü Gáxtanüxü̃na chanaxã, guxü̃nema ga norü ĩanegümaxã.
13 Rü yema Garaáxane ga íyaxüxü̃, rü guxü̃ma ga yema Bacháü̃ane ga ãẽ̱xgacü ga Óx namaxã icuáxü̃, rü ñu̱xũchi guxü̃ma ga yema Argóxane ga Refátanüxü̃anemaxã naxugüxü̃, rü yema ngãxü̃tücumü ga Manachétanüxü̃na chanaxã.
14 Rü Yaí ga Manachétaxa rü nanayaxu ga guxü̃ma ga Argóxane rü ñu̱xmata Guechúxarü üyeanewa rü Maacáarü üyeanewa nangu. Rü yema naane ga noxri Bacháü̃gu ãégaxü̃ rü nüma ga Yaí rü nügüégagu nanaxüéga, rü Abóx-yaígu nanaxüéga. Rü woo i ñu̱xma rü ngẽmatama nixĩ i naéga.
15 3:15-16 Rü Manaché nane ga Maquítanüxü̃na chanaxã ga Garaáxane. Rü yema Rubéü̃tanüxü̃na rü Gáxtanüxü̃na chanaxã ga yema naane ga Garaáxanewa ixügüxü̃ rü natü ga Arnóü̃arü ngãxü̃wa nadapetü rü ñu̱xmata natü ga Yabóxgu yacuáx ga Amóü̃tanüxü̃arü naanemaxã íyaxüyexü̃wa.
16 Nüü̃ nadau 3:15
17 Rü yema naane rü norü oéstecüwawa rü natü ga Yudáü̃ nixĩ ga norü üyeanexü̃. Rü nórtewa rü naxtaxa ga Quinérexwa* inaxügü rü súrwaama nada ñu̱xmata Már ga Ngearü Maxü̃ã́xü̃wa nangu. Rü norü éstewa rü Arabáarü doxonexü̃ nixĩ ga norü üyeane ñu̱xmata ma̱xpǘne ga Picháarü tuãchixü̃wa nangu.
18 Rü yexguma ga choma rü pemaxã nüxü̃ chixu rü ñachagürü pexü̃: “Pa Rubéü̃tanüxü̃, rü Pa Gáxtanüxü̃, rü Pa Ngãxü̃tücumü ga Manachétanüxü̃x, Cori ya perü Tupana rü marü pexna nanaxã ga ñaa naane. Rü ngẽmaca̱x pexü̃ chamu i ñu̱xma nax guxãma ya yíxema daixü̃ cuáxe rü penadexü̃ ya pexnegü rü naxpe̱xegu pexĩxü̃ i petanüxü̃ i Iraétanüxü̃ nax namaxã pichoü̃xü̃ca̱x i ngẽma natü i Yudáü̃.
19 Rü yíxema pexma̱xgü, rü pexacügü, rü yíxexicatátama nixĩ ya yima perü ĩanegü ya pexna chaxãgünewa ngẽxmagüxe namaxã i pexü̃nagü i muxũchixü̃ i pexü̃́ ngẽxmaxü̃.
20 Rü pemaxã nüxü̃ chixu rü ngẽxguma pexenexẽgü rü taxũta napugüã̱xgu i ngẽma naane i Cori ya Tupana tá nüxna ãxü̃ i natü i Yudáü̃arü tocutüwa, rü ngẽxguma Cori ya Tupana taxũta nüxna naxãxgu i ngẽma taãxẽ ga pexna naxãxü̃rüxü̃, rü pema rü taxucürüwa naxca̱x pewoegu i ñaa naane ga pexna chaxãxü̃”, ñachagürü pexü̃.
21 Rü Yochuéna chaxãga rü ñachagürü nüxü̃: “Marü cuxetümaxã nüxü̃ cudau i guxü̃ma i ngẽma curü Cori ya Tupana üxü̃ namaxã ga yema taxre ga ãẽ̱xgacügü ga Óx rü Chióü̃. Rü ngẽmatátama nixĩ i namaxã cuxüxü̃ i guxü̃ma i ngẽma ãẽ̱xgacügü i norü naanewa tá quixüpetüchigüxü̃.
22 ¡Rü taxṹ i nüxü̃ cumuü̃xü̃! Erü nüma ya Cori ya curü Tupana tátama pexü̃ naxümücü nax nüxü̃ perüporamaegüxü̃ca̱x i perü uanügü”, ñachagürü nüxü̃.
Cori ya Tupana rü tama nanaxwa̱xe nax Canaáü̃anewa nanguxü̃ ga Moiché
23 3:23-24 Rü yexgumaü̃cüxü chayumüxẽ rü Cori ya Tupanana naxca̱x chaca rü ñachagürü: “Pa Corix, cuma rü marü icunaxügü nax daa curü duü̃xü̃xü̃ cunawéxü̃ nax ñuxãcü guxü̃étüwa cungexmaxü̃ rü guxü̃arü yexera cuporaxü̃. Rü cuxicatama nixĩ ya Tupana quixĩxü̃ i daxũguxü̃ i naanewa rü ñoma i naanewa rü cuxicatama nixĩ i nüxü̃ cucuáxü̃ nax cunaxüxü̃ i ngẽma mexü̃gü i curü poramaxã cuxüxü̃.
24 Nüü̃ nadau 3:23
25 Rü cuxna naxca̱x chaca nax natü i Yudáü̃arü tocutüwa choxü̃ cumuxü̃, erü nüxü̃ chadauxchaxü̃ i ngẽma naane i nanetügü mea nawa yaexü̃, rü ngẽma máxpü̱xanexü̃ i mexü̃ rü ñu̱xũchi ngẽma Líbanuarü ma̱xpǘnegü”, ñachagürü.
26 Natürü nüma ga Cori ya Tupana rü pegagu chomaxã nanu, rü tama choxna nanaxã ga yema nüxna naxca̱x chacaxü̃. Rü choxü̃ ñanagürü: “¡Marütama! ¡Rü taxṹ i nachiga chomaxã quidexaamaxü̃!
27 ¡Rü yima ma̱xpǘne ya Pichátape̱xegu naxĩnagü rü ngẽma nórteguama, rü súrguama, rü ésteguama, rü oésteguama nadawenü! ¡Natürü taxũtáma quixüe i ngẽma natü i Yudáü̃!
28 ¡Rü naxuxcu̱xẽ i Yochué, rü nüxü̃́ nangúchaü̃xẽxẽ rü naporaxẽxẽ! Erü nüma tá nixĩ i duü̃xü̃gümaxã naxũxpe̱xeãxü̃, rü namaxã tá yapugüãxü̃ i ngẽma naane i ñu̱xma tá nüxü̃ cudauxü̃”, ñanagürü choxü̃.
29 Rü yema doxonexü̃ ga Bex-peúarü to̱xma̱xtawa yexmaxü̃gu tarücho.
Notas
^ 3:17 Naxtaxa ga Gariréa.
