Deuteronómio 31:1-30
31 Rü Moiché rü wenaxarü Iraétanüxü̃maxã nidexa, rü nüxü̃ nixu ga ñaa ore:
2 —Choma rü marü 120 ya taunecü choxü̃́ nangẽxma, rü ngẽmaca̱x marü nataxuma i chorü pora nax pemaxã ichacuáxü̃ca̱x. Rü ñu̱xũchi nüma ya Cori ya Tupana rü chomaxã nüxü̃ nixu nax choma rü taxũtáma chixüexü̃ i natü i Yudáü̃.
3 Natürü nüma ya Cori ya perü Tupana tá nixĩ i pepe̱xegu yaxũxü̃ i Yudáü̃arü tocutüwa. Rü nüma tá nixĩ i pexme̱xgu nayixẽxẽãxü̃ i ngẽma duü̃xü̃gütücumügü i ngéma ngẽxmagüxü̃. Rü ngẽxguma i ngẽma norü naane rü pexrü tá nixĩ. Rü Yochué tá nixĩ ya perü ãẽ̱xgacü ya pemaxã icuácü, yema Cori ya Tupana nüxü̃ ixuxü̃rüxü̃.
4 Rü nüma ya Cori ya Tupana tá nixĩ i pexme̱xgu nayixẽẽãxü̃ i ngẽma duü̃xü̃gütücumügü i Yudáü̃arü tocutüwa ngẽxmagüxü̃, yexgumarüxü̃ nax pexme̱xgu nayixẽẽãxü̃ ga yema Amoréutanüxü̃arü ãẽ̱xgacügü ga Chióü̃ rü Óx ga yexguma norü naane peyapugügu.
5 Rü ngẽxguma Cori ya Tupana tá pexme̱xgu nayixẽxẽgu i ngẽma duü̃xü̃gütücumügü i ngẽma naanewa ngẽxmagüxü̃, rü chanaxwa̱xe nax namaxã peyanguxẽxẽxü̃ nax penadaixü̃ ngẽma pemaxã nüxü̃ chixuxü̃rüxü̃.
6 Rü ngẽxguma ngẽma duü̃xü̃gümaxã pegü peda̱i̱xgu, ¡rü taxṹ i pemuü̃exü̃ rü peba̱i̱xãchiexü̃! ¡Rü pegü íperüporae! Erü nüma ya Cori ya perü Tupana rü tá petanüwa nangẽxma, rü nüma rü tagutáma pexna nixũgachi rü tagutáma pexü̃ ngéma nawogü —ñanagürü.
7 Rü yemawena ga Moiché rü Yochuéca̱x naca, rü guxü̃ma ga yema Iraétanüxü̃pe̱xewa ñanagürü nüxü̃: —¡Ẽcü cugü írüpora! Erü cuma tá nixĩ i cuyagagüxü̃ i ñaa duü̃xü̃gü nawa i ngẽma naane ga Cori ya Tupana tórü o̱xigümaxã nüxü̃ ixuxü̃. Rü cuma tá nixĩ i namaxã cunapuxü̃ i ngẽma naane.
8 Rü nümatama ya Cori ya Tupana rü cupe̱xegu tá nixũ, rü guxü̃gutáma nacuxü̃tagu. Rü tagutáma cuxna nixũgachi rü tagutáma cuxü̃ nangemücü. Rü ngẽmaca̱x tama name nax cumuü̃xü̃ rü naxcha̱xwa quiñaxü̃ —ñanagürü ga Moiché.
Nüxü̃ nadaumatü ga Tupanaarü mugü
9 Rü nüma ga Moiché rü nanaxümatü ga yema Tupanaarü mugü. Rü ñu̱xũchi yema chacherdótegü ga Lebítanüxü̃ ga Tupanaarü mugüchixü̃ ingegüxü̃na nanaxã. Rü yexgumarüxü̃ ta guxü̃ma ga yema Iraétanüxü̃arü ãẽ̱xgacügüna nanaxã ga yema mugü ga ümatüxü̃.
10 31:10-11 Rü yexguma ga nüma ga Moiché rü yema ãẽ̱xgacügüxü̃ naxuxcu̱xẽ, rü ñanagürü: —Guxü̃guma i ngẽxguma norü 7 ya taunecüwa nanguuxü̃gu nax pegüxü̃́ nüxü̃ pengechaü̃güxü̃ i perü ngetanügü, rü ngẽxguma tá nixĩ i guxü̃ma i duü̃xü̃güpe̱xewa nüxü̃ pedaumatügüxü̃ i ñaa mugü. Rü ngẽma tá nixĩ i duü̃xü̃güpe̱xewa pexüxü̃ i ngẽxguma düxenügüchigaarü tauemacüwa nanguuxü̃gu rü guxü̃ma i Iraétanüxü̃ Tupanape̱xegu ngutaque̱xegüxü̃gu nawa i ngẽma nachica i nümatama tá nüxü̃ naxunetaxü̃.
11 Nüü̃ nadau 31:10
12 Rü ngẽma ngunexü̃gu rü guxü̃táma i duü̃xü̃gü i yatüxü̃gü, rü ngexü̃gü, rü buxü̃gü, rü duü̃xü̃gü i to i nachixü̃anecüã̱x i perü ĩanegügu ãchiü̃güxü̃, rü tá nangutaque̱xegü nax nüxü̃ naxĩnüexü̃ca̱x i ngẽma Tupanaarü mugü nax ngẽmaãcü nangúexü̃ca̱x nax nüxü̃ nangechaü̃güxü̃ca̱x ya tórü Cori ya Tupana, rü nagu namaxẽxü̃ca̱x i guxü̃ma i ngẽma mugü nüxü̃ ixuxü̃.
13 Rü ngẽmaãcü i ngẽma pexacügü i tama nüxü̃ cua̱xgüxü̃ i ngẽma mugü, rü tá nüxü̃ naxĩnüe rü ngẽmaãcü tá naxca̱x nangúe nax naga naxĩnüexü̃ rü nüxü̃ nangechaü̃güxü̃ ya Cori ya Tupana i ngẽxguma namaxẽyane nawa i ngẽma naane i tá nawa pengẽxmagüxü̃ nawena nax pichoü̃xü̃ i natü i Yudáü̃ —ñanagürü ga Moiché.
Uxcuxẽgü ga Cori ya Tupana Moichéna ãxü̃
14 Rü nüma ga Cori ya Tupana rü Moichémaxã nidexa rü ñanagürü: —Dücax, marü ningaica nax nawa nangugüxü̃ i ngunexü̃ nax cuyuxü̃. Rü ngẽmaca̱x chanaxwa̱xe i Yochuéca̱x cuca rü wüxigu i pema i taxre rü chopatawa pexĩ, nax ngéma choma pemaxã nüxü̃ chixuxü̃ca̱x i ta̱xacü tá pexüxü̃ —ñanagürü ga Cori ya Tupana. Rü nüma ga Moiché rü Yochué rü Tupanapatawa naxĩ.
15 Rü yéma Tupanapatawa rü nüma ga Cori ya Tupana rü wüxi ga caixanexü̃wa naxca̱x nango̱x. Rü yema caixanexü̃ rü Tupanapataarü ĩã̱x i nawa ixücuxü̃étügu nachü̱xüxü̃.
16 Rü yexguma ga Cori ya Tupana rü Moichémaxã nidexa rü ñanagürü: —Marü paxa tá cuyu, rü ñaa chorü duü̃xü̃gü i Iraétanüxü̃ rü paxa tá nawe narüxĩ i ngẽma tupananetagü i ngẽma naane i tá peyaxuxü̃wa ngẽxmagüxü̃. Rü ngẽxguma rü tá choxna nixĩgachitanü, rü ngẽmaãcü tá nagu narüchixe i ngẽma uneta i namaxã chaxüxü̃.
17 Rü ngẽxguma i choma rü tá namaxã chanu, rü tá nüxna chixũgachi rü nüxica tá ngéma chanawogü. Rü marü taxũtáma marü nüxü̃ chacuáxchaü̃ i ngẽma Iraétanüxü̃. Rü guxchaxü̃gü rü ngúxü̃gü tá naxca̱x ínangugü. Rü ngẽmaca̱x i nümagü rü düxwa tá nügümaxã ñanagürügü: “¿Ẽ̱xna ñaa ngúxü̃ rü taxca̱x ínangu erü tórü Cori ya Tupana rü marü tama taxü̃tawa nangẽxma?” ñanagürügü.
18 Natürü ngẽxguma ngẽma ngunexü̃wa nanguxgu i choma rü tá yexeraãcü nüxna chixũgachi i ngẽma Iraétanüxü̃ nagagu i ngẽma chixexü̃ i naxügüxü̃ rü ñu̱xũchi nagagu nax ngẽma tupananetagüxü̃ nax yacua̱xüü̃güxü̃.
19 Rü ñu̱xma rü chanaxwa̱xe nax cuma rü Yochué penaxümatüxü̃ i ñaa wiyae, rü ñu̱xũchi Iraétanüxü̃xü̃ namaxã penangúexẽẽxü̃ nax nagu nawiyaegüxü̃ca̱x rü ngẽmawa nüxna nacua̱xãchiexü̃ca̱x i ngẽma choma pemaxã nüxü̃ chixuxü̃.
20 Erü choma rü tá nagu chanachocuxẽxẽ i ngẽma naane ga chauégagu norü o̱xigümaxã nüxü̃ chixuxü̃ i ngextá yima lechi rü berure rü ñoma dexárüxü̃ taguma ínataxuxü̃wa. Rü ngẽxguma tá marü lechi nixaxgügu, rü berure ne niwexgu, rü nawa nangaxpütüwegügu rü nawa yangüegu, rü ngẽxguma i nümagü rü tá tupananetagüwe narüxĩ rü ngẽmaxü̃ãma tá nicua̱xüü̃gü rü chauxchi rü tá naxaixe. Rü ngẽxguma i ngẽma uneta i pemaxã chaxüxü̃ rü tá nagu narüchixe.
21 Natürü ngẽxguma naxca̱x tá ínanguxgu i naguxü̃raü̃xü̃ i ngúxü̃gü rü guxchaxü̃gü, rü ñaa wiyaewa tá nüxna nacua̱xãchie nax chixexü̃ naxügüxü̃. Erü ngẽma nataagü rü tá nüxna nacua̱xãchi i ñaa wiyae rü tá nagu nawiyaegü. Rü choma rü naxü̃pa nax nagu chanachocuxẽẽxü̃ i ngẽma Iraétanüxü̃ nawa i ngẽma naane ga namaxã chaxueguxü̃ rü marü nüxü̃ chacua̱x nax ta̱xacürü chixexü̃gu tá yixĩxü̃ ga naxĩnüexü̃ —ñanagürü ga Tupana.
22 Rü yematama ngunexü̃gu ga Moiché rü nanaxümatü ga yema wiyae rü ñu̱xũchi Iraétanüxü̃xü̃ nangúexẽxẽ ga yema wiyae.
23 Rü nüma ya Cori ya Tupana rü Yochué ga Núü̃ nanemaxã nüxü̃ nixu i ñaa ucu̱xẽ rü ñanagürü nüxü̃: —¡Napora rü taxṹ i cumuü̃xü̃! Erü cuma tá nixĩ i cuyachocuxẽẽxü̃ i ngẽma Iraétanüxü̃ nawa i ngẽma naane i nüxü̃ chixuxü̃ nax noxrügü tá yixĩxü̃. Rü choma rü tá cuxü̃ chaxümücü —ñanagürü.
24 Rü nüma ga Moiché rü nanagu̱xẽxẽ nax poperagu naxümatüaxü̃ ga yema mugü.
25 Rü ñu̱xũchi nidexa namaxã ga yema Lebítanüxü̃ ga yangegüxü̃ ga yema baú ga Tupanaarü mugüpane nagu üxü̃, rü ñanagürü nüxü̃:
26 —Ñaa nixĩ i ngẽma popera i Tupanaarü mugüpane. ¡Rü ngẽma baú i Cori ya Tupanaarü mugü nagu üxü̃cüwagu penaxǘ i ñaa popera nax ngẽmawa nüxna pecua̱xãchiexü̃ca̱x ya Cori ya Tupana ega ngẽxguma nüxna pixĩgachitanügu!
27 Erü choma rü marü nüxü̃ chacua̱x nax pema rü wüxi i duü̃xü̃gü i taierugüxe rü tama ĩnüwa̱xegüxe nax pixĩgüxü̃. Rü ñu̱xma nax petanüwa chamaxü̃xü̃ rü nüxü̃ chadauxü̃ nax tama Cori ya Tupanaga pexĩnüexü̃, ¿rü ngẽxguma chayuxguwena rü ta̱xacürü chixexü̃ tá yixĩxü̃ i pexügüxü̃?
28 ¡Rü ñu̱xma rü nua penagagü i guxü̃ma i perü ãẽ̱xgacügü i yaxguã̱xgü rü petücumüarü ãẽ̱xgacügü nax namaxã nüxü̃ chixuxü̃ca̱x nachiga i ñaa Cori ya Tupanaarü mugü! Rü daxũguxü̃ i naane rü ñoma i naane rü nüxü̃ nacua̱xgü nax aixcüma yixĩxü̃ i ngẽma tá nüxü̃ chixuxü̃.
29 Erü choma rü marü nüxü̃ chacua̱x rü ngẽxguma chayuxguwena rü pemax rü tá chixri pemaxẽ, rü tá nüxna pixĩgachi i ngẽma mugü ga pemaxã nüxü̃ chixuxü̃. Rü ngẽxgumarüxü̃ ta nüxü̃ chacua̱x nax yixcüra tá pexca̱x ínanguxü̃ i guxchaxü̃gü nagagu nax chixexü̃ pexügüxü̃ nape̱xewa ya Cori ya Tupana rü ngẽmamaxã nax penanuxẽẽxü̃ —ñanagürü.
Moichéarü wiyae
30 Rü yexguma ga Moiché rü guxü̃ma ga yema Iraétanüxü̃ ga yexma ngutaque̱xegüxü̃pe̱xewa nüxü̃ nixu ga ñaa wiyae. Rü norü ügüwa inanaxügü rü ñu̱xmata norü gu̱xwa nangu nax namaxã nüxü̃ yaxuxü̃, rü ñanagürü:
