Deuteronómio 34:1-12
34 Rü Moáanearü chianexü̃wa inaxũãchi ga Moiché nax ma̱xpǘneanexü̃ ga Nébuwa naxũxü̃ca̱x. Rü guma ma̱xpǘne ga Pichágu naxĩnagü. Rü guma ma̱xpǘne rü Yericúarü to̱xma̱xtawa nayexma. Rü yéma nixĩ ga Cori ya Tupana nüxü̃ nawéxü̃ ga guxü̃ma ga Garaáxane rü ñu̱xmata Dáü̃arü naanegu nüxü̃ nadauxẽxẽ.
2 Rü yexgumarüxü̃ ta nüxü̃ nanawe̱x ga naane ga Netaríarü, rü Efraíü̃arü, rü Manachéarü, rü guxü̃ma ga Yudáarü naane rü ñu̱xmata Már ga Mediteráneuwa nangu.
3 Rü nüxü̃ nanawe̱x ta ga Néguearü chianexü̃, rü natü ga Yudáü̃arü naane ga metachinüxü̃, rü ñu̱xũchi Yericú ga Cucunecüarü Ĩane rü ñu̱xmata ĩane ga Chóagu nadau.
4 Rü nüma ga Cori ya Tupana rü ñanagürü Moichéxü̃: —Ñaa nixĩ i ngẽma naane ga curü o̱xigü ga Abraáü̃, rü Ichaá, rü Acóbumaxã nüxü̃ chixuxü̃ rü tá nataagüna chaxãxü̃. Rü ngẽmaca̱x chanaxwa̱xe nax cuxetümaxãxü̃chi nüxü̃ cudauxü̃, rü woo i cuma rü taxũtáma nawa cungu —ñanagürü.
5 Rü yemawena ga Moiché ga Tupanaarü duü̃ rü nayu nagu ga yema Moáane, yema Cori ya Tupana namaxã naxueguxü̃rüxü̃.
6 Rü wüxi ga Moáanearü doxonexü̃gu nixĩ ga Tupana natáxü̃ ga Bex-peúarü to̱xma̱xtawa, nagu ga wüxi ga nachica i ñu̱xmarüta taxúema nüxü̃ cuáxü̃.
7 Rü nüma rü nüxü̃́ nayexma ga 120 ga norü taunecü rü yexguma rü ta meama tüxü̃ nadau rü napora.
8 Rü nüma ga Iraétanüxü̃ rü 30 ga ngunexü̃ naxca̱x naxauxe ga Moáanearü chianexü̃wa, rü yemaacü nayanguxẽẽgü ga nax naxaurexü̃ naxca̱x ga Moichéarü yu.
9 Rü nüma ga Yochué ga Núü̃ nane rü marü Moichéxü̃tawa nanayaxu ga cua̱x yerü nüma ga Moiché rü naétügu naxǘxme̱x. Rü yemaca̱x ga Iraétanüxü̃ rü Yochuéga naxĩnüe rü nayanguxẽẽgü ga yema Cori ya Tupana Moichémaxã nüxü̃ ixuxü̃.
10 Rü Moichéwena rü Iraétanüxü̃tanüwa taguma nayexma ga to ga orearü uruxü̃ ga Moichérüxü̃ ixĩcü ga Cori ya Tupana namaxãxü̃chi idexacü.
11 Rü Moichéxicatama nixĩ ga naxüxü̃ ga yema cua̱xruü̃gü rü mexü̃gü ga Tupanaarü poramaxã naxüxü̃ ga Equítuanewa nape̱xewa ga Faraóü̃ rü norü ngü̃xẽẽruü̃gü rü guxü̃ma ga Equítuanecüã̱xgü.
12 Rü Moichéwena rü taguma texé Moichérüxü̃ tüxü̃́ nayexma ga pora nax naxüaxü̃ ga yema taxü̃ ga mexü̃gü ga Tupanaarü poramaxã naxüxü̃ nape̱xewa ga guxü̃ma ga Iraétanüxü̃.
