Deuteronómio 4:1-49
4 Rü ñu̱xma Pa Chautanüxügü Pa Iraétanüxü̃x, ¡rü nüxü̃ pexĩnüe i ngẽma Tupanaarü mugü ga pexü̃ changúexẽxẽxü̃ nax aixcüma mea peyanguxẽẽxü̃ca̱x rü nagu pemaxẽxü̃ca̱x rü ngẽmaãcü penayaxuxü̃ca̱x i ngẽma naane i nũxcümaü̃güxü̃ i perü o̱xigüarü Cori ya Tupana tá pexna ãxü̃!
2 ¡Rü taxṹ i to i mugü pixücuchixü̃ rüe̱xna ípenaxíxraãchixü̃ i ngẽma Cori ya Tupanaarü mugü i pexü̃ changúexẽxẽxü̃! ¡Rü peyangu̱xẽxẽ i ngẽma norü mugü i choma pemaxã nüxü̃ chixuxü̃!
3 4:3-4 Rü pematama nüxü̃ pedaugü ga yema Cori ya Tupana Baá-peúwa üxü̃ rü ñuxãcü nadaiaxü̃ ga guxü̃ma ga yema petanüxü̃ ga yema nachixü̃anearü tupananetaxü̃ icua̱xüü̃güxü̃. Natürü guxãma ga pema ga aixcüma Cori ya perü Tupanaga nax pexĩnüexü̃ rü ñu̱xma rü ta pemaxẽ.
4 Nüü̃ nadau 4:3
5 Choma rü marü pexü̃ changúexẽxẽ ga guxü̃ma ga yema mugü ga Cori ya chorü Tupana chomaxã nüxü̃ ixuxü̃ nax ngẽmaãcü aixcüma nagu pemaxẽxü̃ca̱x nawa i ngẽma naane i nagu tá pechocuxü̃.
6 ¡Rü peyanguxẽxẽ rü aixcüma nagu pexĩ i ngẽma mugü nax ngẽmaãcü i ngẽma togü i duü̃xü̃gü nüxü̃ yacua̱xãchitanüxü̃ca̱x nax aixcüma petanüwa nangẽxmaxü̃ i cua̱x! Rü ngẽxguma nümagü nüxü̃ naxĩnüegu i ñaa mugü rü ñanagürügü tá: “Rü nataxuma i to i duü̃xü̃gü i ñaa Iraétanüxü̃rüxü̃ nüxü̃ icua̱xüchixü̃”, ñanagürügü tá.
7 Rü tórü Cori ya Tupana rü guxü̃guma i ngẽxguma ta̱xacüca̱x nüxna icagügu rü tüxna nangaicama. Rü nataxuma i to i duü̃xü̃gütücumü i taxrüxü̃ nüxü̃́ ngẽxmaxü̃ i norü tupana i nüxna ngaicamaxü̃ i ngẽxguma ta̱xacüca̱x nüxna nacagügu.
8 ¿Rü ta̱xacü i to i duü̃xü̃gütücumü nüxü̃́ nangẽxma i norü mugü i aixcüma mexü̃ naxrüxü̃ i guxü̃ma i ñaa mugü i ñu̱xma pexü̃ changúexẽxẽxü̃?
9 ¡Rü ngẽmaca̱x pexuãẽgü nax tama nüxü̃ iperüngümaexü̃ca̱x i ngẽma nüxü̃ pedaugüxü̃, rü woo peãẽwa tagutáma nüxü̃ iperüngümae i ngẽma Tupana pexca̱x üxü̃! Rü name nixĩ i pexacügüxü̃ rü petaagüxü̃ namaxã pengúexẽẽxü̃.
Tupana rü ma̱xpǘne ga Oréxwa Iraétanüxü̃maxã nidexa
10 Rü yema ngunexü̃ ga Cori ya perü Tupanape̱xewa peyexmagügu ga ma̱xpǘne ga Oréxwa, rü nüma ga Cori ya Tupana rü chomaxã nidexa rü ñanagürü: “¡Wüxigu nangutaque̱xexẽxẽ i duü̃xü̃gü nax ngẽmaãcü nüxü̃ naxĩnüexü̃ca̱x i chorü ore, rü ñu̱xũchi guxü̃ma i ngunexü̃gü i nagu namaxẽxü̃gu chauga naxĩnüexü̃ca̱x! Rü name nixĩ i nümagü rü naxacügüxü̃ namaxã nangúexẽẽxü̃ i chorü ore nax ngẽmaãcü i ngẽma naxacügü rü ta chauga naxĩnüexü̃ca̱x”, ñanagürü.
11 Pemax rü pengutaque̱xegü napünegu ga guma ma̱xpǘne, rü guma ma̱xpǘnewa rü üxü nayagoemaxü̃ ga daxũwama nguemaxü̃. Rü yema naemawa rü nayanguxuchi ga caixanexü̃ ga pamüemaxü̃ ga waemaxü̃.
12 Rü yexguma ga Cori ya Tupana rü yema üxüemaarü ngãxü̃wa pemaxã nidexa. Pemax rü nüxü̃ pexĩnüe ga yema norü dexa, natürü yexguma nüxü̃ pexĩnüegu ga naga rü taxuxü̃ma ga naxchicüna̱xãxü̃ pedau.
13 Rü nüma ga Cori ya Tupana rü pexü̃ nüxü̃ nacua̱xẽxẽ ga yema norü unetagü ga 10 i mugü ixĩxü̃ ga taxre ga nutatachinügu naxümatüxü̃. Rü ñu̱xũchi pexü̃ namu nax aixcüma peyanguxẽẽxü̃ca̱x.
14 Rü nüma rü choxü̃ namu nax pexü̃ changúexẽẽxü̃ca̱x i ngẽma norü mugü nax naga pexĩnüexü̃ca̱x nawa i ngẽma naane i nagu tá pechocuxü̃ nax pexrü yixĩxü̃ca̱x.
Ucu̱xẽgü nax tama naxchicüna̱xãxü̃ yacua̱xüü̃güxü̃ca̱x
15 4:15-18 Rü yema ngunexü̃ ga Cori ya Tupana üxüemaarü ngãxü̃wa pemaxã yadexaxgu ga ma̱xpǘne ga Oréxwa rü taxuxü̃ma ga naxchicüna̱xãxü̃ pedau. ¡Rü ngẽmaca̱x pexuãẽgü nax tama nagu peyixü̃ca̱x i ngẽma chixexü̃ nax pegüca̱x penaxüxü̃ i naxchicüna̱xãgü inayatüraü̃xü̃ rüe̱xna nangexeraü̃xü̃ rü bai i naeü̃güchicüna̱xãgü, rüe̱xna werigüchicüna̱xãgü, rüe̱xna ngẽma waixü̃mügu nügü itúgüxü̃chicüna̱xãgü, rüe̱xna choxnigüchicüna̱xãgü nax ngẽmaxü̃ picua̱xüü̃güxü̃ca̱x!
16 Nüü̃ nadau 4:15
17 Nüü̃ nadau 4:15
18 Nüü̃ nadau 4:15
19 Rü ngẽxguma daxũ pedaugügu rü nüxü̃ peda̱u̱xgu ya üa̱xcü, rü tauemacü, rü ẽxtagü, rü guxü̃ma i daxũwa naigüxü̃ rü ¡taxṹ i pexü̃́ nangúchaü̃xü̃ nax nüxü̃ picua̱xüü̃güxü̃ca̱x! Erü nüma ya Cori ya perü Tupana rü guxü̃ma i duü̃xü̃gü i ñoma i naanewa maxẽxü̃ca̱x nixĩ i nango̱xẽẽãxü̃ i ngẽma daxũwa naigüxü̃.
20 Rü nüma ga Cori ya Tupana rü nawa pexü̃ ínamuxü̃ ga Equítuane ga pexca̱x ñoma guruxü ga nawa fieru idexẽẽnerüxü̃ ixĩxü̃. Rü yemaacü pexü̃ narüngü̃xẽxẽ nax ngẽmaãcü norü duü̃xü̃gü pixĩgüxü̃ca̱x. Rü ñu̱xma rü ta rü noxrütama pixĩgü.
21 Natürü nüma ga Cori ya Tupana rü pegagu chomaxã nanu, rü chomaxã nanaxuegu nax taxũtáma chixüexü̃ i ngẽma natü i Yudáü̃ rü bai tá nagu chaxücuxü̃ i ngẽma naane i mexü̃ i nüma tá pexna naxãxü̃ nax pexrü yixĩxü̃ca̱x.
22 Rü ngẽmaãcü i choma rü ñaa tátama i naanegu chayu, rü taxũtáma chixüe i ngẽma natü i Yudáü̃. Natürü i pema rü tá pichoü̃ rü tá peyapu i ngẽma naane i mexü̃.
23 ¡Natürü pexuãxẽgü nax tama nüxü̃ iperüngümaexü̃ca̱x ga yema uneta ga Cori ya perü Tupana pemaxã nüxü̃ ixuxü̃! ¡Rü taxũtáma pegüca̱x penaxü i ta̱xacürü naxchicüna̱xãgü nax namaxã petupanaã́xü̃ca̱x! Erü nüma ya Cori ya perü Tupana rü nanachu̱xu i ngẽma.
24 Erü yimá Cori ya perü Tupana rü Tupana ya pexü̃ inuxü̃cü nixĩ. Rü nüma rü ñoma wüxi i üxüema i guxü̃ma iyarüxoxẽẽxü̃rüxü̃ nixĩ.
25 Rü ngẽxguma ngẽma naanegu pichocugu rü ngéma pexãxacügügu rü pexãtaagügu rü ngẽxma peyaegu, ¡rü taxũtáma petoṍxẽgü rü penaxü i ta̱xacürü naxchicüna̱xãgü nax namaxã petupanaã̱xgüxü̃ca̱x! Erü ngẽma rü wüxi i taxü̃ i chixexü̃ tá nixĩ i Tupanape̱xewa pexüxü̃ rü nüma rü tá poraãcü pemaxã nanu.
26 Rü ngẽxguma ngẽma chixexü̃ pexü̱xgu, rü choma rü daxũguxü̃ i naanepe̱xewa rü ñoma i naanepe̱xewa pemaxã nüxü̃ chixu rü paxa tá ipeyarüxo nawa i ngẽma naane i nagu tá pechocuxü̃ i Yudáü̃arü tocutüwa ngẽxmaxü̃. Rü taxũtáma mucü ya taunecü nawa pemaxẽ i ngẽma naane rü noxtacüma tá ipeyarüxo.
27 Rü nüma ya Cori ya Tupana rü guxü̃ma i nachixü̃anegügu tá pexü̃ nawoone. Rü noxretátama i pema tá nixĩ i ngẽma nachixü̃anegüwa peyaxüxgüxü̃.
28 Rü ngéma tá nixĩ i nüxü̃ picua̱xüü̃güxü̃ i tupananetachicüna̱xãgü i duü̃xü̃gümare naiwa rü nutawa ügüxü̃ i tama tüxü̃ dauxü̃, rü tama tüxü̃ ĩnüxü̃, rü tama chibüxü̃, rü tama ingü̃ãcüüxü̃.
29 Natürü ngẽxguma ngẽma nachixü̃anegüwa pema rü guxü̃ma i perü ngúchaü̃maxã rü guxü̃ma i peãẽmaxã Cori ya perü Tupanaca̱x pewoegugu rü nüxü̃ tá ipeyangaugü.
30 4:30-31 Rü nawena nax nawa pechopetüxü̃ i guxü̃ma i ngẽma ngúxü̃gü rü guxchaxü̃gü, rü ngẽxguma wena Cori ya Tupanaca̱x pewoegu̱xgu rü naga pexĩnüegu, rü nüma rü namecümaxüchi rü taxũtáma pexü̃ ínawogü rü taxũtáma pexü̃ nadai, rü taxũtáma nüxü̃ narüngüma ga yema uneta ga perü o̱xigümaxã nüxü̃ yaxuxü̃.
31 Nüü̃ nadau 4:30
32 ¡Naxca̱x pedau rü penangugü! Rü yexguma noxritama Tupana nango̱xẽẽgu ga duü̃xü̃ rü ñu̱xmata ñomaü̃cüü ¿rü tá ngextá nüxü̃ ipeyangau i to i natücumü i duü̃xü̃ i perüxü̃ Tupana nüxü̃ rüngü̃xẽẽxü̃? Rü woo guxü̃wama i ñoma i naanewa naxca̱x pedaugügu i ta̱xacü i duü̃xü̃güxü̃ ngupetüxü̃ rü taxũtáma nüxü̃ ipeyangau ga yema petanüwa ngupetüxü̃rüxü̃ ixĩxü̃.
33 ¿Rü nangẽxmaxü̃ i to i duü̃xü̃gütücumü i pexrüxü̃ nüxü̃ ĩnüexü̃ i Tupanaga ga yexguma üxüemaarü ngãxü̃wa pemaxã yadexaxgu rü tama yuexü̃?
34 ¿Rü nangẽxmaxü̃ i ta̱xacürü tupana i guxü̃ i nachixü̃anegütanüwa ínanguxü̃xẽxẽxü̃ i wüxitücumü i duü̃xü̃gü nax norü duü̃xü̃gü yaxĩgüxü̃ca̱x? Natürü nüma ga Cori ya perü Tupana rü Equítuanewa pexü̃ ínagaxü̃ naétüwa ga muxü̃ma ga guxchaxü̃gü. Rü inanawe̱x ga norü pora ga yexguma inawéãgu ga cua̱xruü̃gü rü taxü̃ ga mexü̃gü rü ãũcümaxü̃gü rü daigü ga pepe̱xewa Equítuanewa pexca̱x naxüxü̃.
35 Rü nüma rü pexca̱x nanaxü ga guxü̃ma ga yema nax yemaacü nüxü̃ pecuáxü̃ca̱x nax nüma yixĩxü̃ ya Cori ya aixcüma Tupana ixĩcü, rü naweama rü nataxuma i to i tupana.
36 Nüma rü daxũguxü̃ i naanewa pemaxã nidexa nax ngẽmaãcü pexü̃ yaxucu̱xẽgüxü̃ca̱x, rü ñoma i naanewa rü pexü̃ nanawe̱x ga taxü̃ ga norü üxüema, rü yema üxüemaarü ngãxü̃wa pemaxã nidexa.
37 Nüma rü nüxü̃ nangechaxü̃ ga yema nũxcümaü̃güxü̃ ga perü o̱xigü, rü yemaca̱x nayadexechigü ga yema nataagü. Rü norü poramaxã ínananguxü̃xẽxẽ ga Equítuanewa.
38 Rü pepe̱xewa ínanawoxü̃ ga yema duü̃xü̃gü ga pexü̃ rümumaexü̃ rü pexü̃ rüporamaegüxü̃ nax ngẽmaãcü norü naanewa pemaxẽxü̃ca̱x rü pexrü yixĩxü̃ca̱x i norü naane ngẽma ñu̱xma íngupetüxü̃rüxü̃.
39 Rü ngẽmaca̱x mea pegüãẽgu namaxã penguxü̃ nax daxũguxü̃ i naanewa rü ñoma i naanewa rü nüma i Cori rü Tupana yixĩxü̃, rü nataxuxü̃ma i to i naxrüxü̃ ixĩxü̃.
40 ¡Rü peyanguxẽxẽ i ngẽma norü mugü i ñaa ngunexü̃gu pemaxã nüxü̃ chixuxü̃! Rü ngẽmaãcü tá mea pexü̃ rü petanüxü̃xü̃ nangupetü rü ñu̱xũchi mucü ya taunecü tá nawa pemaxẽ i ngẽma naane i Cori ya perü Tupana tá pexna ãxü̃ nax guxü̃gutáma pexrü yixĩxü̃ca̱x —ñanagürü ga Moiché.
Ĩanegü ga cu̱xchicaxü̃gü ixĩgüne ga natü ga Yudáü̃arü éstewaama yexmagüne
41 4:41-42 Rü yexguma ga Moiché rü nüxü̃ naxuneta ga tomaepü̱x ga ĩanegü ga natü ga Yudáü̃arü éstewa yexmagüne nax yíxema máetacüraxü̃xe ngexnerüxüne ya yima ĩanegügu tayarücúxü̃ca̱x rü taxuxü̃ma tüxü̃ üpetüxü̃ca̱x.
42 Nüü̃ nadau 4:41
43 Rü daagü nixĩ ga guma ĩanegü ga cu̱xchicaxü̃ruxü̃ ixĩgüne: Rü wüxi nixĩ ga guma ĩane ga Rubéü̃tanüxü̃ca̱x ixĩxü̃ne. Rü guma nixĩ ga Béche ga chianexü̃arü metachinüxü̃wa yexmane. Rü nai nixĩ ga guma ĩane ga Gáxtanüxü̃ca̱x ixĩxü̃ne, Rü guma nixĩ ga Ramóx ga Garaáxanewa yexmane. Rü nai nixĩ ga guma ĩane ga ngãxü̃tücumü ga Manachétanüxü̃ca̱x ixĩxü̃ne. Rü guma nixĩ ga Goráü̃ ga Bacháü̃anewa yexmane.
Tupanaarü mugü ga Moichéna ãxü̃
44 Ñaagü nixĩ ga yema Tupanaarü mugü ga Iraétanüxü̃xü̃ namaxã nangúexẽẽxü̃ ga Moiché.
45 4:45-46 Rü nawena ga Equítuanewa ínachoxü̃xü̃, rü ñaa nixĩ ga yema Tupanaarü mugü rü ucu̱xẽgü ga Moiché Iraétanüxü̃maxã nüxü̃ ixuxü̃ ga yexguma Yudáü̃arü éstewa nayexmagügu nawa ga yema metachinüanexü̃ ga Bex-peúarü to̱xma̱xtawa yexmaxü̃. Rü yema naane rü Amoréutanüxü̃arü ãẽ̱xgacü ga Chióü̃arü naane nixĩ, rü nüma rü Ebóü̃wa namaxü̃. Natürü nawena nax Equítuanewa ínachoxü̃xü̃ ga Moiché rü Iraétanüxü̃ rü Chióü̃maxã nügü nadai, rü nüxü̃ narüporamaegü. Rü nayama̱xgü ga yexguma Equítuanewa ínachoxü̃gu.
46 Nüü̃ nadau 4:45
47 Rü yema Iraétanüxü̃ rü nawa nangugü ga norü naane ga Bacháü̃arü ãẽ̱xgacü ga Óx. Rü yema taxre ga ãẽ̱xgacügü ga Amoréutanüxü̃ ga Chióü̃ rü Óx rü Yudáü̃arü ésteguama naxãchiü̃gü.
48 4:48-49 Rü yema norü naanegü rü nataxüchi. Rü Aroéwa inaxügü ga natü ga Arnóü̃cutüwa rü ñu̱xmata ma̱xpǘne ga Chirióü̃wa nangu. Rü guma ma̱xpǘne rü to i naéga rü Ermóü̃ nixĩ. Rü norü naane rü guxü̃ma ga Arabáanewa nada ga Yudáü̃arü éstewaama ñu̱xmata Már i Ngearü Maxü̃ã́xü̃wa nangu ga ma̱xpǘne ga Picháarü tuãchiwa.
49 Nüü̃ nadau 4:48
