Deuteronómio 5:1-33
5 Rü nüma ga Moiché rü nanangutaque̱xexẽxẽ ga guxü̃ma ga Iraétanüxü̃ rü ñanagürü nüxü̃: —¡Iperüxĩnüe, Pa Iraétanüxü̃x, i ñaa mugü rü ucu̱xẽgü i ñu̱xmata pemaxã nüxü̃ chixuxü̃! ¡Rü nawa tá pengúe rü nagu tá pexĩ!
2 Rü nüma ga Cori ya Tupana rü wüxi ga uneta tamaxã naxü ga ma̱xpǘne ga Oréxwa.
3 Rü tama nixĩ ga yema nũxcümaü̃güxü̃ ga tórü o̱xigümaxãxicatama inaxunetaxü̃, natürü tamaxã rü ta nixĩ ga inaxunetaxü̃ i guxãma i yixema nax ñu̱xma nuxã wüxigu ingutaque̱xegüxü̃.
4 Rü nüma ga Cori ya Tupana rü üxüemaarü ngãxü̃wa pepe̱xewa pemaxã nidexa ga guma ma̱xpǘnewa.
5 Rü yexguma ga choma rü Cori ya Tupanape̱xewa chayexma nax yemaacü pemaxã nüxü̃ chixuxü̃ca̱x ga yema norü ore. Yerü ga pema rü nüxü̃ pemuü̃xe nüxü̃ ga guma üxüema rü yemaca̱x tama nagu pexĩgü ga guma ma̱xpǘne. Rü yexguma ga Cori ya Tupana rü ñanagürü:
6 “Choma nixĩ i curü Tupana ga Equítuanewa cuxü̃ íchanguxuchixẽxẽxü̃ naxme̱xwa ga Equítuane ga norü mugüruxü̃ íquixĩxü̃wa.
7 Rü choma nixĩ i curü Tupana chixĩxü̃, rü tama chanaxwa̱xe i chope̱xewa ta̱xacürü tomaxã cutupanaã̱x.
8 ¡Rü taxuxü̃táma i ta̱xacü cugüca̱x cuxüxchicüna̱xã nax ngẽmamaxã cutupanaã́xü̃ca̱x, rü bai i ta̱xacü i daxũguxü̃ i naanewa nüxü̃ cudauxü̃, rü bai i ta̱xacü i ñoma i naanewa ngẽxmaxü̃, rü bai i ta̱xacü i márwa ngẽxmaxü̃ tá cuxüxchicüna̱xã nax ngẽmamaxã cutupanaã́xü̃ca̱x!
9 ¡Rü taxũtáma ta̱xacürü naxchicüna̱xãpe̱xegu cucaxã́pü̱xü rü nüxü̃ quicua̱xüxü̃! Erü choma ya curü Cori ya Tupana ya poracü rü poraãcü cuxü̃ chinuxü̃. Rü ngẽmaca̱x tümaarü chixexü̃ca̱x tá tüxü̃ chapoxcu ya yíxema chauxchi aixe, rü ñu̱xmata tümaxacügüwa, rü tümataagüwa tá chananguxẽxẽ i ngẽma poxcu.
10 Natürü ya yíxema choxü̃ ngechaxü̃güxe rü naga ĩnüexe i ngẽma chorü mugü, rü tüxü̃ changechaü̃, rü tá nüxü̃ changechaü̃ i tümataagü woo 1,000 e̱xpü̱xcüna yamuxgu.
11 Rü taxũtáma chauéga cunaxuxuchi ega ta̱xacürü chixexü̃ cuxü̱xgux. Erü choma ya curü Cori ya Tupana rü taxũtáma tüxü̃ chaxüpetümare nax tüxü̃ chapoxcuxü̃ ya yíxema chauégamaxã tügü ípoxü̃netaxe ega ta̱xacürü chixexü̃ taxü̱xgu.
12 ¡Rü nüxna nacua̱xãchi i ngẽma ngü̃xchigaarü ngunexü̃ nax cha̱u̱xca̱xicatama ícunaxüxüchixü̃ca̱x yema curü Cori ya Tupana cuxü̃ muxü̃ãcüma!
13 Rü 6 i ngunexü̃gu tá nixĩ i cupuracüxü̃ rü cunaxüxü̃ i guxü̃ma i curü puracü i cuxüxchaü̃xü̃.
14 Natürü ngẽma norü 7 i ngunexü̃gu rü tá icurüngü̃ rü nagu tá choxü̃ quicua̱xüxü̃. ¡Rü taxuxü̃táma ta̱xacürü puracü nagu cuxü i ngẽma ngunexü̃, rü woo cunegü, rü woo cuxacügü, rü woo curü mugüruü̃gü, rü woo cuxü̃taxü̃gü, rü woo curü woca i puracüruxü̃, rü woo i curü búru, rü woo ta̱xacürü to i cuxü̃nagü, rü woo i ngẽma duü̃xü̃ i to i nachixü̃anecüã̱x i curü ĩanegüwa ngẽxmagüxü̃! Rü ngẽmaãcü i ngẽma curü mugüruxü̃gü, rü ngẽma cuxü̃taxü̃gü rü cuxrüxü̃tátama inarüngü̃gü.
15 ¡Rü nüxna nacua̱xãchi ga Equítuanewa rü cuma rü norü mugüruxü̃ quixĩxü̃, rü choma nax curü Tupana chixĩxü̃ rü yema chorü pora ga taxü̃maxã cuxü̃ íchagaxüchi! Rü ngẽmaca̱x i choma nax perü Cori ya Tupana chixĩxü̃ rü pexü̃ chamu nax nagu perüngü̃ẽxü̃ i ngẽma ngü̃xchigaarü ngunexü̃.
16 Rü tüxü̃ nangechaxü̃ ya cunatü rü cué, ngẽma choma i curü Cori ya Tupana cuxü̃ chamuxü̃ãcüma nax ngẽmaãcü namáxü̃ca̱x i curü maxü̃ nawa i ñoma i naane i choma i Cori ya Tupana cuxna chaxãxü̃.
17 ¡Rü taxũtáma cumáeta!
18 ¡Rü cuma nax cuxãmaxü̃ rü taxũtáma nai i ngemaxã cumaxü̃! ¡Rü cuma nax cuãtexü̃ rü taxũtáma nai ya yatümaxã cumaxü̃!
19 ¡Rü taxũtáma cungĩ́ta̱a̱x!
20 ¡Rü taxũtáma doraxü̃ quixu i cumücüchiga!
21 ¡Rü taxũtáma cugüxü̃́ tüxü̃ cungúchaü̃xẽxẽ ya cumücüma̱x, rüe̱xna napata, rüe̱xna norü naane, rüe̱xna norü mugüruxü̃, rüe̱xna naxü̃taxü̃, rüe̱xna norü woca i puracüruxü̃, rüe̱xna norü búru, rü bai i ta̱xacü i noxrü ixĩxü̃!” ñanagürü ga Tupana.
Nüma ga Iraétanüxü̃ rü Tupanaxü̃ namuü̃e
22 Rü yemagü nixĩ ga norü mugü ga Cori ya Tupana tagaãcü guma üxüemawa rü yema caixanexü̃ ga pamüemaxü̃wa nüxü̃ ixuxü̃ ga yexguma guxãma ga pema guma ma̱xpǘnepechinügu pengutaque̱xegügu. Rü yemawena rü taxuxü̃ma ga toxü̃ nixu, rü taxre ga nutatachinügu nanaxümatü ga yema norü mugü rü ñu̱xũchi choxna nanaxã.
23 Natürü yexguma pema nüxü̃ pexĩnüegu ga yema naga ga yema waemaxü̃wa inaxũxü̃, rü ñu̱xũchi nüxü̃ pedaugügu ga guma ma̱xpǘne ga nax yanaixü̃, rü guxãma i pema i wüxitücumüarü ãẽ̱xgacüchigü rü namaxã ga perü ngu̱xẽẽruü̃gü rü chauxü̃tawa pexĩ nax chomaxã peyarüdexagüxü̃ca̱x.
24 Rü ñaperügügü choxü̃: “Rü aixcümaxü̃chi ya Cori ya tórü Tupana rü tüxü̃ nanawe̱x i norü üüne rü norü pora, rü ñu̱xũchi nüxü̃ taxĩnüe ga naga ga guma üxüemaarü ngãxü̃wa inaxũxü̃. Rü ñu̱xmawaxix nixĩ i nüxü̃ tacuáxü̃ nax tama nayuxü̃ i wüxi i duü̃xü̃ ega Tupana namaxã idexagu.
25 Natürü tama tanaxwa̱xe nax toxna nangaicamaxü̃ i ngẽma üxüema i ãũcümaxü̃ nax tama nagu tayuexü̃ca̱x. Rü ngẽxguma chi wena nüxü̃ taxĩnüegu i ngẽma Cori ya Tupanaga rü aixcüma tá tayue.
26 ¿Rü ta̱xacürü yatü rü tama nayu ega nüxü̃ naxĩnügu i naga ya Tupana ya Maxü̃cü i ngẽxguma üxüemaarü ngãxü̃wa yadexaxgu ngẽma toma nüxü̃ taxĩnüexü̃rüxü̃?
27 ¡Ẽcü cuma naxca̱x ixũ, rü irüxĩnü i ngẽma tórü Cori ya Tupana cumaxã nüxü̃ ixuxü̃, rü ñu̱xũchi yixcama tomaxã nüxü̃ ixu i ngẽma cumaxã nüxü̃ yaxuxü̃! Rü toma rü tá tayanguxẽxẽ i ngẽma cumaxã nüxü̃ yaxuxü̃”, ñaperügügü.
28 Rü yexguma chomaxã pidexagügu, rü nüma ga Cori ya Tupana rü nüxü̃ naxĩnü ga yema chomaxã nüxü̃ pixuxü̃. Rü yemaca̱x choxü̃ ñanagürü: “Marü nüxü̃ chaxĩnü i guxü̃ma i ngẽma nüxü̃ yaxugüxü̃ i ñaa duü̃xü̃gü, rü cha̱u̱xca̱x rü name i ngẽma.
29 ¡Rü chierüx guxü̃guma aixcüma ngẽmaguxicatama naxĩnüeechagu, rü choxü̃ nangechaü̃gügu rü guxü̃ i ngunexü̃gügu yanguxẽẽgüãgu i chorü mugü i nümagü rü naxacügü nax ngẽmaãcü guxü̃guma nataãẽgüxü̃ca̱x!
30 ¡Rü namaxã nüxü̃ ixu i duü̃xü̃gü rü napatagüca̱x nawoegu!
31 ¡Natürü i cuma rü nuxã chauxü̃tagu rüxã̱ũ̱x! Erü cumaxã tá nüxü̃ chixu i guxü̃ma i ngẽma mugü rü ucu̱xẽgü i tá cunangúexẽxẽxü̃ i ngẽma duü̃xü̃gü nax ngẽmaãcü aixcüma yanguxẽxẽgüãxü̃ca̱x nawa i ngẽma naane i nüxna tá chaxãxü̃”, ñanagürü.
32 Rü ngẽmaca̱x i pema rü penaxwa̱xe nax aixcüma peyanguxẽẽxü̃ i guxü̃ma i ngẽma Cori ya perü Tupana pexü̃ muxü̃. Rü bai i íxrarüwa tá nüxna pixĩgachitanüxü̃.
33 ¡Rü nagu pexĩ i ngẽma ore i Cori ya perü Tupana pexü̃ muxü̃ nax ngẽmaãcü mea pexü̃ nangupetüxü̃ca̱x rü mucüma ya taunecü nawa pemaxẽxü̃ca̱x i ngẽma naane i tá pexna naxãxü̃ nax pexrüxü̃ yixĩxü̃ca̱x! —ñanagürü ga Moiché.
