Deuteronómio 6:1-25
6 Rü ñanagürü ga Moiché: —Yema nixĩ ga mugü rü ucu̱xẽgü ga Cori ya Tupana choxü̃ muxü̃ nax pexü̃ changúexẽẽxü̃ca̱x nax nagu pexĩxü̃ca̱x nawa i ngẽma naane i tá pexna naxãxü̃.
2 Rü ngẽxguma guxü̃ i perü maxü̃gu pema rü penegü rü petaagü nagu pexĩxgu i ngẽma mugü rü ucu̱xẽgü i ñu̱xma pemaxã nüxü̃ chixuxü̃ rü ngẽmaãcü tá penataãẽxẽxẽ ya perü Cori ya Tupana rü tá mucü ya taunecü pemaxẽ.
3 Rü ngẽmaca̱x, Pa Iraétanüxü̃x, rü name nixĩ i mea nagu pemaxẽ i ngẽma mugü. Erü ngẽxguma mea nagu pemaxẽgu rü tá mea pexü̃ nangupetü, rü tá pimu nawa i ngẽma naane i ngextá lechi rü ira rü ñoma dexárüxü̃ taguma ítaxuxü̃wa yema Cori ya Tupana perü o̱xigümaxã nüxü̃ ixuxü̃rüxü̃.
4 ¡Rü dücax, iperüxĩnüe, Pa Iraétanüxü̃x! Rü nüma ya Cori ya tórü Tupana rü nüxicatama nixĩ i Cori yixĩxü̃.
5 ¡Rü nüxü̃ pengechaxü̃gü ya perü Tupana i guxü̃ne ya perü maxü̃nemaxã, rü guxü̃ i peãxẽmaxã, rü guxü̃ i perü poramaxã!
6 ¡Rü pegüãẽgu namaxã penguxü̃ i guxü̃ma i ñaa ore i ñu̱xma pemaxã nüxü̃ chixuxü̃!
7 ¡Rü guxü̃gutáma ngẽma mugümaxã penangúexẽxẽ i pexacügü! ¡Rü nachigagu namaxã pidexagü i pepatagüwa rü ngextá ípexĩxü̃wa, rü ngẽxguma pepeechaü̃gu rü ngẽxguma íperüdagügu!
8 Rü ngẽma nax tama nüxü̃ iperüngümaexü̃ca̱x i ñaa mugü ¡rü pegüme̱xẽwa rü pegücatüwa peyanga̱xcuchi nax ngẽxma peyangexü̃ca̱x perü cua̱xruxü̃!
9 ¡Rü ẽcü pepataarü caxtagügu rü pepataarü ĩã̱xgügu penaxümatü i ngẽma mugü!
Moiché rü Iraétanüxü̃xü̃ nixugücu̱xẽ nax Tupanaga naxĩnüexü̃ca̱x
10 Rü nüma ya yimá perü Cori ya Tupana rü nawa tá pexü̃ nangugüxẽxẽ i ngẽma naane i nũxcümaü̃güxü̃ ga perü o̱xigü ga Abraáü̃maxã, rü Ichaámaxã, rü Acóbumaxã naxuegugüxü̃ nax pexna tá naxããxü̃. Rü ngẽma naanewa rü nangẽxmagü i taxü̃ne rü imexẽchine ya ĩanegü ya pema tama pexügüne.
11 Rü ngẽma naanewa nangẽxmagü ya ĩpatagü ya ixããcune namaxã i mexü̃gü i tama pema pixüãcugüne, rü puchugü ya tama pema picaxmaü̃gücü, rü úbanecügü rü oribunecügü i tama pema petogüxü̃. Rü ngẽma tá nixĩ i pengõ̱xgüxü̃ ñu̱xmatáta mea pengãxpütüwegü.
12 Rü ngẽxguma ngẽma mexü̃wa pengẽxmagügu ¡rü pexuãẽgü nax tama nüxü̃ iperüngümaexü̃ ya Cori ya Tupana ga nawa pexü̃ ínguxü̃xẽẽcü ga Equítuane ga norü mugüruü̃gü ípixĩgüxü̃wa!
13 ¡Rü nüxü̃ picua̱xüxü̃ ya Cori ya perü Tupana, rü yimágaxicatama pexĩnüe! Rü ngẽxguma wüxi i uneta pexü̱xgu ¡rü Cori ya Tupanaégaguxicatama penaxü̱x!
14 ¡Rü taxũtáma nawe perüxĩ i ngẽma tupananetagü i ngẽma duü̃xü̃gü i pexna ngaicamagüxü̃ nüxü̃ icua̱xüxü̃güxü̃!
15 Erü yimá perü Cori ya Tupana ya petanüwa ngẽxmacü rü nüxü̃́ pechu̱xu rü ngürüãchi pemaxã nanuxgu rü noxtacüma pexü̃ nadai rü pexü̃ nayarüxoxẽxẽ.
16 Rü tama name nax namaxã penuexü̃ ya perü Cori ya Tupana ga yexguma Macháwa namaxã penuegurüxü̃.
17 ¡Rü aixcüma peyanguxẽxẽ̱x i ngẽma Cori ya perü Tupanaarü mugü rü norü ucu̱xẽgü ga pemaxã nüxü̃ yaxuxü̃!
18 ¡Rü penaxüx i ngẽma aixcüma we̱xguxü̃ i Cori ya Tupana namaxã taãẽxü̃ nax ngẽmaãcü mea pexü̃ nangupetüxü̃ca̱x rü aixcüma penayaxuxü̃ca̱x i ngẽma mexü̃ i naane ga Cori ya Tupana perü o̱xigümaxã nüxü̃ yaxuxü̃!
19 Rü ngẽmaãcü ya Cori ya Tupana rü yema pemaxã nüxü̃ yaxuxü̃rüxü̃ rü tá nayabuxmüxẽxẽ i guxü̃ma i perü uanügü i ngẽma naanewa ngẽxmagüxü̃.
20 6:20-21 Rü ngẽxguma wüxi i ngunexü̃ pexacügü pexna caxgux rü ñagügu: “¿Ta̱xacüchiga nixĩ i ñaa mugü rü ñaa ucu̱xẽgü i tamaxã nüxü̃ yaxuxü̃ ya tórü Cori ya Tupana?” ñagügu, rü pema rü tá penangãxü̃ rü ñapegürügü tá: “Toma ga nũxcüma rü ãẽ̱xgacü ga Equítuanecüã̱x ga Faraóü̃me̱xẽwa tayexmagü rü norü mugüruü̃gü tixĩgü. Natürü nüma ga tórü Cori ya Tupana rü norü poramaxã toxü̃ ínanguxü̃xẽxẽ.
21 Nüü̃ nadau 6:20
22 Rü toma rü nüxü̃ tadau ga yema ãũcümaxü̃ ga Tupana norü poramaxã Equítuanewa üxü̃ nape̱xewa ga Faraóü̃ rü guxü̃ma ga norü duü̃xü̃gü.
23 Natürü ga toma rü toxü̃ ínagaxü̃ ga yema Equítuanewa, rü mea toxü̃ nigagü ñu̱xmata yema naane ga tórü o̱xigümaxã nüxü̃ yaxuxü̃wa toxü̃ nangugüxẽxẽ.
24 Rü yemawena ga nüma ga Cori ya Tupana rü toxü̃ namu nax mea tayanguxẽẽxü̃ca̱x i guxü̃ma i ñaa norü mugü rü naga taxĩnüexü̃ca̱x nax mea toxü̃ naxüpetüxü̃ca̱x rü nüma toxü̃ namaxẽxẽẽxü̃ca̱x ñu̱xmata ñoma i ngunexü̃wa nangu.
25 Rü ngẽmaca̱x i yixema i ñu̱xma rü mexü̃ taxü i ngẽxguma tórü Cori ya Tupanape̱xewa mea yanguxẽẽgügu i ngẽma norü mugü, yema tomaxã nüxü̃ yaxuxü̃rüxü̃”, ñapegürügü tá —ñanagürü ga Moiché.
