Deuteronómio 8:1-20
8 Rü ñanagürü ga Moiché: —¡Ẽcü nagu pexĩ i ngẽma mugü i ñu̱xma pexna chaxãxü̃ nax namáxü̃ca̱x i perü maxü̃ rü pimuxü̃ca̱x, rü ngẽmaãcü penayaxuxü̃ca̱x i ngẽma naane ga perü o̱xigümaxã nüxü̃ yaxuxü̃ ga Tupana!
2 ¡Rü nüxna pecua̱xãchie ga ñuxãcü Cori ya Tupana rü 40 ga taunecü yema chianexü̃gu pexü̃ nimugü! Rü pexü̃ naxãneexẽxẽ rü pexü̃ naxü nax nüxü̃ nacuáxü̃ca̱x rü aixcüma naga tá pexĩnüe rü tá peyangu̱xẽxẽ i norü mugü rüe̱xna tama.
3 Rü woo ngúxü̃ pexü̃ ningexẽxẽ rü taiya pexü̃́ nangu̱x, natürü yixcüama nüma ga Tupana rü daxũcüã̱x ga paũ ga manámaxã pexü̃ nachibüexẽxẽ woo ga pema rü woo ga nũxcümaü̃xü̃ ga perü o̱xigü rü taguma nüxü̃ nadaugüxü̃ ga yema. Rü yema naxü nax pexü̃ nüxü̃ nacua̱xẽxẽ rü tama õnaxica nixĩ i namaxẽẽxü̃ i wüxi i duü̃xü̃, natürü guxü̃ma i norü ore i Tupanaã̱xwa ixũxũxü̃ nixĩ i aixcüma namaxẽẽxü̃.
4 Rü guxcüma ga gumá 40 ga taunecügu rü tama pengauechiru rü bai ga nax perüchaecutüxü̃.
5 ¡Rü nüxna pecua̱xãchie rü yimá perü Cori ya Tupana rü pexü̃ inayarüwe̱xãchigüxẽxẽ ñoma wüxi i papa nanexü̃ rüwe̱xãchixẽẽxü̃rüxü̃!
6 ¡Ẽcü mea naga pexĩnüe i ngẽma norü mugü ya yimá Cori ya Tupana, rü nüxü̃ picua̱xüxü̃gü rü mea nagu pexĩ i ngẽma ngu̱xẽẽtae i pexna naxãxü̃!
7 Erü nüma ya Cori ya Tupana rü wüxi i naane i mexü̃wa tá pexü̃ nagagü i ngextá namu i natüxacügü, rü puchugü, rü bairawegü i ma̱xpǘnearü doxraewa ichuxchugüxü̃.
8 Rü ngẽma naanewa rü nangẽxma i trigunecügü, rü chebádanecügü, rü úbanecügü, rü igunecügü, rü boxranecügü, rü oribunecügü, rü taxü̃ i ira.
9 Rü ngẽma naanewa rü taxũtáma pexoegaãẽgü naxca̱x i perü õna, rü taxũtáma pexü̃́ nataxu. Rü norü ma̱xpǘnegüwa tá nüxü̃ peyangau i fierumü rü cóbremü.
10 Natürü ngẽxguma pechibüeguwena rü pengãxpütüwegügu, rü name nax nüxü̃ picua̱xüü̃xü̃ ya Cori ya Tupana naxca̱x i ngẽma mexü̃ i naane i pexna naxãxü̃.
Moiché rü Iraétanüxü̃maxã nüxü̃ nixu nax tama Tupanaxü̃ iyanangümaexü̃ca̱x
11 ¡Rü pexuãẽgü nax tama nüxü̃ perüngümaexü̃ca̱x ya perü Cori ya Tupana! ¡Rü taxṹ i nüxü̃ perüxoexü̃ i ngẽma norü mugü rü norü ucu̱xẽgü i ñu̱xma pexü̃ chamuxü̃!
12 8:12-14 Rü ngẽxguma pechibüegu rü pengãxcharaü̃gügu, rü nawa pemaxẽgu ya yima ĩpatagü ya ímexü̃ne i pema pexügüne, rü ngẽxguma nüxü̃ peda̱u̱xgu i perü wocagü rü perü carnérugü nax yamuxü̃ rü ngẽxgumarüxü̃ ta i perü úirugü rü perü diẽrumügü rü guxü̃ma i perü ngẽmaxü̃gü nax yamuxü̃ ¡rü taxṹ i pegü picua̱xüü̃güxü̃ rü taxṹ i nüxü̃ perüngümaexü̃ ya perü Cori ya Tupana ga Equítuanewa pexü̃ ínguxü̃xẽẽcü ga ngextá mugüruü̃gü ípixĩgüxü̃wa!
13 Nüü̃ nadau 8:12
14 Nüü̃ nadau 8:12
15 Rü gumá nixĩ ga nagu pexü̃ ĩxẽẽcü ga yema taxü̃ ga chianexü̃ ga ãũcümaxü̃ ga ãxtapegü rü tuxchinawegü nawa muxü̃, rü dexá nawa taxuxü̃. Natürü ga nüma ga Cori ya Tupana rü nuta ga taicüwa dexá ínanagoxü̃chíüxẽxẽ rü yemawa pexü̃ naxaxegüxẽxẽ.
16 Rü yema chianexü̃wa rü pexü̃ naxüwemü namaxã ga maná ga õna ga nũxcümaü̃güxü̃ ga perü o̱xigü tama nüxü̃ cua̱xgüxü̃. Rü yemaacü nanaxü nax pexü̃ naxãneexẽẽxü̃ca̱x rü pexü̃ naxüxü̃ca̱x nax ngẽmawena mexü̃ peyaxuxü̃ca̱x. Rü nüma yixĩxü̃ ga Cori ya Tupana ga pexca̱x ínanguxẽẽãxü̃ ga yema guxü̃ma nax yemaacü mea pemaxẽxü̃ca̱x.
17 Rü tama name i nagu perüxĩnüe rü ñaperügügü: “Guxü̃ma i tórü ngẽmaxü̃gü rü tórü poramaxãtama tüxü̃́ nangẽxma”, ñaperügügü.
18 Rü name i nüxna pecua̱xãchie ya yimá perü Cori ya Tupana, erü nüma nixĩ i pexna naxããxü̃ i pora nax pexü̃́ nangẽxmaxü̃ca̱x i perü ngẽmaxü̃gü. Rü nüma i ñu̱xma rü ngẽmaãcü nixĩ i pemaxã yanguxẽẽãxü̃ ga yema norü uneta ga nũxcüma perü o̱xigümaxã nüxü̃ yaxuxü̃.
19 Natürü ngẽxguma chi nüxü̃ perüngümaegu ya yimá perü Cori ya Tupana, rü chi to i tupanagüwe perüxĩxgu rü nüxü̃ picua̱xüü̃gügu, rü choma rü aixcüma pemaxã nüxü̃ chixu rü wüxicana tá ipeyarüxo.
20 Rü ngẽxguma taxũtáma Cori ya perü Tupanaga pexĩnüegu rü nüma ya Cori ya Tupana rü tá pexü̃ nadai yema nachixü̃anegü ga nawa pichopetüetanüxü̃ nadaixgurüxü̃ —ñanagürü ga Moiché.
