Hebreos 11:1-40
11 Rü tórü õgagu nixĩ i nüxü̃ icuáxü̃ nax aixcüma tá nayauxgüxü̃ i ngẽma írüngu̱xẽẽgüxü̃. Rü ngẽma tórü õgagu nixĩ i nüxü̃ icuáxü̃ nax yixcüra tá nangóxü̃ i ngẽma ñu̱xma tauta nüxü̃ idauxü̃.
2 Rü nũxcümaü̃güxü̃ ga tórü o̱xigü rü Tupanaaxü̃́ nayaxõgü, rü yemaca̱x ga Tupana rü namaxã nataãxẽ.
3 Rü ngẽma tórü õgagu nixĩ i nüxü̃ icuáxü̃ nax aixcüma yixĩxü̃ nax Tupana rü norü oremaxãmare nango̱xẽẽãxü̃ ga ñoma ga naane rü üa̱xcü rü tauemacü rü woramacurigü rü ẽxtagü. Rü yemaacü ga Tupana, rü ngürüwa nanango̱xẽẽmare ga guxü̃ma i ngẽma ñu̱xma nüxü̃ idauxü̃.
4 Rü gumá nũxcümaü̃cü ga Abé rü Tupanaaxü̃́ nayaxõ rü yemaca̱x nüxna nanaxã ga wüxi ga ãmare ga Caíü̃arü ãmarearü yexera Tupanape̱xewa mexü̃. Rü yemaca̱x ga Tupana rü Abémaxã nataãxẽ rü nüxü̃ nixu nax mecü yixĩxü̃. Rü nüma ya Abé rü woo nax nayuxü̃, natürü wüxi i tórü cua̱xruxü̃ nixĩ, erü nagagu nixĩ i nüxü̃ icuáxü̃ nax Tupana naxwa̱xexü̃ nax yaxõgüxü̃.
5 Rü Enóx rü norü õgagu nixĩ ga maxü̃cü Tupana yagaxü̃ nax tama nayuxü̃ca̱x. Rü namücügü rü taguma nüxü̃ inayangaugü yerü Tupana nayaga. Rü Tupanaarü ore i ümatüxü̃wa nüxü̃ nixu rü naxü̃pa nax Tupana yagaxü̃, rü Enóx nanaxü ga yema Tupana namaxã taãẽxü̃.
6 Natürü taxuacüma Tupana tamaxã nataãxẽ ega tama nüxü̃́ yaxõgügu. Rü yíxema Tupanamaxã ãmücüchaü̃xe, rü tanaxwa̱xe nax tayaxõxü̃ nax Tupana rü aixcüma nangẽxmaxü̃ rü aixcüma tüxü̃ nangü̃xẽẽxü̃ ya yíxema naxca̱x daugüxe.
7 Rü yexguma Noémaxã yadexaxgu ga Tupana, rü nüma ga Noé rü nayaxõ rü naga naxĩnü. Rü Tupana rü namaxã nüxü̃ nixu rü tá ínanguxü̃ ga mucü ga taxüchicü ga taguma duü̃xü̃gü nüxü̃ daucü rü tá guxü̃wama inanguanexẽẽcü. Rü Tupana namaxã nüxü̃ nixu nax naxüaxü̃ca̱x ga wüxi ga wapuru ga taxü̃ne nax tama nayuexü̃ca̱x ga nüma rü naxma̱x rü nanegü rü naneã̱xgü. Rü Tupanaga naxĩnü ga Noé, rü nanaxü ga gumá wapuru, rü yemaacü tama nayue ga nüma rü napatacüã̱x yerü Tupanaaxü̃́ nayaxõ. Natürü yema togü ga duü̃xü̃gü rü tama Noérüxü̃ nayaxõgü, rü yemaca̱x Tupana nanapoxcue. Rü nüma ga Tupana rü Noéxü̃ nixu nax nape̱xewa namexü̃, yerü nüxü̃́ nayaxõ.
8 Rü gumá tórü o̱xi ga Abraáü̃, rü Tupanaaxü̃́ nayaxõ. Rü yexguma Tupana naxca̱x caxgux rü naga naxĩnü rü ínaxũxü̃ nawa ga yema naane ga nawa nayexmaxü̃ nax nawa naxũxü̃ca̱x ga yema naane ga Tupana nüxna ãxü̃ nax noxrü yixĩxü̃ca̱x. Rü yemaacü ga Abraáü̃ rü ínaxũxü̃ ga yema naane ga nawa nayexmaxü̃ woo tama nüxü̃ nax nacuáxü̃ ga ngextá tá nax naxũxü̃.
9 Rü yexguma nawa nanguxgu ga yema naane ga Tupana namaxã ixunetaxü̃, rü wüxi ga to ga nachixü̃anecüã̱xrüxü̃ ĩpata ga naxchirunaxca̱xmaxãmare naxãpata. Rü yexgumarüü̃tama ga nane ga Ichaá rü nataxa ga Acóbu rü yema naanewa ĩpata ga naxchirunaxca̱xmaxãmare naxãpatagü, rü naxca̱xgü rü ta nixĩ ga yema uneta ga Tupana Abráü̃maxã nüxü̃ ixuxü̃.
10 Rü nüma ga Abráü̃, rü woo ĩpata ga naxchirunaxca̱xmaxãmare yema naanegu naxãpata, natürü ínanangu̱xẽxẽ nax nawa tá nanguxü̃ ya yima ĩane ya taguma iyarüxoxü̃ne ya nüma ya Tupana norü ĩnümaxã daxũguxü̃ i naanewa naxüxü̃ne.
11 Rü nüma ga Abráü̃ rü woo marü nax nayaxü̃ rü naxma̱x ga Chára rü ta nax nayaxü̃ rü taguma naxãxacüxü̃, natürü ngĩxü̃́ nayexma ga wüxi ga nane, yerü nüma ga Abráü̃ rü nayaxõ nax Tupana tá aixcüma yanguxẽẽxü̃ ga yema norü uneta.
12 Rü yemaacü ga Abráü̃ rü woo marü yaxguã̱xü̃chi nax yixĩxü̃, natürü nüxü̃́ nayexma ga wüxi ga nane, rü gumáwa ne naxĩ ga muxü̃ma ga nataagü ga ñoma ẽxtagürüxü̃ muxũchixü̃, rü ñoma márpechinüwa ngẽxmacü ya naxnücü ya taxuacüma yaxugücürüxü̃ nixĩgü.
13 Natürü nümagü ga Abráü̃ rü Ichaá rü Acóbu rü nayue, rü tama nüxü̃ nadaugü ga guxü̃ma ga yema Tupana namaxã ixunetaxü̃. Natürü Tupanaaxü̃́ nayaxõgü, rü yemaca̱x yáxü̃wama nüxü̃ nadau nax Tupana yanguxẽẽxü̃ ga yema norü uneta. Rü yemaca̱x nataãẽgü woo nüxü̃ nacua̱xgü nax ñoma to i nachixü̃anecüã̱xrüxü̃ paxaãchimare ñoma ga naanewa nayexmagüxü̃.
14 Rü nümagü nax ngẽma ñagüxü̃ rü ngẽmawa meama tüxü̃ nüxü̃ nacua̱xẽxẽ nax ñu̱xma rü ta naxca̱x nadaugüxü̃ i wüxi i to i nachixü̃ane nax noxrü yixĩxü̃ca̱x.
15 Rü yexguma chi nagu naxĩnüegu nax naxca̱x nawoeguxü̃ ga yema naane ga noxri nawa ne naxĩxü̃, rü chi nüxü̃́ nataucha nax marü naxca̱x nawoeguxü̃.
16 Natürü nümagü rü nüxü̃́ nangúchaü̃ i ngẽma naane i yexera rümemaexü̃ i daxũwa ngẽxmaxü̃ i Tupanaxü̃tawa. Rü yemaca̱x nixĩ ga Tupana ga tama naxãnexü̃ nax nügü yaxuxü̃ nax norü Tupana yixĩxü̃ rü marü naxca̱x nanamexẽxẽ ga wüxi ga ĩane ya daxũguxü̃ i naanewa ngẽxmane.
17 11:17-18 Rü Tupana ga noxri rü Abraáü̃maxã nüxü̃ nixu rü ñanagürü:“Cune ya Ichaáwa tá cuxü̃́ nangẽxma i muxũchixü̃ i cutaagü”,
ñanagürü. Rü Abráü̃ rü nayaxõ nax Tupana tá yanguxẽẽxü̃ ga yema namaxã inaxunetaxü̃ nax nane ga Ichaáwa tá nüxü̃́ nangẽxmaxü̃ i muxũchixü̃ i nataagü. Natürü yexguma Tupana nüxü̃ ixuxgu rü Ichaáca̱x nüxna nacaxgu nax naxca̱x yamáaxü̃ca̱x, rü nüma ga Abráü̃ rü Tupanaxü̃́ nayaxõ rü tama nüxna nanachu̱xu. Rü ínamemare nax Tupanaca̱x yamáaxü̃ ga gumá nane ga nügümaxã wüxicacü.
18 Nüü̃ nadau 11:17
19 Yerü nüma ga Abráü̃ rü nayaxõ nax Tupanaaxü̃́ natauxchaxü̃ nax wena namaxẽxẽẽãxü̃ i yuexü̃. Rü yemaca̱x ga Tupana rü maxü̃cü nüxna nanamu ga nane ga Ichaá. Rü yema rü wüxi ga tórü cua̱xruxü̃ nixĩ nax ñuxãcü aixcüma yaxõõxü̃ ga Abráü̃.
20 Rü gumá Ichaá rü ta Tupanaaxü̃́ nayaxõ. Rü yemaca̱x ga yexguma marü naya̱xgu, rü nanegü ga Acóbumaxã rü Echaúmaxã mexü̃ naxuegu nax Tupana tá nüxü̃ rüngü̃xẽẽxü̃ca̱x.
21 Rü gumá Acóbu rü ta Tupanaaxü̃́ nayaxõ. Rü yemaca̱x ga yexguma marü nayuxchaü̃gu, rü norü caxü̃xü̃maxã nügü inachixẽxẽ rü Tupanaxü̃ nicua̱xü̃. Rü Yúche nanegümaxã mexü̃ naxuegu rü Tupanana naca nax wüxichigüxü̃ nangü̃xẽẽxü̃ca̱x.
22 Rü gumá Yúche rü ta Tupanaaxü̃́ nayaxõ. Rü yemaca̱x ga yexguma nayuxchaü̃gu, rü nanegümaxã nüxü̃ nixu rü ñanagürü:“Tatanüxü̃ i Iraétanüxü̃ rü yixcüra tá ínachoxü̃ i nua Equítuanewa nax nawa naxĩxü̃ca̱x i ngẽma naane ga Tupana tórü o̱xi ga Abraáü̃maxã nüxü̃ ixuxü̃.Rü ngẽxguma ngéma naxĩxgu, rü chanaxwa̱xe ya chauxchina̱xãgü rü ta ngéma nanana nax ngẽxma yata̱xgüãxü̃ca̱x”,
ñanagürü.
23 Rü yexguma noxri naxíragu ga Moiché rü nanatü rü naé rü tümaarü õgagu tomaepü̱x ga tauemacü itayacu̱xgü, yerü nüxü̃ tadaugü nax namexẽchixü̃ rü tama naxca̱x tamuü̃e ga yema Equítuanearü ãẽ̱xgacüarü mugü nax buxe tüxü̃ nada̱i̱xü̃.
24 11:24-25 Rü Moiché rü ta Tupanaaxü̃́ nayaxõ. Rü yemaca̱x ga yexguma marü naya̱xgu rü tama nanaxwa̱xe nax nügü yaxuxü̃ nax Equítuanearü ãẽ̱xgacüxacü ngĩne nax yixĩxü̃, yerü naxca̱x rü narümemae nax natanüxü̃ ga Yudíugümaxã wüxigu ngúxü̃ yangexü̃. Rü tama nanaxwa̱xe nax nagu namaxü̃xü̃ ga ñoma ga naanearü pecaduarü ngúchaü̃gü ga paxaãchiruü̃mare ixĩgüxü̃.
25 Nüü̃ nadau 11:24
26 Rü yexgumarüxü̃ nax daxũguxü̃ ga naanena nax yaxũxü̃ ga Cristu nax ngúxü̃ yangexü̃ca̱x, rü yexgumarüxü̃ ta nixĩ ga Moiché ga ãẽ̱xgacüpatana nax yaxũxü̃, yerü naxca̱x rü narümemae nax Iraétanüxü̃maxã wüxigu ngúxü̃ yangexü̃. Rü taxuca̱xma yema ngúxü̃gu narüxĩnü ga Moiché, yerü norü ngúchaü̃ nixĩ nax naya̱u̱xãxü̃ i ngẽma natanü ya Tupana tá nüxna ãxü̃.
27 11:27-28 Rü yema nax Tupanaaxü̃́ yaxõõxü̃ca̱x ínaxũxũ ga Equítuarü naanewa, rü tama naxca̱x namuü̃ nax gumá Equítuanearü ãẽ̱xgacü tá namaxã nanuxü̃. Rü taguma nüxü̃ narüxo ga Tupanawe nax naxũxü̃, yerü Tupana ya ẽxü̃gucüarü ngúchaü̃ naxü. Rü yexguma Tupana namaxã nüxü̃ ixuxgu nax naxüaxü̃ ga Üpetüchiga, rü nayanguxẽxẽ ga yema Tupana nüxü̃ ixuxü̃. Rü nüma ga Moiché rü natanüxü̃ ga Iraétanügüxü̃ namu nax wüxichigü ga ĩpatawa yamáaxü̃ca̱x ga wüxi ga carnéruxacü nax nagümaxã namaxcuãxü̃ca̱x ga napatagüarü ĩã̱xgü nax Tupanaarü orearü ngeruxü̃ i daxũcüã̱x tama nadaiaxü̃ca̱x ga gumá nüxíra bucü ga nane ga wüxichigü ga ĩpatawa.
28 Nüü̃ nadau 11:27
29 Rü yema duü̃xü̃gü ga Moichéwe rüxĩxü̃ rü ta nayaxõgü. Rü yemaca̱x ga yexguma yema Már ga Dauchíüxü̃wa nangugügu, rü yema dexá rü nügüna nixĩgachi, rü nipaaneãchi, rü yéma nichoü̃. Natürü yexguma yema Equítuanecüã̱x ga churaragü ga nawe ngẽgüxü̃ nawe ichoü̃gu, rü yexma nayi, yerü wenaxarü nügüna naxĩ ga yema dexá.
30 Rü yema Iraétanüxü̃ rü Tupanaaxü̃́ nayaxõgü rü yemaca̱x 7 ga ngunexü̃ nüxü̃ ínichoeguãchitanücüü ga guma ĩane ga Yericú. Rü yexguma norü 7 ga ngunexü̃wa nanguxgu rü gumá ĩanetapü̱xgü rü nüechama niwa̱xgü.
31 Rü yema nge ga Yericúcüã̱x ga Raá rü woo noxri wüxi i ngexü̃ i naxü̃nemaxã taxexü̃ nax iyixĩxü̃, natürü Tupanaaxü̃́ iyaxõ. Rü yexguma yéma nangugügu ga yema taxre ga Iraétanüxü̃ ga bexma ngugütaewa yéma ĩxü̃, rü ngĩma iyixĩ ga nüxü̃ nangü̃xẽẽxü̃. Rü yemaca̱x tama iyu naxrüxü̃ ga yema togü ga Yericúcüã̱x ga tama Tupanaga ĩnüexü̃.
32 ¿Rü ñu̱xma rü ta̱xacü i togü i duü̃xü̃güchigaxü̃ tá pemaxã chixuxü̃? Rü changechica nax pemaxã nüxü̃ chixuxü̃ca̱x i nachiga ga yema nũxcümaü̃güxü̃ ga ãẽ̱xgacügü ga Yedeóü̃ rü Baráx rü Chanchóü̃ rü Yeté rü Dabí rü Chamué, rü guxü̃ma ga yema nũxcümaü̃güxü̃ ga Tupanaarü orearü uruü̃gü.
33 Rü yema nax yaxõgüãxü̃ca̱x nixĩ ga Tupana nüxü̃ rüngü̃xẽẽxü̃. Rü yemaacü to ga nachixü̃anegüarü ãẽ̱xgacügüxü̃ naporamaegüxü̃, rü meama norü duü̃xü̃gümaxã inacua̱xgü, rü nanayauxgü ga yema Tupana namaxã ixunetaxü̃. Rü yexguma leóü̃tanügu yata̱xcuchigüãgu, rü taxuxü̃ma namaxã naxü ga leóü̃gü yerü Tupana nayachotaa̱xgü ga yema leóü̃gü.
34 Rü yexguma norü uanügü üxüxétüwa yawocuxgu, rü tama nixae, yerü Tupanaaxü̃́ nayaxõgü. Rü yexguma norü uanügü taramaxã nadaixchaü̃gu, rü Tupana nüxü̃ narüngü̃xẽxẽ nax taxuxü̃ma nüxü̃ üpetüxü̃ca̱x. Rü yexguma naturaegu rü Tupana nanaporaexẽxẽ. Rü yexguma to ga nachixü̃anearü churaragümaxã nügü nadaixgu rü naporaeama, rü yema churaragüxü̃ narüyexeragü.
35 Rü nayexma ga ngexü̃gü ga yuexacüxü̃, natürü yema naxacügü rü wenaxarü namaxẽ yerü Tupanaaxü̃́ nayaxõgü. Rü nayexma ga togü ga poraãcü ngúxü̃ ingegüxü̃ yerü norü uanügü ngúxü̃ nüxü̃ ningegüxẽxẽ nax Tupanaxü̃ ínata̱xgüxü̃ca̱x. Natürü nümagü rü tama Tupanaxü̃ ínata̱xgü rü nayue, yerü naxca̱x rü narümemae nixĩ nax wena namaxẽxü̃ rü nayauxgüãxü̃ca̱x i maxü̃ i taguma gúxü̃.
36 Rü nayexma ta ga ñuxre ga togü ga yaxõgüxü̃ ga norü uanügü nüxü̃ cugüexü̃, rü yacua̱i̱xgüxü̃, rü cadénamaxã yana̱i̱xgüxü̃, rü poxcupataü̃gu nawocuxü̃.
37 Rü ñuxre ga nümagü rü nutamaxã ínanamuxũchigü rü yemaacü nayue. Rü togü rü nayawãĩxyegü. Rü togü rü ngúxü̃ nüxü̃ ningexẽẽgü nax Tupanaxü̃ ínata̱xgüxü̃ca̱x. Rü togü rü taramaxã nanadai. Rü togü rü carnérucha̱xmüü̃maxã rü chíbucha̱xmüü̃maxã nixãxchiru, rü yemaacü nu ne nanaxĩ. Rü ningearü diẽruã̱xgü rü nanaxĩ̱xãchiãẽgü yerü norü uanügü rü chixri namaxã nachopetü.
38 Rü yema yaxõgüxü̃ rü woo ñoma ga naanearü duü̃xü̃güarü yexera nime, natürü nu ne nanaxĩ ga chianexü̃wa rü ma̱xpǘnegüwa. Rü ma̱xpǘnegüarü ãxmaxü̃gügu rü waixü̃müarü ãxmaxü̃gügu nipexü̃tanü.
39 Rü guxü̃ma ga yema nũxcümaü̃güxü̃ ga duü̃xü̃gü woo norü õgagu Tupana namaxã nax taãẽxü̃, natürü taxuxü̃ma ga yema duü̃xü̃gü rü nüxü̃ nadau ga yema mexü̃gü ga Tupana namaxã ixunetaxü̃.
40 Rü yemaacü namaxã nangupetü ga yema duü̃xü̃gü, yerü ga Tupana rü tagu narüxĩnü rü tama nanaxwa̱xe nax yema nũxcümaü̃güxü̃ ga duü̃xü̃güxíra nüxica yamexẽẽgüãxü̃, natürü nanaxwa̱xe nax tamaxã wüxigu yamexẽẽgüãxü̃. Rü yemaacü ga Tupana rü taxca̱x nanamexẽxẽ ga wüxi ga ngü̃xẽxẽ ga yexera rümemaexü̃.
