Hebreos 13:1-25
13 Rü ñu̱xma rü name nax guxü̃guma pegü pengechaü̃güxü̃ ñoma peenexẽxü̃ pengechaü̃xü̃rüxü̃.
2 Tama name nax nüxü̃ ipeyarüngümaexü̃ nax meama penayaxuxü̃ i ngẽma duü̃xü̃gü i pepatawa ngugüxü̃. Erü nüxü̃ tacua̱x rü nümaxü̃ ga yemaacü naxügüxü̃ rü ñuxguacü tama nüxü̃ nacuáãcüma bexma Tupanaarü orearü ngeruü̃gü i daxũcüã̱xü̃ mea nayauxgü.
3 Rü name i nüxna pecua̱xãchie i ngẽma duü̃xü̃gü i poxcuexü̃, ñoma pema rü ta wüxigu namaxã pepoxcuexü̃rüxü̃. Rü ngẽxgumarüxü̃ ta name i nüxna pecua̱xãchie i ngẽma duü̃xü̃gü i togü ngúxü̃ nüxü̃ ingexẽẽgüxü̃, erü ngürüãchi tá ta ngẽmaãcü pexü̃ nangupetü.
4 Rü ngẽma yatügü i ãmaxü̃ rü name i aixcüma naxma̱xü̃ nangechaü̃gü. Rü ngẽxgumarüxü̃ ta i ngexü̃gü, rü name i aixcüma mea natexü̃ nangechaxü̃gü. Rü name i naxma̱xmaxãxicatama rü natemaxãxicatama nanaxü i norü ngúchaü̃. Erü Tupana rü tá nüxna naca rü tá nanapoxcue i ngẽma duü̃xü̃gü i nai i ngexü̃maxã rü ẽ̱xna nai ya yatümaxã maxẽxü̃. Rü aixcüma tá tüxü̃ napoxcue ya guxãma ya yíxema naxma̱xna to i ngexü̃maxã maxü̃́xẽ rü ngẽma natena to i yatümaxã maxü̃́xẽ.
5 Rü tama name nax diẽruguama perüxĩnüexü̃. Rü name nixĩ i namaxã petaãẽgü i ngẽma marü pexü̃́ ngẽxmaxü̃. Yerü Tupana rü ñanagürü:“Tagutáma cuxna chixũ, rü tagutáma cuxü̃ íchata̱x”,
ñanagürü.
6 Rü ngẽmaca̱x tama taxãnee nax ñagüxü̃:“Nüma ya Cori nixĩ ya choxü̃ rüngü̃xẽẽcü.Rü ngẽmaca̱x taxuca̱xma chamuü̃.¿Rü texé tá ta̱xacürü chixexü̃ cha̱u̱xca̱x ítanguxẽxẽ?”
ñagüxü̃.
7 Rü name nixĩ i nüxna pecua̱xãchie ga gumá perü Tupanaarü orearü uruü̃gü ga noxri pemaxã icua̱xgücü rü pemaxã nüxü̃ ixugücü ga Tupanaarü ore. Rü name nixĩ i nagu perüxĩnüe nax ñuxãcü mea pepe̱xewa namaxẽxü̃ rü ñuxãcü mea yaxõgüãcüma nayuexü̃. Rü name nax nüxü̃ peyadauxü̃güxü̃ nawa i norü õ rü mea naxrüxü̃ pemaxẽxü̃.
8 Rü nüma ya Ngechuchu ya Cristu rü ĩnex rü ñu̱xmax rü guxü̃guma nanaxaixrüguma rü taguma naxüchicüxü.
9 Rü tama name i peyaxõgü i ngẽma ngu̱xẽẽtaegü i tama toma pexü̃ namaxã tangúexẽẽxü̃ i tama Tupanaarü ixĩgüxü̃. Rü nũxcüma nagu taxĩ ga yema mugü ga Moiché ümatüxü̃ ga tüxna nachu̱xuxü̃ nax ta̱xacü ixüxü̃ rü ta̱xacü ingṍxü̃. Natürü narümemae nixĩ nax Tupanaarü ngechaü̃maxã napaxü̃ i tórü maxü̃ nax tórü õwa iporaexü̃ca̱x
10 Rü yixema nax yaxõgüxü̃ tüxü̃́ nangẽxma ya Cristu ga tórü pecaduca̱x yucü. Natürü yema chacherdótegü i Tupanapatawa puracüexü̃ rü tama nüxna naxǘ nax nanayauxgüãxü̃ i ngẽma ngü̃xẽxẽ i Cristu tüxna ãxü̃.
11 Rü nüma i chacherdótegüarü ãẽ̱xgacü, rü Tupanapatawa nanange ya nagü i naxü̃nagü nax Tupanana naxããxü̃ca̱x nax iyanaxoxẽẽãxü̃ca̱x i duü̃xü̃güarü pecadugü. Natürü naxü̃negü i ngẽma naxü̃nagü, rü ĩanearü ĩxpemawa nayanagugü.
12 Rü yexgumarüxü̃ ta ga Ngechuchu rü ĩanearü ĩxpemawa ngúxü̃ ninge rü nayu nax nagümaxãtama Tupanaca̱x yamexẽẽgüãxü̃ca̱x i duü̃xü̃gü nax nape̱xewa yaxüünexü̃ca̱x.
13 Rü ngẽmaca̱x name nax nüxna ixĩgachixü̃ ga yema mugü ga nũxcüma nagu ixĩxü̃ rü ngĩxã Ngechuchuwe tarüxĩ rü naxrüxü̃ ãne tingegü.
14 Erü ñoma i naanewa tüxü̃́ nataxu ya wüxi ya ĩane ya taguma yarüxoxü̃ne, natürü naxca̱x tadaugü ya yima ĩane ya daxũguxü̃ i naanewa tá tüxü̃́ ngẽxmane.
15 Rü ngẽmaca̱x tanaxwa̱xe ya Ngechuchu ya Cristuégagu guxü̃guma Tupanaxü̃ ticua̱xüü̃gü. Rü ngẽma nax nüxü̃ icua̱xüü̃güxü̃, rü ngẽma nixĩ i ãmare i mexü̃ i nüxna ixãxü̃. ¡Rü ngĩxã taa̱xmaxã nüxü̃ ticua̱xüü̃gü!
16 ¡Rü taxṹ i nüxü̃ ipeyarüngümaexü̃ nax togüxü̃ perüngü̃xẽẽxü̃ rü namaxã pengauxü̃ i ngẽma pexü̃́ ngẽxmaxü̃! Erü ngẽma nixĩ i ãmare i Tupanana pexãxü̃ i aixcüma namaxã nataãẽxü̃.
17 ¡Rü naga pexĩnüe i ngẽma perü dauruü̃gü i pemaxã icua̱xgüxü̃, rü penaxü̱x i ngẽma pemaxã nüxü̃ yaxuxü̃! Erü nümagü rü mea Tupanape̱xewa pexna nadaugü, rü nüxü̃ nacua̱xgü nax Tupana tá nüxna ca̱xaxü̃ nachiga nax ñuxãcü pexna nadaugüxü̃. Rü name nixĩ i naga pexĩnüe i perü dauruü̃gü nax taãẽãcüma naxügüã̱xü̃ca̱x i norü puracü rü tama wüxi i norü guxchaxü̃ nax yixĩxü̃ca̱x. Erü ngẽxguma chi wüxi i norü guxchaxü̃ yixĩxgu i ngẽma norü puracü nax pexna nadauxü̃, rü pema rü chi taxuxü̃ma i mexü̃ nawa peyaxu i ngẽma norü puracü.
18 Rü tanaxwa̱xe i toxca̱x peyumüxẽgü. Erü toõxẽwa nüxü̃ tacua̱x nax aixcüma mea tayanguxẽẽxü̃ i ngẽma puracü ya Tupana toxna ãxü̃ rü tanaxwa̱xe nax guxü̃guma ngẽmaãcü mea tanaxüxü̃.
19 Rü ngẽma guxü̃arü yexera pexna naxca̱x chaca̱xaxü̃ nixĩ nax cha̱u̱xca̱x peyumüxẽgüxü̃ nax Tupana choxü̃́ natauxchaxẽẽxü̃ca̱x nax paxa pexca̱x chataeguxü̃ca̱x.
Duü̃xü̃güxü̃ narümoxẽ rü naxca̱x ínaca nax Tupana nüxü̃ rüngü̃xẽẽxü̃
20 13:20-21 Rü ñu̱xma chanaxwa̱xe i pexü̃ narüngü̃xẽxẽ ya Tupana ya tórü taãẽxẽẽruxü̃ rü tórü ngüxmüxẽẽruxü̃ ixĩcü. Rü nüma nixĩ ga yuwa ínadaxẽẽãxü̃ ga tórü Cori ya Ngechuchu ya Cristu ya yaxõgüxü̃arü dauruxü̃ ya guxãarü yexera ixĩcü. Rü yexguma curuchawa yapotagu rü nagü ibaxgu rü nayanguxẽxẽ ga norü uneta i taguma iyarüxoxü̃ i maxü̃ tüxna ãxü̃. Rü chanaxwa̱xe nax nüma ya Tupana pexü̃ nangü̃xẽẽxü̃ nax guxü̃wama pemexü̃ca̱x rü mea naga pexĩnüexü̃ca̱x. Rü ngẽxgumarüxü̃ ta tanaxwa̱xe nax Ngechuchu ya Cristugagu Tupana toxü̃ rüngü̃xẽẽxü̃ nax nüma nanaxwa̱xexü̃ãcüma tixĩgüxü̃ca̱x. Rü tanaxwa̱xe i guxü̃guma Cristuxü̃ ticua̱xüü̃gü. Rü ngẽmaãcü yixĩ.
21 Nüü̃ nadau 13:20
22 Pa Chauenexẽgüx, pexü̃ chaca̱xaxü̃ nax yáxna namaxã pexĩnüexü̃ i ñaa noxretama i ore i pexca̱x chaxümatüxü̃ i namaxã pexü̃ chaxucu̱xẽxü̃.
23 Rü chanaxwa̱xe nax nüxü̃ pecuáxü̃ rü taenexẽ ya Timutéu rü marü ínanguxuchi ga nax napoxcuxü̃. Rü ngẽxguma tá paxa nua chauxü̃tawa nanguxgu, rü tá ngéma petanüwa chanaga i ngẽxguma pexü̃ íchayada̱u̱xgu.
24 ¡Rü nüxü̃ perümoxẽgü i guxü̃ma i ngẽma perü dauruü̃gü i pemaxã icuáxü̃! ¡Rü ngẽxgumarüxü̃ ta nüxü̃ perümoxẽgü i guxü̃ma i togü i taenexẽgü i yaxõgüxü̃! Rü ngẽma taenexẽgü i nua Itáriaanewa ngẽxmagüxü̃ rü ta pexü̃ narümoxẽgü.
25 ¡Rü Tupana poraãcü pexü̃ rüngü̃xẽxẽ i guxãma i pemax! Rü ngẽmaãcü yixĩ.
