Hebreos 2:1-18
2 Rü ñu̱xma nax nüxü̃ icuáxü̃ nax guxü̃ma i Tupanaarü orearü ngeruü̃gü i daxũcüã̱xarü yexera yixĩxü̃ ya Nane, rü ngẽmaca̱x name nax yexeraãcü mea naga ixĩnüexü̃ i ngẽma ore i Nanechiga nüxü̃ ixĩnüexü̃ nax tama nüxna ixĩgachixü̃ca̱x nax yaxõgüxü̃.
2 Rü yexguma tauta Nane ya Cristuxü̃ núma namuxgu ga Tupana, rü norü orearü ngeruü̃gü ga daxũcüã̱xgüwa duü̃xü̃gümaxã nüxü̃ nixu ga norü mugü nax naga naxĩnüexü̃ca̱x. Rü yema mugü rü aixcüma napora yerü guxü̃ma ga yema tama naga ĩnüexü̃, rü yema mugü nüxü̃ ixuxü̃ãcüma Tupana nanapoxcue.
3 Rü yexguma yemaacü napoxcueãgu ga yema duü̃xü̃gü ga tama naga ĩnüexü̃, ¿rü ñuxũcürüwa i yixema i na̱xcha̱xwa ibuxmüxü̃ nax tama tüxü̃ napoxcuexü̃ca̱x ega nüxü̃ ixoegu i ngẽma maxü̃ i mexẽchixü̃ i ñu̱xma Cristugagu tüxna uaxü̃xü̃? Rü nümatama ya tórü Cori nixĩ ga nüxíra naxunagüãxü̃ ga yema maxü̃, rü ñu̱xũchi yixcama nixĩ ga yema nüxü̃ ĩnüexü̃ ga nüxĩ́ mea tüxü̃ nüxü̃ nacua̱xẽẽxü̃ nax aixcüma yixĩxü̃ i tüxü̃́ nangẽxmaxü̃ i ngẽma maxü̃.
4 Rü nümatama ga Tupana rü ta taxca̱x nanango̱xẽxẽ nax aixcüma yixĩxü̃ i Cristugagu tüxü̃́ nangẽxmaxü̃ i ngẽma maxü̃. Yerü nüma ga Tupana rü Naãxẽ ya Üünexü̃wa tüxü̃ nanawe̱x ga naguxü̃raü̃xü̃ ga taxü̃ ga mexü̃gü rü cua̱xruxü̃gü ga norü poramaxã naxüxü̃ yema nüma nanaxwa̱xexü̃ãcüma.*
Tupana rü ñoma ga naanewa nanamu ga Ngechuchu ya Cristu nax taxrüxü̃ duü̃xü̃xü̃ yixĩxü̃ca̱x
5 Rü ngẽma naane i tá ínguxü̃ i pemaxã nüxü̃ tixuchigaxü̃, rü Tupana rü taguma daxũcüã̱x ga norü orearü ngeruü̃güna naxãga nax namaxã inacua̱xgüxü̃ca̱x.
6 Rü Tupanaarü ore i ümatüxü̃wa rü ñanagürü:“Pa Tupanax, ¿ta̱xacü nixĩ i duü̃xü̃gü rü ngẽmaca̱x nagu curüxĩnüxü̃?¿Rü ta̱xacüwa name rü ngẽmaca̱x naxca̱x cuxoegaãẽxü̃?
7 Rü paxaãchi ngẽma orearü ngeruxü̃ ga daxũcüã̱xgütüü̃wa cunayexmaxẽxẽ ga duü̃xü̃gü, rü cunatachigaxẽxẽ rü yema cuxüxü̃étüwa cunangexmaxẽxẽ nax namaxã inacuáxü̃ca̱x.
8 Rü naxme̱xwa cunangexmaxẽxẽ i guxü̃ma ga yema cuxüxü̃”,
ñanagürü i ngẽma orewa. Rü yemaacü nixĩ ga Tupana ga naxme̱xẽwa nayexmagüxẽẽãxü̃ ga guxü̃ma ga yema naxüxü̃ ga Tupana. Rü nataxuma ga ta̱xacü ga tama naxme̱xwa nayexmaxẽẽxü̃. Natürü woo naxme̱xwa nax nayexmagüxü̃ ga guxü̃ma, natürü ñu̱xma rü tauta nüxü̃ tadau nax guxü̃ma rü naxme̱xwa nangẽmagü.
9 Natürü ngẽma nüxü̃ idauxü̃ nixĩ ya Ngechuchu. Rü yexguma Tupana ñoma ga naanewa namuãgu rü paxaãchi norü orearü ngeruü̃gü ga daxũcüã̱xgüarü ñaxtüwaama nayexma. Natürü i ñu̱xma ya Tupana rü Ngechuchuxü̃ naporaxẽxẽ rü nanataxẽxẽ rü guxü̃arü ãẽ̱xgacü nayaxĩxẽxẽ yerü ngúxü̃ ninge rü guxü̃ma ga duü̃xü̃güca̱x nayu. Rü nüma ga Tupana rü poraãcü duü̃xü̃güxü̃ nangechaxü̃ rü yemaca̱x nixĩ nax nayuxü̃ ga Cristu nax yemaacü namaxẽxẽẽãxü̃ca̱x i guxü̃ma i duü̃xü̃gü.
10 Rü nümatama ga Tupana nixĩ ga naxüaxü̃ ga guxü̃ma i ñu̱xma ngẽxmaxü̃ rü naxme̱xwa nangẽxma i guxü̃ma nax nüma nanaxwa̱xexü̃ãcüma namaxã inacuáxü̃ca̱x. Rü nüma ga Tupana rü nanaxwa̱xe nax guxü̃ma i naxacügü nüxü̃́ nangẽxmaxü̃ca̱x i nachica i mexü̃ i naxü̃tawa. Rü yemaca̱x ñoma ga naanewa nanamu ga Ngechuchu ya Cristu nax ngúxü̃ yangexü̃ca̱x rü duü̃xü̃güca̱x nayuxü̃ca̱x nax nüxü̃́ nangẽxmaxü̃ca̱x i maxü̃ i taguma gúxü̃.
11 Rü Ngechuchu nixĩ ya tüxü̃ imexẽẽgücü nax Tupanape̱xewa ixüünegüxü̃ca̱x. Rü ñu̱xma i nüma ya Ngechuchu ya tüxü̃ imexẽẽgücü rü guxãma i yixema nax tüxü̃ yaxüünexẽẽgüxü̃ rü wüxitama nixĩ ya Tanatü. Rü ngẽmaca̱x nixĩ i nüma ya Ngechuchu ya Tupana Nane, rü tama taxca̱x naxãnexü̃ nax naenexẽgümaxã tüxü̃ naxuxü̃.
12 Erü Tupanaarü ore i ümatüxü̃wa rü ñanagürü ga Nane:“Pa Chaunatüx, choma rü chauenexẽgüxü̃ tá nüxü̃ chacua̱xẽxẽ i cuchiga.Rü norü ngutaque̱xegüwa rü tá cuxca̱x chawiyae nax ngẽmaãcü cuxü̃ chicua̱xüxü̃xü̃ca̱x”,
ñanagürü.
13 Rü tóxnamana i Tupanaarü ore i ümatüxü̃wa rü ñanagürü ta ga Nane:“Pa Chaunatüx, cuxü̃́ chayaxõ, erü nüxü̃ chacua̱x rü tá choxü̃ curüngü̃xẽxẽ”,
ñanagürü. Rü ñanagürü ta:“Daxe chixĩ, Pa Chaunatüx, namaxã i cuxacügü i choxna cumugüxü̃”,
ñanagürü.
14 Rü nüma ga Ngechuchu rü woo Tupana nax yixĩxü̃ natürü duü̃xü̃rüxü̃ãcü ñoma ga naanewa naxũ nax taxrüxü̃ naxãmachixü̃ca̱x rü naxãgüxü̃ca̱x nax tachicüxü nayuxü̃ca̱x rü yemaacü yanaxoxẽẽãxü̃ca̱x ga Chatanáarü pora ga namaxã tüxü̃ iyanatauxẽẽchaü̃xü̃.
15 Rü yemaacü nanaxü ga Ngechuchu nax Chatanáme̱xẽwa tüxü̃ ínanguxü̃xẽẽxü̃ca̱x ga guxãma ga yíxema ga guxü̃ ga tümaarü maxü̃gu yuca̱x muü̃xe.
16 Rü yemaca̱x ñoma ga naanewa nangu ga Ngechuchu nax taxca̱x nayuxü̃ca̱x i guxãma i yixema nax Abraáü̃rüxü̃ yaxõgüxü̃. Rü tama daxũcüã̱x i orearü ngeruü̃güca̱x nayu, natürü taxca̱x nixĩ ga núma naxũxü̃ rü nayuxü̃.
17 Rü nüma ga Ngechuchu rü nanaxwa̱xe nax yixema i naenexẽgü ixĩgüxü̃rüü̃tama nügü yaxĩxẽẽxü̃ nax yemaacü tórü chogüruxü̃ ya mecümacü ya nüxü̃́ ingechaü̃tümüxü̃gücü yixĩxü̃ca̱x i Tupanape̱xewa. Rü yemaca̱x nixĩ ga nügü inaxãxü̃ rü nayuxü̃ nax yemaacü Tupana duü̃xü̃güaxü̃́ nüxü̃ irüngümaxü̃ca̱x ga norü pecadugü.
18 Rü yema nümatama ngúxü̃ nax yangexü̃ ga yexguma Chataná nüxna ĩnügu, rü ngẽmaca̱x i ñu̱xma rü nüxü̃́ natauxcha nax tüxü̃ nangü̃xẽẽxü̃ ya yíxema Chataná tüxna ĩnüxe.
Notas
^ 2:4 Rü yemaacü nixĩ ga wenaxarü tüxü̃ nüxü̃ nadauxẽẽxü̃ nax aixcüma yixĩxü̃ nax Cristugagu tüxü̃́ nangẽxmaxü̃ i ngẽma maxü̃.
