Hebreos 3:1-19
3 Rü ñu̱xma Pa Chauenexẽgü ya Tupanape̱xewa Üünegüxe, rü pexü̃ nixĩ ya Tupana i nadexü̃ nax norü duü̃xü̃gü pixĩgüxü̃ca̱x. Rü ngẽmaca̱x name nixĩ i mea nagu perüxĩnüe ya Ngechuchu ya Cristu ya Tupana núma namucü. Rü nüma ya Ngechuchu nixĩ i tórü chogüruxü̃ i Tupanape̱xewa tüxü̃ ixüünexẽẽcü. Rü yimáaxü̃́ nixĩ i yaxõgüxü̃.
2 Rü Tupana rü marü Ngechuchuxü̃ naxuneta nax naxüaxü̃ca̱x ga yema puracü ga Tupana nüxna ãxü̃. Rü nüma ga Ngechuchu rü aixcüma Nanatüga naxĩnü rü nayanguxẽxẽ ga yema puracü yexgumarüxü̃ ga Moiché meama nax naxüxü̃ ga yema puracü ga Tupana nüxna ãxü̃ nax nüxna nadauxü̃ca̱x ga Tupanaarü duü̃xü̃gü ga Yudíugü.
3 Rü woo ga noxri rü Moichéxü̃ nitaégacüüxẽxẽ ga Tupana, natürü i ñu̱xma rü Moichéarü yexera Ngechuchuxü̃ nixĩ i yataégacüüxẽẽxü̃. Rü ngẽxgumarüxü̃ ta ya wüxi ya ĩpata ya ngexwaca ixüxü̃ne rü namaxã tataãxẽ, natürü ngẽma ĩpataarü üruxü̃ nixĩ i yexera namaxã itaãẽxü̃.
4 Rü guxü̃nema ya ĩpata rü nüxü̃́ nangẽxma i norü üruxü̃. Natürü guxü̃ma i ngẽma ñu̱xma ngẽxmaxü̃, rü Tupana nixĩ ya naxücü.
5 Rü Moiché rü wüxi ga Tupanaarü duü̃ ga aixcüma mecü nixĩ yerü mea nüxna nadau ga Tupanaarü duü̃xü̃gü ga Yudíugü, yema Tupana namaxã nüxü̃ ixuxü̃rüxü̃. Rü nüma ga Moiché nixĩ ga duü̃xü̃gümaxã nüxü̃ yaxuxü̃ nax yixcüra Tupana tá nüxü̃ rüngü̃xẽẽxü̃.
6 Natürü nüma ya Ngechuchu rü Moichéarü yexera nixĩ erü Tupana Nanexü̃chi nixĩ. Rü nüma nixĩ i nüxna nadauxü̃ i guxü̃ma i ngẽma Tupanaarü duü̃xü̃gü ixĩgüxü̃. Rü yixema rü ta rü Tupanaarü duü̃xü̃gü tixĩgü ega aixcüma Ngechuchuaxü̃́ yaxõgügu rü taguma nüxü̃ rüxoegu. Rü Tupana nanaxwa̱xe nax guxü̃guma Ngechuchumaxã itaãẽgüxü̃ erü nüxü̃ tacua̱x nax wüxi i ngunexü̃ rü tá taxca̱x nataeguxü̃ nax wüxiwa namaxã ingexmagüxü̃ca̱x.
Tupana nüxü̃ nixu nax taxũtáma inangü̃güxü̃ i ngẽma duü̃xü̃gü i tama naga ĩnüexü̃
7 3:7-8 Rü ngẽmaca̱x Tupanaarü ore i ümatüxü̃wa rü Naãxẽ ya Üünexü̃ rü ñanagürü:“Ñu̱xma nax nüxü̃ pexĩnüexü̃ i ngẽma Tupana pemaxã nüxü̃ ixuxü̃, rü tama name nax nüxü̃ pexoexü̃, yexgumarüxü̃ ga yema duü̃xü̃gü ga Tupanaxü̃ ügüxü̃ rü tama naga ĩnüexü̃ ga yexguma yema naane ga chianexü̃wa nayexmagügu”.
8 Nüü̃ nadau 3:7
9 Rü yemaca̱x ga Tupana rü ñanagürü:“Rü yema naanewa nixĩ ga chixexü̃ naxügüxü̃ ga nũxcümaü̃güxü̃ ga perü o̱xigü yerü choxü̃ naxügü rü tama choxü̃́ nayaxõgüchaü̃ woo 40 ga taunecü nüxü̃ nadaugü ga yema mexü̃gü ga nape̱xewa chaxüxü̃.
10 Rü yemaca̱x namaxã chanu ga yema duü̃xü̃gü, rü ñacharügü nüxü̃:‘Pema rü guxü̃guma chixexü̃guxicatama perüxĩnüeecha, rü tama penaxüxchaü̃ i ngẽma chanaxwa̱xexü̃ nax penaxüxü̃’, ñacharügü nüxü̃.
11 Rü yemaca̱x nixĩ ga namaxã chanuxü̃ ga yema duü̃xü̃gü, rü namaxã nüxü̃ chixu nax taxũtáma yema naane ga noxri namaxã ichaxunetaxü̃wa nangugüxü̃ nax yexma nangü̃ẽxü̃ca̱x”,
ñanagürü ga Tupana.
12 Rü ñu̱xma Pa Chauenexẽgüx, rü name nixĩ i pegüna pedaugü nax tama ngürüãchi pechixearü maxü̃ã́xü̃ca̱x, rü ngẽmagagu nax nüxü̃ perüxoexü̃ nax Tupana ya Maxü̃cüaxü̃́ peyaxõgüxü̃.
13 Rü ngẽmaca̱x ñu̱xma nax pexü̃́ natauxchaxü̃, rü name nixĩ nax wüxichigü pegüaxü̃́ penangúchaü̃xẽẽxü̃ i guxü̃ i ngunexü̃gu nax taxúema i petanüwa Tupanaxü̃ taxoxü̃ca̱x nagagu i ngẽma pecadu i pexü̃ womüxẽẽchaü̃xü̃.
14 Rü ñu̱xma rü Cristumaxã tüxü̃́ nangẽxma i maxü̃ i taguma gúxü̃ ega yaxõgüechagu rü noxrirüü̃tama naga ixĩnüegu ñu̱xmatata nawa nangu nax nataeguxü̃ i nüma.
15 Rü ngẽmaca̱x i Tupanaarü ore i ümatüxü̃wa rü ñanagürü:“Rü ñu̱xma ega nüxü̃ pexĩnüegu i ngẽma Tupana pemaxã nüxü̃ ixuxü̃, rü tama name nax nüxü̃ pexoexü̃, yexgumarüxü̃ ga yema duü̃xü̃gü ga tama Tupanaga ĩnüexü̃”,
ñanagürü.
16 ¿Rü texégü tixĩ ga guxema nüxü̃ ĩnüexe ga yema Tupana tümamaxã nüxü̃ ixuxü̃, rü ñu̱xũchi tama Tupanaga ĩnüexe? Rü pemaxã nüxü̃ chixu rü yemagü nixĩ ga guxü̃ma ga yema duü̃xü̃gü ga Moiché Equítuanewa ínguxü̃xẽẽxü̃.
17 ¿Rü texémaxã nixĩ ga nanuxü̃ ga Tupana ga 40 ga taunecü? Rü pemaxã nüxü̃ chixu rü namaxã nanu ga yema duü̃xü̃gü ga chixexü̃ ügüxü̃. Rü yemaca̱x yema chianexü̃gu nayue.
18 ¿Rü texégümaxã nixĩ ga inaxunetaxü̃ ga Tupana nax taxũtáma yema naanewa nangugüxü̃ nax yexma nangü̃ẽxü̃ca̱x? Rü yemagü nixĩ ga yema duü̃xü̃gü ga tama naga ĩnüexü̃.
19 Rü ngẽmawa nüxü̃ tacua̱x nax taxucürüwama yema naane ga noxri Tupana namaxã ixunetaxü̃wa nangugüxü̃ ga yema duü̃xü̃gü, yerü tama nüxü̃́ nayaxõgü.
