Hebreos 4:1-16
4 Rü ngẽmaca̱x i ñu̱xma nax Tupana tamaxã ixunetaxü̃ nax nügüxü̃tawa tá tüxü̃ yachocuxẽẽxü̃ nax ngẽxma rüngü̃ẽxü̃ca̱x, rü tanaxwa̱xe i taxũãẽgü, nax tama ngürüãchi wüxíe i tatanüwa tama ngẽxma taxücuxü̃.
2 Erü yixema rü marü nüxü̃ taxĩnüe i Tupanaarü ore i mexü̃ i maxü̃chiga, yexgumarüxü̃ ga yema nũxcümaü̃güxü̃ ga duü̃xü̃gü nüxü̃ nax naxĩnüexü̃. Natürü nümagü ga yema duü̃xü̃gü rü taxuwama nüxü̃́ name ga nüxü̃ nax naxĩnüexü̃ ga yema ore, yerü tama yema togü ga naga ĩnüexü̃rüxü̃ nayaxõgü.
3 4:3-4 Natürü i yixema nax yaxõgüxü̃, rü tá aixcüma Tupanaxü̃tagu tachocu nax ngẽxma rüngü̃ẽxü̃ca̱x. Rü Tupanaarü ore i ümatüxü̃wa rü ngü̃xchigaarü ngunexü̃chigaxü̃ nixu, rü ñanagürü:“Rü 6 ga ngunexü̃gu nixĩ ga Tupana nagu̱xẽẽxü̃ ga norü puracü.Rü yexguma norü 7 ga ngunexü̃wa nanguxgu, rü nüma rü guxü̃ma ga norü puracüna narüngü”,
ñanagürü. Rü nũxcüma ga Tupana rü nanaxwa̱xe nax nangü̃ẽxü̃ ta ga yema nũxcümaü̃güxü̃ ga tórü o̱xigü ga Moichéwe rüxĩxü̃. Natürü ga nümagü rü tama naga naxĩnüe rü tama nüxü̃́ nayaxõgüchaü̃. Rü yemaca̱x ga Tupana rü norü ore i ümatüxü̃wa rü ñanagürü:“Yema duü̃xü̃gü rü tama choxü̃́ nayaxõgü rü yemaca̱x namaxã chanu rü namaxã chanaxuegu nax taxũtáma yema naane ga namaxã ichaxunetaxü̃wa nangugüxü̃ nax yexma nangü̃ẽxü̃ca̱x”,
ñanagürü.
4 Nüü̃ nadau 4:3
5 4:5-6 Rü yemaacü ga yema duü̃xü̃gü ga nüxíra nüxü̃ ĩnüexü̃ ga Tupanaarü ore, rü tama nagu nachocu ga yema naane ga Tupana namaxã nüxü̃ ixuxü̃, yerü tama naga naxĩnüe. Rü ngẽmaca̱x nixĩ i Tupanaarü ore i ümatüxü̃wa i ñaxü̃:“Ngẽma duü̃xü̃gü i tama chauga ĩnüexü̃ rü taxũtáma ngẽma naane i namaxã ichaxunetaxü̃gu nachocu nax ngẽxma nangü̃ẽxü̃ca̱x”,
ñaxü̃. Natürü ñu̱xma rü ta nangẽxma i nachica i tümaca̱x ya yíxema ngẽxma Tupanaxü̃tagu chocuchaü̃xẽ nax ngẽxma tarüngü̃ẽxü̃ca̱x.
6 Nüü̃ nadau 4:5
7 4:7-8 Rü ngẽma nachica i ngextá nagu nangü̃ẽxü̃ i duü̃xü̃gü rü tama yema naane ga nũxcümaü̃güxü̃ ga Iraétanüxü̃ ga tümaarü ãẽ̱xgacü ga Yochuémaxã tayauxgüxü̃ nixĩ. Yerü yexguma chi yema naane yixĩxgu, rü Tupana rü taxũchima wenaxarü nüxü̃ naxuneta ga to ga ngunexü̃ nax nagu naxü̃tawa yachocuxü̃ca̱x nax ngẽxma nangü̃ẽxü̃ca̱x i duü̃xü̃gü. Rü yemaca̱x ga Tupana rü wenaxarü nüxü̃ naxuneta i wüxi i to i ngunexü̃ nax naxü̃tawa yachocuxü̃ca̱x i duü̃xü̃gü nax ngẽxma nangü̃ẽxü̃ca̱x. Rü ngẽma ngunexü̃ rü ñu̱xma nixĩ. Rü yemaca̱x ga Tupana rü mucüma ga taunecü ga Moichéwena rü Dabímaxã nüxü̃ nixu ga yema ore ga ümatüxü̃ i ñaxü̃:“Rü ñu̱xma nax nüxü̃ pexĩnüexü̃ i ngẽma Tupana pemaxã nüxü̃ ixuxü̃, rü tama name nax nüxü̃ pexoexü̃”,
ñaxü̃.
8 Nüü̃ nadau 4:7
9 Rü ngẽmaca̱x i ñu̱xma rü ta nangẽxma i wüxi i nachica i üünexü̃ i nagu tá nangü̃ẽxü̃ i ngẽma Tupanaarü duü̃xü̃gü ixĩgüxü̃.
10 Rü yíxema Tupanaxü̃tawa ichocuxe nax ngẽxma tarüngü̃ẽxü̃ca̱x, rü nüxna tarüngü̃ẽ i guxü̃ma i tümaarü puracügü yexgumarüxü̃ ga Tupana rü nüxna nax nangüxü̃ ga norü puracügü ga yexguma naane naxü̱xguwena.
11 Rü ngẽmaca̱x name nax yigü iporaãẽxẽẽxü̃ nax yaxõgüxü̃ rü naga ixĩnüexü̃ nax ichocuxü̃ca̱x i ngextá Tupana tüxü̃ írüngü̃güxẽẽxü̃wa. Erü tama tanaxwa̱xe nax texé ngürüãchi yema nũxcümaü̃güxü̃ ga duü̃xü̃gü ga tama Tupanaga ĩnüexü̃rüxü̃ norü orexü̃ taxoxü̃.
12 Erü Tupanaarü ore rü namaxü̃ rü naporaxüchi. Rü wüxi i tara i guxü̃cüwawa mea waixmaguxü̃arü yexera nixĩ nax natéxü̃. Erü ngẽma ore rü tawa nixücu ñu̱xmata taãẽwa nangu, rü ñu̱xmata nawa nangu i ngẽma wüxichigü nagu rüxĩnüxü̃. Rü ngẽmaãcü meama nanango̱xẽẽãma i guxü̃ma i ngẽma yixicatama nagu rüxĩnüxü̃ rü tüxü̃́ ngúchaü̃xü̃.
13 Rü nataxutama i ta̱xacü ya Tupana üxü̃ i tá na̱xcha̱xwa nügü icúxü̃, erü nape̱xewa rü guxü̃ma nango̱x. Rü guxü̃xü̃ma nadau rü guxü̃xü̃ma nacua̱x ya yimá tá namaxã nüxü̃ ixucü i tórü maxü̃chiga.
Ngechuchu nixĩ i chacherdótegüarü ãẽ̱xgacü i Tupanape̱xewa tórü poxü̃ruxü̃ ixĩcü
14 Ngechuchu ya Tupana Nane nixĩ i chacherdótegüarü ãẽ̱xgacü i daxũguxü̃ i naanewa ngucü nax ngéma Nanatüpe̱xewa tüxü̃ ínapoxü̃xü̃ca̱x. Rü ngẽmaca̱x tanaxwa̱xe i guxü̃guma nüxü̃́ tayaxõgü rü taguma nüxü̃ tarüxoe.
15 Rü nüma ya Ngechuchu ya torü poxü̃ruxü̃ ya chacherdótearü ãẽ̱xgacü ixĩcü rü nüxü̃ nacua̱x nax tüxü̃ ínapoxü̃xü̃ i ngẽxguma Chataná tüxna ĩnügu, yerü nüma ga Chataná rü nüxna rü ta naxĩnü ngẽma tüxna nax naxĩnüxü̃rüxü̃. Natürü nüma ga Ngechuchu rü taguma pecadu naxü.
16 Rü ñu̱xma nax tüxü̃́ nangẽxmaxü̃ ya tórü ngü̃xẽẽruxü̃ ya Ngechuchu, rü tüxü̃́ natauxcha nax tama imuü̃eãcüma nüxna ingaicamaxü̃ ya tórü Tupana ya tüxü̃ ngechaü̃cü nax ngẽmaãcü nüma nüxü̃́ ingechaü̃tümüxü̃güxü̃ca̱x rü tüxü̃ nangechaü̃ãcüma tüxü̃ nangü̃xẽẽxü̃ca̱x i ngẽxguma guxchaxü̃gü taxca̱x ínguxgu.