Hebreos 6:1-20
6 Rü ngẽmaca̱x name nixĩ i yexeraãcü tingúeetanü nax aixcüma mea nüxü̃ icuáxü̃ca̱x i Cristuchiga. Rü tanaxwa̱xe nax nüxü̃ ichopetüxü̃ ga yema ore ga nawa inaxügüxü̃ nax Cristuchigaxü̃ icuáxü̃. Rü taxũtáma yeü̃cürü yema ore ga nawa inaxügüxü̃chiga tidexagüecha. Rü taxuca̱xma tü̱xcüü̃ wena pemaxã nüxü̃ tixu nax nüxü̃ perüxoexü̃ca̱x nax nagu pexĩxü̃ i ngẽma mugü ga Moiché ümatüxü̃ i tama tüxü̃ maxẽxẽẽxü̃. Rü ngẽxgumarüxü̃ ta taxuca̱xma tü̱xcüü̃ wena pemaxã nüxü̃ tixu i nachiga nax ñuxãcü Tupanaaxü̃́ yaxõgüxü̃.
2 Rü ngẽxgumarüxü̃ ta taxuca̱xma tü̱xcüü̃ wena pexü̃ tangúexẽxẽ nax ñuxãcü Tupanaca̱x íibaiü̃xü̃ rü ñuxãcü duü̃xü̃güxü̃ ingógüãcüma namaxã iyumüxéxü̃. Rü ngẽxgumarüxü̃ ta taxuca̱xma tü̱xcüü̃ wena pexü̃ tangúexẽxẽ nax ñuxãcü tá wena namaxẽxü̃ i duü̃xü̃gü i yuexü̃ rü ñuxãcü naanearü gu̱xgu rü Tupana tá wüxichigü i duü̃xü̃güna ca̱xaxü̃ i norü maxü̃chiga.
3 Rü ngẽmaca̱x i ñu̱xma rü ngẽxguma Tupana tüxü̃́ natauxchaxẽẽgu rü tanaxwa̱xe i yexeraãcü Cristuchiga tingúetanü.
4 6:4-6 Natürü ngẽxguma chi wüxíe Cristuaxü̃́ yaxõxgu, rü chi meama Tupanaxü̃ tacua̱xgu, rü chi Naãxẽ ya Üünexü̃ tüxna nguxgu rü chi mexü̃ tümawa naxü̱xgu, rü chi Tupanaarü orexü̃ tacua̱xgu, rü chi nüxü̃ tacua̱xgu i ngẽma pora i tá ínguxü̃, natürü ngẽxguma chi Cristuna tixũgachigu, rü marü taxucürüwama texé wenaxarü Tupanaca̱x tüxü̃ tataeguxẽxẽ, erü tüma rü ñoma wena Tupana Nanexü̃ curuchawa tayapotaxü̃rüxü̃ tayaxĩxẽxẽ, rü guxü̃ i duü̃xü̃güpe̱xewa ãne nüxü̃ tingexẽxẽ.
5 Nüü̃ nadau 6:4
6 Nüü̃ nadau 6:4
7 Rü wüxi i naane i pucü mea nagu nguxü̃ rü meama nanetü nawa nayae tümaca̱x ya yíxema nagu üanexe, rü Tupanaarü ngü̃xẽẽgagu nixĩ i ngẽma.
8 Natürü ngẽxguma ngẽma naane rü tuxu rü natüanegü i chixexü̃ nawa yaegu, tü taxuwama name. Rü Tupana rü tá chixexü̃ namaxã naxuegu rü üxüwa tá nigu i guxü̃ma i nawa yaexü̃.*
Ítanangu̱xẽxẽ nax nayauxgüxü̃ i maxü̃ i taguma gúxü̃ rü ngẽmaca̱x tama nüxü̃ tarüxoe nax yaxõgüxü̃
9 Natürü, Pa Chauenexẽgü ya Pexü̃ Tangechaü̃güxex, rü woo ngẽmaxü̃ pemaxã tixuxgu, natürü mea nüxü̃ tacua̱x nax pema rü ngẽma rümemaexü̃ca̱x nixĩ i pedaugüxü̃. Rü pemax, rü nagu pexĩ i ngẽma nama i nawa nguxü̃ i maxü̃ i taguma guxü̃, rü tama ngẽma duü̃xü̃gü i nüxü̃ rüxoexü̃rüxü̃ pixĩgü.
10 Erü nüma ya Tupana rü aixcümacü nixĩ. Rü nüma rü taxũtáma nüxü̃ inayarüngüma ga yema mexü̃ ga pexüxü̃ rü ñuxãcü taenexẽgü i yaxõgüxü̃xü̃ nax pengechaü̃güxü̃ ga yexguma nüxü̃ perüngü̃xẽẽgügu, ngẽma ñu̱xma ípenaxüxü̃rüü̃tama.
11 Rü wüxichigü i pema rü tanaxwa̱xe i ngẽmaãcü noxrirüxü̃ mexü̃ i perü ngúchaü̃maxã nüxü̃ perüngü̃xẽẽgüecha i taenexẽgü ñu̱xmatáta penayauxgü i ngẽma maxü̃ i ípenangu̱xẽẽgüxü̃.
12 Rü tama tanaxwa̱xe nax nüxü̃ perüxoetanücüüxü̃ nax Cristuwe perüxĩxü̃. Natürü name i naxrüxü̃ pixĩgü i ngẽma duü̃xü̃gü i guxü̃guma mea yaxõgüãcüma Cristuwe rüxĩãmaxü̃ rü nayauxgüxü̃ i guxü̃ma i ngẽma mexü̃gü ga Tupana namaxã ixunetaxü̃.
13 Rü dücax, yexguma tórü o̱xi ga Abraáü̃maxã inaxunetagu ga Tupana rü nügüégagutama inaxuneta, yerü tataxuma ga texé ga norü yexera ixĩxẽ nax tümaégagu inaxunetaxü̃ca̱x.
14 Rü yemaca̱x ga Tupana rü Abraáü̃xü̃ ñanagürü:“Choma rü tá aixcümaxü̃chi poraãcü cuxü̃ charüngü̃xẽxẽxü̃.Rü tá cuxü̃́ nangẽxma i muxũchixü̃tama i cutaagü”,
ñanagürü.
15 Rü Abraáü̃ rü meama ínanangu̱xẽxẽ ga gumá nane ga Tupana namaxã ixunetacü. Rü yemaca̱x nabu ga gumá nane ga Ichaá ga Tupana namaxã nüxü̃ ixucü.
16 Rü ngẽxguma duü̃xü̃gü ta̱xacüca̱x nügümaxã ixunetagügu, rü to i norü yexera ixĩxü̃égagu inaxunetagü. Rü wüxicana ta̱xacüca̱x ngẽmaãcü nügümaxã inaxunetagügu, rü nüxü̃ tacua̱x rü aixcüma tá nayanguxẽẽgü i ngẽma naxca̱x nügümaxã inaxunetagüxü̃, rü marü taxucürüwama yeü̃cürü nachiga nidexagüecha.
17 Rü yemaca̱x ga Tupana rü yexguma inaxunetagu namaxã ga yema duü̃xü̃gü ga nayauxgüxü̃ tá ga yema ngü̃xẽxẽ ga Tupana nüxna ãxchaü̃xü̃, rü nügüégagutama inaxuneta, yerü nanaxwa̱xe nax meama nüxü̃ nacua̱xgüxü̃ nax aixcüma tá yangu̱xẽẽãxü̃ rü tagutáma naxüchicüüãxü̃ ga yema uneta ga namaxã nüxü̃ yaxuxü̃.
18 Rü nüxü̃ tacua̱x rü ngẽxguma ta̱xacüca̱x nügüégagu inaxunetagu ya Tupana, rü taxucürüwama tüxü̃ nawomüxẽxẽ rü nanaxüchicüü i ngẽma. Rü ñu̱xma i guxãma i yixema nax Tupanaarü ngü̃xẽẽca̱x idauxü̃ nax tüxü̃ ínapoxü̃xü̃ca̱x, rü tüxü̃́ nangẽxma i taxü̃ i taãxẽ, erü nüxü̃ tacua̱x rü aixcüma tá tanayaxu i ngẽma maxü̃ i taguma gúxü̃ i tamaxã inaxunetaxü̃.
19 Rü ngẽma tórü õ rü natai, ñoma wüxi ya wapuruarü taixẽẽruü̃rüxü̃. Rü ñu̱xma nax ínangu̱xẽẽxü̃ nax aixcüma tá nayaxuxü̃ i ngẽma maxü̃ i taguma gúxü̃, rü taxuca̱xma taxoegaãẽgü, erü nüxü̃ tacua̱x nax aixcüma daxũguxü̃ i naanewa ya Tupana íngẽxmaxü̃wa tá íngugüxü̃.
20 Rü yemaca̱x yexma Tupanaxü̃tagu nüxíra naxücu ga Ngechuchu nax ngéma guxü̃guma Tupanape̱xewa taétüwa nachogüxü̃ca̱x. Rü yemaacü ga Ngechuchu rü gumá chacherdóte ga Melquichedéxrüxü̃ Tupanape̱xewa chacherdóte nixĩ.
Notas
^ 6:8 Rü ngẽxgumarüxü̃ tá tixĩ ya yíxema Cristuxü̃ ítáxe.
