Hebreos 7:1-28
7 Rü gumá Melquichedéx rü ĩane ga Charéü̃arü ãẽ̱xgacü nixĩ. Rü naétü Tupana ya Guxü̃étüwa Ngẽxmacüpe̱xewa duü̃xü̃güarü chacherdóte nixĩ. Rü yexguma Abraáü̃ napataca̱x taeguxgu nawena nax to ga nachixü̃anearü ãẽ̱xgacügümaxã nügü nada̱i̱xü̃ rü nüxü̃ naporamaexü̃, rü Melquichedéx rü namawa Abraáü̃pe̱xegu nayangu. Rü nüma ga Melquichedéx rü Tupanaégagu Abraáü̃maxã mexü̃ naxuegu.
2 Rü Abraáü̃ rü guxü̃ma ga yemaxü̃gü ga yema ãẽ̱xgacügü ga namaxã nügü nada̱i̱xü̃na napuxü̃xü̃wa ínanaxüxüchi ga yema diésmu ga Tupanana üxü̃, rü Melquichedéxna nanaxã. Rü yema naéga ga Melquichedéx rü “Ãẽ̱xgacü ya Ixaixcümacü”, ñaxü̃chiga nixĩ. Rü nüma rü ĩane ga Charéü̃arü ãẽ̱xgacü nixĩ. Rü ngẽmaca̱x naéga rü “Ãẽ̱xgacü ya Ngüxmüxẽẽruxü̃”, ñaxü̃chiga nixĩ.
3 Rü Tupanaarü ore ga nũxcüma ümatüxü̃wa rü tama nüxü̃ nixu nax texé tixĩxü̃ ga nanatü rü naé rü norü o̱xigü ga Melquichedéx. Rü ngẽxgumarüxü̃ ta tama nüxü̃ nixu i norü buxchiga rü norü yuxchiga. Rü ngẽmaãcü Tupana Nanerüxü̃ rü guxü̃guma chacherdóte nixĩ ga Melquichedéx.
4 Rü ñu̱xma rü name nixĩ i nagu perüxĩnüe nax ñuxãcü aixcüma ãẽ̱xgacü ya tacü yixĩxü̃ ga Melquichedéx. Yerü nũxcümaü̃cü ga tórü o̱xi ga Abráü̃ rü Melquichedéxna nanaxã ga yema diésmu ga Tupanana üxü̃ natanüwa ga yema yemaxü̃gü ga daigu yema ãẽ̱xgacügüna napuxü̃xü̃. Rü ngẽmawa nüxü̃ tacua̱x nax Tupanape̱xewa tórü o̱xi ga Abraáü̃arü yexeracü yixĩxü̃ ga Melquichedéx.
5 Rü ñu̱xma i Yudíugü, rü guxü̃ma i norü ngẽmaxü̃wa ínanaxüxüchigü i ngẽma diésmu i Tupanana üxü̃, rü ñu̱xũchi norü chacherdótegü i Lebítaagüna nanaxã yerü yemaacü nixĩ ga namuaxü̃ ga yema mugü ga Moiché ümatüxü̃. Natürü guxü̃ma i ngẽma chacherdótegü rü togü i Yudíugürüxü̃ Abraáü̃taagü nixĩgü. Rü ngẽmaãcü i ngẽma togü i Yudíugü rü norü chacherdótegüna nanaxã i ngẽma diésmu i Tupanana üxü̃, woo natanüxü̃ i Yudíugü nax yixĩxü̃ i ngẽma chacherdótegü.
6 Natürü ga Melquichedéx rü woo tama Lebítaxa nixĩ, natürü Abraáü̃me̱xẽwa nanayaxu ga yema diésmu ga Tupanana üxü̃. Rü nüxü̃ tacua̱x nax Abraáü̃ yixĩxü̃ ga noxri nayaxucü ga Tupanaarü unetagü. Rü Melquichedéx rü Tupanaégagu Abraáü̃maxã mexü̃ naxuegu.
7 Rü guxãma nüxü̃ tacua̱x rü ngẽxguma texé togueca̱x Tupanaarü ngü̃xẽẽca̱x ícaxgu, rü yíxema nüxna caxe rü ngẽma norü ngü̃xẽẽca̱x ítacaxü̃arü yexera tixĩ.*
8 Rü ñu̱xma i nua tatanüwa rü ngẽma chacherdótegü i ngĩxü̃ yauxgüxü̃ i ngẽma diésmu i Tupanana ücü, rü duü̃xü̃gümare nixĩgü rü tá nayue. Natürü ngẽxguma Mequichedéchiga yadexaxgu i Tupanaarü ore, rü ñoma namaxü̃xü̃rüxü̃ nixĩ i nachiga yadexaxü̃.
9 7:9-10 Rü ñu̱xma rü guxü̃ma i chacherdótegü i Lebítaagü ixĩgüxü̃ rü ngĩxü̃ yauxgüxü̃ i ngẽma diésmu i Tupanana ücü, rü nümagü rü ta Abraáü̃maxã Melquichedéxna nanaxãgü i ngẽma diésmu i Tupanana üxü̃. Yerü nüma ga Lebí rü guxü̃ma ga nataagü i ñu̱xma Yudíugüarü chacherdótegü ixĩgüxü̃, rü woo nax tauta nabuexü̃ ga yexguma, natürü marü Abraáü̃xü̃newa nayexmagü ga yexguma Melquichedéx namawa Abraáü̃pe̱xegu yanguxgu.*
10 Nüü̃ nadau 7:9
11 Rü nũxcümaü̃güxü̃ ga tórü o̱xigü ga Yudíugü nixĩ ga nayauxgüxü̃ ga Tupanaarü mugü ga nawa Lebítanüxü̃maxã naxueguxü̃ nax chacherdótegü yixĩgüxü̃ca̱x. Natürü yexguma chi yema chacherdótegü aixcüma yema Yudíugüxü̃ imexẽẽgügu ga Tupanape̱xewa, rü taxuca̱xchima Tupana nüxü̃ naxuneta ga nai ga chacherdóte ga Melquichedéxrüxü̃ ixĩcü rü tama Aróü̃rüxü̃ ixĩcü.
12 Rü yemaca̱x ga Tupana rü yema Yudíugüarü chacherdótegüchicüü nayangucuchixẽxẽ ga Cristu. Rü yexguma yangucuchigu rü yexguma ta nixĩ ga naxüchicüü ga yema mugü.
13 7:13-14 Erü meama nüxü̃ tacua̱x rü nüma ya tórü Cori ya Ngechuchu ya yimá nachiga idexagücü rü tama Lebítanüxü̃ nixĩ, rü nüma rü Yudátanüxü̃ nixĩ. Rü nüxü̃ tacua̱x rü taxuxü̃ma ga Yudátanüxü̃ rü chacherdóte nixĩ. Rü Moiché rü yexguma yema chacherdótegüchiga yadexaxgu rü tama Yudátanüxü̃chigaxü̃ nixu nax chacherdótegü yaxĩgüxü̃ca̱x.
14 Nüü̃ nadau 7:13
15 Rü ngẽmaãcü meama nango̱x nax Tupana nüxü̃ unetaxü̃ ga wüxi ga chacherdóte ga yexwaca̱xü̃cü ga tama Lebítanüxü̃ ixĩcü. Rü nüma nixĩ i tórü Cori ya Melquichedéxrüxü̃ ixĩcü.
16 Rü nüma ga Ngechuchu rü tama yema mugü ga duü̃xü̃gütanüwa ne ũxü̃gagu ningucuchi nax Chacherdóte yixĩxü̃ca̱x, natürü ningucuchi yerü nüxü̃́ nayexma ga pora nax yuwa ínadaxü̃ca̱x nax guxü̃guma namaxechaxü̃ca̱x.
17 Rü ngẽmaca̱x i Tupanaarü ore i ümatüxü̃wa rü tórü Corichiga ñanagürü:“Cuma rü guxü̃gutáma Chacherdóte quixĩ, Melquichedéxrüxü̃”,
ñanagürü.
18 7:18-19 Rü yemaca̱x ga yema nüxíraxü̃xü̃ ga mugü ga Moiché ümatüxü̃ rü narüxo, yerü natura rü taxuwama name, yerü tama aixcüma Tupanape̱xewa tüxü̃ nimexẽẽgü. Rü ñu̱xma rü yema mugüchicüxü tüxü̃́ nangẽxma i wüxi i ngü̃xẽxẽ i yexera mexü̃ i tüxü̃́ natauxchaxẽẽxü̃ nax Tupanaxü̃tawa ingugüxü̃.
19 Nüü̃ nadau 7:18
20 7:20-21 Rü yexguma nüxü̃ naxunetagügu ga yema togü ga chacherdótegü, rü nüxü̃ naxunetagümare. Natürü yexguma Cristuxü̃ naxunetagu ga Tupana nax tórü ngü̃xẽẽruxü̃ ya chacherdóte yixĩxü̃ca̱x, rü nügüégagutama inaxuneta. Rü yemaca̱x ga yexguma Cristuxü̃ naxunetagu rü ñanagürü:“Choma ya Cori ya Tupana rü marü cuxü̃ chaxuneta nax guxü̃gutáma duü̃xü̃güarü ngü̃xẽẽruxü̃ ya chacherdóte quixĩxü̃ca̱x.Rü ñaa uneta rü tagutáma inayarüxo”,
ñanagürü.
21 Nüü̃ nadau 7:20
22 Rü ñu̱xma nax yemaacü nügüégagutama inaxunetaxü̃ ga Tupana, rü nüxü̃ tacua̱x nax aixcüma Cristugagu tüxü̃́ nangẽxma i wüxi i Tupanaarü uneta i rümemaexü̃.
23 Rü namuxũchi ga yema togü ga chacherdótegü yerü niyuetanü. Rü yemaca̱x ga wüxichigü rü taxucürüwama guxü̃guma chacherdóte nixĩ.
24 Natürü Ngechuchu rü guxü̃guma namaxü̃ rü ngẽmaca̱x marü taxuca̱xma texé ya togue tingucuchi nax tórü chacherdóte tixĩxü̃ca̱x.
25 Rü ngẽmaca̱x nüxü̃́ natauxcha nax tüxü̃ namaxẽxẽẽxü̃ ya guxãma ya yíxema norü ngü̃xẽẽmaxã Tupanaxü̃tawa ngugüxe. Erü nüma ya Ngechuchu rü guxü̃guma namaxecha nax Tupanape̱xewa tümaétüwa nachogüxü̃ca̱x.
26 Rü ñu̱xma rü Ngechuchu rü Chacherdóte ya Guxü̃étüwa Ngẽxmacü nixĩ ya inaxwa̱xecü. Erü nüma rü aixcüma naxüüne, rü nawa nataxuma i chixexü̃, rü nangearü pecaduã̱x, rü taguma duü̃xü̃gürüxü̃ pecadu naxü. Rü nüma nixĩ i daxũguxü̃ i naaneétüwa ngẽxmaxü̃ rü namaxã inacuáxü̃.
27 Rü Ngechuchu rü tama ngẽma togü i chacherdótegüerurüxü̃ nixĩ. Erü nümagü rü nanaxwa̱xe nax wüxichigü i ngunexü̃gu Tupanaca̱x naxü̃nagü nada̱i̱xü̃ nax ngẽmaãcü Tupana nüxü̃́ nüxü̃ rüngü̃maxü̃ca̱x i norü pecadugü rü guxü̃ i duü̃xü̃güarü pecadugü rü ta. Natürü nüma ga Ngechuchu rü yexguma nügü inaxãxgu, rü wüxicanatama pecaduca̱x nayu. Rü ngẽma rü taguma inayarüxo.
28 Rü yema mugü ga Moiché ümatüxü̃wa duü̃xü̃gümarexü̃ naxuneta nax chacherdótegüerugü yixĩgüxü̃ca̱x. Natürü nümagü rü nipecaduã̱xgü. Natürü ñu̱xma ya Tupana rü yema mugü inaxãxguwena rü nügüégagu Nane ya Guxü̃guma Mecüxü̃ naxuneta nax guxü̃guma tórü chacherdóte ya Guxü̃étüwa Ngẽxmacü yixĩxü̃ca̱x.
