Hebreos 8:1-13
8 Rü ngẽma pemaxã nüxü̃ tixuxchaü̃xü̃ i ñu̱xma nixĩ nax Tupanape̱xewa tüxü̃́ nangẽxmaxü̃ ya tórü ngü̃xẽẽruxü̃ ya chacherdóte ya Guxü̃étüwa Ngẽxmacü. Rü nüma rü daxũguxü̃ i naanewa i Tupanaarü tochicaxü̃arü tügünecüwawa narüto.
2 Rü yimá daxũguxü̃ i naanewa ngẽxmane ya napata ya üünene ga Tupana üxü̃newa nixĩ i taétüwa nachogüxü̃. Rü yima napata rü tama wüxi ya ĩpata ya duü̃xü̃gü üxü̃ne nixĩ.
3 Rü guxü̃ma i ngẽma Yudíugüarü chacherdótegüerugü rü nüxü̃ naxunetagü nax Tupanana naxãgüãxü̃ca̱x i ãmaregü rü naxca̱x nadaiaxü̃ca̱x i naxü̃nagü nax Tupana duü̃xü̃güaxü̃́ nüxü̃ rüngü̃maxü̃ca̱x i norü pecadugü. Rü yemaca̱x ga Ngechuchu rü nanaxwa̱xe nax Tupanana naxããxü̃ca̱x i wüxi i ãmare.
4 Rü ngẽxguma chi ñoma i naanewa nangẽxmagu ya Ngechuchu rü taxũchima chacherdóte nixĩ, erü ñoma i naanewa nangẽxmagü i ngẽma chacherdótegü i Tupanana ãmare ãgüxü̃, yema Moichéarü mugü nüxü̃ ixuxü̃rüxü̃.*
5 Natürü ngẽma ñoma i naanewa naxügüxü̃ i ngẽma chacherdótegü, rü naxca̱x nadauxü̃taegümare i ngẽma daxũguxü̃ i naanewa ngẽxmaxü̃. Rü meama nüxü̃ tacua̱x i ngẽma, yerü yexguma Moiché naxüxchaü̃gu ga Tupanapata, rü Tupana rü ñanagürü nüxü̃:“¡Dücax, mea nangugü i ngẽma cua̱xruxü̃ ga cuxü̃ chawéxü̃ ga ma̱xpǘne ga Chinaíwa!Rü chanaxwa̱xe i ngẽmaãcü cunaxüxü̃ ya yima chopata”,
ñanagürü.
6 Rü ngẽma chacherdótegü rü nagu naxĩ ga yema mugü ga Moiché ümatüxü̃ nax duü̃xü̃güétüwa nachogüxü̃ca̱x. Natürü tórü Chacherdóte ya Guxü̃étüwa Ngẽxmacü ya Ngechuchu rü yema chacherdótegüarü yexera aixcüma tüxü̃ narüngü̃xẽxẽ. Rü ñu̱xma tüxü̃́ nangẽxma i wüxi i uneta i ngẽma nuxíraxü̃xü̃ ga uneta ga Moiché ümatüxü̃arü yexera mexü̃, erü Ngechuchugagu nixĩ ya Tupana tüxna naxü̃ i ngẽma uneta i ngexwaca̱xü̃xü̃.
7 Rü yexguma chi yema nüxíraxü̃xü̃ ga uneta ga Moiché ümatüxü̃ rü aixcüma namexgu nax duü̃xü̃güxü̃ namaxẽxẽẽxü̃ca̱x, rü marü taxuca̱xchima tanaxwa̱xe i to i ngexwaca̱xü̃xü̃ i Tupanaarü uneta.
8 Natürü nüma ga Tupana rü nüxü̃ nadau nax tama aixcüma duü̃xü̃güxü̃ yamexẽẽxü̃ ga yema nüxíraxü̃xü̃ ga uneta ga Moichéna naxãxü̃. Rü yemaca̱x ga Tupana rü ñanagürü:“Wüxi i ngunexü̃ rü wena táxarü guxü̃ma i Iraétanüxü̃maxã rü Yudátanüxü̃maxã ichaxuneta.
9 Natürü ngẽma chorü uneta i ngexwaca̱xü̃xü̃, rü taxũtáma namaxã nawüxigu ga yema nüxíraxü̃xü̃ ga chorü uneta ga nũxcümaü̃güxü̃ ga perü o̱xigümaxã nüxü̃ chixuxü̃ ga yexguma nüxü̃ charüngü̃xẽẽgu nax ínachoxü̃xü̃ca̱x ga Equítuanewa.Yerü nümagü ga yema duü̃xü̃gü rü tama chauga naxĩnüe rü tama nayanguxẽxẽ ga yema nüxíraxü̃xü̃ ga chorü uneta, rü yemaca̱x íchanawogü.
10 Natürü ngẽma ngunexü̃güwena rü wena tá ngẽma Iraétanüxü̃maxã ichaxuneta.Rü ñaãcü tá nixĩ i namaxã ichaxunetaxü̃:‘Choma rü tá meama ngẽma duü̃xü̃güxü̃ nüxü̃ chacua̱xẽxẽ i chorü mugü nax aixcüma naãxẽwa rü norü maxü̃wa nangẽxmagüxü̃ca̱x.Rü choma rü tá norü Tupana chixĩ, rü nümagü rü tá chorü duü̃xü̃gü nixĩgü’.
11 Rü guxü̃ma i ngẽma duü̃xü̃gü, rü aixcüma tá choxü̃ nacua̱xgü.Rü ngẽmaca̱x taxuca̱xtama tü̱xcüü̃ nügümücümaxã rü nügüenexẽgümaxã nüxü̃ nixugügü i chauchiga nax ngẽmaãcü choxü̃ nacua̱xgüxü̃ca̱x.Erü guxü̃ma i ngẽma duü̃xü̃gü rü aixcüma tá mea choxü̃ nacua̱xgü woo buxü̃ rü ẽ̱xna yáxü̃.
12 Rü choma rü tá nüxü̃́ nüxü̃ charüngüma i norü chixexü̃gü, rü taxũtáma nagu charüxĩnüecha i norü pecadugü”,
ñanagürü ga Tupana.
13 Rü dücax, ñu̱xma nax Tupana ngexwaca̱xü̃xü̃ i unetachiga idexaxü̃, rü nüxü̃ tacua̱x nax yema nüxíraxü̃xü̃ ga uneta rü ñu̱xma rü marü taxuwama namexü̃ rü paxa tá iyanaxoxü̃.
Notas
^ 8:4 Natürü nüma ya Ngechuchu rü daxũguxü̃ i naanewa nangẽxma i ñu̱xma nax ngéma tórü ngü̃xẽẽruxü̃ ya chacherdóte yixĩxü̃ca̱x.
