Hebreos 9:1-28
9 Rü yema nüxíraxü̃xü̃ ga uneta rü nüxü̃́ nayexma ga nacümagü nax ñuxãcü tá Tupanaxü̃ yacua̱xüü̃güxü̃ nawa ga gumá Tupanapata ga ñoma ga naanegu üxü̃ne.
2 Rü gumá Tupanapata ga naxchirunaxca̱x rü nitüyemachiã. Rü yema naxmachiã ga nüxíra nawa ixücuxü̃, rü “Naxmachiã i Üünexü̃”, nixĩ ga naéga. Rü yéma nayexma ga omü ga üünexü̃ rü mecha ga paũ ga üünexü̃ nagu nuxü̃.
3 Rü yema to ga naxmachiã ga tüyemachiãca̱xwena yexmaxü̃ rü “Naxmachiã i Üünexüchixü̃”, nixĩ ga naéga.
4 Rü yéma nayexma ga yema mecha ga úirunaxca̱x ga nawa yagugüãxü̃ ga pumara ga yixixü̃. Rü yéma nayexma ta ga yema baú ga guxü̃wama úirumaxã tüxünexü̃ ga Tupanaarü mugü nagu nucuxü̃. Rü yematama baúarü aixepewa nayexma ga wüxi ga napaxü̃ ga úirunaxca̱x ga maná ga daxũwa rüyixü̃maxã ããcuxü̃. Rü yexgumarüxü̃ ta yema baúarü aixepewa nayexma ga Aróü̃arü caxü̃ruxü̃ ga rüxüxü̃ne, rü gumá nutagü ga Tupanaarü mugü nagu ümatügüxü̃.
5 Rü yema baúétüwa nayexmagü ga yema taxre ga daxũcüã̱xchicüna̱xãgü ga ixãxpe̱xatüxü̃. Rü naxpe̱xatügümaxã nayadüxétügü ga yema baúátaü̃. Rü yema daxũcüã̱xchicüna̱xãgüarü ngãxü̃wa nixĩ ga nangóxü̃ ga Tupanaarü üünexü̃. Natürü taxuca̱xma tü̱xcüü̃ yexeraãcü nüxü̃ tixu i ngẽmachiga.
6 Rü wüxicana nax namexẽẽgüaxü̃́ ga guxü̃ma ga yema, rü ñu̱xũchi ga chacherdótegü rü guxü̃guma yema nüxíraxü̃xü̃ ga naxmachiãgü nachocuxü̃ nax yéma Tupanaxü̃ yacua̱xüü̃güxü̃ca̱x.
7 Natürü yema to ga naxmachiãwa rü yema chacherdótegüarü ãẽ̱xgacüxicatama nixĩ ga wüxicanatama yexma ücuxü̃ ga wüxichigü ga taunecügu. Rü yexguma yexma naxücu̱xgu rü yéma nanange ga nagü nax gumámaxã yema baúxü̃ namaxcuétüxü̃. Rü yemaacü ga yema chacherdótegüarü ãẽ̱xgacü rü Tupanana nanaxã ga gumá nagü nax noxrütama pecaduxü̃ rü yema duü̃xü̃güarü pecadu ga naxücüraxü̃xü̃ iyanangümaxü̃ca̱x ga Tupana.
8 Rü ngẽmawa Tupanaãxẽ ya Üünecü tüxü̃ nüxü̃ nacua̱xẽxẽ rü woo nax namexü̃ nax nagu nachocuxü̃ i ngẽma nüxíraxü̃xü̃ i naxmachiã, natürü ñu̱xma rü ta rü ngẽma naxmachiã i Üünexüchixü̃ rü nachu̱xu nax ngẽxma nachocuxü̃.
9 Rü guxü̃ma i ngẽma pemaxã nüxü̃ chixuxü̃, rü wüxi i cua̱xruxü̃ nixĩ i taxca̱x i yixema nax ñu̱xma imaxẽxü̃. Rü ngẽmawa nüxü̃ tadau rü yema ãmaregü ga Tupanana naxãgüxü̃ rü yema naxü̃nagü ga Tupanaca̱x nada̱i̱xü̃ rü tama nüxü̃́ nangẽxma i pora nax yamexẽẽxü̃ca̱x i duü̃xü̃güarü ĩnü nax aixcüma Tupanape̱xewa yamexü̃ca̱x.
10 Rü yema nũxcümaü̃güxü̃ ga mugü ga õnagüchiga rü axexü̃güchiga rü nacümagüchiga ixĩxü̃, rü duü̃xü̃güarü düxétüxü̃neca̱xicatama nixĩgü. Rü woo name ga yema mugü ga noxrix, natürü yexguma ínanguxgu ga Cristu rü marü yexma nayacua̱x nax duü̃xü̃gümaxã inacuáxü̃ ga yema mugü.
11 Natürü i ñu̱xma rü marü ínangu ya Cristu. Rü nüma nixĩ i aixcüma tórü Chacherdóteeru i tórü ngü̃xẽẽruxü̃ yixĩxü̃ i Tupanape̱xewa, rü nagagu nixĩ i nangẽxmaxü̃ i maxü̃ i taguma gúxü̃. Rü gumá Tupanapata i ngextá taétüwa ínachogüxü̃wa rü aixcüma naxüüne. Rü tama gumá ĩpata ga naxchirunaxca̱x ga duü̃xü̃gümare üxü̃nerüxü̃ nixĩ erü daxũguxü̃ i naanewa nangẽxma.
12 Rü Cristu rü wüxicanatama daxũguxü̃ i naanegu naxücu ya Tupana íngẽxmaxü̃wa, rü guxü̃guma ngéma nangẽxma. Rü tama yéma nanange ga nagü ga chíbugü rü wocaxacügü, natürü nagütama yéma nange. Rü yemaacü taétüwa nachogü nax guxü̃guma tüxü̃́ nangẽxmaxü̃ca̱x i maxü̃ i taguma guxü̃.
13 Rü yimá nagü i woca i iyatüxü̃ rü chíbugü rü yimá tanimaca i wocaxacü i ngexü̃arü, rü aixcüma napora nax düxétüwa yanaxoxẽẽãxü̃ca̱x i duü̃xü̃güarü pecadugü ega yimámaxã namaxcuétügügu i ngẽma duü̃xü̃gü.
14 Natürü nagü ya Cristu rü naporaxüchi norü yexera ya yimá nagü i ngẽma naxü̃nagü. Rü nüma ya Cristu rü Tupanaãxẽarü poramaxã nügü inaxã rü nayu nax ãmare i ngẽarü chixexü̃ã́xü̃ yixĩxü̃ca̱x nax yemaacü yanaxoxẽẽãxü̃ca̱x i tórü chixexü̃ i tórü ĩnüwa ngẽxmagüxü̃ nax ngẽmaãcü Tupana ya Maxü̃cüca̱x imaxẽxü̃ca̱x.
15 Rü ñu̱xma nax tórü pecaduca̱x nayuxü̃ ga Ngechuchu ya Cristu, rü nüma nixĩ i tórü ngü̃xẽẽruxü̃ i Tupanape̱xewa, ngẽma Tupanaarü uneta i ngexwaca̱xü̃xü̃ nüxü̃ ixuxü̃rüxü̃. Rü ñu̱xma i yixema nax Tupana tüxü̃ dexü̃, rü tüxü̃́ nangẽxma i maxü̃ i taguma gúxü̃ yerü Cristu rü marü nayu nax tüxü̃ ínanguxü̃xẽxẽxü̃ ga yema pecadugü ga taxügüxü̃ ga yexguma yema nüxíraxü̃xü̃ ga unetatüxü̃wa tayexmagügu.
16 Rü naxü̃pa nax nayuxü̃ i wüxi i duü̃xü̃, rü wüxi i poperagu nanaxümatü nax texé tá nayaxuxü̃ i norü ngẽmaxü̃gü. Natürü ngẽxguma namaxü̃xgu i ngẽma duü̃xü̃, rü taxucürüwama texé tanayaxu i norü ngẽmaxü̃gü.
17 Rü ngẽmaca̱x i ngẽma popera rü tama napora i ngẽxguma namaxü̃gu i ngẽma duü̃xü̃. Rü ngẽxguma nayu̱xguxicatama nixĩ i naporaxü̃.
18 Rü yemaca̱x yema mugü ga Moiché ümatüxü̃wa nüxü̃ nixu rü yexguma texé pecaduã̱xgu rü tanaxwa̱xe nax tayamáxü̃ ga wüxi ga naxü̃na nax inabaãxü̃ca̱x ga nagü nax gumágagu Tupana tüxü̃́ nüxü̃ rüngü̃maxü̃ca̱x ga tümaarü pecadu.
19 Rü Moiché rü guxü̃ma ga duü̃xü̃güpe̱xewa nüxü̃ nixu ga guxü̃ma ga Tupanaarü mugü. Rü yemawena nanayaxu ga nagü ga wocaxacügü rü chíbuxacügü, rü dexámaxã nanaxüéü̃. Rü ñu̱xũchi nanayaxu ga wüxi ga nai ga ichópuchacüxü, rü tüa̱xmü ga dauxü̃ne nagu nanabagümü. Rü yemamaxã gumá nagüwa nanacúe rü ñu̱xũchi nanamaxcuétü ga yema popera ga Tupanaarü mugü nawa yexmaxü̃. Rü yexgumarüxü̃ ta nayamaxcutanü ga guxü̃ma ga duü̃xü̃gü.
20 Rü ñu̱xũchi ga Moiché rü ñanagürü nüxü̃ ga duü̃xü̃gü:“Tupana rü marü inaxuneta nax pexü̃ tá nangü̃xẽẽxü̃.Rü daa nagümaxã pexü̃ chimaxcutanü nax ngẽmawa nüxü̃ pecuáxü̃ca̱x nax aixcüma tá pexü̃ nangü̃xẽẽxü̃”,
ñanagürü.
21 Rü ñu̱xũchi ga Moiché rü gumá nagümaxã nanamaxcuétü ga guma ĩpata ga nawa Tupanaxü̃ yacua̱xüü̃güne. Rü yexgumarüxü̃ ta nayamaxcutanü ga guxü̃ma ga yemaxü̃gü ga namaxã Tupanaxü̃ yacua̱xüü̃güxü̃ ga gumá ĩpataarü aixepewa yexmagüxü̃.
22 Rü yema mugü nüxü̃ nixu rü tanaxwa̱xe nax nagümaxã yamexẽẽxü̃ i wixguxüchi guxü̃ma. Rü ngẽxguma taxũchima nagü ibaxgu, rü taxũchima Tupana duü̃xü̃güaxü̃́ nüxü̃ narüngüma i norü pecadugü.
Cristu rü nayu nax iyanaxoxẽẽãxü̃ca̱x i pecadugü
23 Rü yemaca̱x ga yema duü̃xü̃gü rü nanaxwa̱xe nax pecaduarü ütanüca̱x nada̱i̱xü̃ ga naxü̃nagü rü inabaãxü̃ ga nagü nax yemaacü Tupanape̱xewa yamexẽẽãxü̃ca̱x ga yema Tupanapataarü yemaxü̃gü ga naxchicüna̱xã ixĩgüxü̃ i ngẽma daxũwa ngẽxmagüxü̃. Natürü ngẽma daxũwa ngẽxmagüxü̃ rü nanaxwa̱xe i ãmaregü i naxü̃nagü i daixü̃arü yexera rümemaexü̃
24 Rü nüma ya Cristu rü tama nagu naxücu ga gumá Tupanapata ga duü̃xü̃gü ügüne ga naxchicüna̱xãmare ixĩxü̃ne ya yimá daxũwa ngẽxmane. Natürü nüma rü daxũguxü̃ ga naanegu naxücu, rü ngéma Tupanape̱xewa nangẽxma nax taétüwa nachogüxü̃ca̱x.
25 Rü nüma ga Cristu rü tama muẽ̱xpü̱xcüna pecaduca̱x nayu ga yexguma daxũgu naxücugu. Rü yema Yudíugüarü chacherdótegüarü ãẽ̱xgacügü rü gucü ga taunecügügu gumá Tupanapatagu nachocu nax yéma Tupanana naxãgüãxü̃ca̱x ga nagü ga naxü̃nagü.
26 Natürü ngẽxguma chi ngẽmaãcü Cristumaxã nangupetügu rü chi noxri naane ixügügumama rü chi marü muẽ̱xpü̱xcüna pecaduarü ütanüxü̃ca̱x nayu. Natürü ñu̱xma nax nagúxchaü̃xü̃ i naane rü Cristu rü marü ñoma ga naanewa nangu nax wüxicanatama nayuxü̃ca̱x nax duü̃xü̃güarü pecadu naxütanüxü̃ca̱x.
27 9:27-28 Rü ngẽxgumarüxü̃ nax wüxicanatama nayuexü̃ i duü̃xü̃gü rü ngẽmawena Tupana tá nüxü̃ nicagü, rü yexgumarüü̃tama ga Cristu rü wüxicanatama nügü inaxã rü nayu nax naxütanüxü̃ca̱x i muxü̃ma i duü̃xü̃güarü pecadugü. Rü nüma ya Cristu rü wena tá núma naxũ, natürü tama pecaduarü ütanüwa. Rü tá núma naxũ nax namaxẽxẽẽãxü̃ca̱x i guxü̃ma i duü̃xü̃gü i aixcüma ínangu̱xuxẽẽgüxü̃.
28 Nüü̃ nadau 9:27
