Eclesiastés 1:1-18
1 1:1-2 Ñaa nixĩ i norü ore ga nüxü̃ yaxuxü̃ ga gumá orearü uruxü̃ ga Dabí nane ga Yerucharéü̃wa ãẽ̱xgacü ixĩcü. Guxü̃ma i ta̱xacü i ñoma i naanewa nagu rüxĩnüexü̃ rü natüca̱xmamare nixĩ, erü guxü̃ma rü tá nagu̱x.
2 Nüü̃ nadau 1:1
3 ¿Rü nüma ya yatü rü ta̱xacürü mexü̃ nawa nayaxu i norü puracü i taxü̃ i ñoma i naanewa naxüxü̃?
4 Rü duü̃xü̃gü rü ningóetanü rü ngẽma togü rü niyuetanü, natürü ñoma i naane rü nanaxa̱i̱xrügumaraxü̃mare.
5 Rü üa̱xcü, rü pa̱xmama inarügo rü yáuanecü rü ínarüxücu. Rü ngẽxma nachicagu narüxã̱ũ̱x. Rü moxü̃ãcü pa̱xmama wenaxarü inarügo.
6 Rü yimá buanecü, rü súrwaama nabuema rü ngéma rü nügü inibuema nax nórtewaama naxũemaxü̃ca̱x. Rü ngẽmaãcü ya yimá buanecü rü dauxque naxũema rü ñu̱xũchi tawaama naxũema. Rü ngẽmaãcü nixũecha rü taguma ínayachaxãchi.
7 Rü guxü̃ma i natügü, rü márwa nixĩ i naya̱xgüxü̃, natürü ngẽma már rü taguma narübai. Rü ngẽma natügüarü dexá nacaixnagü rü pucü nixĩ. Rü ngẽmaãcü wenaxarü ngẽma natü i nawa ne naxũxü̃ca̱x nataegu nax wenaxarü márwa nayaxü̃ca̱x.
8 Rü guxü̃ma i ta̱xacü i ñoma i naanewa ngẽxmaxü̃ rü duü̃xü̃gü rü nüxü̃ narüchau. Rü ngẽmaca̱x düxwa tama nachiga nidexagüchaü̃. Rü ngẽma duü̃xü̃gü nüxü̃ daugüxü̃, rü tama nüxü̃́ ningu nax namaxã nataãẽxü̃, rü yexera nüxü̃ nadaugüchaü̃ i to. Rü ngẽma duü̃xü̃gü nüxü̃ ĩnüexü̃, rü tama nüxü̃́ ningu nax namaxã nataãẽxü̃, rü yexera nüxü̃ naxĩnüechaü̃ i to.
9 Rü ngẽma ü̃pa ngupetüxü̃ rü wena tá nangupetü. Rü ngẽma ü̃pa duü̃xü̃gü ügüxü̃ rü wenaxarü duü̃xü̃gü tá nanaxügü. Rü ñoma i naanewa rü nataxuma i ta̱xacü i ngexwaca ngóxü̃.
10 Rü guxü̃gutáma nangẽxma i duü̃xü̃ i ñaxü̃: —Ñaa waxi nixĩ i wüxi i ngexwaca ngóxü̃ —ñaxü̃. Natürü ngẽma naxca̱x ngexwaca̱xü̃xü̃, rü ñuxre ya taunecü naétü ngupetüxü̃ nixĩ nax marü nangẽxmaxü̃.
11 Rü ngẽma nüxíra ngóexü̃ i duü̃xü̃gü rü taxúema nüxna tacua̱xãchi i ñu̱xmax. Rü ngẽxgumarüxü̃ ta i ngẽma taweama tá ngóexü̃ i duü̃xü̃gü rü taxúetama nüxna tacua̱xãchi.
12 Rü choma i orearü uruxü̃, rü Iraétanüxü̃arü ãẽ̱xgacü chixĩ ga Yerucharéü̃wa.
Orearü uruü̃xü̃ ngupetüxü̃chiga
13 Choma rü poraãcü ngugüxü̃ icharüxã̱ũ̱x. Rü naxca̱x changu̱x i guxü̃ma i ñoma i naanewa ixüxü̃. Rü taxü̃ i puracü nixĩ i yatügüétü naxǘnagüxü̃ ya Tupana nax ngẽmatüü̃wa nangẽxmagüxü̃ca̱x.
14 Rü choma rü chanangugü i guxü̃ma i ta̱xacü i üxü̃ i ñoma i naanewa rü natüca̱xmamare nixĩ. Rü ñoma buanecü ya taxucürüwa texé yayauxemacürüxü̃ nixĩ.
15 Rü wüxi i ta̱xacü i wü̃xü̃ rü taxuacü itanawe̱xãchixẽxẽ. Rü ngẽma tama tüxü̃́ ngẽxmaxü̃ rü taxuacü tayaxugü.
16 1:16-17 Rü yexguma ga choma rü chaugümaxã ñachagürü: —Ñu̱xmax i duü̃xü̃gü rü choxü̃ nataxẽẽgü rü nüxü̃ nixugü nax choma rü nüxü̃ chacua̱xüchixü̃ norü yexera ga yema nüxíra ãẽ̱xgacügü ixĩgüxü̃ ga Yerucharéü̃wa. Yerü chaugü ichaxã nax naxca̱x chadauxü̃ nax cua̱x choxü̃́ yexmaxü̃ nax nüxü̃ chacuáxü̃ca̱x i ta̱xacü nixĩ i aixcüma mexü̃ rü ta̱xacü nixĩ i natüca̱xmamare ixĩxü̃. Natürü nüxü̃ chicua̱xãchi rü guxü̃ma i ngẽma nagu charüxĩnüxü̃ rü ñoma buanecüxü̃ yayauxchaü̃cürüü̃mare nixĩ —chaugümaxã ñachagürü.
17 Nüü̃ nadau 1:16
18 Rü ngẽxguma yexera nüxü̃ icua̱xgux, rü yexera tachixeãxẽ. Rü ngẽxguma yexera i cua̱x tüxü̃́ ngẽxmagux, rü yexera ngúxü̃ tinge.
