Eclesiastés 10:1-20
10 Wüxitama i murenü i yuxü̃ rü nanayixanexẽxẽ rü inanaxoemaxẽxẽ i ngẽma yixichixü̃ i pumaraema. Rü wüxi ya yatü ya tachigacü rü nüxü̃ cua̱xüchicü rü nügütama nachixexẽxẽ ega woo íxraxü̃ i ore i taxuwama mexü̃xü̃ yaxuxgu.
2 Rü yimá yatü ya cua̱x nüxü̃́ ngẽxmacü rü mexü̃gu narüxĩnü, natürü ngẽma yatü i tama naãẽxü̃ cuáxü̃ rü chixexü̃gu narüxĩnü.
3 Rü ngẽma tama naãẽxü̃ cuáxü̃, rü guxü̃ma inaxüxü̃wa rü inanawe̱x nax tama cua̱x nüxü̃́ ngẽxmaxü̃. Rü ngẽxguma yadexaxgu rü guxü̃ma i duü̃xü̃güxü̃ nüxü̃ nacua̱xẽxẽ nax aixcüma wüxi i ngeãẽxü̃ nax yixĩxü̃.
4 Rü ngẽxguma cumaxã nanuxgu i curü ãẽ̱xgacü rü tama name i namaxã cunu. Rü wüxi i duü̃xü̃ i naãẽxü̃ cuáxü̃ rü yáxna namaxã naxĩnü i ngẽma guxchaxü̃gü.
5 Rü nüxü̃ chicua̱xãchi i wüxi i chixexü̃ i ñoma i naanewa ngẽxmaxü̃ i ãẽ̱xgacügüwa ne ũxü̃.
6 Rü ngẽma duü̃xü̃ i taxuxü̃ma cuáxü̃ rü duü̃xü̃gümaxã inacua̱x, natürü ngẽma duü̃xü̃gü i aixcüma nüxü̃ icuáxü̃ rü natüxü̃wa nangẽxmagü.
7 Rü nüxü̃ chadau nax ngẽma mugüruü̃gü rü cowarugügu naxĩxü̃, rü ngẽma ãẽ̱xgacü nanegü rü nacutügumare naxĩxü̃ ñoma mugüruü̃gümare yaxĩgüxü̃rüxü̃.
8 Rü yíxema yacaxmaxe i wüxi i ãxmaxü̃ rü tümatama tá nagu tingucuchi. Rü yíxema yaponaxe i ĩanearü poxeguxü̃tápü̱x rü ãxtape tá tüxü̃ nangõ̱x.
9 Rü yíxema nutaarü mexẽẽcüwawa puracüxe rü ngẽxguma tama taxũãẽgu rü tá ngẽmagu düxwa tayapi̱x. Rü yíxema üxü maxẽ rü ngẽxguma tama taxũãẽgu rü tá ngẽmagu düxwa tügü tachexe.
10 Rü ngẽxguma natécagu i yuema rü tama wena nawaixmagugu rü yexeraãcü poraãcü timanecüxü. Rü ngẽxguma cunaxwa̱xegu nax mea yaxũxü̃ i curü puracü rü name nixĩ nax mea cuãẽxü̃ cucuáãcüma cunaxüxü̃ i curü puracü.
11 Taxuwama name i wüxi i ãxtapearü toõxẽruxü̃ ega ngẽma ãxtape rü nangõ̱xamaagu naxü̃pa nax natoṍxẽãxü̃.
12 Rü ngẽxguma wüxi ya yatü ya cua̱x nüxü̃́ ngẽxmacü idexagu rü guxãma naga taxĩnüe. Natürü ngẽxguma wüxi i yatü i tama cua̱x nüxü̃́ ngẽxmaxü̃ idexagu rü nügüca̱xtama guxchaxü̃ ínanguxẽxẽ.
13 Erü ngẽma ore i namaxã inaxügüãxü̃ rü wüxi i ore i taxuwama mexü̃ nixĩ. Rü ngẽma ore i namaxã iyacuáxü̃ rü wüxi i ngeãẽmare nixĩ.
14 Rü ngẽma yatü i naechita idexaxü̃ rü ngẽxguma yadexaxgu rü taguma inayagu i norü dexa. ¿Rü texé nüxü̃ tacua̱x i ta̱xacü tá yixcüra ngupetüxü̃? Erü taxúema nüxü̃ tacua̱x i ngẽma yixcüra tá ngupetüxü̃.
15 Rü ngẽma yatü i naechita maxü̃xü̃ rü puracügu nügü nima̱x, rü ngẽmaca̱x düxwa nüxü̃ inarüngüma i ngẽma nama i ĩanewa daxü̃.
16 Rü nügümaxã nangechaü̃ i ngẽma nachixü̃ane i bumarexü̃ i ãẽ̱xgacü namaxã icuáxü̃ rü norü ngü̃xẽẽruü̃gü rü petagu ingóonexü̃güxü̃ nixĩ.
17 Rü nataãxẽ i ngẽma nachixü̃ane i ãẽ̱xgacü i mexü̃ i cua̱x nüxü̃́ ngẽxmaxü̃, rü ngẽma norü ngü̃xẽẽruü̃gü rü mea oragu chibüexü̃ nax naporaexü̃ca̱x rü tama nax nangãxẽmarexü̃ca̱x.
18 Rü ngẽma oxü̃ rü düxwa napata naétügu narüngauemü. Rü ngẽma taguma ta̱xacü üxü̃ rü guxü̃nema ya napata naétügu nangu.
19 Rü ngẽma paũ rü ngõ̱xruxü̃ nixĩ nax tama itaiyaxü̃ca̱x. Rü yimá bínu rü axeruxü̃ nixĩ nax tama ita̱xawaexü̃ca̱x rü nax itaãẽxü̃ca̱x i tórü maxü̃wa. Natürü tanaxwa̱xe nax idiẽruã́xü̃ nax tüxü̃́ ngẽxmaxü̃ca̱x i guxü̃ma i ngẽma.
20 Rü tama name i nachiga quidexa ya yimá ãẽ̱xgacü, rü bai i curü ĩnüwa nax nüxü̃ quixuxü̃. Rü tama name i nachiga chixri quidexa i ngẽma diẽruã́xü̃, woo ngẽxguma cuxica cungexmagu. Erü ngẽma dexa rü nigoe ñoma werirüxü̃, rü nüma rü tá nüxü̃ nacua̱xama nax nachiga quidexaxü̃.
