Eclesiastés 11:1-10
11 Name nixĩ i togüxü̃ curüngü̃xẽxẽ, erü yixcüra i nümagü rü tá cuxü̃ narüngü̃xẽẽgü.
2 ¡Rü togüxü̃ rüngü̃xẽxẽ namaxã i ngẽma cuxü̃́ tauxchaxü̃! Erü tama nüxü̃ cucua̱x nax ta̱xacürü guxchaxü̃ tá ínguxü̃ nawa i ñaa nachixü̃ane.
3 Rü ngẽxguma caixanexü̃gü yawaãchigügu rü ngẽmawa nüxü̃ tacua̱x nax naaneétügu tá napuxü̃. Rü ngẽxguma wüxi ya nai nórtewaama wa̱xgu rüe̱xna súrwaama wa̱xgu rü ngẽma ínawáxü̃wa tá nangẽxmaecha.
4 Rü yíxema ínanguxẽxẽ́xẽ nax buanecü ngupetügu nax tatoexü̃, rü tagutáma tatoe. Rü yíxema meanexü̃ ínanguxexẽxẽ nax tanabuxuxü̃ i tümanetü, rü tagutáma tanabuxu i tümanetüarü o.
5 Rü ngẽxgumarüxü̃ nax tama nüxü̃ cucuáxü̃ nax ngextá naxũxü̃ ya buanecü rü tama nüxü̃ cucuáxü̃ nax ñuxãcü tangóxü̃ ya wüxi ya buxe i tümaéanüwa, rü ngẽxgumarüxü̃ ta tama nüxü̃ cucua̱x nax ñuxãcü Tupana ya guxü̃arü üruxü̃ ixĩcü naxüxü̃ i guxü̃ma i ngẽma ngẽxmaxü̃.
6 ¡Rü pa̱xmama namaxã natoe i cunetüchire rü ngẽxgumarüxü̃ ta yáuanecü namaxã natoe! Erü tama nüxü̃ cucua̱x i ngexü̃rüüxü̃ tá yexera mea narüxü, rü ngẽma nüxíra cutoxü̃ rüe̱xna ngẽma wixwena cutoxü̃. Rü ngürüãchi ngẽma taxre tá mea narüxügü.
7 Rü namexẽchi nax nangóonexü̃ rü wüxi i mexü̃ nixĩ nax taxetü nüxü̃ nadauxü̃ ya üa̱xcü.
8 Natürü woo mucüma ya taunecü imaxẽgu rü guxcüma ya yimá taunecügügu itaãẽgügu, natürü name nax nüxna icua̱xãchixü̃ rü ngẽma muxü̃ma i ngunexü̃gügu rü tá ínangugüxü̃ i guxchaxü̃gü. Rü guxü̃ma i ngẽma tá ínguxü̃ rü natüca̱xmamare nixĩ.
Ucu̱xẽgü i ngextü̱xücügüca̱x ixĩxü̃
9 ¡Nataãxẽ Pa Ngextü̱xücüx, rü ñoma rü ta cupora! ¡Rü nataãxẽ namaxã i ngẽma cuxü̃́ mexü̃ ñoma rü ta cuxü̃́ natauxcha! ¡Rü naxü i ngẽma nagu curüxĩnüxü̃, natürü nüxna nacua̱xãchi rü guxü̃ma i ngẽma cuxüxü̃ca̱x rü Tupana tá cuxna naca!
10 ¡Rü cugü nüxü̃ rüngü̃maxẽxẽ i ngẽma oegaãẽgü! ¡Rü cugüwa nüxü̃ naxõõ̱x i guxü̃ma i chixexü̃gü! Erü ngẽma mexẽchixü̃ i ngunexü̃gü i nagu ingextü̱xüxü̃ rü wüxi i paxaãchimare nixĩ.