Eclesiastés 12:1-14
12 Rü ñu̱xma nax cungextü̱xüxü̃, rü ¡nüxna nacua̱xãchi ya yimá Tupana ya cuxü̃ ngo̱xẽẽcü ñoma rü ta taxũta ínangugü i ngunexü̃gü i guxchaxü̃gü namaxã napaxü̃! Erü tá cuxca̱x ínangugü i ngunexü̃gü i nagu ñacuxü̃: —Rü taxuwama choxü̃́ name nax chamaxü̃xü̃ —ñacuxü̃.
2 ¡Rü nüxna nacua̱xãchi ya Tupana ya cuxü̃ ngo̱xẽxẽcü ñoma rü ta i ngẽma caixanexü̃, rü tama nayadüxétü ya üa̱xcü rü tauemacü rü ẽxtagü, rü naxü̃pa nax pucüwena nangẽxmaamaxü̃ i ngẽma caixanexü̃!
3 Erü tá ínangu i ngunexü̃gü i nagu cuyaxü̃ rü cuparagü rü tá nidu̱xruxe. Rü ngẽma cucaxwe̱x i noxri poraxü̃ rü tá nanapüãchi. Rü noxretátama ya cupüta ínayaxügü nax cuchibüxü̃ca̱x, rü ngẽma beü̃tánawa nax icudawenüxü̃ rü tá nixogü ya cuxetügü.
4 Rü ngẽxguma ngẽma ngunexü̃güwa nanguxgu rü ngẽma cuxmachi̱xẽ rü tá nixochigü rü taxũtáma ta̱xacüxü̃ mea cuxĩnü. Rü ngẽma naga ya yima iwichi rü tá cuxca̱x nixígachigü. Rü ngẽma werigü rü tá naxae, natürü taxũtáma mea cuxca̱x nangóga.
5 Rü daxũ nax cuxĩxü̃ rü tá cumuü̃, rü ngẽxguma namagu quixũxgu rü tá cuxca̱x naxãũcüma. Rü ñoma armeü̃drachacurüxü̃ tá cupueru. Rü ñoma munü i yuxchaü̃xü̃rüü̃ãcü tá quixũ. Rü cuxma̱xca̱x rü nataxutama i curü ngúchaü̃ rü taxuwatáma cume. Rü yuwa tá cuxũ rü namawa tá nüxü̃ taxĩnü nax cuxca̱x naxauxexü̃ i duü̃xü̃gü.
6 Rü ñu̱xma nax cungextü̱xüxü̃ rü naxü̃pa nax cuyuxü̃ ¡nüxna nacua̱xãchi ya yimá Tupana ya cuxü̃ ngo̱xẽẽcü! Rü ñu̱xma nax cumaxü̃xü̃ rü ¡nüxna nacua̱xãchi ya Tupana naxü̃pa nax curü maxü̃ rü ñoma wüxi i cadéna i diẽrumünaxca̱x icauyexü̃rüxü̃ nax yixĩxü̃, rü ñoma wüxi ya naxpáü̃ i úirunaxca̱x ipuxü̃rüxü̃ nax yixĩxü̃! ¡Rü nüxna nacua̱xãchi ya yimá cuxü̃ ngo̱xẽẽcü ñu̱xma nax cuxü̃́ nangẽxmaxü̃ i curü maxü̃ i ñoma wüxi i tü̃xü̃ i tama ipuxü̃rüxü̃ nax yixĩxü̃, rü ñoma wüxi i ãchicuxü̃ i dexá namaxã itúnagütaü̃xü̃ i tama ipuxü̃rüxü̃ nax yixĩxü̃!
7 Rü nawena nax cuyuxü̃ rü cuxune rü tá wenaxarü noxrirüxü̃ waixü̃mü nixĩ. Rü cuãxẽ rü tá Tupanaca̱x nataegu yerü nüma nixĩ ga cuxna naxããxü̃.
8 Rü ngẽmaca̱x i choma i orearü uruxü̃ nax chixĩxü̃ rü wena pemaxã nüxü̃ chixu rü guxü̃ma i ngẽma ñoma i naanewa ngẽxmaxü̃ rü nagu rüxĩnüxü̃ rü natüca̱xmamare nixĩ.
Ucu̱xẽ i namaxã yacua̱xẽẽãxü̃
9 Rü yexguma yexera cua̱x nüxü̃́ yexmagu ga gumá orearü uruxü̃ rü yexera ga cua̱x duü̃xü̃güna naxã. Rü poraãcü nagu narüxĩnü rü nanangugü rü mea inananu ga muxü̃ma ga dexagü ga cua̱x nawa yexmagüxü̃.
10 Rü nüma ya orearü uruxü̃ rü naxca̱x nadau nax nüxü̃ yangauxü̃ca̱x i ngẽma ore i aixcüma mexü̃ nax naxümatüaxü̃ca̱x i ngẽma ucu̱xẽgü i aixcüma we̱xguxü̃.
11 Rü ngẽma yatügü i nüxü̃ cua̱xüchixü̃arü ucu̱xẽgü rü ñoma wüxi i carnéruarü dauruü̃arü naixmena̱xã ya ãmaguxü̃rüxü̃ nixĩgü. Rü ngẽxguma wüxigu mea inanuxgu i ngẽma ucu̱xẽgü rü ñoma ĩpataarü naparagü i wüxitama carnérugüarü dauruxü̃ meama ipugünerüxü̃ nixĩgü.
12 Rü ngẽma ucu̱xẽgü rü poraãcü tüxü̃ nüxü̃ nicua̱xãchixẽxẽ. Rü ngẽma nax muxü̃ma i popera naxümatüxü̃ rü taguma inayagu̱x. Rü ngẽma nax poraãcü ingúexü̃ rü düxwa tipae.
13 Rü ngẽxma nayacua̱x i chorü dexa. Rü marü guxü̃xü̃ma chixu. ¡Rü Tupanaxü̃ nangechaxü̃ rü naga naxĩnü i norü mugü! Erü ngẽma nixĩ i guxü̃ma i ngẽma Tupana tüxü̃́ naxwa̱xexü̃.
14 Erü nüma rü tá tüxna naca naxca̱x i guxü̃ma i ta̱xacü ixüxü̃, woo mexü̃ rüe̱xna chixexü̃, rü woo cúãcü ixüxü̃.
