Eclesiastés 2:1-26
2 Chaugümaxã ñachagürü: —Ñu̱xma rü tá nüxü̃ chaxü i ngẽma duü̃xü̃gü nagu rüxĩnüexü̃ rü namaxã nataãẽgüxü̃, rü chaugüxü̃́ tá chanadetaque̱xe i muxü̃ma i ngẽmaxü̃gü —ñachagürü chaugümaxã. Natürü woo i ngẽma ĩnü rü natüca̱xmamare nixĩ.
2 Rü düxwa nüxü̃ chacua̱x i ngẽma nax chacugüxü̃ rü wüxi i natüca̱xmamare yixĩxü̃, rü ngẽma chauxunearü ngúchaü̃gü rü taxuwama namexü̃.
3 Rü chauãẽwa nagu charüxĩnü rü tá nüxü̃ chaxü ya yimá bínu ya ngúchiacüarü pora. Rü namaxã chaugü changãxẽxẽ nax nüxü̃ chacuáxü̃ca̱x rü aixcüma name nax ngẽmaãcü namaxẽxü̃ i duü̃xü̃gü nagu i ngẽma noxretama i ngunexü̃gü i ñoma i naanewa nax namaxẽxü̃.
4 Rü taxü̃ ga puracü chaxü. Rü chaugüca̱x chanaxü ga guma ãẽ̱xgacüpatagü ga taxüchine rü mexẽchine. Rü choxrütama úbanecügü choxü̃́ nayexma.
5 Rü choma ichanato ga nanetügü rü chorü putüraanecügü. Rü yexma chanatogü ga naguxü̃raü̃xü̃ i nanetügü i ori̱xgü.
6 Rü chanaxü ya puchugü nax gumaarü dexámaxã yamegüxü̃ca̱x ga yema nanetügü ga ichatogüxü̃.
7 Rü naxca̱x chataxe ga chorü mugüruü̃gü ga yatüxü̃ rü ngexü̃. Rü yemaétü choxü̃́ nayexma ga togü ga chorü duü̃xü̃gü ga chauchiü̃gutama buexü̃. Rü yexgumarüxü̃ ta rü yema Yerucharéü̃wa nüxíra ãẽ̱xgacü ixĩgüxü̃arü yexera choxü̃́ nayexma ga wocagü rü carnérugü.
8 Rü chananutaque̱xe ga muxü̃ma ga úiru rü diẽrumü ga noxri togü ga nachixü̃anegüarü ãẽ̱xgacügüxü̃tawa rü chorü ĩanegüwa chayaxuxü̃. Rü choxü̃́ nayexma ga duü̃xü̃gü ga iyatüxü̃ rü ngexü̃ ga cha̱u̱xca̱x wiyaegüxü̃. Rü yemaacü chorü ngúchaü̃ chaxü. Rü choxü̃́ nayexma ga muxü̃ma ga ngexü̃gü ga namaxã chaxarüã̱xmaregüxü̃.
9 Rü yema Yerucharéü̃wa nüxíra ãẽ̱xgacügü ixĩgüxü̃arü yexera chatachiga rü choxü̃́ nayexma ga chorü yemaxü̃gü. Rü naétü taguma choxna nixũgachi ga cua̱x.
10 Rü guxü̃ma ga yema choxü̃́ ngúchaü̃xü̃ rü tama chaugüna chanachu̱xu. Rü guxü̃ma i ngẽma duü̃xü̃gü namaxã taãẽxü̃ rü chanaxü. Rü guxü̃ma ga yema chorü puracü ga chaxüxü̃ rü namaxã chataãxẽ. Rü yema taãxẽ nixĩ ga chorü natanü ga yema chaxüxü̃.
11 Rü yemawena rü mea nagu ícharüxĩnü̃ rü chanangugü ga guxü̃ma ga yema chaxüxü̃ rü yema puracü ga guxchaãcü chaxüxü̃. Rü yemawa nüxü̃ chicua̱xãchi nax natüca̱xmamare yixĩxü̃ ga guxü̃ma ga yema chaxüxü̃, rü ñoma buanecü ya ya̱u̱xemachaü̃cürüü̃mare nax yixĩxü̃ nax taxuwama tüxü̃́ namexü̃ i ngẽma ñoma i naanewa ixüxü̃.
12 Rü yemawena rü meama nagu charüxĩnü rü nügügu chanangu i ngẽma cua̱x namaxã i ngẽma nax tama naãẽxü̃ nacuáxü̃ rü ngẽma nax taechitamare imaxü̃xü̃. ¿Rü ngẽma chowena ãẽ̱xgacü ixĩxü̃ rü ta̱xacürü to i puracü i tama choma chaxüxü̃ tá nixĩ i naxüxü̃?
13 Rü ñu̱xma rü düxwa nüxü̃ chicua̱xãchi nax ngẽma taãẽxü̃ icuáxü̃ rü nüxü̃ narümemae i ngẽma nax taechitamare imaxü̃xü̃, ngẽxgumarüxü̃ i ngẽma ngóonexü̃ rü ngẽma ẽanexü̃xü̃ nax namemaexü̃.
14 Rü yíxema tümaãẽxü̃ cuáxe rü mea tanangugü ega ta̱xacü taxü̱xgu, natürü ngẽma naechitamare maxü̃xü̃ rü tama mea nagu naxĩnüãcüma ta̱xacü naxü. Natürü chanangugü rü yíxema tümaãẽxü̃ cuáxe rü ngẽma naechitamare maxü̃xü̃ rü ngẽmatátama nixĩ i norü gu̱x.
15 Rü chaugümaxã ñachagürü: —Ngẽma naechitamare maxü̃xü̃rüü̃tátama chayu i chomax. ¿Rü ngẽmaca̱x ta̱xacüwa choxü̃́ namexü̃ i guxü̃ma i ngẽma chorü cua̱x? Rü ngẽma rü ta rü natüca̱xmamare nixĩ.
16 Erü ngẽxguma nangupetügu ya taunecügü rü tagutáma texé nüxna tacua̱xãchi i ngẽma duü̃xü̃ i taxü̃ i cua̱x nüxü̃́ ngẽxmaxü̃ rü ngẽma duü̃xü̃ i naechitamare maxü̃xü̃. Rü guxü̃xü̃ tarüngüma. Rü ngẽma duü̃xü̃ i taxü̃ i cua̱x nüxü̃́ ngẽxmaxü̃ rü nayu, rü ngẽxgumarüxü̃ ta i ngẽma duü̃xü̃ i naechitamare maxü̃xü̃ rü nayu —ñachagürü chaugümaxã.
17 Rü choxü̃́ nawa̱xtümüü̃ nax ñoma i naanewa chamaxü̃xü̃, erü guxü̃ma i puracü i ñoma i naanewa ixüxü̃ rü inarüxomare. Rü aixcüma nixĩ i guxü̃ma i ngẽma ixüxü̃ rü natüca̱xmamare yixĩxü̃. Rü ñoma buanecü ya taxucürüwama yayauxemacürüxü̃ nixĩ.
18 Rü ngẽxgumarüxü̃ ta ga yema puracü ga ñoma ga naanewa chaxüxü̃, rü tama aixcüma taãxẽ choxna naxã, erü guxü̃ma ga yema puracü ga chaxüxü̃ rü ãẽ̱xgacü i chowena chauchicüxü ãẽ̱xgacü ixĩxü̃ tá namaxã inacua̱x.
19 ¿Texé nüxü̃ cuáxü̃ ya yima ãẽ̱xgacü ya chowena tá ixücucü, rü wüxi ya naãẽxü̃ cuácü yixĩ, rüe̱xna tama naãẽxü̃ cuácü yixĩ? Natürü nüma tá nixĩ i namaxã inacuáxü̃ i guxü̃ma i ngẽma ñoma i naanewa chorü cua̱xmaxã chaxüxü̃ rü taxü̃ i puracümaxã choxü̃́ ngẽxmaxü̃. Rü guxü̃ma i ngẽma rü ta rü natüca̱xmamare nixĩ.
20 Rü ngẽxguma nagu charüxĩnügu ga yema chaxüxü̃ ga ñoma ga naanewa, rü chaugümaxã chixãũxãchi nax yemaacü poraãcü chapuracüxü̃.
21 Rü ngẽxguma wüxíe taxü̃ i tümaarü cua̱xmaxã mea tapuracügu, rü natüca̱xmamare tapuracü, erü guxü̃ma i ngẽma tayaxuxü̃ i tümaarü puracüwa rü togü i tama naxca̱x puracüxü̃arü tá nixĩ. Rü ngẽmaãcü i tümaarü puracü rü natüca̱xmamare nixĩ erü tümaarü ngẽmaxü̃gü rü togüarü tá nixĩ.
22 ¿Rü ta̱xacürü mexü̃ tá nayaxu ya yima yatü ega poraãcü napuracügu rü poraãcü ngẽma puracüca̱x naxoegaãẽgu i ñoma i naanewa?
23 Rü guxü̃ i ngunexü̃gu rü ngúxü̃ ninge rü nachixeãxẽ. Rü woo chütacü rü norü puracügu narüxĩnüecha. Rü ngẽma rü ta wüxi i natüca̱xmamare nixĩ.
24 Rü ngẽma nüxü̃́ rümemaexü̃ ya yimá yatü nixĩ nax nachibüxü̃ rü naxaxexü̃ rü nangóoxü̃ i ngẽma norü puracütanü. Erü guxü̃ma i ngẽma rü ta Tupana nanango̱xẽxẽ.
25 ¿Rü texé tachibü rüe̱xna tataãxẽ ega tama Tupana nango̱xẽẽgu i ngẽma?
26 Rü aixcüma Tupana tüxna nanaxã i cua̱x rü taãxẽ ya yíxema tüxü̃ nadáuxe nax mexü̃ taxüxü̃. Natürü yíxema chixexü̃arü üruxü̃ ixĩxẽ, rü nüma ya Tupana rü tüxü̃ nayixerü nax tügü tamuarü ngẽmaxü̃güã̱xẽẽxü̃. Natürü Tupana rü yixcüama tüxna nanade i tümaarü ngẽmaxü̃gü nax yíxema tümamaxã nataãẽxẽẽna naxããxü̃ca̱x. Rü yíxema chixexü̃ üxe rü guxü̃ma i ngẽma tayaxuxü̃ rü natüca̱xmamare nixĩ. Rü ñoma buanecü ya taxucürüwama yauxemachaü̃cürüxü̃ nixĩ.
