Eclesiastés 3:1-22
3 Ñoma i naanewa rü guxü̃ma i ta̱xacü i ngupetüxü̃ rü nüxü̃́ nangẽxma i norü ora rü norü ngunexü̃ nax nawa nanguxü̃.
2 Rü nangẽxma i ngunexü̃ i nagu ibuxü̃, rü nangẽxma i ngunexü̃ i nagu iyuxü̃. Rü nangẽxma i ngunexü̃ i nagu itoexü̃, rü nangẽxma i ngunexü̃ i nagu nabéxü̃ i ngẽma itoxü̃.
3 Rü nangẽxma i ngunexü̃ i nagu namáetagüxü̃, rü ngunexü̃ i nagu tüxü̃ yaxüxü̃xü̃güxü̃. Rü nangẽxma i ngunexü̃ i nagu napogüexü̃, rü ngunexü̃ i nagu naxüpatagüxü̃.
4 Rü nangẽxma i ngunexü̃ i nagu ixaxuxü̃, rü ngunexü̃ i nagu icugüexü̃. Rü nangẽxma i ngunexü̃ i nagu iyutanüxü̃, rü ngunexü̃ i nagu ipetaexü̃.
5 Rü nangẽxma i ngunexü̃ i nagu nutamaxã nagüanexü̃, rü ngunexü̃ i nagu nuta nadexü̃. Rü nangẽxma i ngunexü̃ i nagu yigüna ina̱i̱xãchigüxü̃, rü ngunexü̃ i nagu yigüna tóxnamana ixĩxü̃.
6 Rü nangẽxma i ngunexü̃ i nagu ta̱xacüca̱x idauxü̃, rü ngunexü̃ i nagu írüchaxãchixü̃ nax ta̱xacüca̱x idauxü̃. Rü nangẽxma i ngunexü̃ i nagu namaxã inguxü̃xü̃ i ngẽmaxü̃gü, rü ngunexü̃ i nagu ínawogüxü̃.
7 Rü nangẽxma i ngunexü̃ i nagu naxchirugu igáugüxü̃, rü ngunexü̃ i nagu inga̱i̱xchiruxü̃. Rü nangẽxma i ngunexü̃ i nagu iyarüchianegüxü̃, rü ngunexü̃ i nagu idexagüxü̃.
8 Rü nangẽxma i ngunexü̃ i nagu yigü ingechaü̃güxü̃, rü ngunexü̃ i nagu yigüchi ixaiexü̃. Rü nangẽxma i ngunexü̃ i nagu yigü ida̱i̱xü̃, rü ngunexü̃ i nagu yigümaxã rüngüxmüexü̃.
9 ¿Rü ta̱xacüwa nüxü̃́ namexü̃ ya yatü nax puracüguxicatama naxĩnüxü̃?
10 Rü nüxü̃ chicua̱xãchi i ngẽma puracü ya Tupana yatügüétüwa ngẽxmaxẽẽxü̃ nax ngẽmagu inachoxü̃ca̱x.
11 Rü yexguma norü ngunexü̃wa nanguxgu rü Tupana nanaxü ga guxü̃ma. Rü namexẽchi ga yema naxüxü̃. Rü naétü Tupana duü̃xü̃güxü̃ nüxü̃ nacua̱xẽxẽ i ngẽma taguma gúxü̃ woo i duü̃xü̃gü rü tama nawa nangugü nax nüxü̃ nacua̱xgüxü̃ i guxü̃ma i ngẽma Tupana marü ngo̱xẽẽxü̃, rü ngẽma yixcüra tá naxüxü̃.
12 3:12-13 Rü ñu̱xma rü nüxü̃ chacua̱x rü duü̃xü̃güca̱x rümemaexü̃ nixĩ nax namaxẽyane nataãẽgüxü̃ rü mexü̃ naxügüxü̃. Rü ngẽxgumarüxü̃ ta nüxü̃ chacua̱x nax Tupanawa ne naxũxü̃ nax ichibüexü̃, rü ixaxegüxü̃, rü nayauxgüxü̃ i tórü puracütanü.
13 Nüü̃ nadau 3:12
14 Rü naétü nüxü̃ chacua̱x rü guxü̃ma i ta̱xacü ya Tupana üxü̃ rü guxü̃gutáma nangẽxmaecha. Rü taxucürüwa texé tanaxüétü i ngẽma Tupana üxü̃, rü taxucürüwa itanaxoxẽxẽ i ngẽma nüma naxüxü̃. Rü Tupana rü ngẽmaãcü nanaxü nax guxü̃ma nüxü̃ muü̃exü̃ca̱x rü nüxü̃ nangechaü̃güxü̃ca̱x.
15 Rü guxü̃ma i ngẽma ñu̱xma ngẽxmaxü̃ rü woetama marü nũxcüma nayexma. Rü taxuxü̃táma yixcüra nangẽxma i ta̱xacü i tama ñu̱xma ngẽxmaxü̃. Rü nüma ya Tupana rü nanatáeguxẽxẽ i ngẽma marü ngupetüxü̃.
Duü̃xü̃gü rü chixri nügümaxã inacua̱xgü
16 Rü ngẽma to i nüxü̃ chadauxü̃ nixĩ nax nangẽxmaxü̃ i taxü̃ i chixexü̃ rü ãẽ̱xgacügü diẽruca̱x chixri duü̃xü̃gümaxã inacua̱xgü. Rü ngẽmaãcü nangupetü nawa i ñoma i naane i ngextá chi mea nügümaxã inacua̱xgüxü̃wa i duü̃xü̃gü rü mexü̃gu nügümaxã ínaxĩnüexü̃wa.
17 Rü nawa tá nangu i ngunexü̃ i nagu Tupana tá norü maxü̃chiga nüxna ca̱xaxü̃ ya yimá yatü ya mexü̃ ücü rü ngẽma yatü i chixexü̃ üxü̃. Erü tá nangẽxma i norü ngunexü̃ i nagu tá nangóxü̃ i ngẽma marü ngupetüxü̃ rü ngẽma cúãcü üxü̃.
18 Rü ngẽxgumarüxü̃ ta nagu charüxĩnü i duü̃xü̃güchiga. Rü Tupana tüxna nanaxã i guxchaxü̃gü nax ngẽmawa nüxü̃ icuáxü̃ca̱x nax ñoma naeü̃gürüxü̃tama iyuexü̃.
19 Rü aixcüma nixĩ i duü̃xü̃gü rü naeü̃gürüxü̃tama nayuexü̃ rü ngẽma wüxitama nixĩ i norü gu̱x. Rü ngẽma ngü̃ãcüxü i duü̃xü̃gü nüxü̃́ ngẽxmaxü̃ rü ngẽmatama ngü̃ãcüxü nixĩ i naeü̃gü nüxü̃́ ngẽxmaxü̃. Rü ngẽmaãcü i duü̃xü̃gü rü tama naeü̃güxü̃ narüyexeramae. Rü guxü̃ma i ngẽma rü natüca̱xmamare nixĩ.
20 Rü guxü̃ i duü̃xü̃gü rü naeü̃gü rü ngẽmatama nachicawa naxĩ. Rü guxü̃ma i ngẽma rü waixü̃müte̱xewa nixĩ i naxüxü̃, rü guxü̃ma rü wenaxarü waixü̃müte̱xexü̃ tá nixĩgü.
21 ¿Rü ngẽxguma nayuegu i duü̃xü̃gü rü texé nüxü̃ tacua̱x nax aixcüma dauxü̃wa naxũxü̃ i naãxẽ? ¿Rü ngẽxguma nayuegu i naeü̃gü rü texé nüxü̃ tacua̱x nax aixcüma waixü̃mütüü̃wa naxũxü̃ i naãxẽ?
22 Rü nüxü̃ chadau nax ngẽma duü̃xü̃güca̱x rümemaexü̃ nixĩ nax nangóoxü̃ i norü puracütanü. Rü ngẽma nixĩ i nüxna üxü̃ i duü̃xü̃gü. ¿Rü texé tá wena tanataeguxẽxẽ i wüxi i duü̃xü̃ i yuxü̃ nax nüxü̃ nadauxü̃ca̱x i ngẽma nawena ngupetüxü̃?
