Eclesiastés 4:1-16
4 Rü yemawena rü nüxü̃ chadau nax ñoma i naanewa naxrüxü̃ i duü̃xẽgümaxã chixri icua̱xgüxü̃. Rü tüxü̃ chadau nax taxauxexü̃ ga guxema duü̃xẽgü ga chixri tümamaxã inacua̱xgüxe, rü taxúema tüxü̃ rüngü̃xẽẽxü̃ nax tataãẽgüxü̃ca̱x. Rü ngẽma duü̃xü̃gü i chixri tümamaxã icua̱xgüxü̃ rü poraãcü chixri tümamaxã nachopetü rü taxúema texé tüxü̃ tarüngü̃xẽxẽ.
2 Rü ngẽmaca̱x nagu charüxĩnü rü ngẽma duü̃xü̃gü i marü yuexü̃ nixĩ i duü̃xü̃gü i maxẽxü̃arü yexera taãẽwa ngẽxmagüxü̃.
3 Rü ngẽma yuexü̃ rü ngẽma maxẽxü̃arü yexera taãẽwa nangẽxmagü, rü ngẽma õxchanagü i tauta ñoma i naanegu buexü̃ rü taãẽwa nangẽxmagü erü tauta nüxü̃ nadaugü i ngẽma chixexü̃ i ñoma i naanewa naxügüxü̃ i duü̃xü̃gü.
4 Rü nüxü̃ chadau rü ngẽxguma wüxi i duü̃xü̃ aixcüma napuracügu rü namuarü diẽruã̱xgu rü ngẽma togü rü naxchi naxaie rü nixãũxãchie. Rü guxü̃ma i ngẽma rü wüxi i natüca̱xmamare nixĩ, rü ñoma buanecü ya iyauxemachaü̃cürüxü̃mare nixĩ.
5 Rü duü̃xü̃gü rü ñanagürügü: —Ngẽma duü̃xü̃ i naechitamare maxü̃xü̃ rü naxo nax napuracüxü̃. Rü ngẽmaca̱x nügütama taiyamaxã nayuxẽxẽ —ñanagürügü.
6 Natürü i choma rü ñacharügü: —Duü̃xü̃gü rü poraãcü napuracüe nax yexera nüxü̃́ nangẽxmaxü̃ca̱x. Natürü ngẽma rümemaexü̃ nixĩ nax namaxã nataãẽxü̃ i ngẽma íxraxü̃ i nüxü̃́ ngẽxmaxü̃, erü ngẽma nax yexera nanaxwa̱xexü̃ rü ñoma buanecü ya taxucürüwa yayauxemacürüü̃mare nixĩ —ñacharügü.
7 Rü ngẽmawena rü nüxü̃ chadau ga to ga natüca̱xmamare ixĩxü̃ i ñoma i naanewa.
8 Rü nüxü̃ chadau ga wüxi ga yatü ga nüxicamare ixĩcü. Rü nüma rü nangemücü, rü nataxuma ga nanegü rü naenexẽgü. Rü taguma inarüngü̃ ga norü puracüwa, rü taguma namaxã nataãxẽ i ngẽma nüxü̃́ ngẽxmaxü̃. Rü guxü̃guma yexera i to nanaxwa̱xe. Rü nüma rü taguma nügüna naca ñaãcü: —¿Texéca̱x nixĩ i poraãcü chapuracüxü̃? ¿Rü tü̱xcüü̃ chaugüna namaxã chaxaü i chorü diẽru rü chorü ngẽmaxü̃gü? —ñanagürü. Rü ngẽma taxü̃ i puracü rü ta rü wüxi i natüca̱xmamare nixĩ.
Ngẽma nax wüxigu rüxĩnüexü̃ rü pora tüxna naxã
9 Rü name i taxre i duü̃xü̃gü nügümaxã napuracüexü̃ rü tama wüxi nüxicatama puracüxü̃. Erü ngẽxguma taxre yixĩxgu rü nügü narüngü̃xẽẽgü.
10 Rü ngẽxguma wüxi yanguxgu rü ngẽma namücü rü tá inanachixẽxẽ. Natürü tügümaxã tangechaü̃ ya yíxema tüxicatama ixĩxẽ i ngẽxguma itayanguxgu, erü taxúema tüxü̃ tarüngü̃xẽxẽ nax itachixü̃ca̱x.
11 Rü ngẽxguma taxre i duü̃xü̃gü nügü caxgux, rü ngẽma taxre rü tá nügü nanaiwegü. Natürü ngẽxguma chi wüxitama nüxica ícaxgu ¿rü ñuxãcü tá nüxica nügü nanaiwexẽxẽ?
12 Rü ngẽxguma wüxi i duü̃xü̃ nüxicatama yixĩxgu rü tama natauxcha nax nügü ínapoxü̃xü̃. Natürü ngẽxguma taxre i duü̃xü̃ yixĩxgu rü natauxcha nax nügü ínapoxü̃xü̃. Rü ngẽxgumarüxü̃ ta i wüxi i napana̱xã i tomaepü̱x ya tünütawa ãxü̃xü̃ rü tama tauxchaãcü nicauye.
Tama nixĩ i ya̱xgurica cua̱x tüxü̃́ ngẽxmaxü̃
13 Rü wüxi i ãẽ̱xgacü ya marü yaxcü ya naechitamare maxü̃cü rü tama mea duü̃xü̃gümaxã inacua̱x, erü tama nanayaxu nax texé naxucu̱xẽxü̃. Rü narümemae nixĩ i wüxi ya ngextü̱xücü ya ngearü diẽruã́cü ya mea naãxẽxü̃ cuácü nax duü̃xü̃gümaxã icuáxü̃.
14 4:14-15 Rü woo chi poxcupataü̃wa ínguxuchicü yixĩxgu ya yimá ngextü̱xücü ya ãẽ̱xgacüchicüxü ingucuchicü rü woo noxri nangearü diẽruã̱xgu, natürü nüxü̃ chadau nax ñoma i naanecüã̱x i duü̃xü̃gü nüxü̃ unetaxü̃ nax norü ãẽ̱xgacü yixĩxü̃ca̱x.
15 Nüü̃ nadau 4:14
16 Rü woo muxü̃ma i duü̃xü̃gü rü yimá ãẽ̱xgacümaxã nataãẽgü, natürü ngẽma duü̃xü̃gü i naweama ngóexü̃, rü tama yimá ãẽ̱xgacümaxã nataãẽgü. Rü guxü̃ma i ngẽma rü natüca̱xmamare nixĩ, rü ñoma buanecü ya taxucürüwama iyauxemacürüxü̃ nixĩ.
