Eclesiastés 5:1-20
5 ¡Ngẽxguma Tupanapatawa cuxũxgu rü naxuãxẽ rü mea nagu rüxĩnü i ngẽma cuxüxü̃! Rü tama name i chixri curü ãmare icuxã naxrüxü̃ i ngẽma duü̃xü̃gü i naechitamare maxẽxü̃ rü tama nüxü̃ cuáxü̃ nax chixexü̃ naxügüxü̃. Rü narümemae nixĩ nax mea Tupanaga cuxĩnüxü̃.
2 Rü tama name i namaxã cuñuxãxẽ i ngẽma curü uneta i Tupanamaxã nüxü̃ quixuxü̃ i cua̱xmaxã rü curü ĩnümaxã. Erü nüma ya Tupana rü daxũguxü̃ i naanewa nangẽxma, rü cuma rü ñoma i naanewa cungexma. Rü ngẽmaca̱x tama name i naxca̱x cuñuxãxẽ nax Tupanamaxã nüxü̃ quixuxü̃ i curü uneta.
3 Erü ngẽxguma poraãcü cuxoegaãẽgu rü düxwa tá cuchixenegü. Rü ngẽxguma quidexaechagu rü düxwa tá nüxü̃ quixu i ore i taxuwama mexü̃.
4 Rü ngẽxguma Tupanamaxã wüxi i uneta cuxü̱xgu, rü name i paxãma cuyanguxẽxẽ i ngẽma curü uneta. Erü nüma ya Tupana rü tama norü me nixĩ i ngẽma duü̃xü̃gü i naechitamare ixunetagüxü̃. Rü name i aixcüma cuyanguxẽxẽ i ngẽma curü uneta.
5 Rü tama name nax icuxunetaxü̃ ega taũtáma cuyanguxẽẽgu. Rü narümemae nixĩ nax noxtacüma tama icuxunetaxü̃.
6 Rü tama name i cunaxüchica i cuberagü nax pecadu cuxü̃ naxüxẽẽxü̃, rü ñu̱xũchi yixcama Tupanaarü duü̃xü̃ i chacherdótemaxã nax nüxü̃ quixuxü̃ rü ícutüxü̃gagumare yixĩxü̃ nax pecadu cuxüxü̃. ¿Tü̱xcüü̃ Tupanaxü̃ cunuxẽxẽ nagagu i ngẽma uneta i tama quinguxẽxẽxü̃ rü ñu̱xũchi nagu cunachixexẽẽxü̃ i ngẽma puracü i cuxüxü̃?
7 Rü naétüwa i guxü̃ma i ngẽma guxchaxü̃gü, rü ngẽma dexagü, rü ngẽma natüca̱xma ixĩxü̃, rü cuma rü name nax Tupanaxü̃ cungechaü̃xü̃ rü nüxü̃ cumuü̃xü̃.
Taxucürüwa diẽrumaxã naxca̱x tataxe i taãxẽ
8 ¡Taxũtáma cubaixãchi i ngẽxguma nüxü̃ cuda̱u̱xgu nax to i nachixü̃anegüwa rü ãẽ̱xgacügü chixri namaxã inacua̱xgüxü̃ i ngẽma norü duü̃xü̃gü i ngearü diẽruã̱xgüxü̃. Rü ngẽma ãẽ̱xgacügü i guxchaxü̃arü mexẽẽruü̃gü rü diẽruca̱x tama tüxü̃ nangü̃xẽẽgüxü̃ ya yíxema ngearü diẽruã̱xgüxe! Erü wüxichigü i ngẽma ãẽ̱xgacügü rü natüxü̃wa nangẽxma i to i ãẽ̱xgacü i naétüwa ngẽxmaxü̃, rü ngẽma ãẽ̱xgacü i naétüwa ngẽxmaxü̃ rü to i ãẽ̱xgacütüü̃wa nangẽxma, rü guxü̃ma i ngẽma ãẽ̱xgacügü rü nügü ínapoxü̃gü.
9 ¿Rü ta̱xacüwa namexü̃ i ngẽma naxügüxü̃ i ngẽma nachixü̃anearü ãẽ̱xgacügü ega tama aixcüma tüxü̃ nangü̃xẽẽgügu ya yíxema duü̃xẽgü ya ngearü diẽruã̱xgüxe?
10 Rü ngẽma duü̃xü̃ i diẽru nüxü̃́ ngúchaü̃xü̃ rü guxü̃guma yexeraxü̃ i diẽru nanaxwa̱xe. Rü ngẽma muarü ngẽmaxü̃ã́xü̃ rü guxü̃guma yexera i to i norü ngẽmaxü̃ nanaxwa̱xe, rü taguma nüxü̃́ ningu. Rü guxü̃ma i ngẽma rü natüca̱xmamare nixĩ.
11 Erü ngẽxguma yexera tüxü̃́ nangẽxmagu i diẽru rü yexera tanaguxẽxẽ. ¿Rü ta̱xacüwa tüxü̃́ name i ngẽma nax namuxü̃ i tórü diẽru? Rü ngẽma nax nüxü̃ idawenüxü̃waxicatama nixĩ i namexü̃.
12 Rü yíxema puracüxe rü woo íxrarüwa tachibü rü woo mea tachibü, natürü guxü̃guma mea tape. Natürü ngẽma diẽruã̱xü̃chixü̃ rü norü diẽrugagu taguma mea nape.
13 Rü wüxi i nacüma i aixcüma ngechaü̃ tüxna ãxü̃xü̃ chadau i ñoma i naanewa. Rü ngẽma nacüma nax imuarü diẽruã́xü̃ rü norü yorana guxchaxü̃ naxã.
14 Erü ngẽxguma tama mea tüxü̃́ ínanguxuchigu ega ta̱xacüca̱x tataxegu, rü ngürüãchi ngẽxma tá nagu̱x i guxü̃ma i tümaarü diẽru. Rü ngẽxguma nangẽxmagu ya wüxi ya tümane, rü taxuxü̃táma naxca̱x ngéma tata̱x.
15 Rü yema taxuxü̃ma ga ta̱xacümaxã ñoma ga naanewa nax nanguxü̃, rü ngẽmaãcü tátama nataegu. Rü yema noxri nabuxgu nax nangexchiruxü̃rüxü̃ tátama nixĩ i ngẽxguma nayu̱xgu. Rü taxuxü̃táma ga yema norü puracütanüwa nayaxuxü̃ rü tá ninge.
16 Rü guxü̃ma i ngẽma rü aixcüma wüxi i taxü̃ i ngechaü̃ nixĩ. Yerü yema ñoma ga naanegu nax ngexchiruãcü nabuxü̃ãcü tátama nayu. ¿Rü ta̱xacü yixĩxü̃ i nawa nayaxuxü̃ nax poraãcü napuracüxü̃?
17 Rü ngẽmaétüwa rü guxü̃ma i ngunexü̃gü i nagu namaxü̃xü̃gu rü ẽanexü̃wa nangẽxma, rü namu i norü guxchaxü̃gü, rü da̱xaweanegü, rü oegaãẽgü i naxca̱x inguxü̃.
18 Rü ngẽmaca̱x nagu charüxĩnü rü ñu̱xma nax paxaãchi ñoma i naanewa Tupana tüxü̃ maxẽxẽẽxü̃, rü ngẽma rümemaexü̃ rü taãxẽ tüxna ãxü̃ nixĩ nax nangṍxü̃ rü yaxaxüxü̃ i ngẽma tórü puracütanü i ñoma i naanewa poraãcü naxca̱x ipuracüxü̃. Erü ngẽma nixĩ i tüxna üxü̃.
19 Rü ngẽxgumarüxü̃ ta ya guxãma ya yíxema Tupana muxü̃ i tümaarü ngẽmaxü̃gü tüxna ãxẽ, rü nüma ya Tupana tüxü̃ namu nax tanangṍxü̃ rü tayaxaxüxü̃ i ngẽma tüxna üxü̃. Erü ngẽma nax poraãcü ipuracüxü̃wa nax nangṍxü̃ rü yaxaxüxü̃, rü Tupanawa ne naxũ.
20 Rü ngẽma nax Tupana tüxü̃ taãẽxẽẽxü̃gagu rü tama poraãcü naxca̱x taxoegaãxẽ i tórü maxü̃ i ñoma i naanewa.
