Eclesiastés 6:1-12
6 Ñoma i naanewa nangẽxma i to i chixexü̃ i nüxü̃ chadauxü̃ nax naxügüãxü̃ i muxü̃ma i duü̃xü̃gü.
2 Rü nüma ya Tupana rü tümaxü̃xe ya duü̃xẽna nanaxã i muxü̃ma i ngẽmaxü̃gü rü mexü̃gü. Rü taguma tüxü̃́ nataxu i ta̱xacü i wüxichigü i ngunexü̃gu tanaxwa̱xexü̃. Natürü Tupana rü tama guxü̃gu tüxna nanaxã i ngẽma tümaarü ngẽmaxü̃gü nax namaxã tataãẽxü̃ca̱x, erü ngẽxguma tayu̱xgu, rü tomare i duü̃xü̃gü tá nüxĩ́ namaxã inacua̱x. Rü ngẽma rü ta rü natüca̱xmamare nixĩ, rü aixcüma wüxi i taxü̃ i ngechaü̃ nixĩ.
3 Rü wüxi ya yatü rü woo 100 i nane nüxü̃́ ngẽxmagu rü ñu̱xũchi mucü ya taunecü namaxü̃gu, natürü woo yimá mucü ya taunecü namaxü̱̃xgu rü taxuwama nüxü̃́ name ega tama mexü̃gu ínamáxü̃xgu rü ngẽxguma nayu̱xgu tama inata̱xgu. Rü choma nüxü̃ chixu rü wüxi i buxü̃ i yuãcü íxraxü̃ rü ngẽma yatüarü yexera nataãxẽ.
4 Rü ngẽma buxü̃ rü natüca̱xma nabu, rü waanexü̃gu inarütaxu rü taguma texé nüxü̃ tacua̱x i naéga.
5 Rü taguma üa̱xcüarü ngóonexü̃xü̃ nadau rü taguma ta̱xacüxü̃ nacua̱x, natürü ngẽma yatüarü yexera mexü̃gu narüngü.
6 Rü ngẽma yatü i muarü ngẽmaxü̃a̱xcü rü woo 2,000 ya taunecü namaxü̃gu, ¿natürü ta̱xacüwa nüxü̃́ name i ngẽma ega tama taãxẽ nüxü̃́ ngẽxmagu? Rü guxü̃ma i duü̃xü̃gü rü ngẽxguma nayuegu rü wüxitama i nachicawa naxĩ.
7 Rü yimá yatü rü poraãcü napuracü nax nachibüxü̃ca̱x, natürü taguma nüxü̃́ ningu i ngẽma norü õna.
8 ¿Rü ngẽma yatü i cua̱x nüxü̃́ ngẽxmaxü̃ rü ta̱xacüwa nüxü̃ nayexeraxü̃ i ngẽma duü̃xü̃ i naechita maxü̃xü̃? Rü ngẽma ngearü diẽruã́xü̃ naxwa̱xexü̃ nixĩ nax norü guxchaxü̃güxü̃ nayexeraxü̃.
9 Rü ngẽma nagu rüxĩnüxü̃arü yexera rümemaexü̃ nixĩ i ngẽma taxetümaxã nüxü̃ idauxü̃. Natürü guxü̃ma i ngẽma rü natüca̱xmamare nixĩ rü ñoma buanecü ya taxucürüwama iyauxemacürüxü̃ nixĩ.
10 Rü ngẽma ñu̱xma nüxü̃ idauxü̃ rü woetama nũxcüma Tupana nanaxüéga. ¿Rü texé tá namaxã tügü tadai ya wüxi ya tümaarü yexera poracü ixĩcü?
11 Rü ngẽxguma yexera idexaechagu rü yexera nangẽxma i guxchaxü̃gü. Rü taxuwama tüxü̃́ name i ngẽma.
12 Rü wüxi ya yatü rü paxaãchi ñoma i naanewa namaxyane, rü taxúema nüxü̃ tacua̱x i ta̱xacü nixĩ i mexü̃ naxca̱x. Erü ngẽma norü ngunexü̃gü rü ñoma wüxi i naxchipetarüxü̃ tá nangupetü. Rü nawena nax nayuxü̃ rü texé tá namaxã nüxü̃ tixu i ngẽma ñoma i naanewa ngupetüxü̃.
