Eclesiastés 7:1-29
7 Ngẽma mexü̃ i pumaraarü yexera rümemaexü̃ nixĩ nax namexü̃ i tachiga. Rü ngẽma ngunexü̃ i nagu ixíxraxü̃arü yexera rümemaexü̃ nixĩ i ngẽma ngunexü̃ i nagu iyuxü̃.
2 Rü ngẽma nax wüxi i petawa ixũxü̃arü yexera rümemaexü̃ nixĩ nax wüxi ya yuxeta tüxü̃ íyarüdauxü̃. Erü ngẽma yugu nixĩ i yacuáxü̃ i guxü̃ma i duü̃xü̃güarü maxü̃. Rü ngẽma maxẽxü̃ rü name nax nügügu naxĩnüexü̃ nax wüxi i ngunexü̃ rü nüma rü tá ta nayuxü̃.
3 Rü ngẽma icuechaxü̃arü yexera rümemaexü̃ nixĩ nax ixaxuxü̃. Rü woo tüxü̃ nachixechiwexẽẽgu, natürü nanataãẽxẽxẽ ya tórü maxü̃ne.
4 Rü ngẽma nüxü̃ cuáxü̃ rü norü yugu nixĩ i naxĩnüxü̃, natürü ngẽma naechitamare maxü̃xü̃ rü norü taãxẽgu nixĩ i naxĩnüxü̃.
5 Rü ngẽma naechitamare maxẽxü̃arü cua̱xüü̃güarü yexera rümemaexü̃ nixĩ nax irüxĩnüxü̃ i ngẽma nüxü̃ cua̱xgüxü̃arü ucu̱xẽgü.
6 Rü ngẽma naechitamare maxü̃xü̃arü cugü rü ñoma tuxu i üxüwa iwocuxü̃rüxü̃ nipecha. Rü ngẽma norü cugü rü wüxi i natüca̱xmamare nixĩ.
7 Rü ngẽma diẽru rü chixexü̃wa nanaga i ngẽma duü̃xü̃gü i cua̱x nüxü̃́ ngẽxmaxü̃. Rü ngẽma ãẽ̱xgacügü rü diẽruca̱x chixri duü̃xü̃gümaxã inacua̱xgü.
8 Rü wüxi i puracü i ngexwaca ixügüxü̃arü yexera narümemae nax yanguxẽẽxü̃ i ngẽma puracü. Rü ngẽma nax yigü írüporaxü̃arü yexera narümemae nax imecümaxü̃.
9 ¡Rü taxṹ i cugü nüxna cuxã i ngẽma nu! Erü ngẽma nu nixĩ i duü̃xü̃gü i naechitamare maxẽxü̃maxã icuáxü̃.
10 Rü nangẽxma i duü̃xü̃gü i nüxü̃ ixuxü̃ nax yexera namemaegüxü̃ ga gumá taunecügü ya ngupetügücü. Natürü ngẽma ĩnü rü tama wüxi i ĩnü i cua̱x nüxü̃́ ngẽxmaxü̃ nixĩ.
11 Rü ngẽma cua̱x rü ñoma i naanewa maxẽxü̃ i duü̃xü̃güca̱x rü name. Natürü ngẽma nax cua̱x tüxü̃́ ngẽxmaxü̃ rü naétü diẽru tüxü̃́ ngẽxmaxü̃ nixĩ i rümemaexü̃.
12 Erü ngẽma cua̱x rü ngẽma diẽrurüxü̃ tüxü̃ ínapoxü̃. Natürü ngẽma cua̱x rü nüxü̃́ nangẽxma i pora nax tüxna naxããxü̃ i maxü̃ ya yíxema cua̱x tüxü̃́ ngẽxmaxe.
13 Rü dücax, ¡mea nagu rüxĩnü rü mea nangugü i ngẽma Tupana üxü̃! ¿Rü texé tüxü̃́ nangẽxma i pora nax itayanawe̱xãchixẽẽxü̃ i ngẽma Tupana wü̃xẽxẽxü̃?
14 Rü ngẽxguma mexü̃gü cuxca̱x ínguxgu, ¡rü namaxã nataãxẽ i ngẽma mexü̃gü! Natürü ngẽxguma guxchaxü̃gü cuxca̱x ínguxgu ¡rü nagu rüxĩnü nax Tupanawa nixĩ i ne naxũxü̃ i guxü̃ma i ngẽma. Rü nüma ya yatü rü taguma nüxü̃ nacua̱x i ngẽma yixcüra tá naxca̱x ínguxü̃!
15 Rü guxü̃ma i ngẽma rü nüxü̃ chadau nagu i chorü maxü̃ i natüca̱xmamare ixĩxü̃. Rü nangẽxma i yatügü i mexü̃ ügüxü̃ i yuexü̃ woo namexgu i norü maxü̃. Rü ñu̱xũchi nangẽxma i duü̃xü̃gü i chixexü̃ ügüxü̃ rü mucüma ya taunecü maxẽxü̃ woo nachixegu i norü maxü̃.
16 Rü tama name nax cugü quixu nax cumecümaxü̃ rüe̱xna nüxü̃ cucua̱xüchixü̃. ¿Rü tü̱xcüü̃ cugütama cuwomüxẽxẽ?
17 Rü tama name nax cuchixecümaxü̃, rü tama name nax wüxi i naechitamare maxü̃xü̃ quixĩxü̃. ¿Rü tü̱xcüü̃ cunaxwa̱xe nax cuyuxü̃ naxü̃pa nax curü ngunexü̃wa nanguxü̃?
18 Rü name nax naga cuxĩnüxü̃ i ngẽma ucu̱xẽ nax tama cuchixecümaxü̃ rü tama wüxi i naechitamare maxü̃xü̃ quixĩxü̃. Rü yíxema aixcüma Tupanaxü̃ ngechaü̃xe rü mea tá tüxü̃́ ínanguxuchi i guxü̃ma i ta̱xacü i taxüxü̃.
19 Rü ngẽma cua̱x rü 10 i ãẽ̱xgacügü i wüxi ya ĩanemaxã icua̱xgüxü̃arü poraarü yexera tüxü̃ naporaxẽxẽ ya yíxema cua̱x tüxü̃́ ngẽxmaxe.
20 Natürü ñoma i naanewa rü tataxuma ya texé aixcüma mea maxü̃́xẽ rü guxü̃guma mexü̃ üxe rü taguma chixexü̃ üxe.
21 ¡Taxṹ i nagu curüxĩnüxü̃ i guxü̃ma i ngẽma nüxü̃ yaxugüexü̃ i duü̃xü̃gü! Rü ngẽmaãcü taxũtáma nüxü̃ cuxĩnü i ngẽxguma chixri cuchiga yadexaxgu i curü mugüruxü̃.
22 Natürü cuma rü meama nüxü̃ cucua̱x rü cuma rü ta rü muẽ̱xpü̱xcüna chixri toguxechiga quidexa.
Cuáxca̱x chadau
23 Rü guxü̃ma i ngẽma rü cua̱xmaxã chanangugü, yerü pora chaxü nax choxü̃́ nayexmaxü̃ca̱x ga cua̱x. Natürü tama aixcüma choxna nangu nax choxü̃́ nayexmaxü̃ca̱x ga yema cua̱x.
24 Rü tama nüxü̃ chacua̱xéga i guxü̃ma i ngẽma ñu̱xma ngẽxmaxü̃. Rü naguxchaxüchi, rü taxúema nüxü̃ tacua̱x nax ñuxãcü nangóexü̃.
25 Rü yexguma pora chaxü nax choxü̃́ nayexmaxü̃ca̱x ga yema cua̱x. Rü naxca̱x changu̱x rü naxca̱x chadau ga yema cua̱x. Rü yemawa nüxü̃ chicua̱xãchi nax tama namexü̃ nax taechitamare imaxü̃xü̃. Rü nüxü̃ chicua̱xãchi nax wüxi ga ngeãẽmare yixĩxü̃ nax tama cua̱x choxü̃́ yexmaxü̃.
26 Rü ñu̱xũchi nüxü̃ chicua̱xãchi rü yuarü yexera rüchixemaexü̃ nixĩ i wüxi i ngexü̃ i tüxna na̱i̱xãchixü̃ nax tüxü̃ yayaxuxü̃ca̱x ñoma wüxi ya yütarüxü̃. Rü yíxema Tupanaga ĩnüxe rü ngĩxme̱xwa tá ítanguxuchi, natürü ngẽma chixexü̃arü üruxü̃ rü ngĩxme̱xgu tá nangu.
27 7:27-28 Rü nawena nax meama naxca̱x changúxü̃ i ta̱xacüca̱x nax yixĩxü̃ i guxü̃ma i ñoma i naanewa ngẽxmaxü̃, rü choma i orearü uruxü̃ nax chixĩxü̃ rü nüxü̃ chacua̱x nax taxũta nüxü̃ ichayangauxü̃ i ngẽma naxca̱x chadauxü̃. Rü 1,000 i yatügütanüwa nüxü̃ ichayangau i wüxitama i yatü i aixcüma mexü̃, natürü guxü̃ma i ngẽma ngexü̃gütanüwa rü bai i wüxi i ngexü̃ i mexü̃ i nüxü̃ ichayangauxü̃.
28 Nüü̃ nadau 7:27
29 Rü ñaaxicatama nixĩ i nüxü̃ ichayangauxü̃: Rü Tupana rü meama yatüxü̃ naxü, natürü nüma ya yatü rü nügüca̱x guxchaxü̃ ínanguxẽxẽ.
